Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2013

“E ara ma te pure”

“E ara ma te pure”

“E haapao maitai outou, e ara ma te pure.”—PET. 1, 4:7.

1, 2. (a) No te aha mea faufaa roa ’i ia “ara ma te pure”? (b) Eaha te uiui?

NO TE hoê taata e ohipa ra i te po, te taime fifi roa ’‘e no te vai ara, o te hora toru aore ra hora maha ïa i te aahiata a poiri noa ’i. Tera atoa paha te mana‘o o te feia tei vai ara e poipoi noa ’tu. Oia atoa, e mea tia ia faaitoito te mau Kerisetiano i teie mahana i te vai ara no te mea te ora nei tatou i te anotau poiri roa ’‘e o te ao ino a Satani. (Roma 13:12) Mea atâta mau ïa ia varea i te taoto i teie nei! Mea faufaa roa ia feruri maite e ia pee i te faaueraa Bibilia ia “ara ma te pure.”—Pet. 1, 4:7.

2 Fatata te hopea o teie nei ao. Mea maitai ïa ia uiui: ‘Te vai ara ra anei au ma te pure? Te pûpû ra anei au i te mau huru pure atoa? Te na reira ra anei au ma te tuutuu ore? Ua matau anei au i te pure no vetahi ê aore ra e haapao noa vau ia ’u? Eaha te faufaaraa o te pure ia fana‘o vau i te ora?’

E PÛPÛ I TE MAU HURU PURE ATOA

3. Eaha te tahi mau huru pure ta tatou e nehenehe e pûpû?

3 A papai ai i to Ephesia, ua faahiti te aposetolo Paulo i “te mau pure atoa.” (Eph. 6:18) A pure ai, e pinepine tatou i te ani ia Iehova ia horoa mai i ta tatou e hinaaro mau ra e ia tauturu mai ia faaafaro i te mau fifi. Ma te here, te faaroo nei “tei faaroo i te pure” i ta tatou mau aniraa. (Sal. 65:2) Eiaha râ tatou e pure no te ani noa i ta tatou e hinaaro ra. Mea faufaa atoa ia haamaitai, ia haamauruuru e ia taparu ia Iehova.

4. No te aha e haamaitai pinepine ai ia Iehova a pure ai ia ’na?

4 Mea rahi te tumu e haamaitai ai ia Iehova a pure ai ia ’na. Ei hi‘oraa, e hinaaro tatou e haamaitai ia ’na a feruri ai i “ta ’na ra mau ravea mana” e “to ’na mana rahi maitai.” (A taio i te Salamo  150:1-6.) Ahuru ma piti taime na irava e ono o te Salamo 150 e faaitoito ai ia tatou ia haamaitai ia Iehova. Ma te faatura rahi i te Atua, ua himene te tahi atu papai salamo: “Taihitu a ’u haamaitairaa ia oe i te mahana hoê, i ta oe ra parau-tia i faaauhia.” (Sal. 119:164) Mea tano iho â ia haamaitai ia Iehova. No reira, mai ta te fatu salamo i faahiti na mua ’tu, e haamaitai pinepine ana‘e ia ’Na i roto i ta tatou mau pure.

5. E nafea te hoê huru feruriraa mauruuru i roto i te pure e paruru mai ai?

5 Mea faufaa ia haamauruuru atoa ia Iehova a pure ai. Ua faaue Paulo i te mau Kerisetiano i Philipi: “Eiaha outou e ahoaho noa ’tu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ’tu ma te haamaitai.” (Phil. 4:6) E haamauruuru ana‘e ia Iehova ma te aau atoa na roto i te pure. E parururaa te reira, i teie iho â râ mau mahana hopea mea “mauruuru ore” hoi te taata. (Tim. 2, 3:1, 2) Tera te huru feruriraa o te rahiraa o te taata i roto i teie nei ao. To tatou atoa paha, ia ore tatou e vai ara. E oaoa tatou a haamauruuru ai i te Atua na roto i te pure e e tauturu mai te reira ia ore e riro ei ‘feia ohumu e mauruuru ore.’ (Iuda 16) Ia haamauruuru te hoê upoo utuafare i te Atua a pure ai e to ’na utuafare, te faaitoito ra ïa o ’na i ta ’na vahine e tamarii ia na reira atoa.

6, 7. Eaha te taparuraa, e e taparu tatou ia Iehova no nia i te aha?

6 Te taparuraa, o te hoê ïa pure haavare ore amuihia i te mana‘o hohonu puai mau. E nehenehe e taparu ia Iehova no nia i te aha? E nehenehe e ani ia ’na ia tauturu mai a hamani-ino-hia ’i tatou aore ra a roohia ’i i te hoê ma‘i ino mau. I tera mau taime, e riro ta tatou mau pure ei pure taparuraa. Tera noa anei te mau taime e nehenehe ai e taparu ia Iehova?

7 A hi‘o na i te hoho‘a pure a Iesu e i ta ’na i parau no nia i te i‘oa o te Atua, to ’Na Basileia e to ’Na hinaaro. (A taio i te Mataio 6:9, 10.) Mea rahi roa te ino na te ao e eita te mau faatereraa taata e nehenehe e horoa i ta te huiraatira e hinaaro mau ra. E pure ana‘e ïa ia haamo‘ahia te i‘oa o to tatou Metua i te ra‘i e ia faaore to ’na Basileia i te faatereraa a Satani i te fenua. E taparu atoa ana‘e ia Iehova ia ravehia to ’na hinaaro i te fenua mai i te ra‘i atoa. E vai ara ana‘e ïa ma te pûpû i te mau huru pure atoa.

E PURE MA TE TUUTUU ORE

8, 9. No te aha eiaha ’i e haava ia Petero e i te tahi atu mau aposetolo tei taoto i te ô i Getesemane?

8 Ua faaitoito te aposetolo Petero i te mau Kerisetiano ia “ara ma te pure.” Aita râ o ’na i na reira i te hoê taime. O ’na hoê o te mau aposetolo tei taoto a pure ai Iesu i te ô i Getesemane. Noa ’tu e ua parau atu Iesu ‘ia ara e ia pure,’ aita ratou i na reira.—A taio i te Mataio 26:40-45.

9 Eiaha e haava ia Petero e i te tahi atu mau aposetolo no te mea aita ratou i vai ara. E haamana‘o ana‘e râ e ua rohirohi roa ratou. I tera mahana, ua faaineine ratou i te Pasa e ua faatupu i te reira i te ahiahi. I muri iho, ua horoa Iesu i te mau faaueraa no te Amuraa  maa a te Fatu ia ite ta ’na mau pǐpǐ e nafea ia faatupu i te Oroa haamana‘oraa i to ’na poheraa. (Kor. 1, 11:23-25) Ia au i te Bibilia, i muri a‘e i te himeneraa, ua haere ratou i te mou‘a Oliveta. Ua haere atea ïa ratou ma te na roto atu i te mau aroâ ǒaǒa o Ierusalema. (Mat. 26:30, 36) I tera taime, ua mairi roa paha te tuiraa po. Mai te peu e tei roto tatou i te ô i Getesemane i taua po ra, ua taoto atoa paha ïa tatou. Aita Iesu i faahapa i ta ’na mau aposetolo tei rohirohi roa. Teie râ ta ’na i faaite ma te here: “Ua tia hoi i te varua, e paruparu râ to te tino.”

Noa ’tu e ua hi‘a Petero, ua haapii o ’na ia “ara ma te pure” (A hi‘o i te paratarafa 10, 11)

10, 11. (a) Eaha te haapiiraa ta Petero i huti mai i roto i te ô i Getesemane? (b) Ia aha tatou i muri a‘e i te hi‘opoaraa i te hi‘oraa o Petero?

10 I roto i te ô i Getesemane, aita Petero i vai ara e ua huti mai o ’na i te haapiiraa mauiui mau. I tera mahana, ua parau Iesu: “I teie nei rui e maheaitu ai outou atoa ia ’u.” Na ô a‘era Petero: “Maheaitu noâ te taata atoa ia oe, e ore roa vau e maheaitu.” Ua pahono atu Iesu ma te faaite e e huna Petero ia ’na e toru taime. Ma te ore e tâu‘a i tera parau, ua na ô Petero: “Pohe noâ vau i ǒ na oe, e ore roa vau e huna ia oe.” (Mat. 26:31-35) Ua hi‘a râ o ’na mai ta Iesu i tohu. A huna ’i o ’na ia Iesu no te taime hopea, “mauiui roa a‘era [o ’na] i te oto rahi.”—Luka 22:60-62.

11 Mai reira mai, ua taa ia Petero eiaha e tiaturi rahi faahou ia ’na iho. E au ra e na te pure i tauturu ia ’na. A tapao na e na vai i horoa i te a‘oraa ia vai “ara ma te pure.” Na Petero. Te pee ra anei tatou i tera a‘oraa faaurua? Te pure ra anei tatou ma te tuutuu ore ei tapao o to tatou tiaturi ia Iehova? (Sal. 85:8) E haamana‘o atoa ana‘e i teie a‘oraa a te aposetolo Paulo: “O tei mana‘o e te tia ra oia, e ara oia o te hi‘a.”—Kor. 1, 10:12.

UA PAHONOHIA TA NEHEMIA MAU PURE

12. No te aha e hi‘oraa maitai ai Nehemia no tatou?

12 A hi‘o na ia Nehemia, tei tavini na ei hopoi au‘a na te arii Peresia o Aretehasaseta fatata e 450 matahiti hou te Mesia. I pure na Nehemia ma to ’na aau atoa. Auê ïa hi‘oraa maitai no tatou! Tau mahana o ’na i te ‘haapaeraa i te maa e te pureraa i te Atua’ no nia i te tupuraa o te mau ati Iuda i Ierusalema.  (Neh. 1:4) I to Aretehasaseta aniraa ’tu ia Nehemia no te aha o ’na e oto ai, pure a‘era Nehemia i te Atua i te ra‘i. (Neh. 2:2-4) Eaha te faahopearaa? Ua pahono Iehova i ta ’na mau pure ma te tauturu i to ’Na nunaa. (Neh. 2:5, 6) Aita e ore e ua puai-mau-hia to Nehemia faaroo!

13, 14. Ia aha ia puai noa to tatou faaroo e ia ore te mau tutavaraa a Satani ia haaparuparu ia tatou?

13 E tauturu mai te pure-tamau-raa, mai ta Nehemia i rave, ia tapea i te faaroo puai. Mea aroha ore Satani e e pinepine oia i te faahema mai ua paruparu ana‘e tatou. A roohia ’i i te ma‘i rahi aore ra a hepohepo mau ai, e nehenehe tatou e mana‘o e e ere te taime ta tatou e faataa ra no te pororaa i te ava‘e taitahi i te mea faufaa roa no Iehova. E mana‘o ahoaho atoa paha to vetahi no te mau mea ta ratou i faaruru aore ra i rave i na mua ’‘e. Te hinaaro ra Satani ia haafaufaa ore tatou ia tatou a paruparu atu ai to tatou faaroo. E vai ara ana‘e ma te pure, e puai noa ïa to tatou faaroo. E tauturu mai ‘te paruru o te faaroo ia tupohe i te mau ihe auahi atoa a te varua ino.’—Eph. 6:16.

E faaoromai tatou i te mau huru fifi atoa ia vai ‘ara tatou ma te pure’ (A hi‘o i te paratarafa 13, 14)

14 ‘Ia ara tatou ma te pure,’ eita tatou e maere ia tamatahia to tatou faaroo e eita tatou e fati i mua i te reira. I mua i te faahemaraa e te fifi, e haamana‘o ana‘e i te hi‘oraa o Nehemia e e pure oioi ana‘e i te Atua. Maoti noa te tauturu a Iehova e tia ’i ia tatou ia patoi i te faahemaraa e ia faaoromai i te mau fifi.

A PURE NO VETAHI Ê

15. Eaha te uiui no nia i te pureraa no vetahi ê?

15 Ua pure Iesu ia vai taiva ore Petero.  (Luka 22:32) Ua pee Epaphera, te hoê Kerisetiano taiva ore, i te hi‘oraa o Iesu e ua pure noa oia no to ’na mau taeae i Kolosa. Ua papai Paulo ia ratou e te ‘tautoo maite ra Epaphera i te pure ia outou aita e faaea, ia mau maite â outou ma te nehenehe, e te î i te mau hinaaro atoa o te Atua ra.’ (Kol. 4:12) Mea maitai ia uiui: ‘Te pure u‘ana ra anei au no to ’u mau taeae na te ao? Te faahiti pinepine ra anei au i roto i ta ’u mau pure i te mau taeae tei roohia i te ati natura? Afea vau i te pureraa no te mau taeae e amo ra i te mau hopoia rahi i roto i ta Iehova faanahonahoraa? Afea vau i te pureraa no te mau melo o te amuiraa e fifi ra?’

16. Mea faufaa mau anei ia pure no vetahi ê? A faataa.

16 E nehenehe ta tatou mau pure no vetahi ê e tauturu mau ia ratou. (A taio i te Korinetia 2, 1:11.) E ere no te mea e mea rahi te tavini a te Atua te pure tamau ra ia ’na no nia i te tahi fifi taa ê e e pahono iho â oia i ta ratou mau pure. E oaoa râ o ’na i te ite e te haapeapea mau nei ratou no vetahi ê. E haapao maite ana‘e ïa i ta tatou hopoia e pure no vetahi ê. Mai ia Epaphera, ia here e ia anaanatae tatou i to tatou mau taeae e tuahine Kerisetiano ma te pure tamau no ratou e tia ’i. E oaoa ’tu â tatou, “mea maitai [hoi] i te horoa ’tu i te rave mai.”—Ohi. 20:35.

‘UA FATATA TO TATOU ORA’

17, 18. E nafea te vai-ara-raa ma te pure e tauturu mai ai?

17 Hou a parau ai e “ua poto roa te rui, ua fatata roa te ao,” ua papai Paulo: “Ua ite tatou e ua tae roa i te hora araraa to tatou taoto: ua fatata hoi to tatou ora i teie nei, i to tatou faarooraa ra.” (Roma 13:11, 12) Fatata te ao apî fafauhia a te Atua. Te piri roa maira ïa to tatou faaoraraa. Eiaha tatou e taoto i te pae varua e eiaha roa ’tu e vaiiho i te mau faaanaanataeraa o teie nei ao ia rave i te taime ta tatou e faataa ra no te pure ia Iehova o tatou ana‘e. “Ia ara [râ tatou] ma te pure.” E tauturu mai te reira ia faaite i te “huru e tia ’i i te haapao maitai e te paieti” a tiai ai i te mahana o Iehova. (Pet. 2, 3:11, 12) E faaite ïa to tatou huru oraraa e te vai ara nei tatou i te pae varua e te tiaturi mau nei tatou e fatata roa teie nei ao ino i te mou. “Eiaha [ïa] e tuutuu i te pure.” (Tes. 1, 5:17) Mai ia Iesu, e faataa ana‘e i te taime no te pure o tatou ana‘e. E haafatata ’tu â tatou ia Iehova ia pure atu â tatou ia ’na. (Iak. 4:7, 8) Auê ïa haamaitairaa e!

18 Te na ô ra te mau Papai: “Ua pûpû hoi [te Mesia] i te pure i tana oraraa ra, i te aniraa ’tu [i te Atua] ma te oto rahi e te roimata, i tei tia ia faaora ia ’na mai te pohe maira, ei faaroohia oia i ta ’na i mǎta‘u.” (Heb. 5:7) Ua taparu Iesu i to ’na Metua e ua faaite i to ’na mau hinaaro a pure ai ia ’na e ua vai taiva ore e tae roa i to ’na poheraa. Ei faahopearaa, ua faaora Iehova i ta ’na Tamaiti here i te pohe no te ora i te ra‘i ei varua pohe ore. E nehenehe atoa tatou e vai taiva ore i to tatou Metua i te ra‘i noa ’tu te mau faahemaraa e fifi ta tatou e faaruru. Ia vai ‘ara tatou ma te pure,’ e noaa ia tatou te re o te ora mure ore.