Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2013

A rave i te mau faaotiraa î i te paari

A rave i te mau faaotiraa î i te paari

“E tiaturi ia Iehova ma to aau atoa ra; eiaha râ e tiaturi i to oe ihora haapao.”—MAS. 3:5.

1, 2. (a) Mea au anei na oe ia rave i te mau faaotiraa? (b) Eaha to mana‘o no nia i te tahi mau faaotiraa ta oe i rave na?

E RAVE tatou i te mau faaotiraa i te mau mahana atoa. Mea au anei na oe? E hinaaro vetahi e na ratou e rave i ta ratou iho mau faaotiraa, eiaha râ na vera ma. E onoono ratou i nia i to ratou tiaraa. Area te tahi atu, te mǎta‘u nei ïa i te rave i te mau faaotiraa faufaa o te oraraa. Te imi nei vetahi i te aratairaa i roto i te mau buka aore ra i te tahi atu mau taata. E e aufau atoa i te tino moni rahi ia tauturuhia ratou ia rave i te mau faaotiraa.

2 Te vai ra te faaotiraa e ere na tatou e rave, e ere hoi no tatou tera tiaraa. Noa ’tu râ, mea rahi te faaotiraa i roto i te oraraa ta tatou e nehenehe e rave. (Gal. 6:5) Teie râ, aita paha tatou i rave noa i te mau faaotiraa maitai e î i te paari.

3. (a) Eaha te mau aratairaa ta tatou e fana‘o nei no te rave i te mau faaotiraa î i te paari? (b) No te aha e ere ai i te mea ohie noa ia ite eaha te faaotiraa e rave?

3 Ei tavini a Iehova, te oaoa nei tatou i te aratairaa taa maitai ta ’na i horoa mai no nia i te tuhaa faufaa e rave rahi o te oraraa. E pee ana‘e i taua mau aratairaa ra. E rave ïa tatou i te mau faaotiraa î i te paari e oaoa ’i Iehova e o tatou atoa. Aita râ te Bibilia e horoa ra i te aratairaa no te mau fifi e tupuraa atoa. E nafea ïa? Ei hi‘oraa, ua ite tatou e eiaha e eiâ. (Eph. 4:28) I teie nei, e rave tatou i ta tahi atu taata taihaa ma te mana‘o e e ere tera taihaa i te mea faufaa roa e te hinaaro mau ra tatou i tera mea. Te eiâ ra anei tatou? Eaha ta tatou e faaoti e rave i roto i te mau tuhaa aita e aratairaa papu? Eaha te tauturu mai?

 A FERURI MAITAI

4. Eaha paha te a‘oraa ta tatou i fana‘o hou a rave ai i te hoê faaotiraa?

4 Hou a rave ai i te hoê faaotiraa faufaa, e parau mai paha te hoê hoa Kerisetiano ia feruri maitai i te reira. E a‘oraa maitai iho â. Teie ta te Bibilia e na ô ra no nia i te raveraa i te hoê faaotiraa ma te ru: “Te imiraa o te feia ru noa ra, tei te veve ïa.” (Mas. 21:5) Ua navai anei râ ia rave i te taime, ia feruri maite i te reira e ia faaite i te huru au noa e te mana‘o faito noa? Mea faufaa te reira no te rave i te faaotiraa maitai, eita râ e navai.

5. No te aha mea fifi ai ia feruri maitai?

5 Aita hoê a‘e o tatou e nehenehe e feruri maitai noa. No te aha? E taata hara hoi tatou e te tia ore. (Sal. 51:5; Roma 3:23) I ‘haapouri’ atoa na paha Satani i to tatou huru feruriraa a ore atu ai e ite o vai ra o Iehova e i ta ’Na mau ture aveia tia. (Kor. 2, 4:4; Tito 3:3) Noa ’tu e e rave te hoê taata i te taime no te rave i te hoê faaotiraa maitai e te tano hoi no ’na, e hape noâ paha o ’na.—Mas. 14:12.

6. Eaha te tauturu mai ia feruri maitai atu â?

6 Noa ’tu e mea tia ore tatou, mea tia roa Iehova to tatou Metua i te ra‘i i roto i te mau tuhaa atoa. (Deut. 32:4) Ua horoa mai o ’na i tei titauhia no te taui i to tatou huru feruriraa e no te feruri maitai atu â. Ei Kerisetiano, e hinaaro tatou e feruri a haa ’tu ai ia au i ta tatou i faaoti. E titauhia ïa ia haavî i to tatou huru feruriraa e huru aau a pee atu ai i to Iehova mana‘o, huru aau e ta ’na mau haaraa.

7, 8. A faatia na i te hoê tupuraa e faaite ra e e nehenehe e rave i te faaotiraa maitai noa ’tu te faateimaharaa e te fifi.

7 Teie te tahi hi‘oraa. Mea rahi te taata tei haere i te tahi atu fenua no te rave i te ohipa ia noaa mai te moni. Ia fanau ratou i te tamarii, e afai ratou ia ’na i te metua ra i to ratou fenua. E peu matauhia tera no vetahi. E nehenehe ïa ratou e rave noa i te ohipa ia noaa mai te moni. * Ua fanau te hoê vahine e ora ra i te fenua ê i te hoê aiû tamaroa nehenehe mau. Ua haamata o ’na i te haapii i te Bibilia e i te faaohipa i ta ’na i haapii mai. Parau noa ’tura to ’na hoa e fetii ia afai i ta raua pêpe i to ’na ra metua hoovai. Ua ite râ o ’na i roto i ta ’na haapiiraa e na raua ta ’na tane te hopoia no ǒ mai i te Atua ra e haapao i ta raua tamaroa. (Sal. 127:3; Eph. 6:4) E pee anei o ’na i te tutuu no te mea e haerea tano te reira no te rahiraa? Aore ra e pee anei o ’na i ta ’na i haapii i roto i te Bibilia noa ’tu e e fifihia raua i te pae moni e e hi‘o-ino-hia mai raua? Eaha ta oe e rave ahani o oe tera?

8 No te mau faateimaharaa, ua haamahora teie vahine apî i to ’na aau ia Iehova ra no te imi i ta ’na aratairaa. Ua aparau o ’na i te tuahine e faatere ra i ta ’na haapiiraa e i te tahi atu o te amuiraa. Haamata a‘era o ’na i te taa i to Iehova mana‘o no nia i tera tupuraa. Oia atoa i te mau fifi i te pae aau ta ta ’na tamaroa e ite aita ana‘e o ’na e paari ia raua ra. I muri a‘e i te feruri-maite-raa i ta te Bibilia e parau ra, ua faaoti o ’na eiaha e afai i ta ’na aiû. Oioi te mau  melo o te amuiraa i te tautururaa ’tu. E pêpe oaoa ta raua e te ea maitai. A ite ai te tane i te reira, ua farii o ’na i te hoê haapiiraa Bibilia e ua haere atoa i te mau putuputuraa e ta ’na vahine.

9, 10. Eaha te auraa e mana‘o mai ia Iehova, e no te aha ia na reira ’i?

9 Hoê noa tupuraa teie. Te faaite nei râ te reira e a rave ai i te hoê faaotiraa, eita e navai ia pee i ta tatou iho aore ra i ta vetahi ê e mana‘o ra mea tano e te ohie a‘e. E au to tatou feruriraa e aau i te hoê uati e hape noa te hora. E fifi-mau-hia tatou a pee ai i tera uati. (Ier. 17:9) E mea tia ïa ia faatano i to tatou feruriraa e aau i te mau ture aveia tia a te Atua.—A taio i te Isaia 55:8, 9.

10 Teie te faaueraa î i te paari a te Bibilia: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ’na i to oe atoa ra mau haerea; e na ’na e faaite ia oe i to oe ra mau haerea.” (Mas. 3:5, 6) A tapao na e te parauhia ra ‘eiaha e tiaturi i to oe ihora haapao.’ E i muri iho, “eiaha e haamoe ia [Iehova].” To ’na ana‘e te huru feruriraa tia roa. Te auraa ïa e hou a rave ai i te tahi noa ’‘e faaotiraa, e hi‘opoa ana‘e i te Bibilia no te ite i to te Atua mana‘o. E mana‘o ïa tatou mai ia Iehova.

IA MATARO OE I TE ITE I TE MAITAI E TE INO

11. Ia aha te hoê taata no te rave i te mau faaotiraa î i te paari?

11 E ere i te mea ohie ia rave i te faaotiraa î i te paari a pee atu ai i te reira. No te feia iho â râ no bapetizo-noa-hia ’tura aore ra o tei haamata noa ’tura i te haere i mua i te pae varua. E nehenehe râ teie mau aiû pae varua e na reira. Te faaauraa ïa a te Bibilia. A hi‘o na te nafea ra te hoê aiû no te haapii i te haere. Hoê avae i mua i te tahi, eiaha râ ia atea roa. E na reira noa o ’na. Hoê â huru ia rave te mau aiû pae varua i te mau faaotiraa î i te paari. Ia au i te aposetolo Paulo, te feia feruriraa paari, o te feia  ïa “no te mataro i ite ai to ratou aau i te maitai e te ino.” Te faaite ra te ta‘o “mataro” e e titauhia te mau tutavaraa tamau. Tei titauhia ïa ia rave te feia mea apî i roto i te parau mau.—A taio i te Hebera 5:13, 14.

E mataro tatou i te ite i te maitai e te ino a rave ai i te maitiraa maitai i te mau mahana atoa (A hi‘o i te paratarafa 11)

12. E nafea e aravihi ai i te rave i te mau faaotiraa î i te paari?

12 Mea rahi te faaotiraa ta tatou e rave i te mau mahana atoa, te mea faufaa aore ra aita. Ia au i te hoê titorotororaa, aita tatou e feruri ra i te afaraa o ta tatou mau haaraa, ua matau hoi tatou. Ei hi‘oraa, i te mau poipoi atoa, e faaoti oe eaha te ahu e oomo. E au ra e aita e titauhia ra ia feruri rahi roa. Mea faufaa râ ia feruri e e au anei te reira no te hoê tavini a Iehova. (Kor. 2, 6:3, 4) A hoo ai i te ahu, e hi‘o paha oe i ta te rahiraa e au nei. Te uiui atoa râ anei oe, ‘Ua tano anei tera ahu no te hoê Kerisetiano? E pee anei ia ’u ia aufau?’ Ma te rave i te mau maitiraa maitai i roto i teie mau tuhaa rii, e mataro tatou i te ite i te maitai e te ino. E tauturu mai te reira ia rave i te mau faaotiraa maitai i roto i te mau tuhaa faufaa a‘e.—Luka 16:10; Kor. 1, 10:31.

IA HINAARO PUAI OE E RAVE I TE MEA TIA

13. Ia aha no te rave i ta tatou i faaoti?

13 Noa ’tu e ua rave tatou i te faaotiraa maitai, e ere i te mea ohie noa ia rave i tei faaotihia. Ei hi‘oraa, ua faaoti vetahi e faaore i te avaava. Aita râ i tae ia ratou, aita hoi ratou e hinaaro roa ra e faaore i te reira. Ua faaau vetahi i to tatou hinaaro e rave aore ra e faaea i te tahi ohipa i te hoê uaua i‘o. E paari atu â te hoê uaua i‘o ia faaohipahia ’tu â te reira, aita ana‘e râ, e tautau mai ïa. Eaha ïa te tauturu mai ia haapuai i to tatou hinaaro e rave i ta tatou i faaoti? E ani ana‘e i ta Iehova tauturu.—A taio i te Philipi 2:13.

14. No te aha i tia ’i ia Paulo ia rave i te mea tia?

14 Ua ite Paulo e e ere i te mea ohie ia rave i te mea tia. Ua na ô oia: “O te hinaaro râ, te fatata nei ïa ia ’u, area te rave i te mea maitai ra, aita ïa i itea ia ’u.” Ua ite o ’na eaha ta ’na e hinaaro e rave aore ra eaha te titauhia ia rave. I te tahi râ mau taime, e ohipa te tapea ra ia ’na. Ua fa‘i oia: “Te oaoa nei hoi au i te ture a te Atua, i te haapaoraa i te taata i roto ra; te ite nei râ vau i te tahi ture i roto i tau tino nei, i te mârôraa mai i te ture i roto i tau aau nei, e te fa[a]riroraa ia ’u ei tîtî na te ture ino i roto i tau tino nei.” Aita iho â ïa e ravea? Oia. Ua na ô o ’na: “E haamaitai au i te Atua, i to tatou Fatu ra ia Iesu Mesia.” (Roma 7:18, 22-25) Ua papai atoa o ’na e ua tia ia ’na ia na reira maoti “te mana rahi” no ǒ mai i te Atua ra.—Kor. 2, 4:7.

15. No te aha ia faaoti papu ai i te rave i te mea tia?

15 No te faaoaoa i te Atua, e faaoti papu ana‘e i te rave i te mea tia. A haamana‘o na i ta Elisaia i parau i te feia haamori ia Baala e i te mau Iseraela apotata i te mou‘a Karemela: “Mai te aha te maoro o tena na feaa-piti-raa? o Iehova te Atua ra, a pee ia ’na; o Baala, a pee ia ’na.” (Arii 1, 18:21) Ua ite te tamarii a Iseraela e e mea tia ia haamori noa ratou ia Iehova. Ua ‘feaa piti’ râ ratou. Mea taa ê roa Iosua o tei parau tau matahiti na mua ’tu i to Iseraela: “E mea ino ia outou ia haamori ia Iehova, e faataa na outou i teie nei mahana i ta  outou e haamori; . . . area vau e to ’u atoa ra utuafare, e haamori ïa matou ia Iehova.” (Ios. 24:15) Eaha te haamaitairaa ta ’na i fana‘o? Ua parahi Iosua e te feia tei pee ia ’na i te Fenua tǎpǔhia, te hoê “fenua tahe pape noa te û e te meli.”—Ios. 5:6.

HAAMAITAIHIA A RAVE AI I TE FAAOTIRAA MAITAI

16, 17. Eaha te mau haamaitairaa ia faaoti tatou i te rave i ta Iehova e hinaaro ra?

16 E toru tamarii iti ta te hoê taeae apî e ta ’na vahine. E ere ta ’na ohipa i te mea aufau-maitai-hia. Na ’na râ i maiti i te reira no te ore e ohipa i te hopea hebedoma e no te haere i te mau putuputuraa e i te pororaa e to ’na utuafare. I te hoê mahana, parau atura te hoê hoa ohipa e e nehenehe ta raua e haere i te tahi atu taiete. E moni ava‘e maitai a‘e i ǒ e e fana‘o raua i te tahi atu â mau mea. Ua feruri e ua pure te taeae no te rave i te hoê faaotiraa. Ua taa ’tura ia ’na e ia rave oia i tera ohipa, eita o ’na e vata oioi i te mau hopea hebedoma. Eaha ta oe e rave ahani o oe tera?

17 Ua feruri te taeae i te mau faahopearaa o teie faaotiraa i nia i to ’na mau taairaa e o Iehova. E aita ’tura o ’na i farii i te ohipa aufau-maitai-hia. Ua tatarahapa anei oia? Aita roa ’tu. E ere te moni te mea faufaa a‘e no ’na. O te mau taairaa piri râ ta ’na e ta to ’na utuafare e faatupu ra e o Iehova. Ua oaoa roa teie taeae e ta ’na vahine a parau ai ta raua tamahine paari, ahuru matahiti, e te here ra o ’na i to ’na na metua, i te mau taeae e tuahine e ia Iehova. Ua faaite atoa o ’na i to ’na hinaaro e pûpû i to ’na ora ia Iehova a bapetizo atu ai. Ua pee o ’na i te hi‘oraa maitai o to ’na papa tei tuu i te taviniraa a Iehova na mua roa i roto i to ’na oraraa.

A rave i te faaotiraa î i te paari a oaoa ’tu ai i roto i to te Atua nunaa (A hi‘o i te paratarafa 18)

18. No te aha mea faufaa ’i ia rave i te mau faaotiraa î i te paari i te mau mahana atoa?

18 E hanere matahiti i teie nei to te Mose Rahi, Iesu Mesia, aratai-noa-raa i to te Atua nunaa na te medebara o te ao a Satani tei fatata i te haamouhia. Ei Iosua Rahi, e aratai Iesu i ta ’na mau pǐpǐ i te ao apî parau-tia fafauhia. (Pet. 2, 3:13) E ere ïa i te taime no te pee faahou i te huru feruriraa, haerea, peu e fa tahito. Teie te taime no te taa ’tu â i to te Atua hinaaro no tatou. (Roma 12:2; Kor. 2, 13:5) Ia faaite ta oe mau faaotiraa e maitiraa o te mau mahana atoa e e au ia oe ta Iehova haamaitairaa mure ore.—A taio i te Hebera 10:38, 39.

^ par. 7 E na reira atoa vetahi ia faaiteite te papa ruau e te mama ruau i ta raua mootua i te hoa e te fetii.