Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TETEPA 2013

Uiraa a te feia taio

Uiraa a te feia taio

Ia au i te Ioane 11:35, ua oto Iesu hou a faaho‘i mai ai ia Lazaro i te ora. No te aha?

Ia pohe tei herehia, e ta‘i iho â tatou. E mihi hoi tatou ia ’na. Ua here Iesu ia Lazaro. Aita râ o ’na i oto no te mea ua pohe oia. No to ’na râ aumihi i te utuafare e hoa o Lazaro. Ta te mau irava tapiri ïa o te faatiaraa a Ioane e faaite maira.—Ioa. 11:36.

A faaroo ai Iesu e ua ma‘ihia to ’na hoa ra o Lazaro, aita Iesu i haere oioi e faaora ia ’na. Te na ô ra te faatiaraa: “Ite a‘era [Iesu] e ua pohe [Lazaro] i te ma‘i, parahi ihora Iesu i taua vahi ra e rui piti.” (Ioa. 11:6) No te aha Iesu i haamaoro ai? Ua na ô oia: “E ore te reira ma‘i e riro ei ma‘i pohe, ia haamaitaihia râ te Atua, e ia haamaitaihia hoi te Tamaiti a te Atua i te reira.” (Ioa. 11:4) Ua hinaaro ïa Iesu e faaohipa i te pohe o Lazaro ‘ia haamaitaihia te Atua.’ E nafea? E rave Iesu i te hoê semeio faahiahia mau ma te faaho‘i mai i to ’na hoa here i te ora.

A tauaparau ai i ta ’na mau pǐpǐ, ua faaau Iesu i te pohe i te taoto. No reira o ’na i parau ai ia ratou e ‘te haere nei oia e faaara’ ia Lazaro. (Ioa. 11:11) No Iesu, e au te faaho‘iraa mai ia Lazaro i te ora i te faaararaa i te hoê taata e taoto ra. Aita ïa e faufaa ia oto o ’na i te pohe o to ’na hoa.

No te aha ïa Iesu i oto ai? E hi‘o ana‘e ïa i te mau irava tapiri. A ite ai i to Lazaro tuahine ra o Maria e ia vetahi ê ia oto, “uuru ihora [Iesu] e horuhoru atura.” Ua “uuru” roa o ’na a ite ai i to ratou mauiui. Ua oto mau Iesu a ite ai i te mauiui o to ’na mau hoa here.—Ioa. 11:33, 35.

Eaha ta teie faatiaraa e faaite maira? E mana to Iesu no te faaho‘i mai i to tatou feia herehia i te ora e te ea maitai i roto i te ao apî i mua nei. Ua aumihi Iesu i te feia ua pohe tei herehia. Ia aumihi atoa ïa tatou i te feia e oto ra i te pohe o tei herehia e ratou e tia ’i.

Ua ite Iesu e e faaho‘i mai o ’na ia Lazaro i te ora. Ua oto o ’na no to ’na here e aumihi i to ’na mau hoa. Ia turai atoa mai to tatou aumihi ia ‘oto e te feia e oto ra.’ (Roma 12:15) Aita te reira e faaite ra e te ere nei tatou i te faaroo i te tiaturiraa o te tia-faahou-raa. A hi‘o na ia Iesu, ua ite o ’na e e faaho‘i mai o ’na ia Lazaro i te ora. Noa ’tu râ, ua faaite o ’na i to ’na aumihi i te feia e oto ra ma te oto atoa e o ratou.