Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atete 2013

 HAAMANA‘ORAA NO TAHITO RA

Ua au roa te arii!

Ua au roa te arii!

TEI Atete 1936 tatou, i te oire iti o te arii no Swaziland. Mai te tahi pereoo atu, no haapuroro noa ’tura Robert e George Nisbet i te mau himene haruharuhia e oreroraa parau a taeae Joseph Rutherford. Ua au roa te arii Sobhuza II. Ua faataa George, “Ua haama roa mâua, ua hinaaro hoi oia e hoo mai i te taihaa haapuroro e ripene haruharu o te poroi o te Basileia!”

 

Ua na ô atu Robert e eita e nehenehe. No te aha? E ere hoi na raua tera mau taihaa. Hinaaro a‘era te arii e ite na vai ra.

Pahono atura Robert, “Na te tahi atu Arii.” Ani a‘era Sobhuza o vai tera Arii. Na ô a‘era Robert, “O Iesu Mesia, te Arii o te Basileia o te Atua.”

Ma te faatura, na ô atura Sobhuza, “Ah, e Arii rahi mau o ’na. Aita vau e hinaaro e rave i te tahi noa ’‘e o ta ’na taihaa.”

Ua papai Robert: ‘Ua maere roa vau i te huru o te Raatira rahi, te arii Sobhuza. Noa ’tu e ua ite maitai o ’na i te paraparau i te reo Beretane, e ere oia i te mea teoteo e haavarevare. Mea ohie roa ia paraparau ia ’na. Fatata e 45 minuti vau i te parahiraa ia ’na ra i roto i to ’na piha a haapuroro ai George i te mau himene haruharuhia i rapae.’

Te na ô faahou ra Robert, ‘I taua noâ mahana, ua haere mâua i te hoê fare haapiiraa (The Swazi National School). Ua ite mâua i te hoê tupuraa faahiahia mau. Ua poro mâua i te faatere o te fare haapiiraa e ua faaroo mai o ’na. Ua oaoa roa oia a faaite ai mâua i te taihaa haapuroro e a parau ai e e nehenehe te taatoaraa e faaroo i te mau ripene. Haaputuputu a‘era o ’na fatata hanere piahi i nia i te matie no te faaroo i te reira. I haapiihia na te tamaroa i te ohipa faaapu, tamuta, paturaa, i te reo Beretane e i te numeraraa. Area te tamahine, ia haapao ïa ia vetahi ê, i te fare e te vai ra ’tu â.’ Na te mama ruau o te Raatira rahi i haamau i te fare haapiiraa.

Piahi o te fare haapiiraa i faaroo i te tahi oreroraa parau i Swaziland i 1936

I 1933, ua oaoa roa te arii Sobhuza i te farii i te mau pionie i haere i to ’na oire iti. I te tahi taime, ua haaputuputu oia 100 taata e paruru ra ia ’na no te faaroo i te mau haapurororaa o te poroi o te Basileia. Ua faaî oia i te tahi aniraa ia  hapono-noa-hia ’tu ta tatou mau vea e ua farii i te mau papai. Aita i maoro, ua haapue te arii e rave rahi papai Kerisetiano! Noa ’tu e ua opanihia te reira e te faatereraa Beretane i te Piti o te Tama‘i rahi, ua haapao maitai noa oia i ta tatou mau papai.

Ua farii noa iho â te arii Sobhuza II i te mau Ite no Iehova i to ’na oire iti i Lobamba. Ua titau manihini atoa i te mau tia haapaoraa ia haere mai e faaroo i ta ratou mau oreroraa parau Bibilia. I te tahi taime, ua faataa Helvie Mashazi, te tahi Ite no Iehova no ô, i te Mataio pene 23. Ma te riri, tia ’tura te tahi pǔpǔ faatere faaroo a faahepo atu ai ia ’na ia parahi. Ani atura râ te arii ia taeae Mashazi ia faahope i ta ’na faaiteraa. Hau atu â, ua parau te arii i te taata e faaroo ra ia tapao i te mau irava Bibilia atoa i faahitihia i roto i te oreroraa parau!

I te tahi atu taime, a faaroo ai i te oreroraa parau a te tahi taeae pionie, ua na ô e maha tia haapaoraa: “E ere faahou matou i te tia haapaoraa, e Ite no Iehova râ.” Ua ani atura ratou i te pionie e te vai ra anei ia ’na ra te tahi buka mai ta te arii.

Mai te mau matahiti 1930 e tae atu i to ’na poheraa i 1982, ua faatura noa iho â te arii i te mau Ite no Iehova. Noa ’tu e aita ratou i rave i te mau peu a to Swaziland, aita oia i vaiiho ia hamani-ino-hia ratou. Ua mauruuru mau te mau Ite no Iehova ia ’na no te reira. Ua oto roa ratou i to ’na poheraa.

I 2013, ua hau atu i te 3 000 taata poro i te Basileia i Swaziland. Hoê mirioni tiahapa taata i tera fenua. E 384 ïa taata no te hoê Ite no Iehova. Ua hau atu i te 260 pionie e haa rahi nei i roto e 90 amuiraa. I 2012, e 7 496 taata tei tae i te Oroa haamana‘oraa. E au ra e e maraa ’tu â te mau numera. Mea papu e o te mau tere i Swaziland i te mau matahiti 1930 te tumu.—Haamana‘oraa no tahito ra no Afirika Apatoa mai.