Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atete 2013

Te tauturu maira Iehova i te mau mahana atoa

Te tauturu maira Iehova i te mau mahana atoa

Noa ’tu to ’u ea ino e te fifi mau, ua ite noa vau i te turu î i te here a to tatou Metua i te ra‘i. Ma te tavini ia Iehova ei pionie e 20 tiahapa matahiti, ua itea ia ’u te oaoa taa ê.

I 1956, a fanauhia ’i au, aita to ’u ivi tua i paari maitai no te hoê ma‘i parauhia spina-bifida. No te mea ua ino to ’u mau uaua uira, mea fifi roa no ’u ia haere e ua roohia vau i te tahi atu â mau ma‘i ino mau.

Hou to ’u fanauraa, i haapii na to ’u na metua i te Bibilia e te mau mitionare Ite no Iehova. I to ’u tamarii-rii-raa, tau taata poro noa te ora ra i to ’u oire tumu i Usakos, Namibie. I faatupu na ïa matou i te mau putuputuraa ei utuafare. I te hituraa o to ’u matahiti, ua tâpûhia vau no te tuu i te tahi faahaereraa omaha. I te 14raa o to ’u matahiti, tupuhia ’tura vau i te ma‘i hopii. I te mea e mea atea roa te fare haapiiraa piri roa ’‘e e i hinaaro na vau i te aupuru a to ’u na metua, aita ’tura vau i faahope i ta ’u tau haapiiraa.

Ua faaoti râ vau i te haapuai i to ’u mau taairaa e o Iehova. Mea iti roa te papai Kerisetiano na roto i te reo o mama, te Afrikaans. Haapii atura vau i te reo Beretane no te hi‘opoa i te rahiraa o ta tatou mau buka. Riro atura vau ei taata poro a bapetizo atu ai i te 19raa o to ’u matahiti. I na maha matahiti i muri a‘e, ua roohia vau i te ma‘i e rave rahi e i te fifi i te pae aau. Hau atu â, mea tahoê roa te feia o to ’u oire tumu. Aita ïa vau i apiti i te taviniraa ma te itoito rahi no te mǎta‘u taata.

I te 20raa o to ’u matahiti, faarue atura matou ia Namibie no te haere atu i Afirika Apatoa. A tahi ra vau e apiti ai i te tahi amuiraa. Auê te faahiahia e! Tera râ, ua faaruru â vau i te tahi atu tâpûraa parauhia colectomie ia nehenehe vau e titio.

I muri a‘e, ua faaroo vau i te tumu parau a te tiaau haaati no nia i te taviniraa pionie. Ua putapû roa vau i ta ’na mau parau. Ua ite au e mea ma‘ima‘i roa vau, ua tauturu mai râ Iehova ia faaruru e rave rahi fifi. Faaî atura vau i te aniraa e riro ei pionie tamau. Ua feaa râ te mau matahiapo i te farii i te reira no to ’u ma‘i rahi.

Noa ’tu râ, ua faaoti au e tutava i te poro i te Basileia. Maoti te tauturu a to ’u mama e vetahi ê, i na ava‘e e ono, e hora pionie ta ’u. Ua haapapu te reira i to ’u hinaaro mau e riro ei pionie noa ’tu te ma‘i. Ani faahou atura vau e tavini ei pionie. I tera râ taime, ua fariihia! I te 1 no Tetepa 1988, ua riro vau ei pionie tamau.

Ei pionie, ua ite noa vau i te tauturu a Iehova. A haapii ai au i te taata i te parau mau, ua paruruhia e ua faaitoitohia vau a ore atu ai e mana‘o noa i to ’u ma‘i. Ua piri roa ’tu â vau ia Iehova. Ma te tauturu i te taata ia pûpû e ia bapetizo ia ratou, ua itea ia ’u te oaoa rahi.

Mea ma‘ima‘i roa vau. Te tauturu maira râ Iehova i te mau mahana atoa. (Sal. 68:19) Aita noa o ’na i tauturu mai ia faaoromai i te ma‘i, ia oaoa atoa râ i to ’u oraraa!