Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2013

Uiraa a te feia taio

Uiraa a te feia taio

I te mau putuputuraa, mea tano anei ia parahi te mau metua Kerisetiano i pihaiiho i te hoê tamarii tiavaruhia?

Eiaha e haapeapea roa ino no te vahi i reira te hoê taata tiavaruhia e parahi ai i te Piha a te Basileia. Ua faaitoito noa teie vea i te mau metua Kerisetiano o te mana‘o ra e mea tano, ia horoa i te tauturu pae varua i ta raua tamarii tiavaruhia o te noho noa ra i te fare. E nehenehe atoa raua e faatere i ta ’na haapiiraa Bibilia aita ana‘e i naea to ’na matahiti. Ta Te Pare Tiairaa ïa o te 1 no Atopa 2001, api 16 e tae atu i te api 18, i faaite. E fana‘o ïa tera tamarii i te mau faaitoitoraa titauhia no te taui i to ’na haerea.

I te Piha a te Basileia, e au ra e mea tano ia parahi muhu ore noa te hoê tamarii tiavaruhia aitâ i naea te matahiti i pihaiiho i to ’na mau metua. Aita e faaheporaa ia parahi te hoê taata tiavaruhia i muri roa. E nehenehe ïa te hoê tamarii tiavaruhia e parahi e to ’na ra mau metua noa ’tu ihea raua e parahi ai. Te hinaaro nei na metua e tauturu i ta raua tamarii i te pae varua. Mea ohie a‘e ïa ia na reira tei pihaiiho ana‘e o ’na ia raua.

Hoê â anei no te hoê tamarii tiavaruhia o te ore e noho faahou ra e to ’na mau metua? I na mua ’‘e, ua faataa maitai ta tatou mau papai i te haerea o te hoê Kerisetiano no nia i te amuiraa ’tu e te hoê melo utuafare tiavaruhia aita e noho ra i te fare. * E nehenehe râ te hoê taata tiavaruhia e parahi muhu ore noa e to ’na ra utuafare i te mau putuputuraa. Mea taa ê roa te reira i te imi-noa-raa i te amui atu ia ’na ei melo utuafare. E haerea tano anei to te mau melo taiva ore o te utuafare i nia i to ratou fetii tiavaruhia? Te tutava ra anei ratou i te pee i te a‘oraa Bibilia no nia i te amuiraa ’tu ia ’na? Mai te peu e e, aita ïa e faufaa ia haapeapea.—Kor. 1, 5:11, 13; Ioa. 2, 11.

Eiaha e haapeapea ia parahi te hoê taata tiavaruhia i pihaiiho i te hoê melo o to ’na utuafare aore ra o te amuiraa a faaite noa ’i i te haerea e tano. Eiaha ïa e tuu i te mau faatureraa no nia i te vahi e parahi ai te hoê taata tiavaruhia. Ia au i te huru tupuraa, e nehenehe te reira e faatupu i te peapea. E nafea ïa? E mea tia ia tutava te feia atoa i tae mai i te putuputuraa, tae noa ’tu te fetii taiva ore, i te faatura i te mau faaueraa tumu Bibilia no nia i te tiavaruraa. Eiaha atoa te reira ia riro ei turoriraa no te mau taeae.