Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atete 2013

Ua ite Elisaia i te pereoo auahi—E oe?

Ua ite Elisaia i te pereoo auahi—E oe?

Te imi nei te arii o Arama i te peropheta a te Atua ra o Elisaia. Ua itehia mai oia i Dotana, te hoê oire i haaatihia e te mou‘a. Tono a‘era te arii i te mau puaahorofenua, pereoo tama‘i e nuu i ǒ. I te aahiata, ua haaati te nuu i te oire.—Arii 2, 6:13, 14.

A ara ’i te tavini a Elisaia e a haere ai i rapae, ite a‘era o ’na i tera nuu. Parau atura oia: “Auê, e tau fatu e! eaha tatou nei?” Ua na ô a‘era Elisaia: “Eiaha e mǎta‘u, e rahi to tatou e iti to ratou.” Pure ihora o ’na: “E Iehova e, teie ta ’u parau ia oe, e faaaraara oe i to ’na mata ia ite oia.” “Faaaraara a‘era Iehova i te mata o taua taata apî ra; ite atura oia; e inaha, ua î te mou‘a i te puaahorofenua, e te pereoo auahi, i te haaatiraa ia Elisaia.” (Arii 2, 6:15-17) Eaha te haapii mai i teie tupuraa o te oraraa o Elisaia e i te tahi atu?

Aita Elisaia i riaria a ite ai e ua haaatihia te oire. Ua tiaturi hoi o ’na ia Iehova e ua ite e te paruru ra te Atua ia ’na. Aita e semeio i teie mahana. Te ite nei râ tatou e te paruru nei Iehova i to ’na nunaa ei pǔpǔ. E au ra e ua haaati-atoa-hia tatou e te mau puaahorofenua e pereoo auahi. Ia “ite” tatou i te reira maoti to tatou faaroo e ia tiaturi tatou i te Atua, e ‘parahi tatou ma te ora’ e e haamaitai mai Iehova. (Sal. 4:8) E hi‘o ana‘e e nafea ia faufaahia i tei tupu i roto i te oraraa o Elisaia.

TE TAVINI RA ELISAIA IA ELIA

Te arote ra Elisaia a haafatata ’i te peropheta Elia ia ’na. Huri atura Elia i to ’na ahu i nia ia ’na. Ua ite Elisaia eaha te auraa. Ua faatupu atura o ’na i te tamaaraa, ua hô‘i i to ’na na metua e faarue ihora i te fare no te tavini ia Elia. (Arii 1, 19:16, 19-21) Ua haavata Elisaia ia ’na no te tavini atu â i te Atua. Faaohipa ’tura Iehova ia ’na e ua mono ihora o ’na ia Elia ei peropheta.

 Ua tavini paha Elisaia ia Elia e ono matahiti. Na ’na i ‘ninii na i te pape i nia i te rima o Elia.’ (Arii 2, 3:11) I tera tau, ua matau te taata i te amu rima noa i te maa, aore a‘e patia e tipi. Ia oti te tamaa, e ninii te hoê tavini i te pape i nia i te rima o to ’na fatu no te horoi atu. Teie ïa te tahi ohipa haehaa roa a Elisaia. Noa ’tu râ, e fana‘oraa taa ê no ’na ia tavini ia Elia.

Oia atoa, mea rahi te Kerisetiano e apiti nei i te mau tuhaa rau o te taviniraa taime taatoa. No te aha? No to ratou faaroo e hinaaro e faaohipa roa ’tu â i to ratou itoito no te taviniraa a Iehova. I te tahi taime, e titauhia ia faarue ratou i te fare a rave atu ai i te mau ohipa, haehaa roa paha no vetahi, i te Betela, i roto i te mau paturaa e te vai ra ’tu â. Eiaha te Kerisetiano ia mana‘o e mea faufaa ore aore ra mea haama tera taviniraa. Mea faufaa roa hoi te reira no Iehova.—Heb. 6:10.

UA HAAPAO ELISAIA I TA ’NA HOPOIA

Hou ‘a rave ai ia Elia na roto i te hoê puahiohio i nia i te ra‘i,’ ua tono te Atua ia ’na mai Gilagala i Betela. Ua parau Elia ia Elisaia eiaha e apee ia ’na. Parau atura râ Elisaia: “E ore au e faarue ia oe.” A haere noa ’i, ua onoono â Elia ia Elisaia e piti â taime ia faaea i muri e aita e faufaa ia apee ia ’na. (Arii 2, 2:1-6) Mai ia Ruta i nia ia Naomi, ua faaea noa Elisaia i pihaiiho ia Elia. (Ruta 1:8, 16, 17) No te aha? Mea faufaa roa no Elisaia ta ’na fana‘oraa taa ê no ǒ mai i te Atua e tavini ia Elia.

E hi‘oraa maitai Elisaia. E fana‘oraa taa ê anei ta tatou i roto i te faanahonahoraa a te Atua? E haafaufaa tatou i te reira a haamana‘o ai e te tavini nei tatou ia Iehova. Aita ’tu fana‘oraa taa ê rahi a‘e.—Sal. 65:4; 84:10.

‘A ANI MAI E NAHEA ’TU VAU IA OE’

A haere noa ’i na taata toopiti, ua na ô Elia ia Elisaia: “A ani mai, e nahea ’tu vau ia oe a rave-ê-hia ’tu ai au ra.” Mai ia Solomona a tau matahiti a‘enei, ua ani Elisaia i te tahi tauturu no te tavini maitai atu â ia Iehova ma te parau: “Ia piti mai â ta ’u i tena na varua i roto ia oe na.” (Arii 1, 3:5, 9; Arii 2, 2:9) I Iseraela, e fana‘o te tamaiti matahiapo e piti tuhaa o te hoê tufaa. (Deut. 21:15-17) Ua ani ïa Elisaia e na ’na e mono ia Elia ei peropheta a te Atua. Ua hinaaro atoa o ’na e riro mai ia Elia, oia hoi itoito noa no Iehova.—Arii 1, 19:13, 14.

Eaha te pahonoraa a Elia i te aniraa a ta ’na tavini? “E aniraa mǎta‘u ore ta oe i ani maira; ia ite mai oe ia ’u ia ravehia mai au ra, e na reirahia mai oe, ia ore râ oe ia ite mai ia ’u ra, e ore e tiahia.” (Arii 2, 2:10) E piti auraa to te pahonoraa a Elia. A tahi, na te Atua noa e faaoti e e fana‘o anei Elisaia i ta ’na i ani. Te piti, ia hinaaro mau Elisaia i te reira, e mea tia ia faaea noa oia ia Elia ra noa ’tu eaha te tupu.

EAHA TA ELISAIA I ITE?

Ua horoa anei te Atua ia Elisaia e piti tuhaa o te varua o Elia? Te parau ra te Bibilia: “Te haere noa ra raua paraparau noa ’i, e inaha, e pereoo auahi, e te puaahorofenua auahi, taa ê a‘era raua; reva ’tura Elia na roto i te [puahiohio] i nia i te ra‘i. Te ite atura hoi Elisaia.” * Tera te pahonoraa a Iehova. Ua ite Elisaia ia Elia i te revaraa. Ua noaa ia ’na e piti tuhaa o te varua o Elia e ua mono ia ’na ei peropheta.—Arii 2, 2:11-14.

Ua rave Elisaia i te ahu o Elia tei topa e ua oomo atura. Maoti teie ahu e itehia ’i e o Elisaia te peropheta a te Atua i teie nei. I muri a‘e, ua ite-mau-hia e o ’na tei maitihia i to ’na faataa-ê-raa i te pape o Ioridana.

Papu maitai e aita i moe ia Elisaia i to Elia revaraa i roto i te puahiohio. Eita te taata e ite hanoa i te hoê pereoo tama‘i e puaahorofenua auahi! E haapapuraa te reira ia Elisaia e ua horoa ’tu Iehova i ta ’na i ani. Eita tatou e ite i tera mau mea faahiahia ia pahono Iehova i ta tatou mau pure. E taa râ ia tatou e te faaohipa ra te Atua i  to ’na mana rahi no te tauturu mai ia rave i to ’na hinaaro. E ia ite tatou e te haamaitai nei Iehova i te tuhaa o ta ’na faanahonahoraa i nia i te fenua nei, e au ra e te ite ra tatou i to ’na pereoo i te ra‘i e tere noa ra.—Ezk. 10:9-13.

Mea rahi te mea ta Elisaia i ite o tei haapapu ia ’na i te puai rahi o Iehova. Maoti te varua mo‘a, ua faatupu te peropheta 16 semeio. Te tataipitiraa ïa o te rahiraa semeio a Elia. * Ua ite Elisaia i te puaahorofenua e te pereoo tama‘i auahi no te piti o te taime i Dotana, i to ’na haaatiraahia e te nuu Arama.

UA TIATURI ELISAIA IA IEHOVA

Noa ’tu e ua haaatihia oia e te enemi i Dotana, ua vai hau noa Elisaia. No te aha? No to ’na faaroo puai ia Iehova. E hinaaro atoa tatou i tera huru faaroo. E ani ana‘e ïa i te Atua to ’na varua mo‘a no te faaite i te faaroo e te tahi atu mau huru maitatai ta te varua e faatupu.—Luka 11:13; Gal. 5:22, 23.

No te ohipa i tupu i Dotana, ua tiaturi atu â Elisaia ia Iehova e ta ’na mau nuu melahi. Ua tono te Atua i ta ’na mau melahi no te haaati i te oire e te enemi. Faaora a‘era te Atua ia Elisaia e ta ’na tavini ma te haamatapo i te enemi. (Arii 2, 6:17-23) I tera taime atâta mai i te tahi atu mau tupuraa, ua faatupu Elisaia i te faaroo e ua tiaturi papu ia Iehova.

Mai ia Elisaia, e tiaturi ana‘e i te Atua ra ia Iehova. (Mas. 3:5, 6) ‘E aroha mai ïa te Atua e e haamaitai mai oia.’ (Sal. 67:1) Aita e pereoo e e puaahorofenua auahi te haaati mau ra ia tatou. I te “ati rahi” râ i mua nei, e paruru Iehova i to ’na nunaa. (Mat. 24:21; Apo. 7:9, 14) A tiai noa ’i, e haamana‘o ana‘e e ‘o te Atua to tatou haapuraa.’—Sal. 62:8.

^ par. 16 Aita Elia i haere i nia i te ra‘i i te vahi Iehova e te mau melahi e faaea ’i. A hi‘o i Te Pare Tiairaa o te 15 no Tetepa 1997, api 15.

^ par. 19 A hi‘o i Te Pare Tiairaa o te 1 no Atete 2005, api 10.