Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2013

E te mau metua, a haapii atu mai to ratou tamarii-rii-raa

E te mau metua, a haapii atu mai to ratou tamarii-rii-raa

TE NA ô ra te Bibilia: “Inaha hoi te tamarii ra, e tufaa ïa no ǒ ia Iehova ra; e ta te opu i fanau ra, e utua ïa.” (Sal. 127:3) E oaoa mau iho â te mau metua Kerisetiano i te fanau i te hoê aiû.

Mea oaoa ia fanau i te hoê tamarii. E hopoia atoa râ. No te riro ei taata paari oraora maitai, e mea tia ia amu tamau te tamarii i te maa maitatai. No te mau papu i roto i te parau mau, mea faufaa ia fana‘o te tamarii i te maa pae varua maitatai. Oia atoa i te aratairaa a te mau metua o te tutava ra i te haapii atu i te mau faaueraa tumu a te Atua. (Mas. 1:8) Afea ïa e haamata ’i i te haapii atu e e nafea?

 E HINAARO TE METUA I TO TE ATUA TAUTURU

Teie te hi‘oraa o Manoa, te hoê ati Dana i ora na i te oire o Zora i Iseraela i tahito. Ua parau atu te melahi a Iehova i te vahine fanau ore a Manoa e e fanau o ’na i te hoê tamaroa. (Tav. 13:2, 3) Aita e hape e ua oaoa mau Manoa taiva ore raua ta ’na vahine i tera parau apî. Ua haapeapea atoa râ raua. No reira Manoa i pure ai: “E tau Fatu e, e tuu faahou mai oe ia mâua nei i taua taata no te Atua ta oe i tono maira, e haapii mai ia mâua i ta mâua e rave i taua tamaiti e fanau ra.” (Tav. 13:8) Ua haapeapea Manoa e ta ’na vahine no nia i te haapiiraa e horoa i ta raua tamaiti ra o Samasona. Ua haapii atu iho â raua i te ture a te Atua e ua haamaitaihia ta raua mau tutavaraa. Te na ô ra te Bibilia e “ua rave maira te [v]arua o Iehova” ia Samasona. Ei faahopearaa, ua rave Samasona i te mau ohipa maere mau ei tavana o Iseraela.—Tav. 13:25; 14:5, 6; 15:14, 15.

Ua pure Manoa no te ani i te aratairaa no te haapii i ta raua tamarii

Afea e haamata ’i i te haapii i te tamarii? ‘Mai to Timoteo tamarii-rii-raa mai â’ to to ’na mama Eunike e mama ruau Loidi haapiiraa ia ’na i “te parau mo‘a i papaihia.” (Tim. 2, 1:5; 3:15) Ua haamata ïa ta Timoteo haapiiraa Bibilia i to ’na tamarii-rii-raa.

Mea maitai ia pure na metua Kerisetiano no te ani i te aratairaa a faaineine atu ai ia raua. E haapii atu ïa na metua i ta raua tamarii mai to ’na “tamarii-rii-raa.” Te na ô ra te Maseli 4:26: “E haamana‘o maitai i te e‘a i haerehia e to avae, e e haapapuhia to oe atoa ra mau haerea.” Hou te aiû e tae mai ai, e faanaho maitai na metua e ua noaa anei ia raua te mau mea atoa ta ’na e hinaaro. Ia haamana‘o atoa raua i te mau ohipa pae varua. Ta raua fa, o te haapii-oioi-raa ïa i ta raua aiû.

Ia au i te hoê buka no nia i te tamarii, ‘mea faufaa roa te mau ava‘e i muri noa ’‘e i te fanauraa no te roro. I reira hoi e rahi roa mai ai te mau tuatiatiraa e nehenehe ai te hoê tamarii e haapii.’ (Early Childhood Counts—A Programming Guide on Early Childhood Care for Development) E te mau metua, a faaohipa ïa i tera taime poto no te tuu i te mau haapiiraa faufaa pae varua i roto i te feruriraa o ta outou tamarii!

Ua parau te hoê metua vahine e pionie tamau atoa no nia i ta ’na tamahine apî: “Hoê noa ava‘e to ’na a haere ai mâua i roto i te taviniraa. Noa ’tu e aita i taa ia ’na eaha te tupu ra, te mana‘o nei au e ua faufaahia o ’na. E piti matahiti to ’na a pûpû ai o ’na i te mau api parau iti i te feia ta mâua e farerei i roto i te pororaa ma te mǎta‘u ore.”

E faahopearaa maitai ia haapii oioi i te tamarii. Ua ite râ te mau metua e mea fifi atoa ia haapii i ta ratou tamarii i te pae varua.

A “FAAHEREHERE MAITE I TE TAIME”

Mea hauti te tamarii aore ra e nevaneva oioi ratou. Mai tera iho â, e hinaaro ratou e ite eaha te mau mea e haaati ra ia ratou. Noa ’tu e mea fifi i te tahi taime, ia aha te mau metua no te tauturu i ta ratou tamarii ia faaroo i ta ratou e haapii atu?

A hi‘o na i ta Mose i parau: “E teie nei mau parau ta ’u e parau atu ia oe i teie nei mahana, ei roto i to aau e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere noa oe na te e‘atia ra, e ia taoto noa oe ra, e ia tia noa oe i nia.” (Deut. 6:6, 7) Mea faufaa roa ïa ia haapii tamau maite ia ratou. E au te hoê tamarii iti i te hoê ohi e mea tia ia faarari tamau. E tauturu te faahiti-noa-raa i te hoê parau i te taata paari ia haamana‘o i te mau mea faufaa. E tauturu atoa te reira i ta outou mau tamarii!

Mea faufaa roa ia faataa te mau metua i te taime no ta ratou tamarii no te haapii atu i te parau mau a te Atua. Mea fifi paha te reira no te rahi o te ohipa. Ua faaitoito râ te aposetolo Paulo ia “faaherehere maite i te taime” no te mau ohipa Kerisetiano faufaa. (Eph. 5:15, 16) E nafea ïa? Mea fifi no te hoê matahiapo, e pionie tamau hoi ta ’na vahine, ia vai faito i rotopu i te haapiiraa i ta ’na tamarii, te amoraa i ta ’na hopoia Kerisetiano e ta ’na ohipa. Afea raua e haapii ai i ta raua tamahine?  Te na ô ra te papa: “I te mau poipoi atoa hou vau a haere ai i te ohipa, e taio atu mâua ta ’u vahine i Ta ’u Buka Aamu Bibilia aore ra te buka iti E hi‘opoa ana‘e i te mau Papai i te mahana hoê. I te ahiahi, e taio â mâua i te hoê papai Bibilia hou o ’na a haere ai e taoto. E ia haere mâua i roto i te taviniraa, e apee atoa mai o ’na. Aita mâua e hinaaro ra e ere i teie mau matahiti matamua o to ’na oraraa.”

‘MAI TE OHE TE TAMARII’

E hinaaro iho â tatou ia riro ta tatou tamarii ei taata paari maitai. Eaha râ te tumu matamua roa e haapii ai ia ratou? Ia here ratou i te Atua.—Mar. 12:28-30.

Te na ô ra te Salamo 127:4: “Mai te ohe i te rima o te feia puai ra, oia atoa te tamarii a te taata itoito.” Ua faaauhia te tamarii i te ohe o te te‘ahia no te raea i te fa. Eita te taata e nehenehe e faaho‘i mai i te ohe ta ’na i te‘a. No te hoê taime poto, e “ohe” atoa to roto i te rima o te mau metua: ta ratou tamarii. A faaohipa i tera taime no te tuu i te mau faaueraa tumu a te Atua i roto i te feruriraa e aau o ta outou tamarii.

Ua papai te aposetolo Ioane no nia i ta ’na mau tamarii pae varua: “Aita ’tu o ’u oaoa rahi maori râ ia ite au, e te haapao ra tau mau tamarii i te parau mau.” (Ioa. 3, 4) Hoê â paha oaoa to te mau metua a ite ai i ta ratou tamarii ‘ia haapao i te parau mau.’