Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2013

Eiaha e ‘riri ia Iehova’

Eiaha e ‘riri ia Iehova’

“Na te maamaa o te taata e haapi‘o i to ’na haerea; e mai reira hoi ua riri ihora tana aau ia Iehova.”—MAS. 19:3.

1, 2. No te aha eiaha ’i e faahapa ia Iehova no te mau fifi o te huitaata? A faataa.

A FERURI na e e tane faaipoipo oaoa oe. A ho‘i ai i te fare i te hoê mahana, ite a‘era oe e ua tupararihia te mau tauihaa i roto. Ua paparari te mau au‘a e te mau mereti. Mea rahi te apoo i nia i te papai. E ere faahou i te fare nehenehe ta oe i hamani! O vai ta oe e faahapa? E parau anei oe, “No te aha ta ’u vahine i na reira ’i?” Eita. E parau oe, “O vai tei na reira?” Ua ite hoi oe e eita ta oe vahine e vavahi i to orua fare.

2 I teie mahana, ua tuino-roa-hia te fenua no te haaviiviiraa, te haavîraa u‘ana e te mau peu taatiraa viivii. Ua haapii râ tatou maoti te Bibilia e e ere Iehova te tumu o teie mau fifi. Ua hamani o ’na i te fenua ia riro te reira ei paradaiso. (Gen. 2:8, 15) E Atua aroha o Iehova. (Ioa. 1, 4:8) Ua tauturu mai te mau Papai ia taa o vai mau te tumu o te mau fifi e rave rahi. O Satani te Diabolo, “te arii o teie nei ao.”—Ioa. 14:30; Kor. 2, 4:4.

3. E nafea e hape ai to tatou mana‘o i te tahi fifi?

3 Eita râ e nehenehe e faahapa ia Satani no to tatou mau fifi atoa. No te aha? I te tahi taime, e fifihia tatou no ta tatou iho mau hape. (A taio i te Deuteronomi 32:4-6.) Ua ite iho â tatou. Ei taata hara râ, e hape paha to tatou mana‘o i te tahi fifi. Mea atâta te reira. (Mas. 14:12) Eita paha tatou e faahapa faahou ia tatou iho aore ra ia Satani, ia Iehova râ a riri atoa ’tu ai ia ’na.—Mas. 19:3.

4, 5. E nafea paha te hoê Kerisetiano e ‘riri ai ia Iehova’?

4 E nehenehe anei e ‘riri ia Iehova’? Aita e faufaa. (Isa. 41:11) Ua parau te hoê rohipehe: “Mea poto roa to rima no te moto i te Atua.” Eita iho â  ïa tatou e parau e ua riri tatou ia Iehova. Te na ô nei râ te Maseli 19:3 e ‘e haapi‘o te hoê taata maamaa i to ’na haerea e ua riri ihora tana aau ia Iehova.’ E nehenehe iho â ïa te hoê taata e riri i te Atua i roto i to ’na aau. E itehia te reira i nia i ta ’na mau haaraa. E faaiti paha te hoê taata tei inoino ia Iehova i ta ’na taviniraa i te Atua aore ra e faarue paha o ’na i te amuiraa.

5 Eaha paha te mau mea e riri ai tatou ia Iehova? Ia aha ia ore e topa i roto i tera marei? Mea faufaa roa ia ite i te mau pahonoraa ia ore to tatou taairaa e te Atua ra o Iehova ia fifihia!

EAHA PAHA TE MAU MEA E RIRI AI TATOU IA IEHOVA?

6, 7. No te aha te mau Iseraela i te tau o Mose i amuamu ai ia Iehova?

6 No te aha paha te aau o te hoê tavini taiva ore a Iehova e haamata ’i i te amuamu i te Atua? E hi‘opoa ana‘e e pae tumu e i te mau hi‘oraa Bibilia o te faataa mai mea nafea vetahi i te tau tahito i te toparaa i roto i tera marei.—Kor. 1, 10:11, 12.

E faahopearaa ino ia faaroo i te mau parau tano ore (A hi‘o i te paratarafa 7)

7 E ohipa te mau parau tano ore a vetahi ê i nia ia tatou. (A taio i te Deuteronomi 1:26-28.) No faaora-noa-hia ’tura to Iseraela i te faatîtîraa i Aiphiti. Ua tairi Iehova ahuru ati i nia i te nunaa haavî a haamou atu ai ia Pharao e ta ’na nuu i roto i te miti Uteute. (Exo. 12:29-32, 51; 14:29-31; Sal. 136:15) Fatata roa te nunaa o te Atua i te tomo i te Fenua tǎpǔhia. Haamata ’tura râ ratou i te amuamu ia Iehova. No te aha ratou i ere ai i te faaroo? Ua tarapape to ratou aau no te mau faatiaraa tano ore a te tahi mau manu. (Num. 14:1-4) Ei faahopearaa, aita te hoê ui taatoa i tomo i taua “fenua maitai” ra. (Deut. 1:34, 35) Eaha te haapii mai? No te huru paraparau tano ore a vetahi ê, e nehenehe tatou e ere i te faaroo a amuamu atu ai i ta Iehova mau haaraa i nia ia tatou.

8. No te aha te nunaa o te Atua i te tau o Isaia i haamata ’i i te faahapa ia ’Na no to ratou mau fifi?

8 E nehenehe te mau ati e fifi e haaparuparu mai. (A taio i te Isaia 8:21, 22.) I te tau o Isaia, ua fifihia te nunaa o Iuda. Ua haaatihia ratou e te enemi. Mea rahi tei poia, aita hoi i navai te maa. Te mea peapea roa ’tu râ, tei roto ratou i te o‘e pae varua. (Am. 8:11) Aita ratou e imi ra i te tauturu a Iehova. Ua haamata râ i te “tuhi” i to ratou arii e to ratou Atua. Oia mau, ua faahapa ratou ia Iehova no to ratou mau fifi. A faaû ai i te ati aore ra i te fifi, e parau atoa anei tatou i roto i to tatou aau, ‘Teihea roa Iehova i teie taime fifi?’

9. No te aha i hape ai te mana‘o o te mau Iseraela i te tau o Ezekiela?

9 Aita tatou i ite pauroa. No te mea aita te mau Iseraela i te tau o Ezekiela i ite pauroa no nia i te tupuraa taitahi, ua mana‘o ratou e “aore e tia” te haerea o Iehova. (Ezk. 18:29, Te Bibilia Mo’a, V.C.J.S., 1976) Noa ’tu e mea taotia to ratou ite, ua haa ratou mai te huru ra e e tiaraa to ratou no te haava i te Atua. I te tahi taime, aita paha tatou e taa maitai roa ra i te hoê faatiaraa Bibilia aore ra no te aha te tahi ohipa i tupu ai i roto i to tatou oraraa. E mana‘o anei tatou i roto i to tatou aau  e “aore e tia” ta Iehova haaraa?—Ioba 35:2.

10. E nafea te hoê taata e pee ai i te hi‘oraa ino o Adamu?

10 E faahape i te tahi atu no ta tatou mau hara e hapa. Ua faahapa te taata matamua ra o Adamu i te Atua no ta ’na iho hara. (Gen. 3:12) Noa ’tu e ua ite maitai Adamu i te mau faahopearaa ia ofati i ta te Atua ture, ua faahapa o ’na ia Iehova. Ua parau o ’na e na Iehova i horoa i te hoê vahine ino na ’na. Ua pee te tahi atu i te hi‘oraa o Adamu ma te faahapa i te Atua no ta ratou iho mau hape. E ui ana‘e ïa, ‘E inoino roa anei au no ta ’u mau hape a mana‘o atu ai e mea etaeta roa ta Iehova mau ture aveia?’

11. Eaha ta te hi‘oraa o Iona e haapii maira?

11 E haamata i te mana‘o noa ia tatou iho. Ua riri te peropheta Iona i te faaotiraa hamani maitai a Iehova no nia ia Nineve. (Iona 4:1-3) E au ra e ua mǎta‘u o ’na ia parauhia e e peropheta haavare o ’na aita ana‘e te oire e haamouhia. Mea faufaa a‘e no ’na to ’na roo i te taata tatarahapa no Nineve. E nehenehe atoa tatou e mana‘o mai ia ’na. Peneia‘e, mea maoro tatou i te poro-noa-raa e ua fatata roa te mahana rahi o Iehova. Teie râ, e riri anei tatou ia Iehova ia faaino mai te taata e aita hoi tera mahana i tae mai atura?—Pet. 2, 3:3, 4, 9.

E NAFEA IA ORE E ‘RIRI IA IEHOVA’?

12, 13. Ia aha ia haamata tatou i te ore e farii i te tahi mea ta Iehova e rave ra aore ra e vaiiho ra i te tupu?

12 Ia aha ia haamata tatou i te ore e farii i te tahi mea ta Iehova e rave ra aore ra e vaiiho ra i te tupu? A haamana‘o e mea paari ore ia na reira. Te na ô ra te tahi atu huriraa o te Maseli 19:3: “Na te maamaa o te taata e haapio i tona ra mau taahiraa, e ua ama tona  mafatu i te riri i te Atua.” (V.C.J.S.) E hi‘opoa ana‘e i teie nei e pae ravea o te tauturu mai ia ore e riri ia Iehova.

13 A atuatu i to mau taairaa e o Iehova. Eita tatou e riri ia Iehova a atuatu ai i te taairaa piri e o ’na. (A taio i te Maseli 3:5, 6.) Ia tiaturi tatou ia Iehova e tia ’i. Eiaha atoa e mana‘o noa ia tatou iho aore ra o to tatou mau hinaaro te mea faufaa a‘e. (Mas. 3:7; Koh. 7:16) Eita ïa tatou e faahapa ia Iehova no te tahi noa ’tu fifi.

14, 15. Eaha te tauturu mai ia ore te mau parau tano ore e ohipa i nia ia tatou?

14 Eiaha te mau parau tano ore ia ohipa i nia ia oe. E nehenehe ta te mau Iseraela i te tau o Mose e tiaturi e e aratai iho â Iehova ia ratou i te Fenua tǎpǔhia. (Sal. 78:43-53) A faaroo ai râ i na manu ahuru taiva, aore ratou i “mana‘o i te ohipa i ravehia e tana rima.” (Sal. 78:42) E piri roa ’tu â to tatou mau taairaa e o Iehova a feruri maite ai i ta ’na i rave no tatou. Eita ïa tatou e vaiiho i te mau mana‘o tano ore o vetahi ê e faataa ê ia tatou ia Iehova.—Sal. 77:11, 12.

15 E nehenehe atoa te hoê feruriraa tano ore no nia i to tatou mau hoa haamori e haafifi i to tatou mau taairaa e o Iehova. (Ioa. 1, 4:20) A faatoroahia ’i Aarona ei tahu‘a rahi, ua amuamu te mau Iseraela. No Iehova râ, e au ra e te amuamu ra ratou ia ’Na. (Num. 17:10) Hoê â huru ia autâ e ia amuamu tatou i te mau taeae ta Iehova e faaohipa ra no te aratai i te tuhaa o ta ’Na faanahonahoraa i nia i te fenua. Te amuamu ra ïa tatou ia Iehova.—Heb. 13:7, 17.

16, 17. Ia haamana‘o tatou i te aha a fifihia ’i?

16 E haamana‘o e e ere o Iehova te tumu o to tatou mau fifi. Ua huri tua te mau Iseraela i te tau o Isaia ia Iehova. Ua hinaaro noa râ Oia e tauturu ia ratou. (Isa. 1:16-19) Noa ’tu te fifi ta tatou e faaruru, e tamahanahanahia tatou ia ite e te tâu‘a maira te Atua e te hinaaro ra o ’na e tauturu mai. (Pet. 1, 5:7) Te fafau atoa nei o ’na e horoa mai i te puai titauhia no te faaoromai i te reira.—Kor. 1, 10:13.

17 Ia mauiui tatou no te tahi ohipa tia ore mai ia Ioba taiva ore, e haamana‘o ana‘e e e ere o Iehova te tumu. Te riri ra Iehova i te parau-tia ore e te hinaaro ra i te parau-tia. (Sal. 33:5) Ia riro tatou mai to Ioba hoa ra o Elihu, tei parau: “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino.” (Ioba 34:10) E ere o Iehova te tumu o to tatou mau fifi, te ho mai nei râ o ’na i ‘te mau mea maitatai e te tia roa.’—Iak. 1:13, 17.

18, 19. No te aha e tiaturi noa ’i ia Iehova? A faataa.

18 A tiaturi noa ia Iehova. E Atua tia roa o Iehova, mea teitei a‘e to ’na mau mana‘o i to tatou. (Isa. 55:8, 9) E tauturu mai te haehaa ia farii e mea taotia to tatou ite. (Roma 9:20) I te rahiraa o te taime, aita tatou i ite i te mau tupuraa atoa. Ua ite paha oe i te parau mau o teie maseli: “O tei na mua i te parau i ta ’na parau e hapehia te tia ra; te haere maira râ tei patoi ia ’na ei reira oia e itea ’i.”—Mas. 18:17.

19 Ia rave te hoê hoa piri i te tahi ohipa aita tatou e taa maitai ra aore ra  matau-ore-hia, e mana‘o oioi anei tatou e e haerea ino to ’na? Eita. Aita hoi tatou e taa ra i te mau tupuraa atoa. Mai te peu e e tiaturi tatou i to tatou hoa tia ore ma te here, hau atu â ïa i to tatou Metua i te ra‘i. Mea teitei a‘e to ’na haerea e mana‘o i to tatou!

20, 21. No te aha eiaha roa ’tu e faahapa ia Iehova no to tatou mau fifi?

20 A haamana‘o i te tumu mau o to tatou mau fifi. E farii ana‘e e o tatou te tumu o te tahi o to tatou mau fifi. (Gal. 6:7) Eiaha e faahapa ia Iehova. No te aha hoi? Teie te hoê hi‘oraa: Mea ra‘u te hoê taata a faahoro ai i to ’na pereoo. Û atura o ’na i te hoê tipuuraa purumu. Na vai te hape? Na te taata i hamani i te pereoo? E ere! Oia atoa, ua hamani Iehova ia tatou e te tiamâraa e maiti. Ua horoa atoa mai râ o ’na i te mau faaueraa no te rave i te mau faaotiraa î i te paari. No te aha ïa e faahapa ’i i to tatou Atua Poiete no ta tatou iho mau hape?

21 E ere o tatou noa te tumu o to tatou mau fifi atoa. E tau e e tupuraa mana‘o-ore-hia to tatou. (Koh. 9:11) Eiaha atoa e haamoe e o Satani te Diabolo te tumu matamua o te ino. (Ioa. 1, 5:19; Apo. 12:9) O ’na te enemi, e ere o Iehova!—Pet. 1, 5:8.

E POIHERE I TO TAAIRAA FAUFAA E O IEHOVA

No to raua tiaturi ia Iehova, ua haamaitaihia Iosua raua Kaleba (A hi‘o i te paratarafa 22)

22, 23. Eaha te haamana‘o ia paruparu tatou no to tatou mau fifi?

22 Ia fifihia oe, a haamana‘o i te hi‘oraa o Iosua e Kaleba. Taa ê atu i na manu ahuru, mea maitai te faatiaraa o na tane taiva ore. (Num. 14:6-9) Ua tiaturi raua ia Iehova. Noa ’tu râ, ua overe atoa raua i roto i te medebara e 40 matahiti e te toea o te mau Iseraela. Ua inoino anei Iosua raua Kaleba a mana‘o atu ai e e ere i te mea tano? Aita. Ua tiaturi raua ia Iehova. Ua haamaitaihia anei raua? E! Ua pohe te hoê ui taatoa i roto i te medebara. Area o raua, ua tomo ïa i te Fenua tǎpǔhia. (Num. 14:30) Oia atoa, e haamaitai mai Iehova ia ore tatou ia “toaruaru” i te rave i to ’na hinaaro.—Gal. 6:9; Heb. 6:10.

23 Ia aha ia paruparu oe no te mau fifi, no ta vetahi ê mau hape aore ra no ta oe iho? A haamana‘o i to Iehova mau huru maitatai faahiahia. Oia atoa i te tiaturiraa ta ’na e horoa ra. A ui, ‘Teihea roa vau ahani aita o Iehova?’ E vai piri noa ia ’na e eiaha roa ’tu e vaiiho i to aau ia riri ia ’na!