Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TIURAI 2013

‘A faaite mai na afea tena mea e tupu ai’

‘A faaite mai na afea tena mea e tupu ai’

‘Eaha te tapao o te hopea o teie nei ao?’—MAT. 24:3.

1. Mai te mau aposetolo, eaha ta tatou e hinaaro e ite?

FATATA ta Iesu taviniraa i te fenua i te hope e ua hinaaro ta ’na mau pǐpǐ e ite eaha te tiai ra ia ratou. Ua uiui atu ïa e maha o ta ’na mau aposetolo tau mahana hou o ’na a pohe ai: “Afea tena mea e tupu ai, ’e e eaha te tapao [o] te hopea . . . o teie nei ao?” (Mat. 24:3, Te Faufaa Api; Mar. 13:3) Ua pahono atu Iesu maoti te hoê parau tohu faufaa mau faatiahia e te Mataio pene 24 e 25. Ua tohu Iesu e rave rahi tupuraa faahiahia. Mea faufaa mau ta ’na mau parau no tatou. Te hinaaro atoa nei hoi tatou e ite eaha te tiai maira ia tatou.

2. (a) A mairi ai te tau, eaha ta tatou i maramarama ’tu â? (b) Eaha na uiraa e toru ta tatou e hi‘opoa mai?

2 A mairi ai te tau, ua pure e ua haapii te mau tavini a Iehova i ta Iesu parau tohu no nia i te mau mahana hopea. Ua tutava te mau taeae faatavaihia o te aratai ra i te faanahonahoraa i te maramarama ’tu â afea e tupu ai ta ’na mau parau. E hi‘opoa mai tatou i teie na uiraa e toru: Afea te “ati rahi” e haamata ’i? Afea Iesu e haava ’i i “te mamoe” e “te puaaniho”? Afea Iesu e “tae” mai ai, e haere mai ai aore ra e ho‘i mai ai?—Mat. 24:21; 25:31-33.

AFEA TE ATI RAHI E HAAMATA ’I?

3. I na mua ’‘e, eaha to tatou mana‘o no nia i te taime e tupu ai te ati rahi?

3 I mana‘o noa na tatou e ua haamata te ati rahi i 1914 i te Tama‘i rahi Matamua. Oia atoa e ua ‘haapotohia taua tau ra’ e Iehova i 1918 a faaea ’i te tama‘i ia poro te toea i te parau apî oaoa i te mau fenua atoa. (Mat. 24:21, 22) Ia oti tera pororaa, e haamouhia te faatereraa a Satani. No reira i mana‘ohia na e e toru tuhaa to te ati rahi: e haamata te ati (1914-1918), e tapeahia te reira (mai 1918 atu), e e hope i Aramagedo.

4. Eaha tei tauturu mai ia taa roa ’tu â i ta Iesu i tohu no nia i te mau mahana hopea?

 4 I muri a‘e râ i te hi‘opoa-faahou-raa i ta Iesu parau tohu, ua taa ia tatou e e piti tupuraa to te hoê tuhaa o ta ’na parau tohu no nia i te mau mahana hopea. (Mat. 24:4-22) Ua tupu na mua te reira i Iudea mai 33 e tae atu i 70 i muri a‘e i te Mesia. E e tupuraa â te itehia na te ao atoa nei i teie nei tau. E titauhia ïa e rave rahi faatanoraa. *

5. (a) Eaha te anotau fifi tei haamata i 1914? (b) Te tuea ra teie anotau ati i teihea anotau i tahito ra?

5 Ua taa atoa ia tatou e aita te ati rahi i haamata i 1914. No te aha hoi? Ia au i te parau tohu Bibilia, e haamata te ati rahi e te aroraa o te haapaoraa hape, eiaha e te hoê tama‘i i rotopu i te mau nunaa. E ere ïa te mau tupuraa tei haamata i 1914 i te haamataraa o te ati rahi, o te ‘matamehai râ no te pohe’ aore ra ati. (Mat. 24:8) Ua tuea teie mau ati i tei tupu i Ierusalema e Iudea mai 33 e tae atu i 66.

6. Eaha te tapao o te haamataraa o te ati rahi?

6 Eaha te tapao o te haamataraa o te ati rahi? Ua tohu Iesu: “Ia hi‘o outou i te mea riaria e pau ai ra, i faaite-atea-hia mai e te peropheta ra e Daniela, i te tiaraa i te vahi mo‘a ra, (e tei taio ra a haapao!) E te feia e parahi i Iudea ra, a horo ratou i te mou‘a i reira.” (Mat. 24:15, 16) Ua tupu na mua te reira i 66 i to te nuu Roma (“te mea riaria”) “tiaraa i te vahi mo‘a” ma te aro ia Ierusalema e to ’na hiero (te hoê vahi mo‘a no te ati Iuda). Teie te tupuraa rahi a‘e, e itehia tera “tiaraa” ia aro te mau Nunaa amui (“te mea riaria” no teie tau) i te Amuiraa faaroo Kerisetiano (mea mo‘a hoi no te mau faahua Kerisetiano) e i te toea o Babulonia Rahi. Ua faataa te Apokalupo  17:16-18 i te hoê â aroraa. O teie tupuraa te haamataraa o te ati rahi.

7. (a) Mea nafea te taata i te ‘oraraa ’tu’ i te senekele matamua? (b) Eaha te tiaturi ia tae mai te ati rahi?

7 Ua tohu atoa Iesu: “E haapotohia ra taua tau ra.” Ua tupu na mua te reira i 66, i to te nuu Roma ‘haapotoraa’ i ta ’na aroraa. Horo ê ihora te mau Kerisetiano faatavaihia no Ierusalema e Iudea no te ora ’tu. (A taio i te Mataio 24:22; Mal. 3:17) Eaha ïa te nehenehe e tiaturi ia tae mai te ati rahi? E ‘haapoto’ Iehova i te aroraa a te mau Nunaa amui i te haapaoraa hape ia ore te haamoriraa mau ia haamou-atoa-hia. E haapapuraa te reira e e faaorahia te nunaa o te Atua.

8. (a) Eaha te tupu ia oti te tuhaa matamua o te ati rahi? (b) Afea paha te melo hopea o na 144 000 e fana‘o ai i ta ’na utua maitai i te ra‘i? (A hi‘o i te nota.)

 8 Eaha te tupu ia oti te tuhaa matamua o te ati rahi? Ia au i ta Iesu mau parau, e itehia te hoê area tau o te hope ia haamata Aramagedo. Eaha te tupu i tera area tau? Tei roto te pahonoraa i te Ezekiela 38:14-16 e te Mataio 24:29-31. (A taio.) * I muri iho, e ite tatou ia Aramagedo, te tuhaa hopea o te ati rahi, o te tuea i te haamouraa o Ierusalema i 70. (Mal. 4:1) Aita te ati rahi i mua nei i itehia a‘enei “mai te matamehai mai o teie nei ao.” (Mat. 24:21) Ia oti, e haamata te Faatereraa tausani matahiti a te Mesia.

9. Mai te aha te huru o te nunaa o Iehova a taa ’i i ta Iesu i tohu no nia i te ati rahi?

9 Te haapuai maira teie parau tohu no nia i te ati rahi. Te haapapu maira hoi te reira e noa ’tu te fifi ta tatou e faaruru, e ora ’tu te nunaa o Iehova ei pǔpǔ i te ati rahi. (Apo. 7:9, 14) Hau roa ’tu â, te oaoa nei tatou. I Aramagedo hoi Iehova e faatia ’i i to ’na mana arii e e haamo‘a ’i i to ’na i‘oa.—Sal. 83:18; Ezk. 38:23.

 AFEA IESU E HAAVA ’I I TE MAMOE E TE PUAANIHO?

10. I na mua ’‘e, eaha ta tatou i maramarama no nia i te taime e haavahia ’i te mamoe e te puaaniho?

10 A hi‘o na i teie nei afea te tahi atu tuhaa o te parau tohu a Iesu e tupu ai: te parabole o te haavaraa o te mamoe e te puaaniho. (Mat. 25:31-46) I na mua ’‘e, ua mana‘o tatou e e haavahia te taata ei mamoe aore ra ei puaaniho i te mau mahana hopea mai 1914 mai â. Ua mana‘o tatou e o te feia o tei patoi i te poroi o te Basileia e o tei pohe hou te ati rahi te puaaniho e aita to ratou e tiaturiraa no te tia faahou mai.

11. No te aha aita ’i te haavaraa o te taata ei mamoe aore ra ei puaaniho i haamata i 1914?

11 I 1995, ua hi‘opoa faahou Te Pare Tiairaa i te Mataio 25:31 o te na ô ra: “Ia tae maira te Tamaiti a te taata ma ta ’na hanahana, e te mau melahi mo‘a atoa ra, ei reira oia e parahi ai i nia iho i to ’na terono hanahana.” Ua faataahia e ua riro mai Iesu ei Arii o te Basileia o te Atua i 1914, aita râ oia i “parahi . . . i nia iho i to ’na terono hanahana” ei Haava i “te mau fenua atoa.” (Mat. 25:32; a hi‘o i te Daniela 7:13.) Teie râ, te faataa nei te parabole o te mamoe e te puaaniho ia Iesu na mua roa ei Haava. (A taio i te Mataio 25:31-34, 41, 46.) I te mea e aita Iesu i riro atura ei Haava i te mau fenua atoa i 1914, aita ïa o ’na i haamata i te haava i te taata ei mamoe aore ra ei puaaniho i tera matahiti. * Afea ïa Iesu e haamata ’i i te haava?

12. (a) Afea Iesu e haa ’i na mua roa ei Haava i te mau fenua atoa? (b) Eaha te mau tupuraa tei faataahia i roto i te Mataio 24:30, 31 e te Mataio 25:31-33, 46? (A hi‘o atoa i te nota.)

 12 Te faaite maira te parau tohu a Iesu no nia i te mau mahana hopea e e haa oia ei Haava i te mau fenua atoa i muri a‘e i te haamouraa o te haapaoraa hape. Mai tei faahitihia i te  paratarafa 8, ua papaihia te tahi mau tupuraa e itehia i tera taime i roto i te Mataio 24:30, 31. A hi‘opoa ’i i tera mau irava, e ite oe e te tohu nei Iesu i te mau tupuraa tei tuea i tera i faahitihia i roto i te parabole o te mamoe e te puaaniho. Ei hi‘oraa: E haere mai te Tamaiti a te taata ma ta ’na hanahana e te mau melahi; e haaputuhia te mau opu e nunaa atoa; “e nânâ” te feia te haavahia ei mamoe ‘i to ratou mata i nia’ no “te ora mure ore” e tiai maira ia ratou. * ‘E oto’ te feia i haavahia ei puaaniho, e taa hoi ia ratou e o “te pohe mure ore” te tiai maira ia ratou.—Mat. 25:31-33, 46.

13. (a) Afea Iesu e haava ’i i te taata ei mamoe aore ra ei puaaniho? (b) E nafea teie ite e ohipa ’i i nia i to tatou mana‘o i ta tatou taviniraa?

13 E haava ïa Iesu i to te mau nunaa atoa ei mamoe aore ra ei puaaniho ia haere mai oia i te ati rahi. E i Aramagedo e haapohe-roa-hia ’i te feia tei au i te puaaniho. E nafea teie ite e ohipa ’i i nia i to tatou mana‘o i ta tatou taviniraa? Te tauturu maira te reira ia haamana‘o i te faufaaraa o tera ohipa. E tae noa ’tu i te ati rahi, e taime â to te taata no te taui i to ratou huru feruriraa e no te haere na nia i te e‘a pirihao e “tae atu ai i te ora.” (Mat. 7:13, 14) Te faaite nei paha te taata e e au ratou i te mamoe aore ra i te puaaniho. Ia haamana‘o râ tatou e i te ati rahi e haava-roa-hia ’i te mamoe e te puaaniho. E tamau ana‘e ïa i te poro ia faaroo e ia farii te taata e rave rahi roa i te poroi o te Basileia.

E tae noa ’tu i te ati rahi, e taime â to te taata no te taui i to ratou huru feruriraa (A hi‘o i te paratarafa 13)

 AFEA IESU E “TAE” MAI AI, E HAERE MAI AI AORE RA E HO‘I MAI AI?

14, 15. Eaha na irava e maha te tano ra i te haerea mai o te Mesia ei Haava?

 14 E mea tia anei ia faatano i to tatou ite no nia i te taime e itehia ’i te tahi atu mau tupuraa faufaa? No te ite, e hi‘opoa ana‘e i ta Iesu parau tohu.

15 I roto i te tuhaa o ta ’na parau tohu itehia i roto i te Mataio 24:29–25:46, ua faataa na mua Iesu i te tupu i te mau mahana hopea e i te ati rahi. I roto i tera mau irava, e vau taime to Iesu faahitiraa i to ’na ‘taeraa mai,’ “haerea mai” aore ra ‘ho‘iraa mai.’ * No nia i te ati rahi, ua na ô oia: “Ia hi‘o ratou i te Tamaiti a te taata i te haerea mai na nia i te ata.” “Aore hoi outou i ite i te hora e tae mai ai to outou Fatu.” “Ei te hora mana‘o-ore-hia e outou na e tae mai ai te Tamaiti a te taata nei.” I roto i ta ’na parabole o te mamoe e te puaaniho, ua parau Iesu: “Ia tae maira te Tamaiti a te taata ma ta ’na hanahana.” (Mat. 24:30, 42, 44; 25:31) No te haerea mai o te Mesia ei Haava teie mau irava taitahi. Ihea i roto i ta Iesu parau tohu e itehia ’i na faahitiraa e maha e toe ra?

16. Ua faahitihia te haerea mai o Iesu i roto i teihea ’tu â mau irava?

16 No nia i te tavini haapao maitai e te paari, te na ô ra Iesu: “E ao to te reira tavini, to tei roohia mai e to ’na ra fatu te na reira ra.” Aore ra ia au i te Traduction du monde nouveau, “ia ite to ’na Fatu tei tae mai e te na reira ra oia.” I roto i te parabole o te mau paretenia, te parau ra Iesu: “E te haere atura ratou e hoo [i te mori], tae maira taua tane faaipoipo apî ra.” I roto i te parabole o te mau taleni, te faatia ra Iesu: “E maoro a‘era, ho‘i maira [“tae maira,” Kingdom Interlinear] te fatu o taua mau tavini ra.” I roto noâ i tera parabole, te na ô ra te fatu: “E ia tae mai au ra noaa ihora ta ’u.” (Mat. 24:46; 25:10, 19, 27) Afea ïa teie taeraa mai o Iesu i faahitihia i ǒ nei e maha taime?

17. Eaha ta tatou i parau na no nia i te taeraa mai faahitihia e te Mataio 24:46?

 17 I na mua ’‘e, ua faataa ta tatou mau papai e no te haerea mai o Iesu i 1918 teie na irava e maha. Ei hi‘oraa, a hi‘o i ta Iesu i parau no nia i “te tavini haapao maitai e te paari.” (A taio i te Mataio 24:45-47.) * I mana‘o na tatou e ua taaihia te taeraa mai, i te irava 46, i te taime i haere mai ai Iesu e hi‘opoa i te maitai pae varua o tei faatavaihia i 1918. Oia atoa e ua faatoroahia te tavini ei tiaau i nia i te tao‘a atoa a te Fatu i 1919. (Mal. 3:1) Ma te hi‘opoa ’tu â râ i te parau tohu a Iesu, e titauhia ia faatano i to tatou ite no nia i te taime e tupu ai te tahi mau tuhaa. No te aha?

18. A hi‘opoa ’i i ta Iesu parau tohu, afea o ’na e haere mai ai?

18 I roto i te mau irava na mua ’‘e te Mataio 24:46, e pinepine te ta‘o hurihia ei “haerea mai” e “tae mai” i te taaihia i te taime e haere mai ai Iesu i te ati rahi no te haava e te haamou i te mau nunaa. (Mat. 24:30, 42, 44) Ia au i te  paratarafa 12, te faataa ra te Mataio 25:31 i tera noa iho â taime haavaraa i mua nei. Afea ïa Iesu e tae mai ai no te faatoroa i te tavini haapao maitai i nia i ta ’na mau tao‘a atoa faahitihia e te Mataio 24:46, 47? Mea tano ia mana‘o e e tupu te reira i to ’na haerea mai i mua nei, oia hoi i te ati rahi. Hau atu â, a hi‘opoa ’i i ta Iesu parau tohu, ua taaihia na irava e vau no nia i to ’na haerea mai i te taime haavaraa i mua nei a tupu ai te ati rahi.

19. Eaha te mau faatanoraa ta tatou i hi‘opoa mai? O teihea mau uiraa te pahonohia i to muri nei mau tumu parau?

19 Ei haamana‘oraa, eaha ta tatou i haapii mai? I te omuaraa o te tumu parau, ua tuuhia e toru uiraa. Ua hi‘opoa na mua tatou e aita te ati rahi i haamata i 1914, e haamata râ ia aro atu te mau Nunaa amui ia Babulonia Rahi. I muri iho, ua hi‘o mai tatou e aita te haavaraa a Iesu i te mamoe e te puaaniho i haamata i 1914, e tupu râ i te ati rahi. E i te pae hopea, ua hi‘opoa mai tatou e aita Iesu i haere mai e faatoroa i te tavini haapao maitai i nia i ta ’na mau tao‘a atoa i 1919, e na reira râ o ’na i te ati rahi. Afea ïa e tupu ai na mea e toru? I te ati rahi. E taui atoa anei teie mau faatanoraa i to tatou ite no nia i te faahoho‘araa o te tavini haapao maitai? Hoê â atoa anei no te tahi atu mau parabole, aore ra faahoho‘araa, a Iesu o te tupu i teie anotau hopea nei? E hi‘opoahia teie na uiraa faufaa i to muri nei mau tumu parau.

 

^ par. 4 Paratarafa 4: No te ite atu â, a hi‘o i Te Pare Tiairaa o te 15 no Fepuare 1994, api 8-21, e o te 1 no Me 1999, api 8-20.

^ par. 8 Paratarafa 8: O te ‘haaputuraa o te feia maitihia’ te tahi tupuraa faahitihia e teie mau irava. (Mat. 24:31) Afea ïa te feia faatavaihia atoa o te ora noâ i te fenua ia oti te tuhaa matamua e faatiahia ’i i te ra‘i? E au ra e e faatiahia ratou i te ra‘i hou te tama‘i o Aramagedo. Mea taa ê teie i tei parauhia i roto i te “Questions des lecteurs” o Te Pare Tiairaa o te 15 no Atete 1990, api 30 (Farani).

^ par. 11 Paratarafa 11: A hi‘o i Te Pare Tiairaa o te 15 no Atopa 1995, api 18-28.

^ par. 12 Paratarafa 12: A hi‘o i te hoê â faatiaraa i roto i te Luka 21:28.

^ par. 15 Paratarafa 15: E toru ta‘o ta Te Bibilia Mo‘a ra e faaohipa ra no te huri i te ihoparau Heleni er′kho·mai: “tae mai,” “haerea mai” e “ho‘i maira.”

^ par. 17 Paratarafa 17: Mataio 24:46 (Traduction du monde nouveau): “E oaoa taua tavini ra ia ite to ’na Fatu tei tae mai e te na reira ra oia.”