Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIURAI 2013

“O vai hoi te tavini haapao maitai e te paari?”

“O vai hoi te tavini haapao maitai e te paari?”

“O vai hoi te tavini haapao maitai e te paari, ta to ’na ra fatu i faatavana i to ’na utuafare?”—MAT. 24:45.

1, 2. (a) O vai te arai ta Iesu e faaohipa nei no te faaamu ia tatou? (b) No te aha mea faufaa roa ’i ia ite o vai tera arai?

TEIE ta te hoê tuahine i papai i te mau taeae i te pu rahi a te mau Ite no Iehova no te faaite i to ’na mauruuru: “E te mau taeae e, e rave rahi taime, ua tuu outou i roto i to ’u rima i te mau tumu parau o ta ’u iho â i hinaaro i te taime mau.” Hoê â huru aau to te rahiraa o tatou, e ere anei? Ia maere anei tatou? Eita.

2 Te fana‘o nei tatou i te maa pae varua i te taime au. E tapao ïa e ua tapea Iesu, te Upoo o te amuiraa, i ta ’na i fafau. Maoti o vai ma e faaamu mai ai oia? A horoa ’i i te tapao o to ’na vairaa mai, ua parau Iesu e e faaohipa o ’na i “te tavini haapao maitai e te paari” no te horoa i te “maa i te hora mau” i to ’na utuafare. * (A taio i te Mataio 24:45-47.) O teie tavini haapao maitai te arai ta Iesu e faaohipa ra no te faaamu i ta ’na mau pǐpǐ mau i teie anotau hopea. Mea faufaa roa ia ite o vai te tavini haapao maitai. Ua taaihia to tatou maitai pae varua e to tatou mau taairaa e te Atua i tera arai.—Mat. 4:4; Ioa. 17:3.

3. Eaha tei itehia na i roto i ta tatou mau papai no nia i te faahoho‘araa o te tavini haapao maitai?

3 E nafea ïa ia taa i te faahoho‘araa a Iesu no nia i te tavini haapao maitai? Teie tei itehia na i roto i ta tatou mau papai: I te Penetekose 33, ua faatoroa Iesu i te tavini haapao maitai i nia i to ’na utuafare. O vai te tavini? Mai te matahiti 33, o te taatoaraa ïa o te mau Kerisetiano faatavaihia o te ora i nia i te fenua noa ’tu eaha te tau. Te utuafare, o te mau Kerisetiano faatavaihia taitahi ïa. I 1919, ua faatoroa Iesu i te tavini haapao maitai i nia “i te mau tao‘a atoa na ’na ra.” Oia hoi te mau ohipa atoa i te fenua  nei tei taaihia i te Basileia. I muri a‘e râ i te hi‘opoa-maite-raa i te reira e te feruri-maite-raa ’tu na roto i te pure, e au ra e mea tia ia faatanohia to tatou ite i te mau parau a Iesu no nia i te tavini haapao maitai e te paari. (Mas. 4:18) E hi‘opoa ana‘e i teie faahoho‘araa e eaha ta tatou tuhaa i roto ei Kerisetiano faatavaihia aore ra aita.

AFEA TE FAAHOHO‘ARAA E TUPU AI?

4-6. No te aha e parau ai e ua haamata te faahoho‘araa a Iesu o te tavini haapao maitai i te tupu i muri iho noa i te matahiti 1914?

4 Te faaite ra te mau irava tapiri o te faahoho‘araa o te tavini haapao maitai e te paari e ua haamata te reira i te tupu i teie anotau hopea nei. Eiaha râ i te Penetekose 33. E hi‘o ana‘e no te aha.

5 E tuhaa te faahoho‘araa o te tavini haapao maitai o te parau tohu a Iesu no nia i “te tapao o [to ’na] vairaa mai e o te anotau hopea o teie nei ao.” (Mat. 24:3, Traduction du monde nouveau) E piti tupuraa to te tuhaa matamua o te parau tohu i roto i te Mataio 24:4-22. A tahi, mai te matahiti 33 e tae atu i te matahiti 70. E te piti, e tupuraa rahi a‘e ïa, i teie mahana. Te auraa anei ïa e e piti atoa tupuraa to te mau parau a Iesu no nia i te tavini haapao maitai? E ere.

6 I roto i te Mataio 24:29, ua faaite na mua Iesu i te mau tupuraa itehia i teie mahana. (A taio i te Mataio 24:30, 42, 44.) No nia i te tupu i te ati rahi, ua parau o ’na e e hi‘o te taata “i te Tamaiti a te taata i te haerea mai na nia i te ata o te ra‘i.” I te feia o te ora i te anotau hopea, ua faaara ’tu Iesu: “Aore hoi outou i ite i te hora e tae mai ai to outou Fatu” e “Ei te hora mana‘o-ore-hia e outou na e tae mai ai te Tamaiti a te taata nei.” * Ua faatia Iesu i te faahoho‘araa o te tavini haapao maitai a faahiti ai i te mau tupuraa e itehia i te anotau hopea. Ua haamata ïa ta ’na mau parau no nia i te tavini haapao maitai i te tupu i muri iho noa i te haamataraa te anotau hopea i 1914. No te aha mea tano ai teie faataaraa?

7. Eaha te uiraa faufaa roa i hiti mai a haamata ’i te tau auhune, e no te aha?

7 A feruri na i teie uiraa: “O vai hoi te tavini haapao maitai e te paari?” Aita teie uiraa i hiti mai i te senekele matamua. Mai ta tatou i hi‘o i te tumu parau na mua ’tu, ua tia i te mau aposetolo ia rave i te mau semeio e ia horoa ’toa i te mau ô semeio ei haapapuraa o te turu o te Atua. (Ohi. 5:12) Aita ïa e faufaa ia ui o vai mau ta te Mesia e faatoroa no te aratai ia ratou. Ua taui roa râ i 1914. Ua haamata te tau auhune. Ua tae i te taime no te faataa ê i te zizania i te sitona. (Mat. 13:36-43) Mea rahi te faahua Kerisetiano tei parau e o ratou te pǐpǐ mau a Iesu. Teie ïa te uiraa faufaa roa: E nafea ia ite o vai te sitona, oia hoi te mau Kerisetiano faatavaihia? Ua horoa te faahoho‘araa o te tavini haapao maitai i te hoê pahonoraa. O te mau pǐpǐ faatavaihia a te Mesia ana‘e te faaamu-maitai-hia i te pae varua.

O VAI TE TAVINI HAAPAO MAITAI E TE PAARI?

8. No te aha e Kerisetiano faatavaihia ana‘e to roto i te tavini haapao maitai?

8 E Kerisetiano faatavaihia ana‘e to roto i te tavini haapao maitai. E “autahu‘a arii” ratou o tei faauehia ‘ia faaite hua i te maitai o tei parau ia ratou i to roto i te pouri, ia tae i to ’na ra maramarama umerehia.’ (Pet. 1, 2:9) Mea tano iho â ïa ia haapii roa ’tu te mau melo o  tera “autahu‘a arii” i te parau mau i to ratou mau hoa haamori.—Mal. 2:7; Apo. 12:17.

9. O te taatoaraa o te mau Kerisetiano faatavaihia anei te tavini haapao maitai? A faataa.

9 O te taatoaraa o te mau Kerisetiano faatavaihia anei te tavini haapao maitai? Aita. E ere na te taatoaraa e horoa ra i te maa pae varua i to ratou mau taeae na te ao. E tavini tauturu paha te tahi mau taeae faatavaihia aore ra e matahiapo. E haapii atu ratou i tera i tera fare e i roto i te amuiraa, e te pee noa nei ratou i te aratairaa no ǒ mai i te pu rahi. Aita râ ratou e horoa ra i te maa pae varua i to ratou mau taeae na te ao. E tuahine haehaa atoa vetahi mau Kerisetiano faatavaihia o te ore roa ’tu e tamata i te haapii i te amuiraa.—Kor. 1, 11:3; 14:34.

10. O vai te tavini haapao maitai e te paari?

10 O vai ïa te tavini haapao maitai e te paari? I faaamu na Iesu i te rahiraa maoti tau taata noa. O te hoê pǔpǔ iti taeae faatavaihia ïa teie tavini o te apiti roa ’tu i te faaineineraa e te opereraa o te maa pae varua mai 1919 mai â. I te mau mahana hopea, ua ohipa te mau taeae faatavaihia o te tavini haapao maitai i te pu rahi. Ua taa-maitai-hia i teie nei e o te Tino aratai a te mau Ite no Iehova teie tavini. A tapao râ e ua faahiti Iesu i roto i ta ’na faahoho‘araa i te hoê “tavini.” E pǔpǔ ïa teie tavini. E rave ïa te Tino aratai i te mau faaotiraa ei pǔpǔ.

O VAI TE UTUAFARE?

11, 12. (a) Eaha na faatoroaraa ta te tavini haapao maitai e fana‘o? (b) Afea Iesu i te faatoroaraa i te tavini haapao maitai i nia i to ’na utuafare, e o vai ma ta ’na i maiti?

11 A tapao na e i roto i ta Iesu faahoho‘araa, ua fana‘o te tavini haapao maitai e te paari e piti faatoroaraa: i nia i te utuafare e i nia i te mau tao‘a atoa a te fatu. I te mea e i teie anotau hopea noa te faahoho‘araa e tupu ai, e fana‘o ratou i na faatoroaraa i muri a‘e i to Iesu ariiraa mai i 1914.

12 Afea Iesu i te faatoroaraa i te tavini haapao maitai i nia i to ’na utuafare? No te ite, e ho‘i ana‘e i te haamataraa o te tau auhune i 1914. Mai ta tatou i haapii mai, mea rahi te pǔpǔ i tera tau o tei parau  e e Kerisetiano ratou. I roto i teihea pǔpǔ Iesu e maiti ai i te tavini haapao maitai? Ua pahonohia teie uiraa i muri a‘e i to ’na haereraa mai e to ’na Metua e hi‘opoa i te hiero mai 1914 e tae atu i te omuaraa o te matahiti 1919. * (Mal. 3:1) Ua oaoa raua i te ite i te hoê pǔpǔ iti Feia haapii Bibilia taiva ore o tei here mau ia Iehova e o tei hinaaro i ta ’Na Parau. Mea faufaa iho â ïa te tahi tamâraa i nia i te hoê tau poto. Ua farii râ ratou. (Mal. 3:2-4) O teie Feia haapii Bibilia taiva ore te mau Kerisetiano mau tei au i te sitona. I 1919, ua maiti Iesu i rotopu ia ratou te mau taeae faatavaihia aravihi no te riro ei melo o te tavini haapao maitai e te paari e ua faatoroa ia ratou i nia i to ’na utuafare.

13. O vai to roto i te utuafare, e no te aha?

13 O vai ïa te utuafare? O te feia e fana‘o ra i te maa pae varua. I te omuaraa o te anotau hopea, o te mau Kerisetiano faatavaihia atoa te utuafare. I muri a‘e, ua taio-atoa-hia i roto te nahoa rahi o te mau mamoe ê atu. ‘Hoê nǎnǎ’ ta te Mesia e te rahiraa i roto, e melo ïa o te mamoe ê atu. (Ioa. 10:16) Te fana‘o nei na pǔpǔ toopiti i te hoê maa pae varua i te taime au horoahia e te tavini haapao maitai. Eaha ïa no te mau melo o te Tino aratai, o ratou hoi te tavini haapao maitai e te paari? Mea faufaa atoa ia faaamuhia ratou i te pae varua. Te farii haehaa nei ïa ratou e e tei roto atoa ratou taitahi i te utuafare mai te tahi atu mau pǐpǐ aau haavare ore a Iesu.

E tiaturiraa no te ra‘i to tatou aore ra no te fenua, tei roto tatou paatoa i te utuafare e te hinaaro nei i te hoê â maa pae varua i te taime au

14. (a) Eaha te hopoia i horoahia i te tavini haapao maitai? A faataa. (b) Eaha te faaararaa a Iesu i te tavini haapao maitai e te paari? (A hi‘o i te tumu parau tarenihia “Ia rave râ te tavini i te mea ino . . .”)

14 Ua horoa Iesu i te hoê hopoia faufaa i te tavini haapao maitai e te paari. I tahito ra, na te hoê tavini tiaturihia aore ra te hoê tiaau e haapao i te utuafare. (Luka 12:42) Hoê â huru, na te tavini haapao maitai e te paari te hopoia e haapao i te mau mea atoa a te Mesia i te fenua nei. Te tiaau-atoa-raa ïa i te mau faufaa materia, i te pororaa e i te porotarama o te mau tairururaa. Oia atoa i te piaraa i te mau papai Bibilia e faaohipahia no te taviniraa, no ta tatou iho haapiiraa e no te amuiraa. Ua taaihia te maitai o te utuafare i te mau  maa pae varua atoa no ǒ mai i te pǔpǔ o te tavini.

FAATOROAHIA I NIA I TE MAU TAO‘A ATOA A TE FATU—AFEA?

15, 16. Afea Iesu e faatoroa ’i i te tavini haapao maitai i nia i ta ’na atoa ra mau tao‘a?

15 Afea te piti o te faatoroaraa, oia hoi i nia i “te mau tao‘a atoa” a Iesu? Ua parau o ’na: “E ao to te reira tavini, to tei roohia mai e to ’na ra fatu te na reira ra. Oia mau ta ’u e parau atu ia outou nei, e faariro oia ia ’na ei tiaau i te mau tao‘a atoa na ’na ra.” (Mat. 24:46, 47) E tupu te piti o te faatoroaraa i muri a‘e i to Iesu taeraa mai e i to ’na iteraa e “te na reira ra” te tavini. Oia hoi te horoa maite ra o ’na i te maa pae varua. Te vai ra ïa te hoê area taime i rotopu i na faatoroaraa e piti. No te taa e nafea e afea Iesu e faatoroa ’i i te tavini i nia i ta ’na atoa ra mau tao‘a, mea faufaa ia ite afea o ’na e tae mai ai e eaha ta ’na mau tao‘a.

16 Afea Iesu e tae mai ai? I roto i te mau irava na mua ’tu, ua taaihia te ‘taeraa mai’ aore ra te “haerea mai” o Iesu i te taime e haere mai ai o ’na no te haava e te haamou i te feia ino i te hopea o teie nei ao. * (Mat. 24:30, 42, 44) Hoê â atoa ïa no te taeraa mai o Iesu faahitihia i roto i te faahoho‘araa o te tavini haapao maitai, e tupu te reira i te ati rahi.

17. Eaha to roto i te mau tao‘a atoa a Iesu?

17 Eaha to roto i te mau “tao‘a atoa” a Iesu? Aita Iesu i faaohipa i te ta‘o “atoa” no te taotia i ta ’na mau tao‘a i te mau mea i te fenua. E mana rahi atoa to ’na i te ra‘i. Ua parau o ’na: “O te mana atoa i te ra‘i e te ao [aore ra fenua] atoa nei ua pûpûhia mai tei ia ’u ana‘e.” (Mat. 28:18; Eph. 1:20-23) Mai 1914, tei roto atoa te  Basileia Mesia i ta ’na mau tao‘a e e tufa o ’na i te reira e ta ’na mau pǐpǐ faatavaihia.—Apo. 11:15.

18. No te aha Iesu e oaoa ’i i te faatoroa i te tavini haapao maitai i nia i ta ’na atoa ra mau tao‘a?

18 Eaha ïa ta te reira e haapii maira? Ia haere mai Iesu ei Haava i te ati rahi, e ite o ’na e ua horoa noa iho â te tavini haapao maitai i te maa pae varua i te taime au i te utuafare. E oaoa ïa Iesu i te faatoroa i te tavini haapao maitai i nia i ta ’na atoa ra mau tao‘a. Te piti ïa o te faatoroaraa. E fana‘o te mau melo o te tavini haapao maitai e te paari i te reira a noaa ’i ta ratou utua maitai i te ra‘i ei arii apiti e te Mesia.

19. E haamaitairaa rahi a‘e anei to te tavini haapao maitai i nia i te ra‘i i te toea o tei faatavaihia?

19 E haamaitairaa rahi a‘e anei to te tavini haapao maitai i nia i te ra‘i i te toea o tei faatavaihia? Eita. E nehenehe te tahi atu e fana‘o atoa i te hoê haamaitairaa fafauhia i te hoê pǔpǔ iti. A hi‘o na i ta Iesu i parau i ta ’na na aposetolo taiva ore 11 i te po hou o ’na a pohe ai. (A taio i te Luka 22:28-30.) Ua fafau o ’na i teie pǔpǔ iti taata e e haamaitairaa rahi to ratou no to ratou taiva ore. E riro ratou ei arii apiti e o ’na. Tau matahiti i muri a‘e, ua faaite o ’na e e parahi te taatoaraa o na 144 000 i nia i te mau terono ei arii apiti. (Apo. 1:1; 3:21) Hoê â huru i ǒ nei. Ia au i te Mataio 24:47, ua fafau Iesu e e faatoroahia te hoê pǔpǔ iti taata, oia hoi te mau taeae faatavaihia o te tavini haapao maitai, i nia i ta ’na atoa ra mau tao‘a. E tufa râ o ’na i to ’na mana rahi i te ra‘i e te taatoaraa o na 144 000.—Apo. 20:4, 6.

E tufa Iesu i to ’na mana rahi i te ra‘i e te taatoaraa o na 144 000 (A hi‘o i te paratarafa 19)

20. No te aha Iesu i faatoroa ’i i te tavini haapao maitai? Eaha ta oe faaotiraa?

20 Mai ta ’na i rave i te senekele matamua, te faaamu nei Iesu i te rahiraa maoti tau taata noa: te tavini haapao maitai e te paari. Ua faatoroa o ’na i tera tavini haapao maitai ia fana‘o iho â ta ’na mau pǐpǐ aau haavare ore, faatavaihia aore ra aita, i te maa pae varua i te taime au i te anotau hopea. E faaite noa ana‘e ïa i to tatou mauruuru ma te turu maite i te mau taeae faatavaihia o te tavini haapao maitai e te paari.—Heb. 13:7, 17.

 

^ par. 2 Paratarafa 2: I te hoê taime na mua ’tu, ua faatia Iesu i te hoê â huru faahoho‘araa i reira o ’na i te faahitiraa i te “tavini” mai te “tiaau” e te “utuafare” mai “to ’na atoa ra mau tavini.”—Luka 12:42-44.

^ par. 6 Paratarafa 6: Mea taa ê te “haerea mai” e te ‘taeraa mai’ (Heleni, er′kho·mai) o te Mesia i to ’na “vairaa mai” (pa·rou·si′a). Ua haamata to ’na vairaa mai itea ore hou to ’na taeraa mai ei Haava.

^ par. 12 Paratarafa 12: A hi‘o i roto i teie vea te tumu parau “Tei ia outou na vau, i te mau mahana atoa,” i te api 10-12, paratarafa 5-8.

^ par. 16 Paratarafa 16: A hi‘o i roto i teie vea te tumu parau “A faaite mai na afea tena mea e tupu ai” i te api 7-8, paratarafa 14-18.