Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2013

E vaiiho i te a‘o a Iehova ia ohipa i nia ia oe

E vaiiho i te a‘o a Iehova ia ohipa i nia ia oe

“E riro oe i te aratai ia ’u i ta oe ra parau, e te hopea a‘e ra e hopoi ai oe ia ’u i te ao.”—SAL. 73:24.

1, 2. (a) Ia aha tatou no te faatupu i te taairaa piri e o Iehova? (b) Eaha te maitai ia hi‘opoa i te mau faatiaraa Bibilia no nia i te huru o te taata a a‘ohia ’i ratou e te Atua?

“E MEA maitai . . . ia ’u ia haafatata ’tu i te Atua: ua tiaturi au i te Fatu ra ia Iehova.” (Sal. 73:28) No te aha te fatu salamo i na reira ’i no nia i to ’na tiaturi i te Atua? Ua taiâ na mua te aau o teie fatu salamo a ite ai o ’na i te hau o te feia ino. Ua na ô oia: “E tamâraa faufaa ore maori ta ’u i tau aau nei, e te horoiraa hoi i tau rima i te hapa ore.” (Sal. 73:2, 3, 13, 21) A haere ai râ o ’na i te “vahi mo‘a a te Atua,” ua tia ia ’na ia faaafaro i to ’na huru feruriraa e ia faatupu noa i te taairaa piri e o Iehova. (Sal. 73:16-18) Ua haapii teie fatu salamo i te tahi mea faufaa mau: No te faatupu i te taairaa piri e o Iehova, e mea tia ia riro ei melo o to ’Na nunaa, ia farii i te a‘oraa e ia faaohipa i te reira.—Sal. 73:24.

2 E hinaaro tatou e fana‘o i te taairaa piri e te Atua ora e te parau mau. Mea faufaa ïa ia farii i ta Iehova a‘oraa. Mea na reira hoi o ’na e ohipa ’i i nia ia tatou ia riro tatou ei taata o te faaoaoa ia ’na! I tahito ra, ua imi Iehova i te ravea ia farii te taata e te mau nunaa i ta ’na a‘o. Ua faatiahia to ratou hi‘oraa i roto i te Bibilia no te haapii e te a‘o ia tatou i teie mau mahana hopea nei. (Roma 15:4; Kor. 1, 10:11) E hi‘opoa ana‘e i teie mau hi‘oraa. E ite mai tatou eaha to Iehova huru e e nafea tatou e maitai ai ma te vaiiho ia ’na ia ohipa i nia ia tatou.

 NAFEA TE POTERA E FAAOHIPA ’I I TO ’NA TIARAA MANA?

3. I roto i te Isaia 64:8 e te Ieremia 18:1-6, mea nafea te tiaraa mana o Iehova i nia i te taata i te faahoho‘araahia? (A hi‘o i te hoho‘a matamua.)

3 Te faataa ra te Isaia 64:8 i te tiaraa mana o Iehova i nia i te taata e te nunaa ma teie faahoho‘araa: “E Iehova, o oe to matou metua; e araea matou, e na oe matou i hamani: e ohipa ana‘e matou na to rima.” Na te potera noa e faaoti e e riro mai te araea mai tera aore ra tera farii. Aita e parau ta te araea. Hoê â huru no te taata e te Atua. Aita e tiaraa to tatou no te parau i te Atua e nafea ia ohipa i nia ia tatou.—A taio i te Ieremia 18:1-6.

4. Te faahepo ra anei Iehova i te taata aore ra te nunaa ia farii ia ohipa o ’na i nia ia ratou? No te aha?

4 Ua ohipa Iehova i nia ia Iseraela mai te potera i nia i te araea. Mea taa ê râ o ’na. Ua horoa Iehova i te taata e te nunaa te hoê ô faufaa mau, te tiamâraa e maiti. Aita o ’na i hamani ia vetahi ei taata ino e i te tahi atu ei taata maitai. Aita atoa o ’na e faaohipa ra i to ’na tiaraa mana no te faahepo i te taata ia auraro ia ’na. Na te taata iho e maiti e vaiiho i te Atua Poiete ra o Iehova ia ohipa i nia ia ratou aore ra aita.—A taio i te Ieremia 18:7-10.

5. Eaha ta Iehova e rave ia patoi etaeta te taata ia ohipa o ’na i nia ia ratou?

5 E nafea te Potera Rahi e faaohipa ’i i to ’na tiaraa mana ia patoi etaeta ’tu te taata ia ’na? A feruri na i te tupu mea fifi ana‘e no te potera ia hamani i te farii ta ’na i hinaaro e te araea. E nehenehe ta ’na e hamani i te tahi atu farii e tera araea aore ra e faarue roa ’tu! Aita ana‘e e nehenehe e faaohipa faahou i tera araea, e pinepine e na te potera te hape. Area râ to tatou Potera, eita roa ’tu o ’na e hape. (Deut. 32:4) Aita ana‘e te hoê taata e hinaaro i ta Iehova tauturu, na ’na noa iho â te hape. E faaohipa Iehova i to ’na tiaraa mana i nia i te taata ma te faatano i ta ’na mau haaraa ia au i ta ratou e rave. E faufaahia te taata o te farii i ta ’na tauturu. Ei hi‘oraa, e “farii o te aroha” te mau Kerisetiano faatavaihia o tei hamanihia ei “farii no te mea maitai.” Area te feia o te patoi etaeta ’tu i te Atua, e riro ïa ei “farii no te riri i faaauhia no te pohe.”—Roma 9:19-23.

6, 7. Ua aha te arii Davida e te arii Saula a a‘ohia ’i raua e Iehova?

 6 E ohipa atoa Iehova i nia i te taata ma te a‘o ia ratou. E hi‘o ana‘e mea nafea Iehova i te faaohiparaa i to ’na tiaraa mana i nia i na arii e piti matamua o Iseraela: Saula e Davida. Ua faaturi Davida ia Bate-seba e ua mauiui a‘era o ’na e vetahi ê atoa. Noa ’tu e e arii Davida, ua a‘o maitai iho â Iehova ia ’na ma te tono i ta ’na peropheta Natana. (Sam. 2, 12:1-12) Ua aha Davida? Ua tatarahapa mau oia e ua fana‘o i te aroha hamani maitai o te Atua.—A taio i te Samuela 2, 12:13.

 7 Area te arii Saula, aita o ’na i farii i te a‘oraa. Na roto i te peropheta Samuela, ua a‘o tia ’tu Iehova ia Saula ia haapohe i te mau taata atoa no Amaleka e ta ratou mau animara. Ua faaroo ore Saula i te faaueraa a te Atua. Aita o ’na i haapohe i te arii Agaga e i te mau animara maitai roa ’‘e. (Sam. 1, 15:1-3, 7-9, 12) E nehenehe ta Saula e faaroo i te a‘oraa e e farii ia ohipa te Potera  Rahi i nia ia ’na. Aita râ o ’na i hinaaro e taui. Ua mana‘o o ’na e e tumu maitai ta ’na no te tâu‘a ore i ta Iehova mau faaueraa. E ua parau atoa e e pûpû o ’na i te mau animara ei tusia na Iehova. Aita Iehova i hinaaro faahou ia Saula ei arii e aita roa ’tu Saula i fana‘o faahou i te taairaa maitai e te Atua mau.—A taio i te Samuela 1, 15:13-15, 20-23.

Ua haafaufaa ore e ua patoi Saula i te a‘oraa. Ua patoi o ’na ia ohipa Iehova i nia ia ’na! (A hi‘o i te paratarafa 7)

Ua tatarahapa Davida e ua farii i te a‘oraa. Ua vaiiho o ’na i te Atua ia ohipa i nia ia ’na. E oe? (A hi‘o i te paratarafa 6)

MEA PAETAHI ORE TE ATUA

8. Eaha te haapiiraa e huti mai i te huru o te nunaa Iseraela a a‘ohia ’i ratou e Iehova?

8 Te horoa ra Iehova i te taime i te mau nunaa atoa no te auraro ia ’na. I muri a‘e i te faatiamâraa i te mau Iseraela mai Aiphiti mai i 1513 hou te Mesia, ua maiti Iehova ia ratou ei nunaa taa ê no ’na. E ohipa ïa te Atua i nia ia ratou. E fana‘oraa taa ê mau! Ua rave noa râ ratou i te mea ino i to ’Na aro e ua haamori atoa i te mau atua o te mau nunaa tapiri. Noa ’tu e ua tono noa Iehova i te mau peropheta no te tauturu ia ratou, aita Iseraela i faaroo. (Ier. 35:12-15) Ua a‘o maitai ïa Iehova ia ratou. Mai te farii i faaauhia no te haamouraa, ua haru to Asura i te basileia apatoerau o Iseraela e to Babulonia i te basileia apatoa o Iuda. Auê ïa haapiiraa puai mau! E faufaahia tatou i te tauturu a Iehova ia farii tatou i te reira.

9, 10. Ua aha to Nineve a faaara ’i Iehova ia ratou?

 9 Ua horoa atoa Iehova i te taime i te taata i Nineve, te oire pu o Asura, no te farii i ta ’na mau faaararaa. Ua parau o ’na ia Iona: “A tia, a haere i te oire rahi ra i Nineve, e tiaoro atu, ua tae roa mai to ratou ino i mua i tau aro nei.” Ua faaoti Iehova e haamou ia Nineve.—Iona 1:1, 2; 3:1-4.

10 A faaite ai râ Iona i ta te Atua poroi haavaraa, “ua faaroo atura to Nineve i te Atua, e ua poro atura i te haapaeraa maa, e ua ahu atura i te ahu oto, mai te taata rahi ra e tae noa ’tura i tei iti.” “Ua tia a‘era [to ratou arii] mai nia mai i to ’na terono, ua haapae atura i to ’na iho ahu i nia ia ’na iho, tapo‘i ihora ia ’na iho i te ahu oto, e ua parahi ihora i nia i te rehu auahi.” Ua farii to Nineve i ta Iehova mau parau e ua tatarahapa. Aita ïa Iehova i haamou faahou ia ratou.—Iona 3:5-10.

11. Eaha ta tatou e haapii mai no nia ia Iehova i roto i ta ’na mau haaraa i nia ia Iseraela e Nineve?

11 Noa ’tu e o Iseraela te nunaa maitihia o Iehova, e mea tia ia a‘o oia ia ratou. E ere to Nineve i te nunaa taa ê o te Atua, ua pee râ ratou i ta ’na mau a‘oraa. Faaite ihora Iehova i to ’na aroha hamani maitai ma te ore e haamou ia ratou. Te faaite maitai ra teie na hi‘oraa e aita Iehova to tatou Atua e haapao ra i te huru o te taata!—Deut. 10:17.

UA ITE IEHOVA AFEA E TAUI AI I TA ’NA I FAAOTI

12, 13. (a) No te aha te Atua e taui ai i ta ’na i faaoti ia taui te taata i to ratou haerea? (b) Eaha te auraa e ua tatarahapa Iehova i roto i te tupuraa o Saula e o Nineve?

12 E taui Iehova i ta ’na i faaoti no nia i te taata ia taui ratou i to ratou haerea. Ei hi‘oraa, ia au i te Bibilia, ua tatarahapa Iehova i te faaariiraa ia Saula. (Sam. 1, 15:11) I to te taata no Nineve tatarahaparaa e fariuraa mai i to ratou haerea ino, te na ô ra te Bibilia: “Ua tatarahapa ihora te Atua i te ino ta ’na i parau ra e, e tuu mai i nia ia ratou, e aore a‘era oia i na reira mai.”—Iona 3:10.

13 Te auraa o te ta‘o Hebera hurihia ei “tatarahapa,” o te tauiraa ïa i te huru aore ra i tei opuahia. I farii na Iehova ia Saula. A faaroo ore ai râ oia, aita Iehova i hinaaro faahou ia Saula ei arii. E ere no te mea ua hape Iehova a maiti ai ia ’na ei arii. No te mea râ ua faaroo ore Saula. A tatarahapa ’i to Nineve, taui oioi a‘era Iehova i ta ’na i faaoti e aita o ’na i haamou ia ratou. Mea mahanahana mau ia ite e e Atua maitai rahi o Iehova e te aroha faito ore o tei ineine i te taui i ta ’na i faaoti ia taui te taata i to ratou haerea!

EIAHA E PATOI I TE A‘O A IEHOVA

14. (a) E nafea Iehova e haapii mai ai ia tatou i teie mahana? (b) Ia aha tatou ia a‘o mai Iehova?

14 Te haapii mai nei iho â Iehova ia tatou maoti te Bibilia e ta ’na faanahonahoraa. (Tim. 2, 3:16, 17) E farii ana‘e ïa i te a‘oraa atoa no ǒ mai i tera mau ravea. Mea maoro anei tatou i te bapetizoraahia? Mea rahi anei ta tatou hopoia i roto i te amuiraa? E tamau noa ana‘e i te farii i ta Iehova a‘oraa ia riro tatou ei farii no te mea maitai.

15, 16. (a) Eaha paha ta te hoê Kerisetiano e mana‘o ia ere o ’na i ta ’na mau hopoia? A faataa. (b) Eaha te tauturu mai ia faaruru i te tahi mau huru aau mai te haama ia a‘ohia tatou?

15 E a‘o mai Iehova ma te haapii ia  tatou aore ra ma te faaafaro i to tatou huru feruriraa. I te tahi taime, e mea tia ia a‘ohia tatou aita ana‘e tatou i rave i te mea tia. E ere atoa paha tatou i ta tatou mau hopoia. Te hi‘oraa ïa o Dennis * tei tavini na ei matahiapo. Ua rave o ’na i te mau faaotiraa tano ore i te pae tapihooraa. Eaha to ’na huru i te rui i faaitehia ’i i te amuiraa e e ere faahou o ’na i te matahiapo? Te na ô ra oia: “Ua inoino roa vau ia ’u iho. . . . I na 30 tiahapa matahiti i mairi, mea rahi ta ’u hopoia. E pionie tamau vau, ua tavini au i te Betela, ua faatoroahia vau ei tavini tauturu e ei matahiapo. No horoa noa ’tura vau i ta ’u oreroraa parau matamua i te tairururaa mataeinaa. I tera noa taime . . . aita hoê a‘e faahou.” Ua haama o ’na e ua mana‘o e mea faufaa ore o ’na i teie nei i roto i te faanahonahoraa.

16 E mea tia ia taui Dennis i to ’na haerea. Eaha râ tei tauturu ia ’na ia faaruru i te haama? Ua haapii oia i te Bibilia e ua haere tamau i roto i te pororaa e i te mau putuputuraa atoa. Ua mauruuru roa ’toa oia no te mau faaitoitoraa no ǒ mai i te mau taeae e tuahine e i ta tatou mau papai. No nia i te tumu parau “E nehenehe anei oe e tavini faahou mai na mua ’‘e ra?” i roto i Te Pare Tiairaa o te 1 no Atete 2009, ua na ô Dennis: “Ua riro [te reira] ei rata tei papaihia no ’u no te pahono i ta ’u mau pure.” Ua taa ia Dennis e e nehenehe ta ’na e faaohipa i to ’na taime ia piri atu â to ’na mau taairaa e o Iehova. Ua faufaahia o ’na i te a‘o ta ’na i fana‘o e tau matahiti i muri a‘e ua riro faahou mai nei ei tavini tauturu.

17. E nafea te tiavaruraa e tauturu ai i te hoê Kerisetiano tei hara? A faataa.

17 O te tiavaruraa te tahi atu ravea e a‘o mai ai Iehova. E paruru te reira i te amuiraa i te haerea viivii o te taata i hara e e tauturu atoa i tera taata ia tatarahapa. (Kor. 1, 5:6, 7, 11) Fatata 16 matahiti to Robert tiavaruraahia. I tera roaraa, ua pee to ’na na metua, to ’na mau tuaane e to ’na teina i te faaueraa Bibilia e ua faaea ratou i te amui e i te aroha ’tu ia ’na. Tau matahiti i teie nei to Robert ho‘iraa mai i roto i te faanahonahoraa e te haere nei o ’na i mua i te pae varua. Na te haerea o to ’na utuafare i turai ia ’na ia ho‘i mai i muri a‘e e rave rahi matahiti. Ua parau Robert e e mauruuru roa o ’na ahani to ’na utuafare i amui atu ia ’na maa taime iti noa aore ra i ani noa ’tu i to ’na huru. Ua tauturu te reira ia ’na ia hinaaro e ho‘i ia Iehova ra e i to ’Na ra nunaa.

18. Ia riro tatou mai teihea huru araea i roto i te rima o te Potera Rahi?

18 Eita e titauhia ia a‘ohia tatou mai tera. Teie râ, e riro tatou mai teihea huru araea i roto i te rima o te Potera Rahi? Eaha to tatou huru ia a‘ohia mai tatou? E riro anei tatou mai ia Davida aore ra mai ia Saula? O to tatou Metua te Potera Rahi. Eiaha roa ’tu e haamoe e “o tei herehia e Iehova ra, o ta ’na ïa e a‘o mai, mai te metua e a‘o i te tamaiti ta ’na e here ra.” Eiaha ïa e ‘inoino i te a‘o a Iehova e e fatimauu i ta ’na a‘oraa mai.’—Mas. 3:11, 12.

^ par. 15 Ua tauihia te mau i‘oa.