Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2013

Te taiva ore e te faaoreraa i te hara

Te taiva ore e te faaoreraa i te hara

“Te maitai ra hoi oe, e te Fatu, e ua tia ia oe te faaore mai i te hara nei, e te aroha rahi i te feia atoa e tiaoro atu ia oe.”—SAL. 86:5.

1, 2. (a) No te aha tatou e au ai i te hoa taiva ore e o te faaore mai i te hapa? (b) E pahonohia teihea mau uiraa?

EAHA te hoê hoa mau? No te hoê tuahine o Ashley to ’na i‘oa, o te hoê ïa taata tei ineine i te tauturu ia oe e o te faaore i ta oe mau hapa. Mea au na tatou paatoa i te hoa mai tera. E tauturu mai hoi ratou ia ite i te hau e te here.—Mas. 17:17.

2 Te Hoa taiva ore roa ’‘e e o te faaore mai i te hara, o Iehova ïa. Ua parau te fatu salamo no nia ia ’Na: “Te maitai ra hoi oe, e te Fatu, e ua tia ia oe te faaore mai i te hara nei, e te aroha rahi [aore ra aroha taiva ore] i te feia atoa e tiaoro atu ia oe.” (Sal. 86:5) Eaha te auraa e vai taiva ore e e faaore i ta te tahi atu hara? E nafea Iehova e faaite ai i tera na huru maitatai? E e nafea ia pee i to ’na hi‘oraa? E tauturu mai te mau pahonoraa ia here roa ’tu â i to tatou Hoa rahi ra o Iehova. Oia atoa ia piri roa ’tu â i to tatou mau taeae e tuahine.—Ioa. 1, 4:7, 8.

MEA TAIVA ORE IEHOVA

3. Eaha te hoê taata taiva ore?

3 Eita te hoê taata taiva ore e faarue i te feia ta ’na e here ra. E faaite o ’na i to ’na here ma te tauturu noa ia ratou i roto i te tupuraa fifi atoa. O Iehova ana‘e te faaite nei i te aroha rahi aore ra te taiva ore rahi roa ’‘e.—Sal. 18:25.

4, 5. (a) E nafea Iehova e faaite ai i to ’na taiva ore? (b) E nafea tatou e itoitohia ’i i te feruriraa i te mau haaraa taiva ore a Iehova?

4 E nafea Iehova e faaite ai i to ’na taiva ore? Eita roa ’tu o ’na e faarue i to ’na feia haamori. O ta hoê ïa o ratou, oia hoi te arii Davida, i haapapu. (A taio i te Salamo 37:28.) A fifi ai o ’na, ua aratai,  ua paruru e ua faaora Iehova ia ’na. (Sam. 2, 22:1) Ua ite Davida e e faaite Iehova i to ’na taiva ore ma te tauturu i ta ’na mau tavini. No te aha Iehova i haa ’i ma te taiva ore i nia ia ’na? No te mea e taata “aroha,” aore ra taiva ore, Davida. Te here nei Iehova i ta ’na mau tavini no to ratou taiva ore. E faaite atoa ’tu ïa o ’Na i to ’na taiva ore ia ratou.—Mas. 2:6-8.

5 E itoitohia tatou a feruri ai i te mau haaraa taiva ore a Iehova. Te na ô ra te hoê taeae taiva ore ra o Reed to ’na i‘oa: “Mea au roa na ’u ia taio i ta Iehova mau haaraa i nia ia Davida a fifi ai oia. Noa ’tu e ua horo ê Davida e ua ora oia i roto e i rapae i te mau ana, ua tauturu noa Iehova ia ’na. Mea faaitoito mau â! E haamana‘o mai te reira e noa ’tu te huru tupuraa, noa ’tu e mea peapea roa, e tauturu mai Iehova ia ’u ia vai taiva ore noa ia ’na.” Aita e hape e hoê â huru no oe.—Roma 8:38, 39.

6. E nafea ’tu â Iehova e faaite ai i te taiva ore, e eaha ta to ’na feia haamori e fana‘o?

6 E nafea ’tu â Iehova e faaite ai i te taiva ore? Ma te pee noa i ta ’na mau ture aveia. Te haapapu nei oia: “E ruhiruhia noa ’tu â outou, o vau nei â vau.” (Isa. 46:4) E rave noa ïa oia i te mau faaotiraa niuhia i nia i ta ’na mau ture aveia o te ore e taui. (Mal. 3:6) Hau atu â, ua faaite Iehova i te taiva ore ma te faatupu i ta ’na i fafau. (Isa. 55:11) E faufaahia ïa to ’na feia haamori haapao maitai i to ’na taiva ore. E nafea? Ia auraro maite tatou i te mau ture a Iehova, e nehenehe tatou e tiaturi e e faatupu iho â o ’na i ta ’na i fafau no te haamaitai ia tatou.—Isa. 48:17, 18.

A PEE I TO IEHOVA TAIVA ORE

7. Eaha te hoê ravea no te pee i te taiva ore o Iehova?

 7 E nafea tatou e pee ai i te taiva ore o Iehova? Te hoê ravea, o te tautururaa ïa i te feia e fifi nei. (Mas. 3:27) Ei hi‘oraa, ua matau anei oe i te hoê Kerisetiano o tei paruparu no te ma‘i paha, te patoiraa a te fetii aore ra no to ’na iho mau hapa? E faaitoito atu ia ’na ma “te parau maitai e te parau haamahanahana.” (Zek. 1:13) * E faaite ïa oe e e hoa mau oe e te taiva ore o te ‘ati maitai a‘e i te taeae.’—Mas. 18:24.

8. E nafea ia pee i te taiva ore o Iehova, ei hi‘oraa, i roto i te faaipoiporaa?

8 Ia vai taiva ore atoa tatou i te feia ta tatou e here ra. Ei hi‘oraa, mea faaipoipo ana‘e tatou, ua ite tatou e mea tia ia vai taiva ore i to tatou apiti. (Mas. 5:15-18) Eita roa ’tu ïa tatou e rave hoê noa ’‘e mea e faaturi ai tatou. (Mat. 5:28) E vai taiva ore atoa ana‘e i to tatou mau hoa haamori ma te ore e haaparare e e faaroo noa ’tu i te mau parau faaino aore ra haavare.—Mas. 12:18.

9, 10. (a) E hinaaro iho â tatou e vai taiva ore ia vai? (b) No te aha e ere i te mea ohie noa ia auraro i ta Iehova mau faaueraa?

9 E hinaaro iho â tatou e vai taiva ore ia Iehova. E nafea ïa? Ma te hinaaro i ta Iehova e hinaaro ra e ma te riri i ta ’na e riri ra. E ma te faaau atu i to tatou haerea. (A taio i te Salamo 97:10.) E haapii atu â ana‘e ia mana‘o mai ia Iehova. Mea ohie a‘e ïa ia auraro ia ’na.—Sal. 119:104.

 10 E ere iho â i te mea ohie noa ia auraro i ta Iehova mau faaueraa. E mea tia ia tutava maite no te vai taiva ore ia ’na. Ei hi‘oraa, e hinaaro vetahi mau Kerisetiano taa noa e faaipoipo. Aita râ i itea ’tura ia ratou te hoê apiti maitai i rotopu i te mau tavini a Iehova. (Kor. 1, 7:39) Te ite nei paha te hoê tuahine taa noa e te tamata ra to ’na mau hoa ohipa e ere i te Ite i te imi i te tane na ’na. Te moemoe atoa nei paha teie tuahine. Ua faaoti papu râ o ’na e vai taiva ore ia Iehova. E hi‘oraa maitai teie mau Kerisetiano taa noa o te taiva ore, e ere anei? E haamaitai iho â Iehova i te feia atoa e vai taiva ore ia ’na noa ’tu te mau fifi.—Heb. 11:6.

“Ati maitai mai â vetahi taua i to te taeae.”—Mas. 18:24 (A hi‘o i te paratarafa 7)

‘E faaore i te hara te tahi e te tahi.’—Eph. 4:32 (A hi‘o i te paratarafa 16)

E FAAORE IEHOVA I TE HARA

11. Eaha te hoê taata o te faaore i te hapa?

11 Eaha te hoê taata o te faaore i te hapa? O te hoê taata o te maiti eiaha e riri noa i te feia tei haamauiui ia ’na. E ere i te auraa e te farii nei o ’na i ta ratou i rave aore ra te parau nei oia e aita hoê a‘e mea i tupu. Te faaoti nei râ oia eiaha e inoino. Tera ïa te tahi huru maitai au roa ’‘e o Iehova. Te na ô nei te Bibilia e ‘ua tia ia Iehova ia faaore i te hara’ a te feia e tatarahapa mau ra.—Sal. 86:5.

12. (a) E nafea Iehova e faaite ai e te faaore nei oia i te hara? (b) Eaha te auraa ia paraihia te hara a te hoê taata?

12 E nafea Iehova e faaite ai e te faaore nei oia i te hara? E faaore “rahi” Iehova i te hara. Oia hoi, e faaore roa o ’na i te reira e a muri noa ’tu. (Isa. 55:7) E nafea tatou e ite ai e e faaore roa Iehova i ta tatou hara? A hi‘o na i te parau fafau i roto i te Ohipa 3:19. (A taio.) Ua faaitoito te aposetolo Petero i te taata e faaroo ra ia ’na ia “tatarahapa” e ia “fariu mai.” E faaoti papu te hoê taata e  tatarahapa mau ra i te hara ta ’na i rave eiaha e na reira faahou. (Kor. 2, 7:10, 11) E “fariu” atoa mai oia ma te faarue i taua haerea ino ra e ma te pee i ta te Atua e au ra. Eaha te faahopearaa ia faaite te taata e faaroo ra ia Petero i te tatarahapa mau? Ua parau o ’na e e ‘paraihia ta ratou hara.’ No ǒ mai teie parau i te hoê ta‘o Heleni o “horoi” aore ra “tumâ” te auraa. No reira, ia faaore Iehova i te hara, e tumâ oia i te reira. E moe-roa-hia ia ’na.—Heb. 10:22; Ioa. 1, 1:7.

13. Eaha ta te mau parau “e ore au e mana‘o faahou i ta ratou ino” e haapapu maira?

13 E nafea tatou e ite ai e e faaore Iehova i te hara ta tatou i rave e a muri noa ’tu? E itea ia tatou te pahonoraa i roto i te parau tohu a Ieremia no nia i te mau Kerisetiano faatavaihia. (A taio i te Ieremia 31:34.) Ua parau Iehova: “E faaore hoi au i ta ratou hara, e ore au e mana‘o faahou i ta ratou ino.” Te haapapu maira ïa Iehova e ia faaore o ’na i te hara, eita o ’na e haamana‘o faahou i te reira no te faahapa aore ra faautua noa ia tatou. E tuu râ o ’na i te reira i muri ia ’na.—Roma 4:7, 8.

14. No te aha tatou e tamahanahanahia ’i i te feruri-maite-raa e nafea Iehova e faaore ai i te hara? A faataa.

14 E tamahanahanahia tatou a feruri hohonu ai e e Atua Iehova o te faaore i te hara. A hi‘o na i teie tuahine ta tatou e pii Elaine. A tau matahiti i teie nei, ua tiavaruhia o ’na. E i muri a‘e ua ho‘i faahou mai o ’na i roto i te amuiraa. Te na ô nei Elaine e aita i papu ia ’na e ua faaore Iehova i ta ’na mau hara. No ’na, mea here a‘e Iehova ia vetahi ê. Ua tamahanahanahia râ oia a taio ai e a feruri maite ai i te mau hoho‘a ta te Bibilia e faaohipa ra no te faataa e nafea Iehova e faaore ai i te hara. I teie nei noa te taaraa ia ’na e te here nei Iehova ia ’na. Teie te mana‘o i haaputapû ia ’na: “Ia faaore Iehova i ta tatou mau hara, eiaha tatou ia mana‘o e te vai noa ra te tafetafeta o taua mau hara ra i nia ia tatou no te toea o to tatou oraraa.” * Te na ô ra Elaine: “Ua taa ia ’u e aita vau i tiaturi e e nehenehe ta Iehova e faaore roa i ta ’u mau hara. E ua mana‘o vau e e mea tia ia amo vau i tera hopoia teimaha no te toea o to ’u oraraa. Ua ite au e e titauhia maa taime, te haamata nei râ vau i te ite e e nehenehe ta ’u e haafatata ’tu â ia Iehova e e au ra e ua mâmâhia vau.” Te tavini mau nei tatou i te hoê Atua î i te here e o te faaore i te hara!—Sal. 103:9.

A PEE I TO IEHOVA HI‘ORAA

15. E nafea ia pee i to Iehova hi‘oraa a faaore ai o ’na i te hara?

15 E pee tatou i to Iehova hi‘oraa ma te faaore atoa i ta vetahi ê hapa. (A taio i te Luka 17:3, 4.) A haamana‘o e ia faaore Iehova i te hara, eita o ’na e haamana‘o faahou i ta tatou i rave. Ia faaore tatou i ta vetahi ê hapa, eiaha atoa ïa tatou e haamana‘o e e faahiti faahou i ta ratou i rave i nia ia tatou.

16. (a) Eaha mau te auraa e faaore i ta vetahi ê hapa? A faataa. (b) Ia aha ia faaore mai te Atua i ta tatou hara?

 16 E ere te faaoreraa i ta vetahi ê hapa i te auraa e mea au na tatou ia faainohia mai aore ra te farii ra tatou i ta ratou i rave. Ua maiti râ tatou eiaha e inoino atu. Mea faufaa te reira. E faaore hoi Iehova i ta tatou nei hara ia na reira atoa tatou i nia ia vetahi ê. (Mat. 6:14, 15) No  to ’na aumauiui, e haamana‘o Iehova e “e repo tatou.” (Sal. 103:14) Eiaha anei ïa te aumauiui e turai ia tatou ia faaore i ta vetahi ê hapa ma to tatou aau atoa?—Eph. 4:32.

E pure ana‘e ma te aau atoa no te taata o te haamauiui mai (A hi‘o i te paratarafa 17)

17. Eaha te tauturu mai ia haamauiui mai te hoê hoa Kerisetiano ia tatou?

 17 E ere iho â i te mea ohie ia faaore i ta te tahi atu hapa. Mea fifi atoa no vetahi mau Kerisetiano faatavaihia i te senekele matamua ia faaafaro i to ratou mau fifi. (Phil. 4:2) Eaha te tauturu mai ia haamauiui mai te hoê hoa Kerisetiano ia tatou? A hi‘o na ia Ioba. Ua mauiui mau o ’na a faahapa noa ’i to ’na mau “hoa” ra o Eliphaza, Biladada e Zophara ia ’na. (Ioba 10:1; 19:2) Ua a‘o ihora Iehova i tera mau taata pari haavare. Ua faaue ia ratou ia haere ia Ioba ra e ia pûpû i te tusia no ta ratou mau hara. (Ioba 42:7-9) Ua titau atoa râ Iehova ia rave Ioba i te tahi ohipa. Teihea? Ia pure Ioba no teie mau taata. Ua na reira Ioba e ua haamaitai Iehova ia ’na no to ’na faaore-oioi-raa i ta ratou hapa. (A taio i te Ioba 42:10, 12, 16, 17.) Eaha te haapiiraa e huti mai? E tauturu mai te pure haavare ore no te hoê taata tei haamauiui ia tatou ia ore e inoino noa.

A HAAFAUFAA NOA I TO IEHOVA MAU HURU MAITATAI

18, 19. Eaha ta tatou e hinaaro e rave noa?

18 Ua oaoa tatou i te haapii no nia i te mau huru maitatai rau o Iehova: te ohieraa ia haafatata ’tu, te paetahi ore, te aau horoa noa, te huru au noa, te taiva ore e te faaoreraa i te hara. E ere râ tera ana‘e. E oaoa tatou i te haapii atu â no nia ia Iehova e a muri noa ’tu. (Koh. 3:11) Te tu nei to tatou mana‘o i to Paulo tei papai: “Auê te rahi hau ê atu o te paari e te ite o te Atua e.” Hoê â huru no to ’na here e no to ’na na huru maitatai e ono ta tatou i hi‘opoa mai.—Roma 11:33.

19 E tamau ana‘e i te haafaufaa ’tu â i te mau huru maitatai au mau o Iehova. E nafea? Ma te haapii atu â no nia i to ’na mau huru maitatai, ma te feruri maite atu e ma te faaohipa i te reira i roto i to tatou oraraa. (Eph. 5:1) E farii atu â ïa tatou i ta te fatu salamo i himene: “E mea maitai râ ia ’u ia haafatata ’tu i te Atua.”—Sal. 73:28.

^ par. 7 E ite oe maa tauturu faufaa i roto i Te Pare Tiairaa o te 15 no Tenuare 1995 i te tumu parau “No faaitoito noa iho nei anei oe i te tahi taata?” e o te 1 no Eperera 1995 i te tumu parau “Te faaaraararaa i te here e i te mau ohipa maitatai—Nafea?”