Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2013

To Iehova aau horoa noa e huru au noa

To Iehova aau horoa noa e huru au noa

“Hamani maitai to Iehova i te taata atoa; e te vai ra to ’na aroha faaherehere rahi i nia i to ’na atoa ra mau ohipa.”—SAL. 145:9.

1, 2. Eaha ta te mau hoa a te Atua e fana‘o nei?

FATATA e 35 matahiti faaipoiporaa to Monika. Te na ô nei teie tuahine: “Ua matau maitai mâua ta ’u tane. Noa ’tu râ teie roaraa matahiti, mea rahi â ta mâua e haapii nei no nia ia mâua!” Mea papu e hoê â no e rave rahi faaipoiporaa e auhoaraa.

2 E oaoa tatou i te matau atu â i te feia ta tatou e here ra. Te auhoaraa faufaa roa ’‘e râ te atuatu, o to tatou ïa auhoaraa e o Iehova. Eita roa ’tu tatou e ite pauroa no nia ia ’na. (Roma 11:33) E nehenehe tatou e oaoa e e haafaufaa ’tu â i to Iehova mau huru maitatai e a muri noa ’tu.—Koh. 3:11.

3. Eaha ta tatou e hi‘opoa i roto i teie tumu parau?

3 Ua tauturu mai to na mua ’tu tumu parau ia haafaufaa ’tu â e piti huru maitatai au mau o Iehova: te ohieraa ia haafatata ’tu e te paetahi ore. E hi‘o ana‘e i teie nei i to ’na aau horoa noa e huru au noa. E taa atu â ïa ia tatou e ‘mea hamani maitai Iehova i te taata atoa e tei nia to ’na aroha faaherehere rahi i ta ’na atoa mau ohipa.’—Sal. 145:9.

E ATUA HOROA NOA IEHOVA

4. Eaha mau na te aau horoa noa?

4 Eaha te hoê taata aau horoa noa? Teie te pahonoraa i roto i ta Iesu mau parau i roto i te Ohipa 20:35: “Mea maitai i te horoa ’tu i te rave mai.” Ua faaite Iesu eaha mau na te aau horoa noa. O te horoa-noa-raa ma te oaoa i to ’na taime, puai e faufaa no te maitai o vetahi ê. Aita te reira i taaihia i te rahi o te hoê ô, i te mana‘o turai râ o te taata i horoa. (A taio i te Korinetia 2, 9:7.) Te hi‘oraa maitai roa ’‘e, o to tatou ïa Atua oaoa ra o Iehova.—Tim. 1, 1:11.

5. E nafea Iehova e faaite ai e e Atua horoa noa oia?

 5 E nafea Iehova e faaite ai e e Atua horoa noa oia? Te haapao nei oia i te mau hinaaro o te taata atoa, tae noa ’tu o te feia tei ore â i haamori ia ’na. E “hamani maitai [hoi] to Iehova i te taata atoa.” “Te faahiti nei [oia] i to ’na mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.” (Mat. 5:45) No reira i tia ’i i te aposetolo Paulo ia parau i te feia tiaturi ore e ua “hamani maitai mai” Iehova ma te horoa mai i “te ûa no nia i te ra‘i ra, e te anotau auhune, e te faaîraa mai i to tatou aau i te maa e te oaoa.” (Ohi. 14:17) E Atua horoa noa Iehova no te taata atoa.—Luka 6:35.

6, 7. (a) Te oaoa taa ê nei Iehova i te haapao i to vai ma mau hinaaro? (b) A faataa na e nafea te Atua e haapao ai i ta ’na mau tavini taiva ore.

6 Te oaoa taa ê nei Iehova i te haapao i te mau hinaaro o ta ’na mau tavini taiva ore. Ua tapao te arii Davida: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ’na ra huaai i te aniraa i te maa.” (Sal. 37:25) Mea rahi te Kerisetiano taiva ore tei ite i te haapao maitai o Iehova. Teie te tahi hi‘oraa.

7 Tau matahiti a‘enei, tei mua te hoê pionie o Nancy to ’na i‘oa i te fifi. Te haamana‘o ra oia e hoê mahana i toe no te aufau i ta ’na tarahu fare e 66 tara Marite (fatata e 6 000 CFP). Te na ô ra Nancy: “Aita vau i ite ia aha ia noaa mai tera moni. Ua pure au no nia i tera fifi e ua haere au i ta ’u ohipa ei tuati maa. Aita vau i mana‘o e e noaa mai e rave rahi moni haamauruururaa, mea iti roa hoi te taata i tera taime o te hebedoma. Ua maere roa vau i te ite e rave rahi taata matau tei haere mai i te fare tamaaraa i tera po. I te otiraa ta ’u ohipa, ua taio vau i te moni haamauruururaa, ua noaa mai e 66 tara Marite.” Ua papu ia Nancy e ua horoa Iehova i ta ’na iho â i hinaaro.—Mat. 6:33.

8. Eaha te ô horoa noa rahi roa ’‘e a Iehova?

8 E nehenehe te taata atoa e fana‘o i te ô horoa noa rahi roa ’‘e a Iehova. Eaha te reira? Te tusia taraehara o ta ’na Tamaiti. Ua parau Iesu: “I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.” (Ioa. 3:16) “Te ao” i ǒ nei, o te huitaata ïa. O te taata atoa o te maiti i te farii i tera ô horoa noa rahi roa ’‘e a Iehova te nehenehe e fana‘o i te reira. E fana‘o te feia o te faatupu i te faaroo ia Iesu i te ora mure ore! (Ioa. 10:10) E ere anei te reira i te haapapuraa rahi roa ’‘e e e Atua horoa noa o Iehova?

 A PEE I TO IEHOVA AAU HOROA NOA

Ua faaitoitohia to Iseraela ia pee i te aau horoa noa o Iehova (A hi‘o i te paratarafa 9)

9. E nafea ia pee i to Iehova aau horoa noa?

 9 E nafea ia pee i to Iehova aau horoa noa? O Iehova “te horoa hua mai i te mau mea maitatai ia rave tatou.” E mea tia ïa ia hinaaro tatou ia riro ei taata o te “horoa atu ia vetahi ’ē” a oaoa ’tu ai ratou. (Tim. 1, 6:17-19, Te Faufaa Api) Te faaohipa nei tatou ma te oaoa i ta tatou faufaa no te horoa i te mau ô no to tatou feia herehia e no te tauturu i te feia e fifi ra. (A taio i te Deuteronomi 15:7.) Eaha te tauturu mai ia haamana‘o i te faaite i te aau horoa noa? Teie ta te tahi mau Kerisetiano e rave nei: ia fana‘o ratou i te hoê ô, e na reira atoa ratou i nia ia vetahi ê. E haamaitaihia te amuiraa ia faaite te taeae e tuahine e rave rahi i te hoê huru feruriraa horoa noa.

10. Eaha te tahi ravea maitai roa no te faaite i te aau horoa noa?

10 Teie te tahi ravea maitai roa no te faaite i te aau horoa noa: te horoaraa ia tatou iho na roto i ta tatou mau parau e ohipa. E nafea? Ma te faaohipa i to tatou taime e puai no te tauturu e te faaitoito ia vetahi ê. (Gal. 6:10) No te ite e te na reira ra anei tatou, e uiui ana‘e: ‘Ua ite anei vetahi ê e ua ineine au i te horoa ia ’u iho e i te horoa i te tari‘a faaroo? Ia ani mai te tahi i te tauturu no te hoê ohipa, e parau anei au E ia tia ia ’u? Afea ra vau i te haapopouraa ma te haavare ore i te hoê melo o to ’u utuafare aore ra i te hoê hoa Kerisetiano?’ Ia “horoa” noa tatou, e piri atu â tatou ia Iehova e i to tatou mau hoa.—Luka 6:38; Mas. 19:17.

11. E nafea ia faaite i te aau horoa noa i nia ia Iehova?

 11 E nehenehe atoa tatou e faaite i te aau horoa noa i nia ia Iehova. Te faaue maira te mau Papai: “E faatura ’tu ia Iehova i ta oe ra mau tao‘a rarahi.” (Mas. 3:9) Teie mau “tao‘a rarahi,” o to tatou  atoa ïa taime, puai e faufaa ta tatou e faaohipa noa i roto i ta ’na taviniraa. E nehenehe atoa te mau tamarii e haapii i te faaite i te aau horoa noa i nia ia Iehova. Te na ô nei te hoê papa o Jason to ’na i‘oa: “Ia horoa to matou utuafare i te tahi ô i te Piha a te Basileia, na ta mâua na tamarii e tuu i te moni i roto i te afata ô. E oaoa raua. E au ra hoi te horoa nei raua i te tahi mea na Iehova.” Mai te peu e e ite te mau tamarii i te oaoa ia horoa na Iehova i to ratou apîraa, e faaite noa ratou i te aau horoa noa a paari mai ai.—Mas. 22:6.

TE HURU AU NOA O IEHOVA

12. Eaha te hoê taata au noa?

12 Teie te tahi atu huru maitai au mau o Iehova: to ’na huru au noa. Eaha ïa? Te auraa o te ta‘o tumu i hurihia i roto i ta tatou Bibilia ei “mǎrû,” aore ra huru au noa, o te tuu-noa-raa ’tu aore ra te fariiraa ïa. (Tito 3:1, 2) E ere te hoê taata mana‘o au noa i te mea etaeta i nia i te tahi ohipa rii. E tutava râ o ’na i te faaite i te mǎrû i nia ia vetahi ê ma te haapao i to ratou huru tupuraa. Ua ineine oia i te faaroo ia ratou e, ia nehenehe, i te farii i to ratou mau hinaaro a faatano atu ai i ta ’na mau titauraa.

13, 14. (a) E nafea Iehova e faaite ai i te huru au noa? (b) Eaha te haapii mai i ta te Atua i rave e o Lota no nia i te huru au noa?

13 E nafea Iehova e faaite ai i te huru au noa? Ma te hamani maitai, te haapao ra oia i te mau huru aau o ta ’na mau tavini. E e pinepine oia i te farii i ta ratou mau aniraa. A hi‘o na i ta ’na i rave e te taata parau-tia ra o Lota. A faaoti ai Iehova e haamou ia Sodoma e Gomora, ua faaue papu o ’na ia Lota ia horo i nia i te mou‘a. No te tahi râ tumu, ua taparu Lota e horo i te tahi atu vahi. A feruri na, ua ani Lota ia Iehova ia taui i ta ’Na mau faaueraa!—A taio i te Genese 19:17-20.

14 Mea ohie paha ia parau e mea paruparu aore ra mea faaroo ore o Lota. No te aha o ’na i mǎta‘u ai i te mea e e faaora iho â Iehova ia ’na? Atira noa ’tu, ua mǎta‘u o Lota. Ua farii ihora Iehova i ta ’na aniraa e ua faatia ia ’na ia horo i te hoê oire ta ’Na i faaoti na i te haamou. (A taio i te Genese 19:21, 22.) Papu maitai e e ere roa ’tu Iehova i te mea etaeta. E Atua au noa o ’na.

15, 16. Mea nafea te Ture a Mose i faaite ai i te huru au noa o Iehova? (A hi‘o i te hoho‘a matamua.)

15 E itehia te tahi atu hi‘oraa o to Iehova huru au noa i roto i te Ture a Mose. Mea veve roa ana‘e te hoê Iseraela no te pûpû ei tusia i te hoê pinia mamoe aore ra te hoê pinia puaaniho, ua tia ia ’na ia pûpû e piti uupa aore ra e piti uuaira‘o. Eaha râ mea veve roa ana‘e o ’na no te hoo mai e piti uuaira‘o? I roto i tera tupuraa, ua faatia Iehova i te Iseraela veve ia pûpû maa faraoa, aore ra faraoa ota. Teie râ te hoê parau rii faufaa e tapao mai: I titauhia na te “faraoa hua,” oia hoi te faraoa ota tei faaohipahia no te mau manihini taa ê. (Gen. 18:6) No te aha mea faufaa ’i te reira?—A taio i te Levitiko 5:7, 11.

16 A feruri na e e Iseraela veve roa oe. A tapae ai i te hiero e ta oe maa faraoa ota no te pûpû ei tusia, e ite oe i te mau Iseraela tao‘a rahi e ta ratou nǎnǎ. E haama paha oe i ta oe tusia e au ra e mea faufaa ore. Haamana‘o a‘era oe e no Iehova mea faufaa ta oe tusia. No te aha? No te mea ua titau Iehova i te faraoa ota maitai roa. E au ra e te parau nei Iehova  i te mau Iseraela veve: ‘Ua ite au e aita ta oe e nehenehe e pûpû i te tusia mai i ta vetahi ê, ua ite atoa râ vau e te horoa mai nei oe i tei maraa ia oe.’ Oia mau, te faaite ra Iehova i to ’na huru au noa ma te haapao i te mau taotiaraa e huru tupuraa o ta ’na mau tavini.—Sal. 103:14.

17. E farii Iehova i teihea huru taviniraa?

 17 E mahanahanahia tatou i te ite e no to ’na huru au noa, te farii ra Iehova i ta tatou taviniraa ma to tatou aau atoa. (Kol. 3:23) Ua na ô Constance te hoê tuahine paari no Italia: “Mai mutaa iho mai â, mea au roa na ’u e paraparau ia vetahi ê no nia i to ’u Atua Poiete. No reira vau e poro e e faatere noa ’i i te mau haapiiraa Bibilia. I te tahi taime, e oto vau. No to ’u hoi ea, aita ta ’u e nehenehe e rave hau atu â. Ua taa râ ia ’u e te ite ra Iehova i to ’u mau taotiaraa, te here ra o ’na ia ’u e te haafaufaa ra i tei tia ia ’u ia rave.”

A PEE I TO IEHOVA HURU AU NOA

18. E nafea te mau metua e pee ai i te hi‘oraa o Iehova?

18 E nafea ia pee i to Iehova huru au noa? A feruri faahou na i ta Iehova i rave i nia ia Lota. Tei ia Iehova ra te mana. Noa ’tu râ, ua faaroo o ’Na ia Lota a faaite ai oia i to ’na huru aau e ua farii i ta ’na aniraa. E nehenehe anei outou, ei metua, e pee i to Iehova hi‘oraa ma te faaroo i te aniraa a ta outou tamarii e ma te farii atoa paha i ta ’na e hinaaro ra? Ia au i Te Pare Tiairaa o te 1 no Tetepa 2007, e ani paha vetahi mau metua i te mana‘o o ta ratou tamarii no nia i te mau ture o te utuafare. Ei hi‘oraa, e faaoti paha te mau metua i te hoê hora e mea tia ia ho‘i mai ta ratou tamarii i te fare. E tiaraa to ratou no te na reira. Noa ’tu râ, e faaroo te mau metua Kerisetiano i te mana‘o o ta ratou tamarii no nia i te hora i faaotihia. E maiti paha vetahi i te faatano i tera hora. Ia haapao te mau metua i te mana‘o o ta ratou tamarii no nia i te mau ture o te utuafare e hinaaro atu â te mau tamarii e taa e e pee i te reira.

19. E nafea te mau matahiapo e tutava ’i i te pee i to Iehova huru au noa?

19 E tutava te mau matahiapo i te pee i to Iehova huru au noa ma te haapao i te huru tupuraa o to ratou mau hoa haamori. A haamana‘o e ua haafaufaa atoa Iehova i te mau tusia a te mau Iseraela veve a‘e. Oia atoa, ua taotia-mau-hia te taviniraa a vetahi mau taeae e tuahine no to ratou paha ea aore ra matahiti rahi. Ia aha ïa ia toaruaru teie mau hoa herehia? Ma te hamani maitai, e haamana‘o atu te mau matahiapo e te here ra Iehova ia ratou no te horoaraa i tei maraa ia ratou.—Mar. 12:41-44.

20. Eaha te auraa e faaite i te huru au noa a tavini ai i te Atua?

20 E ere te faaiteraa i te huru au noa i te faaitiraa i ta tatou taviniraa i te Atua no te hamani maitai noa ia tatou iho. (Mat. 16:22) Aita tatou e hinaaro ra e rave noa maa vahi iti ia nehenehe ta tatou e rave hau atu â. Mea faufaa râ ia “faaitoito hua” tatou i te turu i te mau ohipa taaihia i te Basileia. (Luka 13:24) Ia vai faito noa tatou e tia ’i. E rave ana‘e i tei maraa i roto i te taviniraa a Iehova. E i te hoê â taime, e haamana‘o ana‘e e eita roa ’tu Iehova e ani mai hau atu i tei maraa ia tatou. Ia na reira tatou, e oaoa o ’na. Mea oaoa ia tavini i te hoê Fatu î i te mauruuru e te au noa, e ere anei? I to muri iho tumu parau, e hi‘opoa tatou e piti atu â huru maitatai au mau o Iehova.—Sal. 73:28.

“E faatura ’tu ia Iehova i ta oe ra mau tao‘a rarahi.”—Mas. 3:9 (A hi‘o i te paratarafa 11)

“Ta outou mau mea atoa e rave ra, e rave ma te aau atoa.”—Kol. 3:23 (A hi‘o i te paratarafa 17)