Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Me 2013

 UIRAA A TE FEIA TAIO

Uiraa a te feia taio

E haapohe anei te mau Iseraela i te feia ohipa ino ma te rî ia ratou i nia i te pou?

Mea rahi te nunaa i tahito ra tei haapohe na i te tahi feia ohipa ino ma te rî ia ratou i nia i te hoê pou. I taamu e i patiti na to Roma i tera mau taata i nia i te pou. E ora ratou tau mahana a pohe atu ai no te mauiui, te poihâ, te poia e te huru o te reva. No to Roma, o te feia ohipa ino mau te rîhia, e utua haamâ mau hoi te reira.

E no te nunaa Iseraela i tahito? E haapohe anei ratou i te feia ohipa ino ma te rî ia ratou i nia i te pou? Te na ô ra te Ture a Mose: “Ia rave te taata i te hara pohe roa ra, [“e ia haapohehia oia,” Traduction du monde nouveau] e ua ri atura oe ia ’na i nia i te raau; eiaha to ’na tino e vaiihohia i nia i taua raau ra e ia ao te rui ra, ei taua mahana ra oe e tanu ai ia ’na; ia ore ia viivii to fenua, ta to Atua ta Iehova e horoa mai no oe ei parahiraa: o te taata atoa hoi i rihia i nia i te raau ra, ua katarahia [aore ra faainohia] ïa e te Atua.” (Deut. 21:22, 23) I te tau a papaihia ’i te mau Papai Hebera, e haapohehia ïa na mua te hoê taata e au ia ’na te pohe hou a rî ai ia ’na i nia i te hoê pou aore ra tumu raau.

Te na ô ra te Levitiko 20:2: “O te taata e hopoi i ta ’na i fanau ra no Moloha, to te tamarii a Iseraela, e to te feia taata ěê i purutia i roto ia ratou ra, e pohe roa ïa oia; na te taata o te fenua na e tui i te ofai.” E haapohe-atoa-hia te feia o te rave i te ohipa tahutahu. Mea nafea? ‘E tuihia ratou i te ofai.’—Lev. 20:27.

Te taiohia nei i roto i te Deuteronomi 22:23, 24: “Ia momo‘ahia te hoê paretenia i te tane, e roohia ihora oia e te hoê taata i roto i te oire, e ua rave ihora ia ’na; e aratai outou ia raua atoa i rapae au i te uputa o taua oire ra, a tui ai outou ia raua i te ofai e ia pohe roa raua; taua paretenia ra, no te mea, i roto oia i te oire e aita oia i pii; e taua tane ra, no te mea, ua rave oia i te vahine a tana taeae ra; taa ê atura te ino i roto ia outou ia oe i reira.” No te mau Iseraela matamua, o te tuiraa ïa i te ofai te ravea matamua no te haapohe i te feia tei rave i te ohipa ino mau. *

I te tau a papaihia ’i te mau Papai Hebera, e haapohehia na mua te hoê taata e au ia ’na te pohe hou a rî ai ia ’na i nia i te hoê pou aore ra tumu raau

Ia au i te Deuteronomi 21:23, “O te taata atoa hoi i rihia i nia i te raau ra, ua katarahia ïa e te Atua.” E rîhia te tino pohe o te hoê taata ino tei faainohia e te Atua i nia i te hoê pou aore ra tumu raau. E riro te reira ei faaararaa no te tahi atu mau Iseraela.

^ par. 6 Te farii nei te aivanaa e rave rahi e i raro a‘e i te Ture e haapohehia te hoê taata ohipa ino hou a rî ai i to ’na tino i nia i te hoê pou. Te vai ra râ te haapapuraa e mai te senekele matamua, te ora noa ra vetahi feia ohipa ino a rîhia ’i ratou e te mau ati Iuda e ua pohe atura i nia i te pou.