Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ME 2013

 AAMU

No te aha mea faufaa ’i to matou oraraa?

No te aha mea faufaa ’i to matou oraraa?

I 1958, ua fanau vau i ta ’u tamaiti ia Gary. Ua taa oioi ia ’u e te vai ra te hoê fifi. I titauhia ahuru ava‘e ia itea i te taote eaha to ’na ma‘i e e pae â matahiti ia haapapu te mau taote taa ê i Lonedona e tera iho â. E iva matahiti i muri a‘e ia Gary, ua fanau vau ia Louise. Auê au i te oto a faaite ai o ’na i te mau tapao peapea a‘e i ta to ’na taeae!

Ua parau mǎrû mai te mau taote e e ma‘i piihia LMBB * to ta ’u na tamarii toopiti e aita e rapaauraa. I tera tau, mea iti roa tei itehia no nia i tera ma‘i varavara tutuuhia e te metua. Teie te mau tapao matauhia: te mohimohiraa te mata a matapo atu ai, te ma‘i poria, te manimani rima e avae hau, te mau fifi i te pae tino e no te haapii, te mau fifi no te faatere i te mau mero, te omaha tihota, te mauiui i roto i te mau puoiraa ivi e te ma‘i mape. E ere ïa i te ohipa nainai ia haapao i ta ’u na tamarii. Ia au i te hoê maimiraa apî, te mana‘ohia ra e i Beretane, 1 taata i nia 125 000 tei roohia i tera ma‘i. Mea rahi atu â râ tei roohia i te hoê huru au noa o tera ma‘i.

UA RIRO IEHOVA EI “HAAPURAA” NO MATOU

I muri iti noa ’‘e i to ’u faaipoiporaa, ua paraparau vau i te hoê Ite no Iehova. Ua taa oioi ia ’u e tera te parau mau. Aita roa ’tu râ ta ’u tane i anaanatae. No ta ’na ohipa, e teretere noa matou. Aita ïa ta ’u e nehenehe e apiti i te hoê amuiraa. Ua tamau noa râ vau i te taio i te Bibilia e i te pure ia Iehova. Mea mahanahana mau ia taio e “e haapuraa hoi Iehova no te feia i hamani-ino-hia; e haapuraa i te anotau ahoaho” e e ‘ore roa o ’na e faarue i tei imi ia ’na’!—Sal. 9:9, 10.

I te mea e ua mohimohi to Gary mata, ua afaihia o ’na i te hoê fare haapiiraa taa ê i te pae miti apatoa o Beretane i te onoraa o to ’na matahiti. Ua noho o ’na i ǒ. Ua taniuniu noa mai o ’na ia ’u no te faaite mai i te mau mea e haapeapea ra ia ’na. Na roto i te niuniu, ua tia ia ’u ia tauturu ia ’na ia taa i te mau faaueraa tumu Bibilia. Tau matahiti i muri iho i to ’u fanauraa ia Louise, ua roohia vau i te sclérose en plaques (ma‘i o te ino roa ’tu â a ore atu ai te tahi mau tuhaa o te tino e hauti faahou) e te fibromyalgie (ma‘i e mauiui hanoa ’i te mau uaua i‘o). Ua ho‘i mai Gary i te fare i te 16raa o to ’na matahiti. Teie râ, ua ino roa ’tu â to ’na mata e ua faataahia o ’na mai te hoê taata matapo i 1975. I 1977, ua faarue mai ta ’u tane ia matou.

I to Gary iho â ho‘iraa mai, ua apiti matou i te hoê amuiraa î i te here e ua bapetizo vau ia ’u i 1974. A taurearea ’i, ua tauturu te hoê matahiapo ia Gary ia farii i te mau tauiraa i nia i to ’na tino. Auê au i te oaoa! Ua tauturu mai te tahi atu mau Ite ia rave i te ohipa i te fare. I te pae hopea, e pae o ratou tei aufauhia e te turuutaa no te tauturu ia matou. Auê haamaitairaa e!

Ua haere noa Gary i mua i roto i te parau mau e ua bapetizo ia ’na i 1982. Ua hinaaro mau o ’na e rave i te taviniraa pionie tauturu. Ua faaoti ïa vau e apiti ia ’na i roto i tera taviniraa e ua na reira noa vau e rave rahi matahiti. Tau matahiti i muri a‘e, ua oaoa mau ta ’u tamaiti a parau ai to matou tiaau haaati ia ’na, “Gary, no te aha eita oe e rave i te taviniraa pionie tamau?” Tera iho â te faaitoitoraa ta Gary i hinaaro. Faatoroahia ’tura o ’na i 1990.

 E piti taime te tauiraahia to Gary tauupu haavare, i 1999 e i 2008. Mea peapea a‘e râ te mau fifi mafatu o Louise. I te fanauraahia o ’na, mea matapo o ’na. E i to ’u iteraa i te hoê manimani hau i nia i to ’na avae, ua taa ia ’u e hoê â ma‘i to ’na i to Gary. Ua faaite oioi te mau hi‘opoaraa e mea rahi te mero i roto ia ’na tei ino. E pinepine o ’na i te tâpûhia. E pae atoa tâpûraa tei ravehia i nia i to ’na mau mape. Mai ia Gary, e omaha tihota atoa to ’na.

Ua taa ia Louise te mau fifi e itehia mea titau-ana‘e-hia te hoê tâpûraa. E paraparau ê na ïa o ’na i te mau taote tâpû, taote faataoto e i te pǔpǔ faatere o te fare ma‘i no te faataa no te aha eita o ’na e farii i te pâmuraa toto. Ei faahopearaa, e taairaa maitai to ’na e te feia tei haapao maite i to ’na mau fifi pae tino.

E ORARAA FAUFAA TO MATOU

Mea rahi te mea ta matou e rave nei i te fare no te haamori ia Iehova. Hou te faraa mai te mau ravea apî, i rave na vau tau hora no te taio e o Gary raua Louise. I teie nei, maoti te mau CD, DVD e haruharuraa i nia i te www.jw.org, ua tia ia matou ia haamau i te hoê porotarama haapiiraa Bibilia tahebedoma i te taime taa ê. Oia atoa ia horoa i te mau pahonoraa i te mau putuputuraa.

Auê matou i te mauruuru no te pue parau mau faufaa i roto i te Parau faaurua a Iehova!

I te tahi taime, e tamau aau Gary i ta ’na mau pahonoraa. E tumu parau ana‘e ta ’na i te Haapiiraa no te taviniraa Kerisetiano, e vauvau o ’na i te reira na roto i ta ’na iho mau parau. Ua riro mai o ’na ei tavini tauturu i 1995 e mea rahi ta ’na hopoia i te Piha a te Basileia. E farii popou o ’na i te mau melo o te amuiraa e e tauturu atoa o ’na i te tuhaa haapurororaa.

E apiti te tahi atu mau Ite ia Gary i roto i te taviniraa. E pinepine e na ratou e turai i to ’na parahiraa turairai ta ’na e faaohipa no to ’na mau mauiui i te mau puoiraa ivi. Ua tauturu te hoê Ite ia ’na ia faatere i te haapiiraa Bibilia a te hoê taata e anaanatae ra. Ua faaitoito atoa Gary i te hoê tuahine tei ore i poro faahou e 25 matahiti. Te haere nei raua toopiti i te mau putuputuraa.

I te ivaraa o to ’na matahiti, ua haapii Louise i te nino i te ahu e to ’na mama ruau. E na mâua te hoê taata utuutu i haapii atu ia ’na te au-rima-raa. I te mea e mea au roa na ’na te niraraa, ua raraa o ’na i te ahu taoto ua rau te û na te pepe e na te feia paari o te amuiraa. Ua hamani atoa i te mau tareta parau faatau aroha e te mau hoho‘a tapiripiri nainai. Ua poihere te feia tei fana‘o i tera mau tareta i te reira. A taurearea ’i, ua haapii o ’na i te faaohipa i te hoê matini patapataraa parau. I teie nei, maoti te hoê matini roro uira taa ê e faaroohia te reo, e papai o ’na i to ’na mau hoa. Ua bapetizohia Louise i te 17raa o to ’na matahiti. E opereraa taa ê ana‘e, e rave mâua i te taviniraa pionie tauturu. Mai ia Gary, e tamau aau Louise i te mau irava no te faataa i to ’na faaroo i ta te Atua i fafau no nia i te ao i reira “e faaaraarahia ’i te mata o te matapo” e e ore “to reira e parau e, Ua paruparu vau i te ma‘i.”—Isa. 33:24; 35:5.

Auê matou i te mauruuru no te pue parau mau faufaa i roto i te Parau faaurua a Iehova! Ua î to matou aau i te mauruuru no te tauturu î i te here a te amuiraa, mea fifi roa ’tu â hoi ahani aita ratou. E maoti iho â râ te tauturu a Iehova, mea faufaa mau to matou oraraa.

^ par. 5 Ua piihia teie ma‘i Laurence-Moon-Bardet-Biedl no na taote e maha tei ite i te tumu o teie ma‘i. I teie nei, e pii-noa-hia te reira te ma‘i a Bardet-Biedl. Aita e rapaauraa.