Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Me 2013

 HAAMANA‘ORAA NO TAHITO RA

Ua tapea maite ratou i te “hora ati”

Ua tapea maite ratou i te “hora ati”

A TUPU ai te Tama‘i rahi Matamua i 1914, ua taa i te taata e eita te Feia haapii Bibilia e apiti i te tama‘i. (Isa. 2:2-4; Ioa. 18:36; Eph. 6:12) Eaha ta te mau tavini a te Atua i Beretane i faaruru?

Henry Hudson

I 1916, ua haamauhia i Beretane te hoê ture o tei faahepo i te mau tane faaipoipo-ore-hia mai te 18raa e tae atu i te 40raa o te matahiti ia haere i te tama‘i. Area te feia o te ore e na reira no to ratou to ratou mana‘o haava, e faatiamâhia ïa. Ua haamau te faatereraa i te mau tiripuna no te faaoti o vai te faatiamâhia e i nia i teihea faito.

Aita i maoro roa, fatata e 40 Feia haapii Bibilia tei tuuhia i te fare auri e e 8 tei afaihia i te tama‘i i Farani. Hapono a‘era te mau taeae i Beretane i te hoê rata, oia atoa te hoê papie e 5 500 tarimaraa to nia iho, i te faatere hau nui o Herbert Asquith no te patoi i tera mau ohipa tia ore.

Faaroohia ’tura e e pupuhihia na taeae e vau tei afaihia i Farani no te mea ua patoi ratou i te oraraa faehau. Tei mua ratou i te feia te pupuhi ia ratou a taui ai ta ratou faautuaraa ei ahuru matahiti ohipa faahepohia. Ta ratou ïa i rave a ho‘i ai i Beretane i roto i te mau fare tapearaa tivira.

James Frederick Scott

A tamau noa ’i te tama‘i, ua tihepu atoa te nuu i te mau tane faaipoipo. I Manchester (Beretane), ua haavahia Henry Hudson, te hoê taote e taata haapii Bibilia atoa. I te 3 no Atete 1916, ua faahapa te tiripuna ia ’na, ua titau ia ’na ia aufau i te hoê utua e ua tuu ia ’na i te rima o te mau tia a te nuu. I te hoê â taime, ua faaroohia e te haavahia ra i Édimbourg (Ekosia) James Frederick Scott. Aita teie pionie e 25 matahiti i faahapahia. Ani faahou atura te faatereraa ia haava ia ’na. Tera râ, vaiiho a‘era te faatereraa i te reira no te haapao i te tahi atu haavaraa i Lonedona. I reira, ua faahapahia te taeae Herbert Kipps, ua titauhia ia aufau o ’na i te hoê utua e ua tuuhia o ’na i te rima o te mau tia a te nuu.

I Tetepa 1916, e 264 taeae tei ani ia faatiamâhia ratou i te tau faehau. E 5 o ratou tei faatiamâhia, 154 tei horoahia te hoê ohipa no te tauturu i te huiraatira, e 23 tei tuuhia i te mau tuhaa a te nuu aita i taaihia i te aroraa e e 82 tei tuuhia i te rima a te mau tia a te nuu. Ua haavahia e ua tapeahia vetahi no te oreraa e auraro i te mau faaueraa. Mea rahi te taata tei patoi i te mau hamani-ino-raa ta teie mau tane i faaruru i te fare tapearaa a te nuu. Ua afai atura te faatereraa ia ratou i te mau aua raveraa ohipa tivira.

Pryce Hughes

 Ua ohipa Edgar Clay e Pryce Hughes, tei tavini i muri a‘e ei tiaau amaa i Beretane, i nia i te hoê patu haapahuraa pape i te fenua no Galles. Area o Herbert Senior, hoê o na taeae e vau tei faaho‘ihia mai Farani mai, ua afaihia ïa i te fare auri no Wakefield i Yorkshire. Ua amo vetahi ê i ta ratou faautuaraa ma te rave i te ohipa faahepohia i te fare auri fifi roa no Dartmoor. O ratou te pǔpǔ rahi roa ’‘e e te otahi o te feia tei ore i rave i te tau faehau no to ratou tiaturiraa faaroo.

I farii na Frank Platt ia rave i te ohipa tei ore i taaihia i te aroraa. Ua hamani-ino-noa-hia o ’na ma te u‘ana a afaihia ’i o ’na i te tama‘i. Ua haapii Atkinson Padgett i te parau mau i muri iti noa ’‘e i te ôraa i roto i te nuu. Ua hamani-ino-atoa-hia o ’na e te mau tia a te nuu no te oreraa e apiti i te aroraa.

Herbert Senior

Ua fatata 100 matahiti noa paha to to tatou mau taeae taa-maitai-roa-raa i to tatou tiaraa amui ore ei Kerisetiano. Noa ’tu râ, ua imi ratou i te faaoaoa i te Atua ra o Iehova. E hi‘oraa maitai mau te feia tei faahitihia ma to ratou i‘oa i roto i teie tumu parau o te tiaraa amui ore i te hoê “hora ati” mau. (Apo. 3:10)—Haamana‘oraa no tahito ra no Beretane mai.

No te ite atu â

UIRAA A TE TAATA

No te aha e vai amui ore ai te mau Ite no Iehova i roto i te mau ohipa poritita?

Mea atâta anei ratou no te hau o te fenua?