Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2013

A tamahanahana atoa ’tu

A tamahanahana atoa ’tu

Ei taata tia ore, e ma‘ihia tatou pauroa. E roo-atoa-hia vetahi i te ma‘i rahi. E nafea ïa ia faaoromai i te reira?

Te tahi tauturu faufaa roa, o te tamahanahanaraa ïa no ǒ mai i te utuafare, te hoa e te taeae e tuahine Kerisetiano.

E au te mau parau î i te here e te mǎrû a te hoê hoa i te raau tamǎrû o te rapaau e o te tamahanahana mai. (Mas. 16:24; 18:24; 25:11) Te oaoa nei te mau Kerisetiano mau i te fana‘o i te tamahanahanaraa. Te faaitoito atoa nei râ ratou i te “haamahanahana i te feia i roohia i te pohe ra [aore ra ati], i te mahanahana a te Atua i mahanahana ’i [r]atou iho nei.” (Kor. 2, 1:4; Luka 6:31) Ta Antonio ïa, te hoê tiaau mataeinaa i Mehiko, i haapii.

Ua roohia Antonio i te tahi huru mariri ai taata o te toto. Ua hepohepo roa o ’na. Noa ’tu râ, ua faaitoito o ’na i te haavî i to ’na toaruaru rahi. Mea nafea? Ua tamata o ’na i te haamana‘o e i te himene i te mau himene o te Basileia. E faaroo e e feruri maite ïa o ’na i tei papaihia. Ua pure atoa o ’na ma te reo puai e ua taio i te Bibilia. Ua tauturu rahi te reira ia ’na.

Te fa‘i nei râ Antonio e no ǒ mai te tauturu rahi roa ’‘e i to ’na mau hoa Kerisetiano. Te na ô ra oia: “A toaruaru roa ’i mâua ta ’u vahine, e ani mâua i te hoê fetii, e matahiapo hoi, ia haere mai e ia pure ia mâua ra. Ua tamahanahana e ua tamǎrû mai te reira. Maoti te tauturu a to mâua utuafare e to mâua mau taeae pae varua, ua tia ia mâua ia tinai oioi i te toaruaru rahi.” Auê o ’na i te oaoa i te fana‘o i tera mau hoa î i te here e te haapao maitai!

Te tahi atu tauturu a fifi ai, o te varua mo‘a ïa i fafauhia. Ua parau te aposetolo Petero e e ô te varua mo‘a o te Atua. (Ohi. 2:38) Tei itehia ïa a faatavaihia ’i e rave rahi i te Penetekose 33. E nehenehe atoa râ tatou paatoa e fana‘o i tera ô o te varua mo‘a o te ore roa ’tu e pau. No te aha ïa e ore ai e ani ia horoa-rahi-hia mai tera ô?—Isa. 40:28-31.

A ANAANATAE ROA ’TU I TEI MAUIUI

Mea rahi te fifi ta te aposetolo Paulo i faaruru. Fatata atoa o ’na i te pohe tau taime. (Kor. 2, 1:8-10) Aita râ o ’na i riaria no to ’na ora. Na te ite e te turu ra te Atua ia ’na i tamahanahana ia ’na. Ua papai Paulo: “Ia haamaitaihia te Atua, te Metua o to tatou Fatu ra o Iesu Mesia, te tumu o te aroha e o te Atua no ’na ana‘e te mahanahana; o tei haamahanahana mai ia matou i to matou mau pohe atoa nei.” (Kor. 2, 1:3, 4) Aita Paulo i paruparu no to ’na mau fifi. Ua tauturu râ te reira ia ’na ia faaite i te aumauiui. Ua tia ïa ia ’na ia tamahanahana ia vetahi ê a fifi ai ratou.

I te oraraa to ’na ma‘i, ua tia ia Antonio ia tavini faahou ei tiaau ratere. Ua anaanatae mau o ’na i to ’na mau hoa Kerisetiano. I teie nei râ, te faaitoito taa ê nei raua ta ’na vahine i te haere e hi‘o e e faaitoito i tei ma‘ihia. Ei hi‘oraa, ua haere Antonio e hi‘o i te hoê Kerisetiano tei roohia i te ma‘i rahi. Ua taa ’tura ia ’na e aita tera taeae i hinaaro e haere i te mau putuputuraa. Te faataa ra Antonio: “E ere no te mea aita o ’na e here ra ia Iehova aore ra i te mau taeae. Ua horuhoru râ o ’na no to ’na ma‘i a mana‘o atu ai e mea faufaa ore o ’na.”

No te faaitoito atoa i tera taeae i ma‘ihia, ua ani Antonio ia ’na ia faaoti i te pure i te hoê tamaaraa. Noa ’tu e ua mana‘o tera taeae e eita e maraa ia ’na, ua farii o ’na. Te faatia ra Antonio: “Mea nehenehe mau ta ’na pure, e i muri iho, ua taui roa o ’na. Aita o ’na i mana‘o faahou e mea faufaa ore o ’na.”

Oia mau, ua faaruru e ua faaoromai tatou paatoa i te tahi fifi rahi aore ra iti. Teie râ, mai ta Paulo i parau, e tauturu mai te reira ia tamahanahana ia vetahi ê ia fifihia ratou. E faaite ana‘e ïa i te aumauiui i to tatou mau hoa Kerisetiano e mauiui ra. E pee atoa ana‘e i te hi‘oraa o to tatou Atua ra o Iehova ma te tamahanahana ia vetahi ê.