1. No te aha te hoê pairati e faaohipa ˈi i te hoê tapura a hiˈopoa ˈi i te manureva?

 HOU te faarevaraa taitahi, e hiˈopoa maite te hoê pairati i te manureva. E faaohipa o ˈna i te hoê tapura no te papu e ua hiˈopoa o ˈna i te mau mea atoa. Ia ore o ˈna e na reira, eita paha o ˈna e ite i te hoê fifi e ati ai te manureva. Mea faufaa roa ia hiˈopoa te pairati aravihi atoa i te taatoaraa o te mau mea e vai ra i nia iho i te tapura.

2. Ia hiˈopoa te mau Kerisetiano i te aha?

² E nehenehe oe e faaohipa i te hoê tapura, mai teie pairati, no te papu e e puai noâ to faaroo ia fifihia oe. No bapetizo noa ˈtura anei oe aore ra mea maoro, mea faufaa roa ia hiˈopoa tamau maite i to faaroo. Ia ore, e ati paha to oe mau taairaa e o Iehova. Te faaara maira te Bibilia: “O tei manaˈo e te tia ra oia, e ara oia o te hiˈa.”—Kor. 1, 10:12.

3. Ia aha te mau Kerisetiano i Galatia?

³ I titauhia na ia hiˈopoa te mau Kerisetiano i Galatia i to ratou faaroo e ia haafaufaa i to ratou tiamâraa pae varua. Maoti te tusia a Iesu, ua tia i te feia e faatupu i te faaroo ia ˈna ia ite i te Atua ma te faahiahia roa ˈtu â: e nehenehe ratou e riro ei tamaiti a te Atua! (Gal. 4:9) I parau na vetahi i roto i te amuiraa e mea tia ia pee te mau Kerisetiano i te Ture a Mose no te riro ei taata parau-tia. Aita râ te Atua e faaohipa faahou ra i tera Ture! E aita te mau Etene i pee aˈenei i te reira! Mea faufaa ia haere te ati Iuda e te Etene atoa i mua i te pae varua. E mea tia ia farii ratou e aita te Atua e titau faahou ra ia pee te taata i te Ture.

4, 5. Eaha te aˈoraa a Paulo i to Galatia, e e nafea tatou e faufaahia ˈi i te reira?

⁴ No te aha i papaihia ˈi te aˈoraa a Paulo i to Galatia? Ia ore te mau Kerisetiano mau ia faarue i te pue parau mau faufaa a te Bibilia a hoˈi atu ai i te mau mea ta ratou i faarue. Ua faaurua Iehova i te aposetolo no te faaitoito ia tatou paatoa ia vai taiva ore.

⁵ Mea maitai ia haamanaˈo tatou paatoa mea nafea tatou i te tiamâraa mai i te pae varua e i te riroraa mai ei Ite no Iehova. No te na reira, a feruri na i teie na uiraa: Te haamanaˈo ra anei oe i ta oe i rave ia ineine oe no te bapetizoraa? Te haamanaˈo ra anei oe mea nafea oe i te iteraa i te Atua e i to oe huru aau a itehia mai ai oe e ana?

6. Eaha te tapura hiˈopoaraa ta tatou e hiˈopoa mai?

⁶ Ua rave tatou paatoa e iva taahiraa. Te faataahia ra taua mau taahiraa ra, tei au i te hoê tapura hiˈopoaraa pae varua, i roto i te tumu parau tarenihia  “Taahiraa e aratai i te bapetizoraa e no te haere â i mua.” E haamanaˈo tamau anaˈe i tera na taahiraa e iva. E puaihia ïa tatou no te ore e hoˈi i te mau mea o teie nei ao. Mai te hoê pairati o te hiˈopoa iho â i te hoê tapura hou te faarevaraa, ia hiˈopoa noa ˈtoa tatou i te hoê tapura pae varua e tia ˈi.

7. Ia pee tatou i teihea “hiroa,” e no te aha?

⁷ E haamanaˈo te hoê tapura hiˈopoaraa i te hoê pairati e e ohipa te titauhia ia pee maite hou te faarevaraa taitahi. E nehenehe tatou atoa e hiˈopoa ia tatou iho e i ta tatou i rave mai to tatou bapetizoraa mai â. Ua papai Paulo ia Timoteo: “E tapea maitai i te hiroa parau mau ta oe i ite ia ˈu nei ra, ma te faaroo e te hinaaro i te Mesia ra ia Iesu.” (Tim. 2, 1:13) E itehia tera pue “parau mau” i roto i te Parau a te Atua. (Tim. 1, 6:3) E tauturu mai te tahi hohoˈa rii ia ite eaha ta te hoê taata peni i hinaaro e faaite mai. Oia atoa, e tauturu mai te “hiroa parau mau” ia ite i ta Iehova e titau maira. E hiˈo anaˈe ïa i te mau taahiraa ta tatou i rave hou a bapetizo ai no te ite e te piri ra anei tatou i te hiroa, aore ra hohoˈa, parau mau.

8, 9. (a) No te aha ia tamau ai i te haapii e i te haapaari i to tatou faaroo? (b) No te aha mea faufaa ˈi to tatou haereraa i mua ei Kerisetiano? No te aha e au ai te reira i te tupuraa o te hoê tumu raau?

⁸ Ta tatou taahiraa matamua, o te fanaˈoraa ïa i te ite a faatupu atu ai i te faaroo. Mea faufaa roa râ ia tamau i te haapii e i te haapaari i to tatou faaroo. (Tes. 2, 1:3) I muri aˈe i to tatou bapetizoraa, e titauhia ia piri e ia puai roa ˈtu â to tatou taairaa e te Atua.

⁹ E nehenehe e faaau i te reira i te tupuraa o te hoê tumu raau. Mea maere mau ia ite i te teitei ta te hoê tumu raau e raea. Mea paari maitai anaˈe iho â râ to ˈna mau aa. Ei hiˈoraa, e raea i te tahi mau arezi nehenehe mau i Lebanona e 37 metera i te teitei. E aa paari mau to ˈna e te hohonu. E titau-atoa-hia te hoê taura 12 metera no te haaati i to ˈna tumu. (Sire 5:15) E tupu oioi te hoê tumu raau i te omuaraa. I muri aˈe e tupu â o ˈna, eita râ te reira e ite-maitai-hia. E rahi mai to ˈna tumu e e haere hohonu to ˈna mau aa e e parare atoa. E mau maitai ïa te tumu raau. Hoê â huru  e to tatou haereraa i mua ei Kerisetiano. A haamata ˈi i te haapii i te Bibilia, e rave oioi paha tatou i te tauiraa e rave rahi a bapetizo atu ai. E ite maitai te amuiraa i to tatou haereraa i mua. Ua riro atoa mai paha tatou ei pionie aore ra ua fanaˈo i te tahi atu mau hopoia. A nuu noa ˈtu ai te tau, mea fifi paha no vetahi ia ite i to tatou haereraa i mua i roto i te parau mau. Mea faufaa râ ia tamau â i te haapii e i te faatupu i te faaroo rahi aˈe no te riro ei taata paari i te faaroo e te ite mai te Mesia. (Eph. 4:13) A haere ai tatou i mua ei Kerisetiano, e au tatou i te hoê ohi apî tei tupu e tei riro mai ei tumu raau paari maitai.

10. No te aha mea faufaa ˈi no te Kerisetiano feruriraa paari ia haere â i mua?

¹⁰ Eiaha râ tatou e faaea noa i ǒ. E au to tatou ite i te Parau a te Atua e to tatou faaroo i te aa e mau papu ai tatou. Mea faufaa ïa ia haapaari i tera mau aa. (Mas. 12:3) Mea rahi te taeae e tuahine i roto i te amuiraa te na reira nei. Ei hiˈoraa, no te hoê taeae tei riro ei matahiapo e 30 tiahapa matahiti i te maoro, te haere noâ o ˈna i mua i te pae varua. Te na ô nei oia: “Ua au roa ˈtu â vau i te Bibilia i teie nei. E ite noa vau i te ravea rau no te faaohipa i te mau faaueraa tumu e ture a te Bibilia. E te rahi noa ˈtura to ˈu oaoa i roto i te taviniraa.”

11. E nafea ia piri roa ˈtu â to tatou auhoaraa e o Iehova?

¹¹ No te haere i mua, mea faufaa atoa ia piri roa ˈtu â tatou ia Iehova mai to tatou Hoa e Metua. Te hinaaro ra oia ia ite tatou i te hau e te here. Tera te huru aau o te hoê tamarii i pihai iho i to ˈna metua î i te here. To tatou atoa paha huru e te hoê hoa piri. Eita tera taairaa piri e o Iehova e tupu i te hoê noa po. E titauhia te taime ia ite e ia here tatou ia ˈna. A faataa ïa i te taime i te mahana taitahi no te taio i te Bibilia. A taio i te vea apî taitahi, te buka e te buka rairai ta Iehova e horoa ˈtu. E tauturu atu te reira ia ite maitai roa ˈtu â o vai ra o ˈna e ia piri roa ˈtu â to orua auhoaraa.

12. Ia aha tatou ia itehia mai tatou e Iehova?

¹² E piri roa ˈtoa to tatou auhoaraa e te Atua maoti ta tatou mau pure e amuimuiraa maitai. (A taio i te Malaki 3:16.) Te faaroo ra Iehova i te “pure” a to ˈna  mau hoa. (Pet. 1, 3:12) Mai te hoê metua î i te here, te faaroo nei Iehova ia tiaoro ˈtu tatou ia ˈna na roto i te pure. Ia ‘tamau uˈana maite â ïa tatou i te pure’ e tia ˈi. (Roma 12:12) Eita e nehenehe e riro noa ei hoa no te Atua aita anaˈe ta ˈna tauturu. Mea puai mau te mau faahemaraa a teie nei ao no te faaruru i te reira o tatou anaˈe. Ia faaea tatou i te pure, eita tatou e fanaˈo faahou i te puai ta te Atua e hinaaro e horoa mai. Te oaoa ra anei oe i ta oe mau pure aore ra te ite ra oe e mea tia ia haamaitaihia te reira?—Ier. 16:19.

13. No te aha mea faufaa ˈi ia amuimui atu i te mau hoa Kerisetiano ia piri noa to tatou auhoaraa e te Atua?

¹³ Te oaoa ra Iehova i te feia atoa “tei tiaturi ia ˈna.” No reira, i muri aˈe i te iteraa i te Atua, mea faufaa ia tamau noa i te amui atu i te feia o tei ite ia ˈNa. (Nah. 1:7) Ua î teie nei ao i te ino. E haerea paari ïa ia amuimui atu i to tatou mau taeae e tuahine o te faaitoito mai. Eaha te mau maitai? E ite oe i roto i te amuiraa te mau taata o te turai ia oe ia faaite i “te aroha” e ia rave i “te mau ohipa maitatai.” (Heb. 10:24, 25) Eita e nehenehe e pee i te aˈoraa a Paulo ia ore tatou e putuputu tamau e te amuiraa. A haere tamau ïa i te mau putuputuraa e a horoa i te mau pahonoraa.

14. No te aha ia vai ineine noa ˈi tatou i te tatarahapa e i te taui?

¹⁴ Hou a riro mai ai ei Kerisetiano, i titauhia na ia tatarahapa tatou i ta tatou mau hara e ia fariu mai. Ia vai ineine noa tatou i te tatarahapa. Ei taata tia ore, mea ohie roa ia hara. E au te hara i te ophi tei ineine i te hohoni ia tatou. (Roma 3:9, 10; 6:12-14) E hara iho â ïa tatou. Auaa râ mea faaoromai Iehova a faaitoito ai tatou i te aro i to tatou huru tia ore e ia rave i te mau tauiraa e titauhia. (Phil. 2:12; Pet. 2, 3:9) A faaohipa i to taime e ta oe mau faufaa i roto i te taviniraa a Iehova, eiaha no te mau tapiraa miimii. Ua manaˈo noa te hoê tuahine tei paari i roto i te parau mau e mea tia ia riaria ia Iehova. No ˈna, eita roa ˈtu ïa ta ˈna e nehenehe e faaoaoa i te Atua. E ere o ˈna i te mea piri roa ia Iehova e ua hapa o ˈna i roto i to ˈna oraraa. Te na ô ra o ˈna: “E ere no te mea e aita vau i here ia Iehova, no te mea râ aita vau i ite mau o vai ra o ˈna. Ua pure uˈana noa râ vau e ua haamata vau i te taui.” Te parau nei â teie tuahine: “Ua ite au e ua aratai mai Iehova ia ˈu mai te hoê tamarii, ma te tauturu ia ˈu ia haapaiuma hoê hoê i te fifi. E ma te mǎrû, ua faaite mai eaha te titauhia ia rave au.”

15. Eaha ta Iesu raua to ˈna Metua e ite ra?

¹⁵ A tamau i te parau atu i te taata no nia i te parau apî maitai. O ta te hoê ïa melahi i parau ia Petero e i te tahi atu mau aposetolo a tuu ai o ˈna ia ratou i rapaeau i te fare tapearaa. (Ohi. 5:19-21) Te tahi atu ohipa te mea tia ia hiˈopoa, o ta tatou ïa taviniraa i te hebedoma taitahi. E ite Iesu raua to ˈna Metua i to tatou faaroo e i ta tatou taviniraa. (Apo. 2:19) Ia riro te taviniraa ei tuhaa faufaa roa o to tatou oraraa e tia ˈi.

16. No te aha mea maitai ai ia feruri maite i ta tatou pûpûraa ia Iehova?

¹⁶ A feruri maite i ta oe pûpûraa. O to tatou taairaa e o Iehova te mea faufaa roa ˈˈe ta tatou e fanaˈo nei. Ua ite o ˈna i to ˈna mau taata. (A taio i te Isaia 44:5.) A hiˈopoa na roto i te pure i to oe mau taairaa e o Iehova. A haamanaˈo atoa i  te taio mahana o to oe bapetizoraa. E faaite te reira e ua pûpû oe ia oe ia Iehova. O te faaotiraa faufaa roa ˈˈe ïa ta oe e rave.

17. No te aha mea faufaa ˈi te faaoromai no te vai piri noa ia Iehova?

¹⁷ Ua faaite Paulo i to Galatia te faufaaraa o te faaoromai. (Gal. 6:9) Mea faufaa atoa te reira no tatou. E fifihia oe. E tauturu râ Iehova ia oe. A tamau i te ani i te varua moˈa. E mono te Atua i te oto e te oaoa e i te ahoaho e te hau. (Mat. 7:7-11) A feruri na: Te haapao ra Iehova i te mau manu o te reva. Eita anei ïa o ˈna e haapao atu â ia oe o te here ra ia ˈna e o tei pûpû ia oe ia ˈna? (Mat. 10:29-31) Noa ˈtu eaha te mau faaheporaa ta oe e faaruru eiaha roa ˈtu e hoˈi i muri, eiaha roa ˈtu e tuu. Te haamaitai-rahi-hia ra tatou, ua itehia mai hoi tatou e Iehova!

18. I teie nei ‘ua ite oe i te Atua,’ ia aha oe?

¹⁸ No ite noa ˈtura anei oe i te Atua e no bapetizo-noa-hia ˈtura oe? Ia aha oe i teie nei? A haapii atu â no nia ia Iehova no te riro ei Kerisetiano feruriraa paari i te pae varua. Mea maoro anei oe i te bapetizoraahia? Ia aha oe i teie nei? E mea tia ia faahohonu e ia faarahi i to ite no nia ia Iehova. Eiaha roa ˈtu tatou e manaˈo e aita e faufaa ia haamaitai atu â to tatou mau taairaa e o Iehova. I te tahi taime, e titauhia ia hiˈopoa i ta tatou tapura hiˈopoaraa pae varua. E papu ïa ia tatou e te piri noa ˈtura anei to tatou mau taairaa e to tatou Metua, Hoa e Atua î i te here ra o Iehova.—A taio i te Korinetia 2, 13:5, 6.