Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Mati 2013

Aore e turoriraa to te feia e here ra ia Iehova

Aore e turoriraa to te feia e here ra ia Iehova

“E hau rahi to te feia i hinaaro i ta oe ture; aore o ratou e turoriraa.”—Sal. 119:165.

1. E nafea te huru o te hoê taata horo e faahoho‘a maitai ai i ta tatou faaotiraa eiaha e tuu?

MAI to ’na apîraa, e vahine horo tuiroo Mary Decker na te ao. I te Heiva tuaro nui i 1984, ua mana‘ohia e o ’na te upootia mai i te fetia auro i te hororaa hopea i nia e 3 000 metera. Aita râ o ’na i faaoti i te hororaa. Ua tano to ’na avae i nia i te tahi atu e ua topa ’tura. Ua pepe o ’na e ma te ta‘i ua afaihia ’tura o ’na i rapae i te tahua hororaa. Aita râ o Mary i tuu. Aita hoê matahiti atura, ua horo faahou o ’na e ua noaa ia ’na te taime apî maitai roa ’‘e o te hororaa a te vahine i nia 1,6 kilometera.

2. Tei roto te mau Kerisetiano mau i teihea hororaa? Eaha ta tatou fa?

2 Tei roto tatou ei Kerisetiano i te hoê hororaa taipe. Ta tatou fa? E horo no te upootia. E ere i te hoê hororaa vitiviti. E ere atoa i te hoê hororaa e faaea ’i oe ia au i to hinaaro. E hororaa atea râ teie i reira mea faufaa ’i te faaoromai no te upootia. Ua faaohipa Paulo i tera faahoho‘araa a papai ai i to Korinetia, oire matauhia no te mau tata‘uraa: “Aita outou i ite e, o te feia horo i te hororaa e horo paatoa ïa, hoê roa râ e rave i te berabeio [aore ra re]? E faaau i to outou hororaa ia noaa te berabeio.”—Kor. 1, 9:24.

3. E nafea te feia horo atoa e upootia ’i i te hororaa no te ora mure ore?

3 Te parau maira te Bibilia ia horo i roto i tera hororaa taipe. (A taio i te Korinetia 1, 9:25-27.) O te ora mure ore te re. I nia i te ra‘i no te mau Kerisetiano faatavaihia aore ra i nia i te fenua no te toea o te feia apiti. Taa ê roa ’tu i te rahiraa o te mau tata‘uraa, o te feia atoa o te apiti i tera hororaa e o te faaoromai e tae roa ’tu i te hopea te upootia. (Mat. 24:13) E pau te feia horo i te taime noa e tâu‘a ore ai ratou i te mau faatureraa  aore ra ia ore ratou e tapae i te reni faaotiraa. Hau atu â, o teie ana‘e hororaa te pûpû i te re o te ora mure ore.

4. Na te aha e haafifi i ta tatou hororaa no te fana‘o i te ora mure ore?

4 E ere i te mea ohie ia tapae i te reni faaotiraa. E titauhia ia haavî ia tatou e ia tiaturi e e manuïa iho â tatou. Hoê noa taata tei tapae ma te ore roa ’tu e turori: Iesu Mesia. Ua papai râ Iakobo e te hapa nei te mau pǐpǐ atoa a te Mesia e rave rahi taime. (Iak. 3:2) Tera iho â! Mea tia ore tatou e o vetahi ê atoa. I te tahi taime, e turori paha ïa tatou, e peretete e e haamǎrû rii mai i ta tatou hororaa. E topa atoa paha. E tia faahou ana‘e râ e e horo â. Ua pepe mau vetahi e ua hinaaro maa tauturu no te tia faahou mai e no te horo e tae roa ’tu i te hopea. Eiaha tatou e maere e e turori aore ra e topa tatou i te tahi taime.—Arii 1, 8:46.

Ia topa oe, a farii i te tauturu e a tia faahou mai!

IA TURORI OE, A FAAEA I ROTO I TE HORORAA

5, 6. (a) No te aha aore ai e turoriraa to te hoê Kerisetiano, e eaha te tauturu ia ’na ia “tia faahou mai”? (b) No te aha aita ’i vetahi tei turori i tia faahou mai?

5 E faaohipa paha oe i na ta‘o “turori” e “hi‘a” no te faataa i te huru o te mau taairaa o te hoê taata e te Atua. Mea maitai anei aore ra aita. I te tahi taime, eiaha râ pauroa, hoê â auraa to raua. Tera ïa te itehia ra i roto i te Maseli 24:16: “E hi‘a te parau-tia e ia taihitu noa ’tu i te hi‘araa, e e tia faahou mai; e nina-noa-hia [aore ra turori] râ te paieti ore e te ino.”

6 E turori e e hi‘a atoa te feia e tiaturi ra ia Iehova a fifi ai aore ra a paruparu ai ratou i roto i te taviniraa. E nehenehe râ e “tia faahou mai.” E tauturu mai iho â Iehova ia na reira ia haamori noa tatou ia ’na ma te aau atoa. Mea mahanahana mau, e ere anei? Area te paieti ore, aita ratou e hinaaro ra e tia faahou mai. Aita ratou e imi ra i te tauturu a te varua mo‘a o te Atua e a to ’Na nunaa. E patoi atoa ratou i tera tauturu i horoahia ’tu. No te feia râ ‘e hinaaro ra i te ture a Iehova,’ aore e turoriraa te patu ia ratou i rapae i te hororaa no te ora.—A taio i te Salamo 119:165.

7, 8. E nafea te hoê taata o tei “hi‘a” e fana‘o noa ’i i te farii maitai a te Atua?

 7 Te topa ra vetahi i roto i te hapa rii, e rave rahi paha taime, no te tahi paruparu. E taata parau-tia noâ râ ratou i te aro o Iehova ia tamau ratou i te “tia faahou mai.” Oia hoi ia tatarahapa mau ratou i ta ratou i rave a faaitoito atu ai i te tavini i te Atua ma te taiva ore. Tera ïa tei itehia i roto i ta te Atua mau haaraa e o Iseraela i tahito. (Isa. 41:9, 10) Aita te Maseli 24:16, i faahiti-ê-na-hia, e onoono ra i nia i to tatou ‘hi‘araa.’ I nia râ i te mea maitai, oia hoi to tatou ‘tia-faahou-raa’ mai maoti te tauturu a to tatou Atua aroha. (A taio i te Isaia 55:7.) Te tiaturi nei Iehova e o Iesu Mesia ia tatou e te faaitoito mai nei ia “tia faahou mai.”—Sal. 86:5; Ioa. 5:19.

8 E turori aore ra e hi‘a paha te hoê taata horo i roto i te hoê hororaa atea. Noa ’tu râ, e taime â to ’na no te tia faahou mai e no te horo â ia tia oioi mai oia. I roto i ta tatou hororaa no te ora mure ore, aita tatou i ite i te ‘mahana e te hora’ e tae mai ai te hopea. (Mat. 24:36) Iti noa ’tu â tatou i te hi‘a, iti noa ’tu â tatou i te haamǎrû mai i ta tatou hororaa. E horo noa ïa tatou e tae roa ’tu i te hopea. E nafea ïa ia ore e turori?

TURORIRAA E HAAFIFI I TA TATOU HORORAA

9. E hi‘opoa tatou i teihea mau ofai te nehenehe e faaturori ia tatou?

9 E hi‘opoa ana‘e e pae ofai o te nehenehe e faaturori ia tatou: to tatou mau paruparu, te mau hinaaro o te tino, te mau ohipa tia ore a te mau hoa Kerisetiano, te ati aore ra te hamani-ino-raa, e te huru tia ore o vetahi ê. Mai te peu e ua turori tatou, e haamana‘o ana‘e e e faaoromai rahi to Iehova. Eita o ’na e parau oioi e mea taiva tatou.

10, 11. O teihea paruparu ta Davida i aro noa na?

10 To tatou mau paruparu. E au te reira i te mau ofai i nia i te purumu hororaa. A hi‘o ai i te mau tupuraa i roto i te oraraa o te arii Davida e o te aposetolo Petero, e ite tatou e piti paruparu: te ereraa i te hitahita ore e te mǎta‘u taata.

11 Mea fifi no te arii Davida ia tapea i to ’na hitahita ore. Tei itehia ïa e o Bate-seba. E i mua i te mau faainoraa a Nabala, fatata atoa Davida i te haa ma te feruri ore. Oia mau, ua ere o ’na i te hitahita ore. Ua faaitoito noa râ o ’na i te faaoaoa ia Iehova. Ua tauturu vetahi ê ia ’na e ua faatupu faahou o ’na i te taairaa maitai e o Iehova.—Sam. 1, 25:5-13, 32, 33; Sam. 2, 12:1-13.

12. Mea nafea Petero i te faaearaa i roto i te hororaa noa ’tu te turoriraa?

12 Ua faaturori te mǎta‘u taata ia Petero i te tahi taime. Noa ’tu râ, ua vai taiva ore noa oia ia Iesu e ia Iehova. A hi‘o na, ua huna o ’na i to ’na Fatu i mua i te taatoaraa eiaha hoê noa taime, e toru râ. (Luka 22:54-62) I muri a‘e, aita Petero i haa ia au i ta Iesu i haapii atu. Ua faaite to ’na haerea e mea maitai a‘e no ’na te mau Kerisetiano ati Iuda peritomehia i te mau Kerisetiano Etene. Mea taa ê râ te mana‘o o te aposetolo Paulo: eiaha te paetahi ia itehia i roto i te amuiraa. Mea ino te haerea o Petero. Hou te mau taeae a inoino ai i to ’na haerea, ua a‘o roa ’tu Paulo ia ’na. (Gal. 2:11-14) Ua puta roa anei Petero a faarue atu ai i te hororaa no te ora? Aita. Ua feruri maite o ’na i te a‘oraa a Paulo, ua faaohipa i te reira e ua tamau i te horo.

13. E nafea te paruparu pae tino e faaturori ai ia tatou?

13 I te tahi taime, o te ea to tatou paruparu. E nehenehe te reira atoa e riro ei turoriraa o te haafifi ia tatou ia haere i mua i te pae varua a peretete e a rohirohi atu ai. Teie te hi‘oraa o te hoê tuahine Tapone  tei ma‘i-mau-hia 17 matahiti i muri a‘e i to ’na bapetizoraa. Ua haapeapea roa ino o ’na no to ’na ea e ua paruparu atura i te pae varua. Aita o ’na i haere faahou i te mau putuputuraa e i te pororaa. Haere a‘era e piti matahiapo e hi‘o ia ’na. No ta raua mau parau faaitoito, ua haere faahou o ’na i te mau putuputuraa. Te haamana‘o ra o ’na: “Ua ta‘i au no te mea ua farii mai te mau taeae ia ’u ma te mahanahana.” Ua apiti faahou mai to tatou tuahine i te hororaa.

14, 15. Eaha te rave ma te papu ia fa mai te mau hinaaro viivii? A faataa.

14 Ua faaturori te mau hinaaro o te tino i te taata e rave rahi. I mua i te faahemaraa, mea faufaa roa ia haa ma te puai ia vai viivii ore noa tatou i te pae feruriraa, morare e varua. Ua parau Iesu ia “faarue ê atu” i te mau mea atoa e turori ai tatou, o to tatou mata anei aore ra rima. Ua tano atoa ïa tera a‘oraa no te mau mana‘o e haerea morare ore e faaea ’i tatou i te horo, e ere anei?—A taio i te Mataio 5:29, 30.

15 Ua papai te hoê taeae, tei paari i roto i te hoê utuafare Kerisetiano, e mea maoro i teie nei to ’na aro-noa-raa i te mau hinaaro mahu. Ua parau oia: “Ua huru ê noa vau.” I te 20raa o to ’na matahiti, ua riro mai oia ei pionie tamau e ei tavini tauturu i roto i te amuiraa. Ua hi‘a a‘era o ’na, ua a‘ohia ia au i te mau Papai e ua fana‘o i te tauturu a te mau matahiapo. Ua tia faahou mai o ’na e ua haere faahou i mua i te pae varua. Ua pure o ’na, ua haapii i te Parau a te Atua e ua faaitoito i te tauturu ia vetahi ê. Tau matahiti i muri a‘e, te fa‘i nei oia: “E fa mai iho â tera mau hinaaro i te tahi taime. Aita râ vau e vaiiho e na ratou e faatere mai ia ’u. Ua haapii au e eita Iehova e vaiiho ia oe ia faahemahia hau a‘e i te tia ia oe ia faaoromai. No ’u, te mana‘o ra ïa te Atua e ua tia ia ’u ia faaoromai.” Te na ô faahou ra o ’na: “I roto roa i te ao apî e hoona ’i te mau tutavaraa atoa ta ’u e rave noa ra. O ta ’u ïa e hinaaro ra! A tiai noa ’tu ai, e tamau vau i te aro i te reira.” Ua faaoti papu o ’na e tamau noa i te horo.

16, 17. (a) Eaha tei tauturu i te hoê taeae o tei mana‘o e ua ravehia te tahi ohipa tia ore i nia ia ’na? (b) Ia tiatonu tatou i te aha no te ore e turori?

16 E riro atoa te ohipa tia ore a te mau hoa Kerisetiano i nia ia tatou ei ofai turoriraa. Tera ta te hoê taeae i Farani, e matahiapo hoi i na mua ’‘e, i mana‘o. No to ’na inoino, ua faaea o ’na i te haere i te mau putuputuraa e i te pororaa. Ua haere e piti matahiapo e hi‘o ia ’na. E ua faaroo i ta ’na faatiaraa ma te ore e tapupu i ta ’na parau. Ua faaitoito raua i te taeae ia huri i ta ’na hopoia i nia ia Iehova. E ua haapapu atu e te mea faufaa roa ’‘e, o te faaoaoaraa ïa i te Atua. Ua na reira iho â o ’na e ua horo faahou. Ua itoito mai o ’na i roto i te amuiraa.

17 E mea tia ia tiatonu tatou paatoa i te Upoo o te amuiraa, o Iesu Mesia. Eiaha râ i te taata tia ore. Te ite maitai nei Iesu, “mai te ura auahi” hoi to ’na mata, i te mau mea atoa. Mea rahi a‘e ïa te ohipa ta ’na e ite ra. (Apo. 1:13-16) Ei hi‘oraa, no tatou, e ohipa tia ore te itehia ra i roto i te amuiraa. Teie râ, peneia‘e ua ite Iesu e aita tatou i taa maitai i tei tupu. Ma te tia roa e i te taime tano, e faaafaro iho â o ’na i te mau fifi i roto i te amuiraa. Eiaha ïa e vaiiho i te mau haaraa aore ra faaotiraa a te tahi noa ’‘e hoa Kerisetiano ia riro ei ofai turoriraa no to tatou faaroo.

18. E nafea ia tapea i te paari i roto i te ati aore ra tupuraa peapea?

18 Teie e piti atu â ofai turoriraa: te ati aore ra hamani-ino-raa e te huru tia ore o vetahi ê. I roto i ta ’na parabole o te taata  ueue huero, ua parau Iesu e e “maheaitu” aore ra e turori vetahi no te ati aore ra te hamani-ino-raa no to ratou faaroo. No ǒ mai paha te reira i te utuafare, te feia tapiri aore ra te feia mana. E haafifi mau te reira i te taata ‘aore e aa i roto i to ’na aau.’ Oia hoi te taata faaroo paruparu. (Mat. 13:21) Ia maitai noa râ to tatou aau, e tauturu mai te huero o te Basileia i to tatou faaroo ia aa maitai. I roto i te ati, e feruri maite ana‘e i roto i te pure i te mau mea e au ia haamaitaihia. (A taio i te Philipi 4:6-9.) Maoti te tauturu a Iehova, e tapea tatou i te paari i roto i te ati e eita tatou e vaiiho i te mau tupuraa peapea ia faaturori ia tatou.

Eiaha te tahi noa ’‘e mea ia tapea ia oe ia faaoti i te hororaa!

19. Ia aha ia ore te tahi hapa ia riro ei turoriraa?

19 Te mea peapea, ua faaea vetahi i te tavini ia Iehova no te huru tia ore o te tahi atu. Ua turori vetahi o ratou no te mau maitiraa niuhia i nia i te mana‘o haava. (Kor. 1, 8:12, 13) Ia hapa mai te tahi taata, e vaiiho anei tatou i te reira ia riro ei peapea rahi roa ino? Te faaue ra te Bibilia i te mau Kerisetiano ia faaea i te faaino atu, ia faaore i ta vetahi ê hapa e ia faaea i te onoono i nia i to tatou tiaraa. (Luka 6:37) I mua i tera huru ofai o te faaturori, a ui: ‘Te faaino ra anei au ia vetahi ê ia au i to ’u iho mau mana‘o? E faarue anei au i te parau mau no te huru tia ore o to ’u mau taeae?’ E tauturu mai te here ia Iehova ia ore roa ’tu e vaiiho i ta te tahi atu taata e rave ia tapea ia tatou ia faaoti i te hororaa.

A HORO TAMAU MAITE, EIAHA E TURORI

20, 21. Eaha ta oe i faaoti papu i te rave i roto i te hororaa no te ora?

20 Ua faaoti papu anei oe e horo e tae roa ’tu i te hopea? (Tim. 2, 4:7, 8) Mea faufaa roa ïa ta oe iho haapiiraa. A faaohipa i te Bibilia e ta tatou mau papai no te rave i te mau maimiraa, no te feruriruri e no te ite eaha te nehenehe e riro ei turoriraa. A taparuparu i te Atua i to ’na varua mo‘a o te horoa ia oe i te itoito. A haamana‘o, e ere no te mea ua turori aore ra ua hi‘a te hoê taata horo i te tahi taime e ua oti iho â ïa no ’na. E nehenehe o ’na e tia faahou mai e e horo â. E tia atoa ia ’na ia faaohipa i te mau ofai e turori ai o ’na ei ofai o te tauturu ia ’na ia haere i mua. E na reira o ’na ma te huti i te haapiiraa a tamatahia ’i to ’na faaroo.

21 E ere te hororaa no te ora mai te raveraa i te pereoo mataeinaa e upootia ’i te taata tei paiuma ’tu. Ia au i te Bibilia, e titauhia ia horo te taata taitahi tei apiti atu, eiaha râ ia faaea noa. Ia na reira tatou, e riro te “hau rahi” no ǒ mai ia Iehova ra mai te mata‘i o te turai ia tatou i mua. (Sal. 119:165) E nehenehe e tiaturi e e haamaitai noa mai o ’na i teie nei â e a muri noa ’tu ia faaoti tatou i te hororaa.—Iak. 1:12.