Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2013

A faahanahana i te i‘oa rahi o Iehova

A faahanahana i te i‘oa rahi o Iehova

“E faarahi tamau â vau i to oe ra i‘oa.”—SAL. 86:12.

1, 2. Taa ê atu i te mau haapaoraa o te Amuiraa faaroo Kerisetiano, eaha te mana‘o o te mau Ite no Iehova no nia i te i‘oa o te Atua?

AITA te rahiraa o te mau haapaoraa o te Amuiraa faaroo Kerisetiano e faaohipa ra i te i‘oa o te Atua. Ei hi‘oraa, te na ô ra te omuaraa parau o te tahi huriraa Bibilia e ‘aita roa ’tu te faaohiparaa i te tahi i‘oa no te Atua hoê e te otahi e tu ra i te faaroo o te ekalesia.’—Revised Standard Version.

2 Area te mau Ite no Iehova, e teoteoraa na ratou ia amo i to te Atua i‘oa e ia faahanahana i te reira. (Sal. 86:12; a taio i te Isaia 43:10.) E fana‘oraa taa ê atoa ia taa i te auraa o tera i‘oa e i te faufaaraa ia faaraa i te reira. (Mat. 6:9) E nehenehe tatou e ere i tera fana‘oraa. E hi‘opoa ana‘e ïa e toru uiraa faufaa: Eaha te auraa e ite i te i‘oa o te Atua? Mea nafea Iehova i te amo-maitai-raa i to ’na i‘oa rahi? E e nafea ia haere ma te i‘oa o Iehova?

EAHA TE AURAA E ITE I TO TE ATUA I‘OA?

3. Eaha te auraa e ite i to te Atua i‘oa?

3 E ere te iteraa i te i‘oa o te Atua i te ite-noa-raa i te ta‘o “Iehova.” O te ite-atoa-raa râ i to ’na roo, to ’na mau huru maitatai, ta ’na opuaraa e haaraa, mai to ’na huru i nia i ta ’na mau tavini. Ua horoa mǎrû noa Iehova i tera ite a faatupu ai i ta ’na opuaraa. (Mas. 4:18) Ua faaite o ’na i to ’na i‘oa i na taata matamua. No reira Eva i faaohipa ’i i te reira a fanau ai ia Kaina. (Gen. 4:1) Ua ite te mau patereareha taiva ore ra o Noa, Aberahama, Isaaka e Iakoba i to te Atua i‘oa. Ua haafaufaa ’tu â ratou i tera i‘oa a haamaitai e a haapao ai Iehova ia ratou e a faaite ai o ’na i ta ’na opuaraa. Ua faaite te Atua  ia Mose i te tahi mea taa ê no nia i te auraa o to ’na i‘oa.

Ua ite Mose i te auraa o to te Atua i‘oa e ua puaihia to ’na faaroo

4. No te aha Mose i ani ai i te i‘oa o te Atua, e no te aha ua tano iho â o ’na i te haapeapearaa?

4 A taio i te Exodo 3:10-15. I te 80raa o to ’na matahiti, ua horoa te Atua ia Mose te hoê faaueraa faufaa: “Na oe e aratai mai i to ’u ra mau taata, te tamarii a Iseraela mai Aiphiti mai.” Ma te faatura, tuu atura Mose i te uiraa faufaa roa: ‘O vai to oe i‘oa?’ Ua ite ê na Mose i to te Atua i‘oa. No te aha ïa tera uiraa? Ua hinaaro oia e ite hau atu â no nia i te Atua e amo ra i tera i‘oa. E papu ïa i to te Atua nunaa e e faaora iho â o ’Na ia ratou. Ua tano iho â Mose i te haapeapearaa. Mea maoro hoi te mau Iseraela i te faatîtîraahia. E uiui paha ratou e e nehenehe anei ta te Atua o to ratou hui metua e faaora ia ratou. I haamori atoa na hoi vetahi mau Iseraela i te mau atua no Aiphiti!—Ezk. 20:7, 8.

5. Mea nafea Iehova i te faataaraa i te auraa o to ’na i‘oa ia Mose?

5 Eaha ta Iehova i pahono ia Mose? Ua parau o ’Na: “Teie ta oe e parau atu i te tamarii a I[s]eraela, Na TE VAI NEI AU vau i tono mai ia outou nei.” * Ua na ô â o ’na: “Na Iehova, te Atua no to outou hui metua, . . . vau i tono mai ia outou nei.” Ua faaite te Atua e e riro o ’na i ta ’na e hinaaro e riro mai no te faatupu i ta ’na opuaraa e e faatupu noa o ’na i ta ’na parau. No reira Iehova i parau faahou ai: “O to ’u [ï]a i‘oa e a muri noa ’tu, o to ’u ïa faaite e tae noa ’tu i te mau ui atoa.” Ua haapuai mau â tera mau parau i te faaroo o Mose e ua î to ’na aau i te mǎta‘u e te faatura!

UA AMO MAITAI IEHOVA I TO ’NA I‘OA

6, 7. Mea nafea Iehova i te faaiteraa e te amo maitai ra o ’na i to ’na i‘oa rahi?

6 I muri iti noa ’‘e i te paraparauraa ia Mose, ua faaite Iehova e te amo maitai ra o ’na i to ’na i‘oa ma te riro ei Faaora no Iseraela. Ua faahaehaa o ’na ia Aiphiti i roto i na ati ahuru a faaite atoa ’i e mea puai ore to ratou mau atua, o Pharao atoa. (Exo. 12:12) Vahi a‘era Iehova i te miti Uteute. Aratai atura ia Iseraela. E haapohe ihora ia Pharao e to ’na nuu. (Sal. 136:13-15) I roto i te “medebara rahi riaria,” ua haapao Iehova i to ’na nunaa. Ua horoa o ’na i te maa e te pape no e mirioni taata! Aita atoa to ratou  ahu e tamaa, aore ra tiaa, i pe. (Deut. 1:19; 29:5) Oia mau, aita hoê a‘e mea e nehenehe e tapea ia Iehova ia rave i ta ’na i fafau. I muri a‘e, ua parau o ’na ia Isaia: “O vau, o vau ana‘e nei o Iehova; aore roa hoi e ora maori râ o vau.”—Isa. 43:11.

7 Ua ite atoa Iosua, tei mono ia Mose, i te mau haaraa puai mau a Iehova i Aiphiti e i roto i te medebara. No reira i tia ’i ia ’na, i te hopea o to ’na oraraa, ia parau i to ’na mau hoa Iseraela: “[U]a ite atoa hoi outou i roto i to outou aau . . . e aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.” (Ios. 23:14) Ua rave iho â Iehova i ta ’na i fafau.

8. E nafea Iehova e faaite ai e te amo maitai ra o ’na i to ’na i‘oa i teie mahana?

8 I teie mahana, te rave atoa nei Iehova i ta ’na i fafau. Na roto i ta ’na Tamaiti, ua tohu o ’na e i te mau mahana hopea, e porohia te poroi o te Basileia “e ati noa ’‘e teie nei ao.” (Mat. 24:14) O te Atua ana‘e te nehenehe e faaite atea e e faatupu i tera ohipa. E te faaohipa ra o ’na i te taata ‘haapii-ore-hia e te itea ore’ no te rave i te reira. (Ohi. 4:13) Te apiti nei ïa tatou i te tupuraa o te parau tohu Bibilia a poro ai i te parau apî maitai. Te faahanahana ra tatou i to tatou Metua e te faaite nei e te tu ra to tatou mana‘o i teie pure: “Ia raa to oe i‘oa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.”—Mat. 6:9, 10.

E I‘OA RAHI TO ’NA

Aita Pharao i farii e o Iehova te Atua mana hope

9, 10. Eaha ’tu â te haapii mai no nia ia Iehova i ta ’na mau haaraa i nia i te mau Iseraela?

9 I muri iti noa ’‘e i to Iseraela faarueraa ia Aiphiti, ua faaite atu â Iehova i to ’na huru. Na roto i te faufaa o te Ture, ua riro o ’na ei “tane” na ratou o tei ineine i te amo i te mau hopoia atoa i taaihia i tera tiaraa. (Ier. 3:14) Riro mai nei ïa te mau Iseraela ei vahine taipe na ’na, ei nunaa no to ’na ra i‘oa. (Isa. 54:5, 6) A auraro ai ratou i ta ’na mau faaueraa, e riro oia ei ‘Tane’ tia roa. E haamaitai e e tiai Iehova ia ratou e e horoa ’tu i te hau. (Num. 6:22-27) E faahanahanahia te i‘oa rahi o Iehova i roto i te mau nunaa. (A taio i te Deuteronomi 4:5-8; Salamo 86:7-10.) A riro noa ’i Iseraela ei nunaa o te Atua, mea rahi te taata ěê tei farii i te haamoriraa mau. Hoê â ta ratou  mau parau i ta te vahine Moabi ra o Ruta ia Naomi: “To oe ra nunaa, o to ’u atoa ïa nunaa; e to oe ra Atua, o to ’u atoa ïa Atua.”—Ruta 1:16.

10 Fatata 1 500 matahiti i te maoro, ua faaite â ta Iehova mau haaraa i nia ia Iseraela i to ’na huru. Noa ’tu e ua faaroo ore noa te nunaa, ua riro Iehova ei “Atua aroha noa” e te “faaoromai rahi.” (Exo. 34:5-7) E otia râ to te faaoromai o Iehova. E ua naea te reira a patoi e a haapohe ai te nunaa ati Iuda i ta ’na Tamaiti. (Mat. 23:37, 38) E ere faahou te huaai o Iseraela i te nunaa no to te Atua ra i‘oa. No Iehova, ua riro ratou mai te raau mǎrô ra te huru. (Luka 23:31) Ua taui anei te reira i to ratou haerea i nia i te i‘oa o te Atua?

11. No te aha te mau ati Iuda i faaea ’i i te faaohipa i te i‘oa o te Atua?

11 Aita i maoro, ua haamata ’tura te mau ati Iuda i te mana‘o ma te hape e mea mo‘a roa te i‘oa o te Atua no te faahiti atu. (Exo. 20:7) Faaea mǎrû atura ratou i te faaohipa i te i‘oa o te Atua. Aita e hape e ua mauiui Iehova i te ite i to ratou faatura ore i to ’na i‘oa. (Sal. 78:40, 41) Eita râ te Atua, “e i‘oa tahoo hoi to ’na,” e faatia noa i te hoê nunaa tei faarue ia ’na e ta ’na i faarue ia amo i to ’na i‘oa. (Exo. 34:14) Te haapii maira te reira i te faufaaraa ia faatura i te i‘oa o to tatou Atua Poiete.

NUNAA APÎ TEI MAIRIHIA I TO TE ATUA I‘OA

12. Mea nafea Iehova i te faatupuraa i te hoê nunaa no to ’na i‘oa mai ta ’na i tohu?

12 Na roto ia Ieremia, ua faaite Iehova i ta ’na opuaraa e faaau i te “tahi faufaa apî” e te hoê nunaa apî: te Iseraela pae varua. E “ite” to ’na mau melo atoa, “o tei haehaa e o tei rahi,” ia Iehova. (Ier. 31:31, 33, 34) Ua haamata teie parau tohu i te tupu i te Penetekose 33. Ua faaau te Atua i te faufaa apî e ‘te Iseraela pae varua.’ E taiohia ïa i roto, te taata no te mau nunaa atoa. Ua riro ratou ei nunaa ‘i mairihia i te i‘oa o te Atua.’—Gal. 6:16; a taio i te Ohipa 15:14-17; Mat. 21:43.

13. (a) Ua faaohipa anei te mau Kerisetiano matamua i te i‘oa o te Atua? A faataa. (b) Eaha to oe mana‘o i te fana‘oraa taa ê e faaohipa i te i‘oa o te Atua a poro ai?

13 Ua faaohipa te mau melo o tera nunaa pae varua i to te Atua i‘oa. Ta ratou ïa i rave a faahiti ai i te mau Papai Hebera. * I te Penetekose 33, ua faaohipa Petero i mua i te ati Iuda e peroseluto nunaa rau i te i‘oa o te Atua. (Ohi. 2:34) Ua faahanahana te mau Kerisetiano matamua ia Iehova e ua haamaitai oia i ta ratou ohipa pororaa. E haamaitai atoa mai o ’na i ta tatou taviniraa ia parau tatou ia vetahi ê e o Iehova to te Atua i‘oa a faaite roa ’tu ai i te reira i roto i te Bibilia a te feia anaanatae. E ite ïa ratou o vai te Atua mau. E fana‘oraa taa ê mau teie no ratou e no tatou atoa! I reira paha e haamata ’i te hoê taairaa nehenehe mau o te piri roa ’tu â e o te ore roa ’tu e mutu.

14, 15. Noa ’tu e ua parare te ohipa apotata, ua aha Iehova ia ore to ’na i‘oa ia moehia?

14 I muri a‘e, i te poheraa iho â te mau aposetolo, haamata a‘era te ohipa apotata i te haaviivii i te amuiraa Kerisetiano. (Tes. 2, 2:3-7) Ua pee atoa teie mau orometua haavare i te tutuu ati Iuda ma te ore e faaohipa i to te Atua  i‘oa. E vaiiho anei râ Iehova ia tumâhia to ’na i‘oa? Eita roa ’tu! Parau mau, aita te faahitiraa tano o tera i‘oa i itehia ’tura. Aita râ to ’na i‘oa i moe. A mairi ai te tau, ua itehia tera i‘oa i roto i te mau huriraa Bibilia rau e papai a te mau aivanaa Bibilia. Ei hi‘oraa, i 1757, ua papai Charles Peters e mea au a‘e te i‘oa o te Atua i te tahi noa ’tu tiaraa i‘oa. Te faataa maitai ra hoi te auraa o te i‘oa Iehova i to ’na huru. I 1797, ua papai Hopton Haynes i te hoê buka no nia i te haamoriraa i te Atua. No ’na, o Iehova te i‘oa ta te mau ati Iuda i faaohipa na no te Atua. E mai te Mesia e ta ’na mau aposetolo, o ’Na ana‘e ta ratou i haamori. Ua faaohipa Henry Grew (1781-1862) i te i‘oa o te Atua e ua taa atoa ia ’na e ua faainohia te reira e e mea tia ia faaraahia. Ua faaohipa atoa George Storrs (1796-1879) e to ’na hoa ohipa ra o Charles Russell i te i‘oa o te Atua.

15 Mea taa ê te matahiti 1931 no te nunaa o te Atua, i piihia na te Feia haapii Bibilia nunaa rau. I tera matahiti ratou i te raveraa i te i‘oa Bibilia: Ite no Iehova. (Isa. 43:10-12) Ua faaite ïa ratou i te ao e e teoteoraa na ratou ia riro ei tavini a te Atua mau hoê roa, ei nunaa ‘no to ’na ra i‘oa,’ ma te arue i tera i‘oa. (Ohi. 15:14) Te haamana‘o maira te reira i ta Iehova mau parau i roto i te Malaki 1:11: “E rahi hoi to ’u nei i‘oa i te mau fenua nei, mai te hitiraa mai o te mahana, e tae noa ’tu i to ’na mairiraa.”

A HAERE MA TE I‘OA O IEHOVA

16. No te aha ia hi‘o ai i te haereraa ma te i‘oa o Iehova ei fana‘oraa taa ê?

16 Ua papai te peropheta Mika: “E haere noa te mau taata ěê atoa ma te i‘oa ana‘e o to ’na iho atua; e haere râ tatou ma te i‘oa o Iehova, o to tatou ïa Atua e a muri noa ’tu.” (Mika 4:5) No te Feia haapii Bibilia, e ere noa i te haamaitairaa hanahana ia amo i te i‘oa o Iehova. E haapapuraa atoa râ te reira o ta ’na farii maitai. (A taio i te Malaki 3:16-18.) Hoê â anei no oe? Te faaitoito mau ra anei oe i te “haere ma te i‘oa o Iehova”?

17. Eaha tei titauhia no te haere ma te i‘oa o te Atua?

17 No te haere ma te i‘oa o te Atua e titauhia e toru a‘e ohipa. A tahi, e mea tia ia faaite haere i tera i‘oa. O te feia ana‘e hoi ‘o te tiaoro i te i‘oa o Iehova te ora ’tu.’ (Roma 10:13) Te piti, mea faufaa ia pee i to Iehova mau huru maitatai, i to ’na iho â râ aroha. E te toru, e titauhia ia auraro ma te aau tae i ta te Atua mau ture aveia tia. Eita ïa tatou e faaino i te i‘oa mo‘a o to tatou Metua. (Ioa. 1, 4:8; 5:3) Ua faaoti papu anei oe e ‘haere ma te i‘oa o Iehova, to tatou Atua, e a muri noa ’tu’?

18. No te aha te feia atoa o te faahanahana ra i to Iehova i‘oa rahi e hi‘o ai i te ananahi ma te tiaturi?

18 Fatata te taata atoa o te ore e tâu‘a ra ia Iehova aore ra o te patoi ra ia ’na i te ite iho â o vai ra o ’na. (Ezk. 38:23) E au ratou ia Pharao, tei parau: “O vai Iehova, a faaroo atu ai au i to ’na reo”? Oioi roa o ’na i te ite o vai ra Oia! (Exo. 5:1, 2; 9:16; 12:29) Ua maiti râ tatou i te ite ia Iehova e i te riro ei hoa no ’na. E teoteoraa na tatou ia amo i to ’na i‘oa e ia riro ei nunaa auraro no to ’na ra i‘oa. E hi‘o ana‘e i te ananahi ma te tiaturi i te parau fafau i roto i te Salamo 9:10: “Te feia i ite i to oe ra i‘oa, e tiaturi ïa ia oe; o tei imi hoi ia oe ra, e Iehova, o tei ore roa ïa e faaruehia e oe.”

^ par. 5 No roto mai te i‘oa o te Atua i te hoê ihoparau Hebera o “e riro” te auraa. “Na ’na e faariro,” te auraa ïa o te i‘oa “Iehova.”

^ par. 13 I itehia na te i‘oa o Iehova i roto i te papai Hebera faaohipahia e te mau Kerisetiano matamua. Tei roto atoa paha te i‘oa o Iehova i te mau papai matamua o te Septante, te hoê huriraa Heleni o te mau Papai Hebera.