Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2013

E “aau e ite” ia Iehova anei to oe?

E “aau e ite” ia Iehova anei to oe?

“E horoa vau ia ratou i te aau e ite mai ai ia ’u ra, e o vau o Iehova; e riro hoi ratou ei taata no ’u.”—IER. 24:7.

1, 2. No te aha vetahi e hinaaro ai e haapii no nia i te suke?

MEA au anei na oe te suke? Mea au roa na te mau ati Iuda i tahito ra. (Nah. 3:12; Luka 13:6-9) I teie mahana, mea rahi te tanu ra i te reira na te ao. Mea maitai te suke no te ea. No vetahi, mea au atoa te reira no te mafatu.

2 Ua faaau ê na Iehova i te taata i te suke. Ua parau o ’na no nia i tei itehia i roto i to ratou aau. E tauturu atoa mai te reira ia tatou e i te feia ta tatou e here ra. Aita te Atua i faataa i te mau maitai ia amu i te suke, e auraa taipe râ to te reira. A hi‘opoa ’i tatou i ta ’na i parau, a feruri i te haapiiraa e huti mai ei Kerisetiano.

3. Te faahoho‘a ra te mau suke i roto i te Ieremia pene 24 ia vai ma?

3 E hi‘opoa ana‘e na mua i ta te Atua i parau i te tau o Ieremia no nia i te suke. I 617 ra, aita e taairaa maitai faahou to te nunaa no Iuda e te Atua. Ua faaite orama Iehova eaha te tiai ra ia ratou. Ua faaohipa o ’na e piti huru suke: te mea “maitai roa” e te mea “ino roa.” (A taio i te Ieremia 24:1-3.) Te suke ino, o te arii Zedekia ïa e te feia ta te arii Nebukanesa e ta ’na nuu i aro. E te suke maitai? O Ezekiela ïa, Daniela e to ’na na hoa e toru, e te tahi mau ati Iuda tei afaihia i Babulonia. I muri a‘e, e ho‘i te hoê toea i rotopu ia ratou i Ierusalema no te patu faahou i te oire e to ’na hiero. Tera iho â tei tupu.—Ier. 24:8-10; 25:11, 12; 29:10.

4. Eaha te faaitoitoraa e itehia i roto i ta te Atua i parau no nia i te suke maitai?

4 Ua parau Iehova no nia i te feia i faahoho‘ahia e te suke maitai: “E horoa vau ia ratou i te aau e ite  mai ai ia ’u ra, e o vau o Iehova; e riro hoi ratou ei taata no ’u.” (Ier. 24:7) Te mana‘o tumu ïa o teie tumu parau. Mea faaitoito mau ia ite e te hinaaro ra te Atua ia fana‘o tatou i “te aau e ite” ia ’na. Oia hoi, ia hinaaro tatou e ite o vai ra o ’na e e riro ei taata no ’na. E nafea ïa? E haapii e e faaohipa ana‘e i ta ’na Parau. E tatarahapa ana‘e i ta tatou mau hara a faarue roa ’tu ai i te reira. Ia oti, e pûpû ana‘e i to tatou ora i te Atua e e bapetizo ana‘e i te i‘oa o te Metua, te Tamaiti e te varua mo‘a. (Mat. 28:19, 20; Ohi. 3:19) Ua na reira ê na anei oe? Aore ra te haere tamau ra anei oe i te mau putuputuraa a te mau Ite no Iehova e fatata oe i te na reira?

5. No vai na mua te poroi a Ieremia?

5 Noa ’tu e ua na reira ê na tatou, mea faufaa noâ ia hi‘opoa i to tatou huru e haerea. No te aha? E ite oe i te pahonoraa i roto i ta Ieremia i papai no nia i te aau. Tei nia te tahi mau pene o ta ’na buka i te mau nunaa e ati a‘e ia Iuda. Tei nia râ te rahiraa i te nunaa no Iuda a faatere ai e pae o to ’na mau arii. (Ier. 1:15, 16) No vai na mua te poroi a Ieremia? No te mau tane, vahine e tamarii tei pûpû ia ratou ia Iehova. Ua farii to ratou hui metua e riro ei nunaa o te Atua. (Exo. 19:3-8) E i te tau atoa o Ieremia, ua parau te nunaa: “Te haere atu nei matou ia oe, o to matou Atua hoi oe, o Iehova.” (Ier. 3:22) Mea maitai anei râ to ratou aau?

E TITAUHIA ANEI IA PERITOME I TE AAU?

6. No te aha e anaanatae ai i ta te Atua i parau no nia i te aau?

6 Te faaohipa nei te mau taote i te mau ravea apî no te hi‘opoa e mea maitai anei to tatou mafatu. Area o Iehova, e nehenehe ta ’na e rave hau atu â, mai i te tau o Ieremia. Te faaite nei teie mau parau e mea aravihi mau o ’Na: “E haavare rahi to te aau i te mau mea atoa nei, e ua ino roa; o vai te ite? O vau o Iehova, o tei paheru i te aau, . . . ia hopoi atu vau i te taata atoa ra i tei au i ta ’na ra parau, e tei au i te hopea o ta ’na e rave ra.” (Ier. 17:9, 10) E ere te ‘paheruraa i te aau’ i te hoê hi‘opoaraa o te mafatu, o te tupaipai fatata e toru miria taime i roto e 70 aore ra 80 matahiti. Te aau i ǒ nei, o to tatou ïa huru o roto: to tatou mau hinaaro, mana‘o, huru aau, haerea e ta tatou mau fa. E hi‘opoa te Atua i to aau, e i nia i te tahi faito, e nehenehe atoa ta oe.

7. Mea nafea Ieremia i te faataaraa i te aau o te rahiraa o te mau ati Iuda i to ’na ra tau?

7 No te faaineine no tera hi‘opoaraa, e ui ana‘e, ‘Mea maitai anei te aau o te rahiraa o te mau ati Iuda i te tau o Ieremia?’ No te ite, e hi‘opoa ana‘e i ta Ieremia i parau: “E feia peritome ore atoa te utuafare atoa o Iseraela i te aau.” Aita o ’na i mana‘o i te peritomeraa pae tino o te mau tane ati Iuda. Noa ’tu e mea peritomehia ratou, ia au i te Traduction du monde nouveau ua parau Iehova e “mea peritome ore noâ” ratou. Oia hoi ‘mea peritome-ore-hia ratou i te aau.’ (Ier. 9:25, 26) Eaha ïa te auraa?

8, 9. No nia i to ratou aau, ia aha te rahiraa o te mau ati Iuda?

8 E itehia te auraa o te ‘peritome-ore-raa i te aau’ i roto i ta te Atua i faaue i te mau ati Iuda ia rave: “E hopoi ê atu i te iri mua o to outou aau na, e te mau taata o Iuda, e to Ierusalema; o te puroro noa ’tu tau riri . . . no te ino o ta outou  parau i rave.” No te aha mea ino ai to ratou haerea? No to ratou aau. (A taio i te Mareko 7:20-23.) O ta te Atua ïa i faaite maitai na roto ia Ieremia. Mea orure hau e te etaeta ratou. I to ’Na aro, mea ino to ratou huru feruriraa e mana‘o turai. (A taio i te Ieremia 5:23, 24; 7:24-26.) Ua parau atu te Atua: “Ia peritomehia outou no Iehova, e hopoi ê atu i te iri mua o to outou aau.”—Ier. 4:4; 18:11, 12.

9 Mai te huru ra ïa e e titauhia te hoê tâpûraa taipe o to ratou aau mai i te tau o Mose. (Deut. 10:16; 30:6) E nafea ratou ‘e hopoi ê atu ai i te iri mua o to ratou aau’? E titauhia ia iriti ratou i te mau mea e etaeta ’i to ratou aau. Oia hoi te mau mana‘o, hinaaro aore ra mana‘o turai ta te Atua e ore e au.—Ohi. 7:51.

E NAFEA IA FANA‘O I TE “AAU E ITE” IA ’NA?

10. Mea nafea Davida i te hi‘opoaraa i to ’na aau? E nafea tatou e pee ai i to ’na hi‘oraa?

10 Auê tatou i te mauruuru i te Atua i te tautururaa mai ia taa eaha te aau! E ui paha vetahi, ‘No te aha mea faufaa ’i ia hi‘opoa maite i to tatou aau ei Ite no Iehova?’ E ere no te mea e haerea ino to e rave rahi Kerisetiano i roto i te amuiraa aore ra ua riro ratou ei “suke ino.” E nunaa taiva ore e viivii ore te mau tavini a te Atua i teie mahana. A hi‘o na i ta Davida i taparu i te Atua: “E hi‘opoa mai oe ia ’u, e te Atua, ia ite hoi oe i tau aau; e tamata hua mai ia ’u, e ia ite oe i tau mana‘o: e hi‘o mai, e eiaha ei haamainaina to roto ia ’u ia oe ra.”—Sal. 17:3; 139:23, 24.

11, 12. (a) No te aha ia hi‘opoa ’i tatou taitahi i to tatou aau? (b) Eaha ta te Atua e ore e rave?

11 Te hinaaro ra Iehova ia noaa ia tatou taitahi ta ’na farii maitai e ia fana‘o noâ i te reira. No nia i te taata parau-tia, ua parau Ieremia: “E Iehova sabaota ra, tei tamata i te feia parau-tia ra, tei hi‘o i te mana‘o i roto i te aau.” (Ier. 20:12) Te hi‘opoa atoa nei te Atua Mana hope i te aau o te taata parau-tia. Eiaha anei ïa tatou e hi‘opoa ia tatou iho ma te haavare ore? (A taio i te Salamo 11:5.) A na reira ’i, e ite paha tatou i te hoê haerea, fa aore ra mana‘o hohonu e etaeta rii ai to tatou aau. E titauhia ïa te tahi tâpûraa taipe no te tatara i tera ‘iri mua o to tatou aau.’ Eaha ta oe e imi a hi‘opoa ’i i to aau? E e nafea ia rave i te mau tauiraa?—Ier. 4:4.

12 Te mea papu, eita roa ’tu Iehova e faahepo ia tatou ia taui. Ua parau o ’na no nia i te “suke maitai” e ‘e horoa o ’na ia ratou i te aau e ite mai ai’ ia ’na. Aita o ’na i parau e e faahepo atu o ’na ia taui i to ratou aau. Na ratou iho râ e hinaaro i te hoê aau faaroo o te faaite ra e ua ite ratou o vai te Atua. Ia na reira atoa ïa tatou e tia ’i.

E haamaitaihia oe ia hi‘opoa oe i to aau a tinai atu ai i te mau hinaaro tano ore

13, 14. E nafea te mea e vai ra i roto i te aau o te hoê taata e riro ai ei mea atâta no ’na?

13 Ua na ô Iesu: “No roto mai hoi i te  aau te mana‘o iino, te taparahi taata, e te faaturi, te poreneia, e te eiâ, te haavare, e te faaino.” (Mat. 15:19) Mai te peu e e turai te aau etaeta o te hoê taeae ia ’na ia faaturi e ia ore e tatarahapa, e ere roa o ’na i te farii maitai a te Atua. E nehenehe atoa râ te hoê taata tei ore i na reira ’tura e vaiiho i te hoê hinaaro tano ore ia puai roa mai i roto i to ’na aau. (A taio i te Mataio 5:27, 28.) No reira mea faufaa ’i ia hi‘opoa i to tatou iho aau. A na reira ’i, e ite anei oe e e hinaaro tano ore to oe no te tahi taeae aore ra tuahine, hinaaro ta te Atua e ore e farii e te titauhia ia tinai?

14 Hoê â no te hoê taeae tei ore â i taparahi i te taata. E nehenehe o ’na e vaiiho i te inoino ia rahi roa mai i roto i to ’na aau a riri roa ’tu ai i to ’na hoa Kerisetiano. (Lev. 19:17) E faaitoito anei o ’na i te tinai i tera mau huru aau?—Mat. 5:21, 22.

15, 16. (a) A faataa na e nafea te hoê Kerisetiano e riro ei mea ‘peritome-ore-hia i te aau.’ (b) I to oe mana‘o, no te aha aita ’i te Atua e au ra i te hoê ‘aau peritome-ore-hia’?

15 Aua‘e, aita te aau o te rahiraa o te mau Kerisetiano e fifi ra. Teie râ, ua faahiti atoa Iesu i te mau “mana‘o iino.” Ei hi‘oraa, e mana‘o paha tatou e mea faufaa a‘e to tatou taiva ore i to tatou utuafare. E aroha iho â te mau Kerisetiano i to ratou fetii. E ere ratou mai te taata aroha ore o teie mau “mahana hopea” nei. (Tim. 2, 3:1, 3) Teie râ, e nehenehe tatou e riro ei mea aifaito ore i roto i tera tuhaa. Mea rahi te mana‘o ra e mea puai a‘e iho â te taairaa o te toto. Ia inoino te tahi fetii, e inoino atoa ratou. Ua riri roa ino to Dina mau taeae i te hamani-ino-raahia o ’na. E ua haapohe ihora ratou i te tane e rave rahi. (Gen. 34:13, 25-30) No to ’na mau huru aau iino, ua haapohe Abasaloma ia Amanona. (Sam. 2, 13:1-30) Mea atâta mau te mau “mana‘o iino,” e ere anei?

16 E riri roa ino vetahi ia haamauiuihia te tahi fetii aore ra ia mana‘o ratou e ua na-reira-hia. Eita paha ratou e farii i te titau-manihini-raa a te hoa Kerisetiano tei haamauiui i to ratou fetii. Eita atoa paha e titau manihini ia ’na. (Heb. 13:1, 2) E ere roa ’tu tera haerea i te mea maitai. E tapao te reira o te aroha ore. E nehenehe Tei hi‘opoa i te aau e faaoti e mea ‘peritome-ore-hia tatou i te aau.’  (Ier. 9:25, 26) A haamana‘o i ta Iehova i parau: “E hopoi ê atu i te iri mua o to outou aau.”—Ier. 4:4.

E TAUI E E FANA‘O NOA I “TE AAU E ITE” I TE ATUA

17. No te aha mea ohie a‘e ia taui i to tatou aau ia mǎta‘u tatou ia Iehova?

17 A hi‘opoa ’i i to aau, e ite paha oe e aita oe e auraro oioi ra i ta Iehova mau a‘oraa mai tei titauhia. I nia i te tahi faito, mea ‘peritome-ore-hia paha to aau.’ Ua itea paha ia oe te tahi mǎta‘u taata, te tahi hiaai no te roo aore ra te tao‘a, aore ra te tahi huru feruriraa etaeta aore ra tiamâ. E ere o oe ana‘e tei ite i te reira. (Ier. 7:24; 11:8) Ua papai Ieremia e ‘e aau taiva e te orure hau’ to te mau ati Iuda taiva. Ua na ô â oia: “Aore hoi to ratou aau i parau e, Tatou e mǎta‘u i to tatou Atua ra, ia Iehova, o tei horoa mai i te ûa i to ’na tau.” (Ier. 5:23, 24) No te tatara i te ‘iri mua o te aau,’ mea faufaa roa ia mǎta‘u e ia faatura ia Iehova. Mea ohie a‘e ïa ia taui i te huru o to tatou aau e ia rave i ta te Atua e hinaaro ra ia rave tatou.

18. Eaha ta Iehova i fafau i te feia i ô i roto i te faufaa apî?

18 E horoa mai Iehova i “te aau e ite” ia ’na ia tamau â tatou i te faaitoito. Tera ta ’na i fafau e rave no te feia faatavaihia i ô i roto i te faufaa apî: “E tuu vau i tau ture i roto ia ratou, e papai au i te reira i roto i to ratou aau; e e riro vau ei Atua no ratou, e ei taata hoi ratou no ’u.” Ua na ô â oia: “E ore hoi ratou e haapii faahou, o te taata o to ’na iho taata-tupu, o te taata a to ’na iho taeae, i te na ôraa ’tu e, Ia ite hoi outou ia Iehova; e ite paatoa hoi ratou ia ’u, o tei haehaa e o tei rahi, . . . e faaore hoi au i ta ratou hara, e ore au e mana‘o faahou i ta ratou ino.”—Ier. 31:31-34. *

19. Eaha te tiaturiraa faahiahia a te mau Kerisetiano mau?

19 Te tiai ru nei paha oe i te mau haamaitairaa mure ore ta oe e fana‘o maoti te faufaa apî, i nia anei i te ra‘i aore ra i te fenua. E mea tia ia hinaaro oe e ite o vai ra o Iehova e e riro ei tavini na ’na. E fana‘o oe i tera mau haamaitairaa i te taime noa e faaorehia ’i ta oe mau hara maoti te tusia o te Mesia. I te mea e e faaorehia ta oe mau hara, ia faaore atoa ïa oe i ta vetahi ê noa ’tu e au ra e mea fifi ia na reira. A faaitoito i te tinai i te tahi noa ’‘e ino i roto i to aau. E maitai mai ïa to aau e e faaite te reira e te hinaaro ra oe e tavini ia Iehova. Oia atoa e te haamata ra oe i te ite maitai a‘e o vai ra o ’na. E riro oe mai te feia ta Iehova i parau atu: “E imi mai hoi outou ia ’u, e e itea vau e outou, ia imi mai outou ia ’u ma te aau atoa ra. . . . E itea vau e outou.”—Ier. 29:13, 14.

^ par. 18 No nia i te faufaa apî, a hi‘o i Te Pare Tiairaa o te 1 no Tenuare 2012, api 28-32.