Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2013

Teie ta tatou tufaa pae varua

Teie ta tatou tufaa pae varua

“O te tufaa teie o te mau tavini o Iehova.”—ISA. 54:17.

1. Eaha ta Iehova i faaherehere maite no te maitai o te huitaata?

E ORA Iehova e a muri noa ’tu. Ua haapao ïa o ’na ia fana‘o tatou i ta ’na poroi faaora. Eita roa ’tu te reira e taui, ‘e tia hoi te parau o te Fatu i te vairaa.’ (Pet. 1, 1:23-25) Auê tatou i te oaoa e ua faaherehere maite Iehova i tera parau faufaa roa i roto i te Bibilia!

2. Eaha ta te Atua e hinaaro ra ia ite tatou no nia ia ’na?

2 Te hinaaro ra Iehova ia ite tatou paatoa i to ’na i‘oa. Ua faahiti matamua te Bibilia i te “Atua ra o Iehova” a hamani ai o ’na i “te ra‘i e te fenua.” (Gen. 2:4) Ua papai semeio te Atua i to ’na i‘oa e rave rahi taime i nia i te mau pǎpǎ ofai o na Ture Ahuru. Ei hi‘oraa, te haamata ra te ture matamua mai teie: “O vau to Atua ra o Iehova.” (Exo. 20:1-17) Ua tamata Satani i te faaore i te Bibilia ia ore tatou ia ite o vai ra te Atua e i to ’Na i‘oa. Aita râ Iehova i farii ia tupu te reira.—Sal. 73:28.

3. Eaha ’tu â ta te Atua e hinaaro ra ia haapii tatou no nia i te Bibilia?

3 Ua parare te haapiiraa hape i te pae faaroo. Te hinaaro nei râ Iehova ia ite tatou paatoa i te parau mau. Auê ïa tatou i te oaoa e ua horoa mai te Atua i te maramarama e te parau mau pae varua! (A taio i te Salamo 43:3, 4.) Noa ’tu e te haere noa ra te rahiraa o te taata na te pouri, te haere nei tatou na te maramarama ma te oaoa.—Ioa. 1, 1:6, 7.

E POIHERE ANA‘E I TA TATOU TUFAA

4, 5. Eaha ta tatou fana‘oraa taa ê mai 1931 mai â?

4 Te hoê tufaa, o te tahi ïa mea ta te hoê ui e horoa no te ui i muri iho. E tufaa faufaa mau atoa ta tatou ei Kerisetiano. Oia hoi, te fana‘o nei tatou i te ite mau i te Parau a te Atua e te taa maitai ra ia tatou te parau mau no nia ia ’na e ta ’na mau  opuaraa. Te vai atoa ra te tahi atu â fana‘oraa taa ê.

Ua oaoa roa tatou i te farii i te i‘oa Ite no Iehova i ta tatou tairururaa i 1931

5 E tuhaa te reira o ta tatou tufaa pae varua mai 1931 mai â, i te tairururaa i Columbus, i Ohio. Ua itehia na reta “JW” i nia i te porotarama. Ia au i te hoê tuahine, ua uiui noa ratou eaha ra te auraa o na reta e piti, ua tamata i te tahi mau ta‘o e tano i tera na reta. I piihia na tatou te Feia haapii Bibilia. Teie râ, i te Tapati 26 no Tiurai 1931, ua farii te feia i putuputu i ǒ ia amo i te i‘oa Ite no Iehova (Jehovah’s Witnesses na roto i te reo Beretane). Mea putapû mau ia amo i tera i‘oa no roto mai i te Bibilia. (A taio i te Isaia 43:12.) “Eita roa ’tu e moe ia ’u te oaoa rahi e te mau haapopouraa,” ta te hoê taeae ïa e haamana‘o ra. Aita ’tu pǔpǔ faaroo na te ao e hinaaro ra ia piihia ratou i te i‘oa o te Atua. Ua haamaitai râ te Atua ia tatou i te faaohiparaa i te reira a 80 tiahapa matahiti i teie nei. Auê fana‘oraa taa ê ia riro ei Ite no Iehova!

6. Eaha te mau haamaramaramaraa tano e itehia i roto i ta tatou tufaa?

6 Te tahi atu tuhaa o ta tatou tufaa o te mau haamaramaramaraa faufaa e te tano no tahito ra. A hi‘o na ia Aberahama, Isaaka e Iakoba. Aita e ore e ua tauaparau ratou e to ratou utuafare e nafea ia faaoaoa ia Iehova. E ere ïa i te mea maere e ua patoi Iosepha i te faaturi e te vahine a Potiphara no te ore ‘e hara i te Atua.’ (Gen. 39:7-9) Ua faaite te mau Kerisetiano o te senekele matamua i te mau faaueraa a Iesu ma ta ratou mau parau e to ratou hi‘oraa. Teie te tahi, te mau tuhaa no nia i te Amuraa maa a te Fatu ta Paulo i faaite i te mau amuiraa Kerisetiano. (Kor. 1, 11:2, 23) Tei roto tera mau tuhaa rii atoa i te Bibilia ia nehenehe tatou e haapii e nafea ia haamori i te Atua. (A taio i te Ioane 4:23, 24.) E haamaramarama te Bibilia i te huitaata. Ei Ite no Iehova râ, te haafaufaa nei tatou i te reira.

7. E ite-atoa-hia teihea parau fafau i roto i ta tatou tufaa?

7 I teie mahana atoa, te tauturu nei Iehova i to ’na nunaa. (Sal. 118:7) Te faaite nei ta tatou mau papai i ta ’na e rave ra no te paruru ia ratou. E ite tatou i te hau noa ’tu e te hamani-ino-hia ra tatou. Te hoê tuhaa putapû mau o ta tatou tufaa pae varua o te rahi noa ’tu ra, o teie ïa parau fafau: “Te mauhaa ra n[o] oe i hamanihia ’i ra, e ore ïa e tupu; e te mau vaha atoa e patoi ia oe i te haavaraa ra, e hapa ïa ia oe. O te tufaa teie o te mau tavini o Iehova; e tei ia ’u te faatia ia ratou, te na reira maira Iehova.” (Isa. 54:17) Aita hoê a‘e mauhaa a Satani te nehenehe e haamauiui ia tatou e a muri noa ’tu.

8. Eaha te hi‘opoahia i roto i teie tumu parau e i to muri iho?

 8 Ua tamata Satani i te faaore i te Parau a te Atua, i te i‘oa Iehova e i te parau mau. Aita roa ’tu râ o ’na i upootia. E ite tatou i roto i teie tumu parau e i to muri iho eaha ta Iehova i rave (1) ia fana‘o tatou i ta ’na Parau, (2) ia ite tatou i to ’na i‘oa, e (3) ia ite tatou i te parau mau.

UA PARURU IEHOVA I TA ’NA PARAU

9-11. Eaha te mau hi‘oraa e faaite ra e aita i tae i te feia patoi ia faaore i te Bibilia?

9 Ua paruru Iehova i ta ’na Parau noa ’tu te mau tutavaraa atoa no te faaore i te reira. I 1229, no te aro i te mau Albigeois e Vaudois, ua opanihia te feia faaroo ia faaohipa i te mau Bibilia na roto i te mau reo atoa o te nunaa. I 1234, ua haamauhia i Paniora te hoê â opaniraa. I 1559, no te taime matamua, ua faaô atoa te faatereraa pâpa ia ’na a opani ai Paulo IV, i roto i te hoê papai, ia pia e ia fana‘o i te Bibilia na roto i te reo o te nunaa aita ana‘e te faatiaraa a te Tiripuna haava i te hairesi.

10 Noa ’tu te mau tutavaraa a te taata no te faaore i te Bibilia, ua paruruhia te reira. I te mau matahiti 1382, ua pia John Wycliffe e to ’na mau apiti i te huriraa Bibilia matamua reo Beretane. O William Tyndale te tahi atu taata huri Bibilia. Ua haapohehia oia i 1536. Taamuhia i nia i te hoê pou, ua tuô o ’na: “E te Fatu, e faaaraara oe i te mata o te arii no Beretane.” Uumihia ’tura to ’na arapoa e tutuihia ihora to ’na tino i te auahi.

11 Aita i tae i te feia patoi ia faaore i te Bibilia. Ei hi‘oraa, i 1535, ua fa mai te huriraa Bibilia reo Beretane a Miles Coverdale. Ua faaohipa o ’na i te huriraa a Tyndale o te “Faufaa apî” e o te “Faufaa tahito” mai te Genese e tae atu i te mau Paraleipomeno. Ua huri o ’na i te tahi atu mau tuhaa o te mau Papai mai te reo Latino e mai te Bibilia reo Heremani a Martin Luther. I teie mahana, te oaoa nei tatou i te fana‘o i te mau Saintes Écritures—Traduction du monde nouveau. Mea maramarama hoi te reira, mea tano e te ohie ia faaohipa i roto i te taviniraa. Aita roa ’tu i tia ia Satani aore ra i te taata ia faaore i ta Iehova ra Parau. Auê ïa oaoa e!

UA HAAPAPU IEHOVA IA ITEHIA TO ’NA I‘OA

Ua pohe Tyndale e te tahi atu no te Parau a te Atua

12. Mea nafea te Traduction du monde nouveau i te tautururaa i te taata ia ite i to Iehova i‘oa?

12 Ua ara te Atua ra o Iehova eiaha to ’na i‘oa ia faaore-roa-hia i roto i te mau Bibilia atoa. Ua haapao ïa te mau taeae  tei ohipa i nia i te Traduction du monde nouveau ia tuuhia iho â to te Atua i‘oa, Iehova, i te vahi atoa i papaihia ’i te reira i roto i te mau buka Bibilia tumu. E itehia tera i‘oa e 6 973 taime i roto i te mau Papai Hebera e e 237 taime i roto i te mau Papai Heleni Kerisetiano. I teie mahana, te vai nei te Traduction du monde nouveau, i roto i to ’na taatoaraa aore ra hoê noa tuhaa, na roto hau atu 116 reo e ua hau i te 178 545 862 Bibilia tei neneihia.

13. No te aha e nehenehe ai e parau e ua ite te taata i to te Atua i‘oa mai te omuaraa mai â?

13 Ua ite e ua faaohipa na taata matamua, o Adamu raua Eva, i to Iehova i‘oa. O Noa atoa. Ua parau oia: “E haamaitaihia Iehova, te Atua no Sema.” (Gen. 4:1; 9:26) Ua faaite te Atua iho: “O vau o Iehova, o to ’u ïa i‘oa, e ore au e horoa i to ’u ra hanahana no vetahi ê.” Oia atoa: “O vau o Iehova, e aitâ ’tu; aitâ ’tu Atua maori râ o vau.” (Isa. 42:8; 45:5) Ua ara Iehova ia ite te taata na te ao i to ’na i‘oa. Auê ïa fana‘oraa taa ê ta tatou e faaohipa i te i‘oa Iehova e e tavini ei Ite no ’na! Te auraa ïa o teie parau: “E faatia matou i to matou reva i te i‘oa o to matou Atua.”—Sal. 20:5.

14. Hau atu â i te Bibilia, ihea e itehia ’i to te Atua i‘oa?

14 Eita te i‘oa o te Atua e itehia i roto noa i te Bibilia. Oia atoa râ, ei hi‘oraa, i nia i te Ofai no Mesa itehia i Dhibân (Dibona), e 21 kilometera i te pae hitia o te râ o te miti Pohe. Te faahiti ra te reira i te arii Iseraela ra o Omeri e i te faatiaraa a te arii Moabi ra o Mesa a aro ai o ’na ia Iseraela. (Arii 1, 16:28; Arii 2, 1:1; 3:4, 5) Te mea anaanatae, e itehia i nia i te Ofai no Mesa na reta Hebera e maha o te i‘oa o te Atua. E ite-atoa-hia tera na reta e maha i roto i te mau rata no Lakisa, oia hoi te mau hu‘ahu‘a taihaa potera itehia i Iseraela.

15. Eaha te Septante, e no te aha i hinaarohia ’i te reira?

15 Hau atu e 2 000 matahiti a‘enei, ua hurihia te mau Papai Hebera na roto i te reo Heleni. O te Septante ïa. No te aha i hinaaro-mau-hia ’i te hoê huriraa reo Heleni? Ua tapeahia te mau ati Iuda i Babulonia e 70 matahiti. A tuuhia ’i ratou i 537 hou te Mesia, ua faaea vetahi i Babulonia. I muri a‘e râ, mea rahi ati Iuda tei haere i Alesanederia, i Aiphiti. E reo Heleni to ǒ. Ua hinaaro mau teie mau ati Iuda i te hoê huriraa o te mau Papai Hebera na roto i tera reo. E itehia te i‘oa Hebera o te Atua i roto i te tahi mau Bibilia Septante Heleni.

16. A horoa i te hoê hi‘oraa o te faaohiparaa i te i‘oa o te Atua i roto i te hoê buka pia-matamua-hia i 1640.

16 Te buka matamua i piahia i te mau aihuaraau no Marite, o te hoê ïa huriraa o te mau Salamo e itehia ’i te i‘oa o te Atua parauhia te Buka Salamo no te Ooa (Beretane). Ua hurihia te reira mai te reo Heleni i te reo Beretane e ua piahia i 1640. O te Salamo 1:1, 2 hoê o te mau irava e itehia ’i te i‘oa o te Atua, papaihia Iehovah. Te na ô ra tera irava i roto i tera buka e eita te taata haamaitaihia e faaroo i te feia ino, e hinaaro râ o ’na i “te ture a Iehovah.” No te ite hau atu â no nia i te i‘oa o te Atua, a hi‘o i te buka rairai Te i‘oa o te Atua e vai noa e a muri noa ’tu.

UA HAAPAPU IEHOVA IA ITEHIA TE PARAU MAU

17, 18. (a) Eaha te “parau mau”? (b) Eaha to roto i “te parau mau o te evanelia”?

17 Te tavini nei tatou ia Iehova, “te Atua parau mau,” ma te oaoa. (Sal.  31:5) Eaha te parau mau? I roto i te mau reo tumu o te Bibilia, e faataa pinepine te mau ta‘o hurihia ei “parau mau” i te tahi mea mau, tano e te nehenehe e tiaturi.

18 Ua haapapu Iehova ia itehia te parau mau i teie mahana. E te tauturu noa maira oia ia ite hau atu â no nia i te parau mau. (Ioa. 2, 1, 2) Ta te Maseli 4:18 ïa e faaite maira: “O te e‘a hoi o te feia parau-tia ra, e au ïa i te maramarama anaana ra, o tei tupu noa te anaanaraa e tae noa ’tu i te avatea mau.” Hoê â to tatou mana‘o i to Iesu o tei pure i te Atua: “O to parau na te parau mau.” (Ioa. 17:17) Tei roto i te Bibilia “te parau mau o te evanelia,” oia hoi te taatoaraa o te mau haapiiraa Kerisetiano. (Gal. 2:14) E ite-atoa-hia i roto te parau mau no nia i te i‘oa o Iehova, to ’na mana arii, te tusia taraehara o Iesu, te tia-faahou-raa e te Basileia. E hi‘opoa ana‘e i teie nei i ta te Atua i rave ia ite tatou i te parau mau noa ’tu te mau tutavaraa a Satani no te faaore i te reira.

UA TAPEA IEHOVA IA SATANI IA HUNA I TE PARAU MAU

19, 20. O vai o Nimeroda, e eaha te opuaraa tei ore i manuïa i to ’na ra tau?

19 I muri a‘e i te diluvi, i patoi na Nimeroda, te hoê taata haharu rahi, ia Iehova. (Gen. 10:9) Ei taata patoi ia Iehova, te haamori ra ïa Nimeroda ia Satani e ua au oia i te feia patoi ta Iesu i parau atu: “O te [D]iabolo to outou na metua, i faatia ’i â outou i te hinaaro o to outou metua. . . . Aore oia i haapao i te parau mau.”—Ioa. 8:44.

20 I faatere na Nimeroda ia Babela e i te tahi atu mau oire i rotopu i na anavai Hidekela e Eupharate. (Gen. 10:10) Na ’na paha i haamata i te paturaa o Babela e o to ’na pare i te area matahiti 2269 hou te Mesia. Taa ê roa i to Iehova hinaaro ia parare te huitaata na te mau fenua atoa, ua parau te feia patu: “Tatou e patu i te tahi oire no tatou, e te tahi pare, e ia puta noa ’tu te upoo i nia i te ra‘i ra, ia itea to tatou i‘oa, o te purara ê noa ’tu tatou e ati noa ’‘e te fenua atoa nei.” Ua faaea râ tera paturaa i “t[o] Iehova haapeapearaa i te reo o te taata atoa” e haapurararaa i te feia patu. (Gen. 11:1-4, 8, 9) Mai te peu e ua opua Satani e haamau i te hoê faaroo apî e haamori ai te taata atoa ia ’na, aita roa ’tu o ’na i manuïa. E tae roa mai i teie mahana, ua paruru Iehova i te haamoriraa mau e te rahi roa ’tu ra te taata te apiti atu nei i te mahana taitahi.

21, 22. (a) No te aha aita roa ’tu te haapaoraa hape i haafifi mau i te haamoriraa mau? (b) Eaha te hi‘opoahia i to muri iho tumu parau?

21 Aita roa ’tu te haapaoraa hape i haafifi mau i te haamoriraa mau. No te aha? No te mea ua haapao to tatou Orometua Rahi ra o Iehova ia fana‘o tatou i ta ’na Parau, ia ite tatou i to ’na i‘oa e i te parau mau. (Isa. 30:20, 21) E haamori ana‘e i te Atua ia au i te parau mau, e oaoa tatou. No te na reira, mea faufaa roa ia vai ara noa tatou i te pae varua, ia turui roa ’tu i nia ia Iehova e ia pee i te aratairaa o to ’na varua mo‘a.

22 E faaite mai to muri iho tumu parau mea nafea te tahi mau haapiiraa hape i te faraa mai. E ite mai tatou e aita te Bibilia e haapii ra i tera mau mea hape. Oia atoa mea nafea Iehova i te haamaitairaa ia tatou ma te faaite mai i te parau mau no nia ia ’na. E tuhaa te reira o ta tatou tufaa pae varua ta tatou e poihere.