Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Fepuare 2013

A faaea noa i roto i te peho paruruhia e Iehova

A faaea noa i roto i te peho paruruhia e Iehova

“Ei reira Iehova e . . . aro ai i taua mau fenua ra, mai ta ’na hoi i aro i te mahana tama‘i.”—ZEK. 14:3.

1, 2. Eaha te tama‘i mau e fatata roa maira? Eaha ta tatou e rave i roto i tera tama‘i?

MARITE, 30 no Atopa 1938. E mirioni taata te faaroo ra i te radio o te haapuroro ra i te hoê hautiraa: te faaite nei te mau papai vea e ua tae mai te mau taata no Mars mai no te haamou i te Fenua. Noa ’tu e ua parauhia e e hautiraa noa te reira, mea rahi te taata tei mana‘o e e tama‘i mau te tupu ra e ua riaria a‘era. Ua imi atoa vetahi i te mau ravea no te paruru ia ratou i te mau taata no Mars mai.

2 Te fatata roa maira te hoê tama‘i mau: Aramagedo. O ta te Atua ïa tama‘i i nia i teie nei ao ino. Aita râ te taata e tâu‘a ra. E ere te reira i te aai, ua tohuhia râ e te Parau faaurua a te Atua, te Bibilia. (Apo. 16:14-16) Eita tatou e aro i roto i tera tama‘i. E faaohipa râ te Atua i to ’na puai no te faaora ia tatou ma te faahiahia.

3. Eaha te parau tohu ta tatou e hi‘opoa mai? No te aha mea faufaa ’i te reira no tatou?

3 Ua taai-roa-hia te hoê parau tohu i roto i te Zekaria pene 14 i te tama‘i o Aramagedo. Mea faufaa roa te reira no tatou i teie mahana noa ’tu e ua papaihia a fatata e 2 500 matahiti a‘enei. (Roma 15:4) Te faahiti-rahi-hia nei te tupuraa ta te nunaa o te Atua i ite mai te haamauraahia te Basileia Mesia i nia i te ra‘i i 1914. Oia atoa i te mau tupuraa faahiahia o te fatata roa i te itehia. No nia teie parau tohu i te hoê “peho rahi roa” e i te “pape ora.” (Zek. 14:4, 8) E paruru teie peho i te feia haamori ia Iehova. A taa ’i ia tatou te auraa o te pape ora no tatou, e ite tatou i  te faufaaraa ia inu i tera pape e e na reira atoa râ tatou no te mea ua hinaaro tatou. E haapao maite ana‘e i teie parau tohu. No to tatou hoi maitai.—Pet. 2, 1:19, 20.

UA HAAMATA “TE MAHANA O IEHOVA”

4. (a) Afea “te mahana o Iehova” i te haamataraa? (b) Eaha ta te feia haamori ia Iehova i faaite e rave rahi matahiti hou 1914, e ua aha te mau tia faatere o te ao?

4 Te faahiti ra te omuaraa o te Zekaria pene 14 i “te mahana o Iehova.” (A taio i te Zekaria 14:1, 2.) Eaha tera mahana? O te “mahana o te Fatu,” o tei haamata i to “te basileia ra o teie nei ao” riroraa mai ei “basileia no to tatou Fatu e no ta ’na ra Mesia.” (Apo. 1:10; 11:15) Ua haamata tera mahana i 1914, a haamauhia ’i te Basileia Mesia i nia i te ra‘i. E rave rahi matahiti na mua ’tu, ua faaite te feia haamori ia Iehova i te mau nunaa e e hope “to te Etene anotau” i tera matahiti e e arepurepu roa ’toa te ao. (Luka 21:24) Ua haapao anei te mau nunaa? Aita. Ua faaooo e ua hamani ino te mau tia poritita e haapaoraa i tera feia poro faatavaihia itoito rahi. Ua faaooo ïa teie mau tia faatere o te ao i te Atua Mana hope. E tia hoi te mau Kerisetiano faatavaihia no te Ierusalema i te ra‘i, oia hoi te Basileia Mesia.—Heb. 12:22, 28.

5, 6. (a) Ia au i te parau tohu, eaha ta te mau enemi o te nunaa o te Atua e rave? (b) O vai “te toea o te taata”?

5 Ua tohu Zekaria i ta te mau nunaa e rave: “E pau te oire [o Ierusalema].” E taipe tera “oire” o te Basileia Mesia o te Atua. E tufaa atoa ta te mau Kerisetiano faatavaihia i nia noâ i te fenua i roto. (Phil. 3:20) Ua “pau” te oire i te Tama‘i Rahi matamua, a tapeahia ’i te mau taeae e hopoia rahi ta ratou i roto i te faanahonahoraa a Iehova i te fare auri no Atlanta, i Géorgie, i Marite. Ua haa te mau enemi i nia i te mau Kerisetiano faatavaihia ma te ino e te tia ore, ua opani i ta ratou mau papai e ua tamata i te tapea i ta ratou ohipa pororaa. Mai te huru ra e ua ‘haru’ te mau enemi i te mau fare o te oire.

6 Mea rahi roa te enemi e faaino ra, e patoi ra e e hamani ino ra i te nunaa o te Atua. Noa ’tu râ, eita te haamoriraa mau e faaorehia. Te vai ra “te toea o te taata,” oia hoi te toea o te feia faatavaihia, o te patoi ma te taiva ore ia ‘tâpû-ê-hia ratou i taua oire ra.’

7. Eaha te hi‘oraa ta te mau Kerisetiano faatavaihia i vaiiho mai no te feia haamori i te Atua mau?

7 Ua tupu roa anei teie parau tohu a hope ai te Tama‘i Rahi matamua? Aita. Ua aro â te mau nunaa i te toea o tei faatavaihia e i to ratou mau hoa taiva ore e tiaturi ra e ora i nia i te fenua. (Apo. 12:17) Tei itehia ïa i te Piti o te Tama‘i Rahi. Te turai nei te hapa ore o te mau Kerisetiano faatavaihia taiva ore i te mau tavini a te Atua ia faaoromai i te mau fifi atoa. Ei hi‘oraa, ia patoi mai te utuafare, te hoa ohipa aore ra ia faaooo mai te mau hoa haapiiraa ia tatou no to tatou faaroo. (Pet. 1, 1:6, 7) I te mau fenua atoa, ua faaoti papu roa ’tu â te mau Kerisetiano mau i te vai taiva  ore e i te ore e mǎta‘u i to ratou mau enemi. (Phil. 1:27, 28) Ihea ïa te nunaa o Iehova e imi ai i te parururaa i roto i te hoê ao e riri ra ia ratou?—Ioa. 15:17-19.

UA HAAMAU IEHOVA I TE HOÊ “PEHO RAHI ROA”

8. (a) I roto i te Bibilia, eaha ta te mau mou‘a e nehenehe e faahoho‘a? (b) Eaha ta “te mou‘a ra Oliveta” e faahoho‘a ra?

8 Ua haapii mai tatou e i roto i teie parau tohu, te faahoho‘a ra te “oire,” aore ra Ierusalema, i te Basileia o te Atua. Eaha ïa “te mou‘a ra Oliveta, i mua mai ia Ierusalema”? E nafea te reira e ‘amaha ’i i ropu’ a riro atu ai e piti mou‘a? No te aha Iehova i faahiti ai i tera na mou‘a ei “na mou‘a no ’u”? (A taio i te Zekaria 14:3-5.) I roto i te Bibilia, e faahoho‘a atoa te mau mou‘a i te mau basileia aore ra faatereraa. Oia atoa i te mau haamaitairaa e te parururaa no ǒ mai i te mou‘a o te Atua ra. (Sal. 72:3; Isa. 25:6, 7) Te faahoho‘a ra ïa te mou‘a ra Oliveta i te mana arii o Iehova i nia i ta ’na poieteraa atoa.

9. Ua amaha “te mou‘a ra Oliveta” i roto i teihea auraa?

9 Ua amaha te mou‘a ra Oliveta. Eaha te auraa? Ua haamau Iehova i te tahi atu faatereraa no te hoê fa taa ê, o te Basileia Mesia ïa faaterehia e Iesu Mesia. No reira Iehova i faahiti ai i tera na mou‘a i fa mai a amaha ’i “te mou‘a ra Oliveta” mai “na mou‘a no ’u.” Na Iehova tera na faatereraa.

10. Eaha ta te “peho rahi roa” i ropu i na mou‘a e faahoho‘a ra?

10 A amaha ’i te mou‘a taipe, te tahi pae mou‘a i te pae apatoerau e te tahi atu i te pae apatoa, ua vai noa na avae o Iehova i nia i tera na mou‘a. Fa mai nei te hoê “peho rahi roa” i raro a‘e i to ’na na avae. Te faahoho‘a ra tera peho i te parururaa a te Atua. E ite te mau tavini a Iehova i te parururaa i raro a‘e i to ’na mana arii e i te Basileia Mesia o ta ’na Tamaiti. Eita roa ’tu Iehova e vaiiho ia faaorehia te haamoriraa viivii ore. Afea te mou‘a ra Oliveta i te amaharaa? A haamauhia ’i te Basileia Mesia i te hopea o to te Etene anotau i 1914. Afea te feia haamori i te Atua mau i te hororaa i roto i te peho taipe?

TE HORO NEI TE NUNAA O TE ATUA I TE PEHO RA

11, 12. (a) Afea te nunaa o te Atua i te hororaa i roto i te peho taipe? (b) Na te aha e faaite ra e te paruru ra Iehova i to ’na nunaa?

11 Ua faaara Iesu i ta ’na mau pǐpǐ: “E ririhia outou e te mau fenua atoa i to ’u nei i‘oa.” (Mat. 24:9) Ua u‘ana roa ’tu â tera riri mai 1914, a haamata ’i te mau mahana hopea o teie nei ao. Ua aro-u‘ana-hia te toea faatavaihia i te Tama‘i Rahi matamua. Aita râ teie pǔpǔ taiva ore i faaorehia. I 1919, ua faaorahia mai ratou i te mana o Babulonia Rahi, te hau emepera o te ao atoa o te haapaoraa hape. (Apo. 11:11, 12) * I reira te mau tavini a te Atua i te hororaa i roto i te peho o na mou‘a o Iehova.

12 Mai 1919, ua paruru noa Iehova i te feia e haamori ra ia ’na i te mau fenua atoa. A mairi ai te tau,  mea rahi te faatereraa tei opani e tei taotia i te pororaa e te papai Bibilia a te mau Ite no Iehova. Mai tera noâ i te tahi mau fenua. Noa ’tu eaha ta te mau nunaa e rave, eita roa ’tu ratou e manuïa i te faaore i te haamoriraa mau! E paruru iho â Iehova i to ’na nunaa.—Deut. 11:2.

13. E nafea ia faaea noa i roto i te peho paruruhia e Iehova, e no te aha mea faufaa roa ’tu â ’i i teie mahana ia na reira?

13 Ia vai taiva ore tatou ia Iehova, e faaea tatou i roto i te peho paruruhia e Iehova. Eita roa ’tu o ’na e ta ’na Tamaiti e vaiiho i te tahi noa ’‘e taata aore ra ohipa ia ‘haru ia tatou i roto i to ’Na rima.’ (Ioa. 10:28, 29) E tauturu mai iho â Iehova ia vai taiva ore i ta ’na faatereraa e a ta ’na Tamaiti. E hinaaro roa ’tu â tatou i ta ’na tauturu i te ati rahi e piri oioi maira. Mea faufaa roa ’tu â ïa i teie mahana ia faaea i roto i te peho paruruhia e Iehova.

TE FATATA MAIRA TE MAHANA E ARO AI TE ATUA

14, 15. Eaha te tupu i nia i te taata i rapaeau mai i te peho i te mahana e aro ai te Atua i to ’na mau enemi?

14 E aro u‘ana roa ’tu â Satani i te mau tavini a Iehova a piri mai ai te hopea o teie nei ao. I muri iho ïa e tupu ai te mahana e aro ai te Atua i to ’na mau enemi. E haapapu Iehova e o te aroraa hopea tera a Satani. I tera mahana e faaite papu ai Iehova e e Aito hanahana mau o ’na.—Zek. 14:3.

15 Eaha te tupu i nia i te taata i rapaeau mai i te “peho rahi” i te mahana e aro ai te Atua i to ’na mau enemi? Aita to ratou e “maramarama,” oia hoi te farii maitai a te Atua. Te na ô ra te parau tohu e e “arehurehu,” aore ra paari roa mai, “te puaahorofenua, e te pheradi [aore ra niuru], e te kamela, e te asini, e te mau puaa atoa.” Te auraa ïa e e paari mai te mau mauhaa tama‘i, oia hoi e riro tera mau mea ei mea faufaa ore. Te faaite ra Zekaria e e faautua Iehova i to ’na mau enemi e te “ati,” aore ra ma‘i. E “pau noa” to ratou mata e arero. Aita tatou i ite e e ma‘i mau anei. Ua ite râ tatou e eita e tia ia ratou ia haamauiui mai aore ra ia faaino i te Atua. (Zek. 14:6, 7, 12, 15) E tia te taatoaraa o “te mau arii o te ao nei, e ta ratou mau nuu” i te paeau o Satani. Noa ’tu teihea roa ratou i nia i te fenua, e haamouhia ratou. (Apo. 19:19-21) “Tei pohe ia Iehova ra ia tae i te reira ra anotau, e riro ïa mai te hopea mai o te fenua.”—Ier. 25:32, 33.

16. Ia uiui tatou i te aha a piri mai ai te mahana aroraa a te Atua? Ia aha tatou?

16 E pinepine te tama‘i i te haamauiui, i te feia atoa i upootia. E iti mai paha te maa. E ere paha tatou i te rahiraa o ta tatou mau faufaa. E iti roa mai paha to tatou tiamâraa. Ia aha tatou ia tupu tera mau mea? E horo hanoa anei tatou? E haapae anei tatou i to tatou faaroo no te faateimaharaa? E paruparu roa anei tatou a ere atu ai i te tiaturiraa? A tupu ai te ati rahi, mea faufaa mau ia tiaturi e e faaora mai iho â Iehova e ia faaea noa i roto i te peho paruruhia e te Atua.—A taio i te Habakuka 3:17, 18.

 E TAHE MAI “TE PAPE ORA”

17, 18. (a) Eaha te “pape ora”? (b) Eaha ta ‘te miti i te pae hitia o te râ e i te pae tooa o te râ’ e faahoho‘a ra? (c) Eaha ta oe e faaoti papu?

17 Ia oti Aramagedo, e tahe rahi mai “te pape ora” mai te Basileia o te Mesia mai. Teie “pape ora,” o ta Iehova ïa i faanaho ia ora te taata e a muri noa ’tu. ‘Te miti i te pae hitia o te râ,’ o te miti Pohe ïa, o te faahoho‘a maitai ra i te feia e taoto ra i roto i te pohe. E te miti i ‘te pae tooa o te râ,’ o te miti Mediteranea ïa tei î i te ora, o te faahoho‘a maitai ra i te “feia rahi roa” e ora ’tu i Aramagedo. (A taio i te Zekaria 14:8, 9; Apo. 7:9-15) E faatiamâhia na pǔpǔ e piti i te utua pohe a Adamu a inu ai ratou i te pape ora taipe, aore ra “te pape ora tahe.” Ei faahopearaa, e fana‘o te taatoaraa o ratou i te huru taata tia e te ora mure ore.—Apo. 22:1, 2.

A faaoti papu e faaea noa i roto i te peho paruruhia e Iehova

18 A haamou ai Iehova i teie ao ino, e paruru o ’na ia tatou e tae roa ’tu i roto i ta ’na ao apî parau-tia. Noa ’tu e e riri mai te mau nunaa atoa, e faaoti papu ana‘e e vai taiva ore i te Basileia o te Atua e e faaea noa i roto i te peho paruruhia e Iehova.

^ par. 11 A hi‘o Te Apokalupo—Ua fatata roa to ’na tatararaa rahi hopea nei!, api 169-170.