Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2013

 Haamana‘oraa no tahito ra

Ua tae mai i te taime tano mau!

Ua tae mai i te taime tano mau!

“EITA e moehia!” Ta e rave rahi ïa i parau no te faataa i te “Darama o te Poieteraa” (Beretane). Ua tae mai te reira i te taime tano mau e ua putapû roa te feia i mataitai atu. Ua horoa te “Darama o te Poieteraa” i te hoê faaiteraa puai mau no te arue ia Iehova hou rii te faatereraa a Hitler e hamani ino u‘ana ’i i to te Atua nunaa i Europa. Eaha râ te “Darama o te Poieteraa”?

No ǒ mai te i‘oa o te darama apî i te buka Schöpfung (Création)

I 1914, ua faaite te pu rahi a te nunaa o Iehova i Brooklyn, i New York (Marite), i te “Hoho‘a Darama o te Poieteraa.” E porotarama pataraa hoho‘a peni rau, hoho‘a taviri e haruharuraa e vau hora i te maoro. E mirioni taata tei ite i te reira. Ua faaite-atoa-hia te hoê â porotarama (Eurêka-Drame), mea poto a‘e râ, i 1914. I te mau matahiti 1920 râ, ua ino te mau hoho‘a, hoho‘a taviri e taihaa no te pata. Tera râ, mea rahi â te taata te hinaaro ra e mataitai i te “Hoho‘a Darama.” Mai te feia no Ludwigsbourg i Heremani o tei ui, “Afea te ‘Hoho‘a Darama’ e pata-faahou-hia ’i?” Eaha te nehenehe e rave?

No te pata faahou i te Darama, ua hoo mai te mau tia no te Betela i Magdebourg i 1920 te mau hoho‘a taviri a te hoê taiete i Paris (Farani). Oia atoa te mau hoho‘a a te mau taiete hamani hoho‘a no Leipzig e Dresde. Ua amuihia te reira i te tahi mau hoho‘a o te “Hoho‘a Darama” tei ore i ino.

Ua papai te taeae Erich Frost, taata faata‘i upaupa aravihi, i te upaupa e faaroohia ia patahia te hoho‘a taviri e te hoho‘a. No roto mai te tahi mau parau i papaihia i nia iho i ta tatou buka Création. No reira i horoahia ’i i te “Hoho‘a Darama” apî te i‘oa “Darama o te Poieteraa.”

E vau atoa hora i te maoro te Darama apî. Ua tatuhaahia te reira e e patahia hoê tuhaa i te arui taitahi. E itehia te mau parau rii faufaa no nia i te mau mahana poieteraa, haamana‘oraa Bibilia e te tuatapaparaa. Ua faaite atoa e ua inoino te huitaata i te haapaoraa hape. Ua ite te feia i Auteteria, Heremani, Luxembourg e Helevetia i te “Darama o te Poieteraa.” Oia atoa te feia reo Heremani i te tahi atu mau vahi.

Erich Frost e ta ’na mau nota himene no te “Darama o te Poieteraa”

Te faataa ra Erich Frost: “A haapurorohia ’i te hoho‘a taviri o te Darama, ua faaitoito vau i to ’u mau hoa, tera iho â râ i roto i te pǔpǔ faata‘i upaupa, ia faaohipa i te taime faafaaearaa no te opere i ta matou mau buka e buka rairai faahiahia mau i te feia i tae mai. Mea rahi a‘e te papai tei vaiihohia i taua taime ra i tera i tera fare.” Te haamana‘o ra Johannes Rauthe, o tei faanaho i te  mau haapurororaa i Poronia e i te Repupirita Tchèque i teie nei, e mea rahi te taata o tei tae mai tei faaite ihea ratou e faaea ’i ia farereihia ratou. Ua haere te feia poro e hi‘o ia ratou e ua tauaparau no nia i te Bibilia ma te anaanatae mau.

I te mau matahiti 1930, ua î te mau piha haapurororaa a patahia ’i te “Darama o te Poieteraa” e tei nia te tauaparauraa a te taata i taua mau oire ra i te mau Ite no Iehova. I 1933, fatata hoê mirioni taata tei haere i te mau haapurororaa faanahohia e ta tatou amaa i Heremani. Te haamana‘o ra Käthe Krauss: “No te mataitai i te Darama, ua haere avae matou e pae mahana i te maoro, 10 kilometera i te mahana taitahi, na roto i te uru raau, na nia i te mou‘a e na roto i te mau faa.” Te na ô ra Else Billharz e ua haamata o ’na i te au roa i te parau mau maoti tera haapurororaa.

Te faatia ra Alfred Almendinger e i to to ’na mama haereraa e mataitai i te Darama, ua oaoa roa o ’na e ua hoo atura i te hoê Bibilia a imi atu ai i te parau ‘po auahi.’ No te mea aita o ’na i ite i te reira i roto i te Bibilia, ua faaea oia i te haere i te fare pureraa e ua bapetizo a‘era ia ’na. Te haamana‘o ra Erich Frost: “Mea rahi roa te taata tei farii i te parau mau maoti te ‘Darama o te Poieteraa.’”—Ioa. 3, 1-3.

E rave rahi tei maitatai i te “Darama o te Poieteraa.” Aita râ i maoro ua parare roa to Hitler mau mana‘o na Europa e ua haamata ’tura te peapea. I te omuaraa o te matahiti 1933, ua opanihia te mau ohipa a te mau Ite i Heremani. Mai tera taime e tae atu i te hopea o te piti o te tama‘i rahi i 1945, ua hamani-ino-u‘ana-noa-hia te mau tavini a Iehova i Europa. Ua tapeahia Erich Frost fatata vau matahiti i te maoro. Ua ora mai râ oia e ua tavini i muri a‘e i te Betela i Wiesbaden, i Heremani. Ua tae mai iho â te “Darama o te Poieteraa,” o te ore roa ’tu e moehia, i te taime tano mau no te faaitoito i te Kerisetiano e rave rahi roa ia tamatahia to ratou faaroo i te roaraa o te Piti o te Tama‘i rahi!—Haamana‘oraa no tahito ra no Heremani mai.

 

No te ite atu â

Na 100 matahiti o te hoê hoho‘a tavirihia

A 100 matahiti te “Hoho‘a Darama” i te faaiteraahia no te taime matamua. Ua faaineinehia te reira ia tiaturi atu â te taata i te Bibilia ei Parau a te Atua.