Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2013

E ara i te mau opuaraa a te aau

E ara i te mau opuaraa a te aau

“E haavare rahi to te aau i te mau mea atoa nei, e ua ino roa,” ta te Ieremia 17:9 ïa e parau ra. Ia hinaaro u‘ana to tatou aau i te tahi mea, e ere anei i te mea maitai ia haapao maite i ta ’na mau opuaraa?

Te faaara maira te Bibilia: “No roto mai hoi i te aau te mana‘o iino, te taparahi taata, e te faaturi, te poreneia, e te eiâ, te haavare, e te faaino.” (Mat. 15:19) E nehenehe tatou e vare i to tatou aau a imi atu ai i te otoheraa no te hoê haerea aita e tu ra i te hinaaro o te Atua. E taa noa paha ia tatou i tei tupu i muri a‘e i te haaraa ma te paari ore. Eaha te tauturu mai ia ite i te mau opuaraa a to tatou aau hou a rave ai i te hoê haerea tano ore?

E NAFEA IA ITE I TA OE MAU OPUARAA?

Nafea te taioraa Bibilia i te mahana hoê e ohipa ’i i nia i to tatou aau?

A taio i te Bibilia i te mau mahana atoa e a feruri maite i ta te reira e parau ra.

“Mea ora . . . te parau a te Atua, e te puai rahi, e te ooi rahi hoi to te reira i to te ‘o‘e mata piti ra, i te putapupû-roa-raa hoi e taa ê noa ’tu te varua e te aau,” ta te aposetolo Paulo ïa i papai. E nehenehe te poroi a te Atua i roto i te Bibilia e ‘hi‘opoa i te mana‘o e te opua o te aau.’ (Heb. 4:12) E hi‘opoa ana‘e ia tatou iho maoti te mau Papai. E tauturu rahi mai te reira ia hi‘opoa i te mau opuaraa a te aau. Mea faufaa roa ia taio tatou i te Parau a te Atua i te mau mahana atoa e ia feruri maite i ta te reira e parau ra! E taa maitai ïa ia tatou to Iehova mau mana‘o.

E farii ana‘e i te a‘oraa Bibilia a faaohipa ’tu ai i ta ’na mau faaueraa tumu. E ohipa te reira i nia i to tatou mana‘o haava—te “faaite” i roto ia tatou. (Roma 9:1) E tapea mai te reira ia imi i te otoheraa  o te hoê haerea tano ore. E hi‘oraa to roto i te Bibilia o te riro ei “a‘o” aore ra ei faaararaa no tatou. (Kor. 1, 10:11) E tauturu mai te reira ia ore e hape i te e‘a. Ia aha tatou taitahi?

E tauturu mai te pure ia ite i te huru o to tatou aau

A pure i te Atua ia tauturu ia oe ia hi‘opoa i te mau opuaraa a to aau.

“E hi‘o â [Iehova] i te aau.” (Par. 1, 29:17) “E rahi te Atua i to tatou aau, e ua ite oia i te mau mea atoa nei.” (Ioa. 1, 3:20) Eita e nehenehe e haavare i te Atua. Ia faaite roa ’tu tatou i ta tatou mau haapeapearaa, to tatou mana‘o e hinaaro i roto i te pure, e tauturu mai Iehova ia ite i te mau opuaraa a to tatou aau. E ani atoa ana‘e i te Atua ia ‘faaau i te aau mâ i roto ia tatou.’ (Sal. 51:10) No te ite i te mau opuaraa a to tatou aau, eiaha roa ’tu ïa e haamoe i te faanahoraa o te pure.

E tauturu mai te mau putuputuraa ia ite i te mau opuaraa a to tatou aau

A faaroo maite i te mau putuputuraa Kerisetiano.

E tauturu mai te faaroo-maite-raa i te mau putuputuraa ia hi‘opoa i to tatou aau ma te haavare ore. Aita e haamaramaramaraa apî i te mau putuputuraa atoa. Teie râ, ia tae atu tatou e taa maitai roa ’tu â ia tatou i te mau faaueraa tumu Bibilia e e tauturu mai te mau haamana‘oraa faufaa e faaroohia ia hi‘opoa i te mau opuaraa a te aau. Mea faufaa roa atoa te mau pahonoraa a to tatou mau taeae e tuahine ia maitai mai to tatou aau. (Mas. 27:17) E fifihia tatou ia faataa ê tatou ia tatou a ore atu ai e fana‘o tamau i te auhoaraa Kerisetiano i te mau putuputuraa. ‘E imi ïa tatou i to tatou iho hinaaro.’ (Mas. 18:1) Mea maitai ïa ia ui, ‘E peu matauhia anei no ’u ia haere e ia haafaufaa i te mau putuputuraa atoa?’—Heb. 10:24, 25.

E ARATAI TO TATOU AAU IA TATOU IHEA?

E nehenehe to tatou aau haavare e haafariu ê ia tatou i te e‘a tia i roto i te tuhaa e rave rahi o te oraraa. E hi‘opoa ana‘e e maha: te tapiraa i te mau mea materia, te inuraa i te ava, ta tatou mau amuimuiraa e te faaanaanataeraa.

Te tapiraa i te mau mea materia.

E tutava iho â tatou i te haapao i to tatou mau hinaaro pae tino. Ua horoa râ Iesu i te hoê faaararaa no nia i te haafaufaa-rahi-roa-raa i te tao‘a materia. I roto hoê o ta ’na mau faahi‘oraa, ua faahiti Iesu i te hoê taata tao‘a rahi ua î ta ’na mau fare vairaa maa. Aita ïa ta ’na e vairaa faahou no te haapue i te maa o te tahi atu ootiraa maitai. Ua opua o ’na e vavahi i ta ’na mau fare vairaa maa no te faatia i te fare rahi a‘e. Ua feruri o ’na: “E tau varua, e tao‘a rahi ta oe ua pue i te vairaa no te mau matahiti a muri nei e rave rahi; e faaea maite, e amu, e inu, e ia rearea maite.” Aita râ o ’na i tâu‘a i teie parau faufaa roa: E nehenehe o ’na e pohe i tera iho â po.—Luka 12:16-20.

A paari mai ai, e riro paha ta tatou tapitapiraa matamua i te faanahoraa i to tatou oraraa ia ore e haapeapea faahou a ruau ai. E haamata paha ïa tatou i te imi i te otoheraa no te rave i te ohipa hau i te mau arui putuputuraa aore ra i te ore e haapao maite faahou i ta tatou mau hopoia Kerisetiano. Eiaha anei tatou e ara i te reira? Peneia‘e atoa mea apî tatou e ua taa ia tatou e aita ’tu toroa maitai a‘e i te taviniraa taime taatoa. E tiai â anei tatou no te riro ei pionie ma te mana‘o e e mea tia ia  putu na mua ta tatou moni? Eiaha anei tatou e rave i tei nehenehe i teie nei â ia rahi ta tatou tao‘a i te Atua? O vai te ite e e ora noa anei tatou ananahi?

Te inuraa i te ava.

Te na ô ra te Maseli 23:20: “Eiaha oe e amui atoa i te feia i taero i te uaina.” Ia hinaaro puai te hoê taata i te inu i te ava, e imi paha o ’na i te otoheraa o to ’na inu-tamau-raa ma te parau e te inu ra o ’na no te tamǎrû, eiaha no te faataero. Mai te peu e e titauhia te ava no te tamǎrû, ua tae paha ïa i te taime no te hi‘opoa i te mau opuaraa a to tatou aau ma te haavare ore.

Ta tatou mau amuimuiraa.

E amui iho â tatou i te feia e ere i te Ite no Iehova i te fare haapiiraa, i te ohipa e i roto i te taviniraa. Mea taa ê râ ia haamatau roa ’tu ia ratou e ia riro ei hoa piri. E imi anei tatou i te otoheraa i tera mau amuimuiraa ma te parau e mea rahi to ratou huru maitatai? “Eiaha e vare,” ta te Bibilia ïa faaararaa. “E ino te parau maitai i te amuiraa iino.” (Kor. 1, 15:33) E navai noa maa haaviiviiraa ia ino te pape mâ. Oia atoa, e nehenehe te auhoaraa e te feia o te ore e haamori ia Iehova e faaino i to tatou mau taairaa e o ’Na a pee atu ai tatou i te mana‘o, te faaahuraa, te huru paraparau e te haerea o teie nei ao.

Te faaanaanataeraa.

Maoti te mau ravea apî e fana‘o ohie tatou i te mau huru faaanaanataeraa atoa. E ere râ te rahiraa i te mea tano no te hoê Kerisetiano. ‘Eiaha roa ia faahitihia i roto ia outou te mau parau faufau atoa,’ ta Paulo ïa i papai. (Eph. 5:3) Ia aha mea au ana‘e na to tatou aau e hi‘o aore ra e faaroo i te mau mea hairiiri? E mana‘o paha tatou e e hinaaro te taata atoa maa tamǎrûraa aore ra faaanaanataeraa, e na te taata taitahi e maiti e nafea o ’na e na reira ’i. E haamana‘o ana‘e râ i te a‘oraa a Paulo e eiaha e hi‘o aore ra e faaroo i te mau mea hairiiri.

E NEHENEHE E TAUI

Mai te peu e ua pee tatou i te mau hinaaro o te hoê aau haavare e ua matau roa i te imi i te otoheraa no to tatou haerea tano ore, e nehenehe e taui. (Eph. 4:22-24) Teie e piti hi‘oraa.

E mea tia ia faaafaro Miguel * i to ’na huru feruriraa no nia i te mau tao‘a materia. Te na ô ra oia: “No ǒ mai ta ’u vahine, ta ’u tamaiti e o vau atoa i te hoê fenua mea faufaa roa ia noaa mai i te mau ravea apî maitai roa ’‘e e tei matara noa ’tura e te hoê oraraa fana‘o. Ua horoa vau ia ’u iho no te fana‘o i tei nehenehe i roto i teie nei ao. No ’u, e nehenehe ta ’u e na reira ma te ore e nounou i te tao‘a. Ua taa oioi râ ia ’u e aita tera maimiraa i te tao‘a materia e hope. Ua pure au ia Iehova no nia i to ’u mau mana‘o e te mau hinaaro o to ’u aau. Ua faaite au ia ’na e te hinaaro nei to matou utuafare e tavini hau atu â ia ’na. Ua rave matou i te hoê faaotiraa no te faaohie i to matou oraraa e ua haere i te vahi e hinaaro-rahi-hia ra te taata poro. Riro atura matou ei pionie. Ua itea a‘era ia matou e aita e titauhia ra e rave rahi roa tao‘a materia no te ite i te hoê huru oraraa oaoa e te mauruuru.”

Te faaite ra te hi‘oraa o Lee mea nafea te hi‘opoaraa ia ’na iho i te tautururaa ia ’na ia faarue i ta ’na mau amuimuiraa iino. Te na ô ra oia: “I amuimui pinepine na vau i te feia tapihoo ěê no ta ’u ohipa. Ua ite au e e inu-hua-raa i tera mau putuputuraa, mea au roa râ na ’u. E pinepine ua fatata roa vau i te taero a tatarahapa ’tu ai i muri iho. E titauhia ia hi‘opoa vau i te mau hinaaro o to ’u aau ma te haavare ore. Ua tauturu mai te mau a‘oraa a te Parau a te Atua e te mau mana‘o tauturu a te mau matahiapo ia taa e te imi ra vau i te amuimui i te feia aita e here ra ia Iehova. I teie nei, e ohipa vau maoti te niuniu paraparau ia nehenehe ta ’u e ua faaiti roa vau i te mau farereiraa e te feia tapihoo.”

Eiaha tatou e haavare ia tatou iho e e imi ana‘e i te mau opuaraa a to tatou aau. Mea faufaa roa. A na reira ’i, ia ani tatou ia Iehova na roto i te pure ia tauturu mai ma te haamana‘o e ua “itea ia ’na te mau parau moe atoa o te aau.” (Sal. 44:21) Ua horoa atoa mai te Atua i ta ’na Parau o te riro ei hi‘o no tatou. (Iak. 1:22-25) Mea faufaa atoa te mau haamana‘oraa e te a‘oraa ta tatou e fana‘o maoti te mau papai Kerisetiano e te mau putuputuraa! Maoti teie mau faanahoraa, e nehenehe tatou e tiai i to tatou aau e e haere noa na nia i te e‘a parau-tia.

^ par. 18 Ua tauihia te mau i‘oa.