Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2013

E tavini i te Atua ma te ore e tatarahapa

E tavini i te Atua ma te ore e tatarahapa

“Te haamoeraa i te mau mea i muri ra, e te titauraa ’tu hoi i t[o] mua.”—PHIL. 3:13.

1-3. (a) Eaha to vetahi huru no nia i ta ratou i rave aore ra i ore i rave? Eaha paha ta tatou e rave no ta tatou mau hape na mua ’‘e? (b) Eaha te haapiiraa e huti mai i te hi‘oraa o Paulo?

‘AHANI au i ite.’ Teie te parau peapea roa ’‘e tei faahitihia a‘enei, ia au i te hoê rohipehe. Ahani ratou i na ô, mai tera paha ïa to ratou oraraa. Ta te taata ïa e parau. E mana‘o iho â tatou paatoa i te mau mea ta tatou e hinaaro e taui. O vetahi râ, e tatarahapa aore ra e haapeapea noa ïa no ta ratou i rave aore ra i ore i rave. Mai tera atoa anei no oe?

2 Te vai ra o tei rave i te hape ino mau e tei hara rahi atoa. Area te tahi atu, te uiui nei ïa e e faaotiraa maitai anei ta ratou i rave. Ua tia ia vetahi ia ore e mana‘o noa i ta ratou i rave na. Te tahi atu râ, te faahapa noa ra ïa ia ratou ma te parau e “ahani.” (Sal. 51:3) E oe? E hinaaro anei oe e tavini i te Atua ma te ore e mana‘o noa i te mau hape ta oe i rave na? Te faahiti ra te Bibilia i te hi‘oraa o te aposetolo Paulo, o tei haapii i te na reira.

3 E hape ino mau â e e faaotiraa maitai atoa ta Paulo i rave. Ua tatarahapa roa oia no ta ’na mau hape, ua haapii râ i te tavini i te Atua ma te taiva ore, a maitai atu ai to ’na oraraa. E nehenehe tatou e huti mai i te haapiiraa.

TA PAULO I RAVE NA

4. Eaha ta te aposetolo Paulo i rave e ta ’na i tatarahapa i muri iho?

4 Ei Pharisea i to ’na apîraa, i rave na Paulo i te tahi mau mea ta ’na i tatarahapa i muri iho. Ua  hamani ino roa oia i te mau pǐpǐ a te Mesia. Te faatia ra te Bibilia e i muri iti a‘e i to Setephano haapoheraahia, “ua hamani ino atura Saulo [o Paulo i muri a‘e] i te Etaretia : e tomo oia i roto i te mau fare, a aratō atu ai i te tane ’e te vahine i rapae, ’e a huri atu ai ia ratou i roto i te tapearaa.” (Ohi. 8:3, Te Faufaa Api) Mea teimaha te parau “hamani ino” ia au i te hoê taata ite i te Bibilia, o te faataa ra i te huru raveraa a Saulo i te amuiraa Kerisetiano “mai te hoê animara taehae.” E ati Iuda paieti Saulo tei tiaturi e ua hinaaro iho â te Atua ia faaore oia i te amuiraa Kerisetiano. No reira oia i hamani ino roa ’i i te mau Kerisetiano ma te “parau haamǎta‘u e te taparahi i . . . te tane e te vahine atoa.”—Ohi. 9:1, 2; 22:4. *

5. Eaha tei tupu i faaea ’i Saulo i te hamani ino i te mau Kerisetiano no te poro no nia i te Mesia?

5 I muri a‘e, opua ’tura Saulo e haere i Damaseko e haru i te mau Kerisetiano i ǒ ratou no te arato mai ia ratou i Ierusalema ia faautuahia e te Sunederi. Ua tapea râ Iesu, te Upoo o te amuiraa Kerisetiano, ia ’na. (Eph. 5:23) Aitâ oia i tae atura i Damaseko i fa ’tu ai Iesu ia ’na ma te maramarama no te ra‘i i te anaanaraa mai. Matapohia ’tura Saulo. Tono atura Iesu ia ’na i Damaseko, i reira e faaitehia ’tu ai ta ’na e rave. Ua ite tatou eaha tei tupu i muri iho.—Ohi. 9:3-22.

6, 7. Na te aha e faaite mai e aita Paulo i huna i ta ’na mau hape ino mau?

6 Taa oioi atura ia Paulo e ua hape roa oia. Faaea ihora oia i te hamani ino i te mau Kerisetiano e poro atura ma te itoito rahi no nia i te Mesia. Aita i moe ia ’na ta ’na ohipa ino, ua papai hoi oia i muri a‘e: “Ua ite hoi outou i ta ’u haapaoraa i mutaa iho i te parau a te ati Iuda ra, e e hamani ino hau ê to ’u i te ekalesia o te Atua, e pau a‘era ïa ia ’u.” (Gal. 1:13) Ua faahiti â oia i ta ’na i rave na i to ’na papairaa i to Korinetia, to Philipi e ia Timoteo. (A taio i te Korinetia 1, 15:9; Phil. 3:6; Tim. 1, 1:13) Noa ’tu to ’na haama, ua papai Paulo i ta ’na i rave ma te ore e huna i ta ’na mau hape ino mau.—Ohi. 26:9-11.

7 Mea u‘ana mau â to Paulo hamani-ino-raa i te mau Kerisetiano. Ia feruri tatou i te reira, e taa roa ia tatou to ’na tatarahapa rahi i muri iho, a faaino-atoa-hia ’i oia e te enemi. Ta te tahi atu ïa taata ite i te Bibilia i parau. A ratere ai Paulo na te mau amuiraa, peneia‘e ua na ô atu te tahi mau taeae a tahi ra oia a farerei ai: ‘Ah, o oe Paulo. O oe tei hamani ino ia matou!’—Ohi. 9:21.

8. Ua aha Paulo i to Iehova raua Iesu aroharaa e hereraa ia ’na? Eaha ïa ta Paulo e haapii maira?

8 Ua taa ia Paulo e maoti noa te maitai rahi o te Atua i tia ’i ia ’na ia tavini ei aposetolo. I roto i ta ’na na 14 rata, ua faahiti pinepine a‘e oia i te aroha o te Atua i te tahi atu feia i papai i te Bibilia. (A taio i te Korinetia 1, 15:10.) Ua mauruuru roa Paulo i to te Atua aroharaa ia ’na. Ei faaiteraa i to ’na aau mehara, ua “ohipa rahi” oia i roto i te taviniraa a te Atua, hau a‘e i te tahi atu mau aposetolo. Eaha ïa ta Paulo e  haapii maira? Teie ïa, ia fa‘i tatou i ta tatou mau hara a taui atu ai, ua ineine Iehova i te faaore i te mau hara rahi atoa maoti te tusia taraehara o Iesu. Ia mana‘o oe e eita oe e faufaahia i te reira no te mea e hara iti rahi ta oe, a haamana‘o ïa ia Paulo. (A taio i te Timoteo 1, 1:15, 16.) I hamani ino na Paulo ia Iesu, ua papai râ oia e ua aroha mai te Tamaiti a te Atua ia ’na e ua horoa ia ’na iho no ’na. (Ohi. 9:5; Gal. 2:20) Ua haapii Paulo i te faufaaraa ia tavini i te Atua ma te ore e mana‘ona‘o i ta ’na i rave na. Ia na reira atoa ïa oe.

Ua haapii Paulo i te tavini i te Atua ma te ore e tatarahapa

TE TATARAHAPA RA ANEI OE?

9, 10. (a) No teihea mau mea e tatarahapa ’i vetahi mau tavini a Iehova? (b) No te aha aita ’i e apî ia mana‘o noa i ta tatou mau hape?

9 Peneia‘e te tatarahapa nei oe i te raveraa i te tahi mau mea, i te mâu‘araa to oe taime e itoito no te mau ohipa e ere i te mea faufaa roa, i te haamauiui-atoa-raa ia vetahi ê aore ra no te tahi atu tumu. Teie ïa te uiraa, e nafea oe?

10 Mea rahi o te haapeapea no te mana‘o-noa-raa i ta ratou mau hape. E afaro anei te fifi ia haapeapea rahi tatou? Eita ïa! A tamata na i te taueue ia oe e rave rahi hora i nia i te hoê parahiraa. E nuu anei oe i mua? Eita ïa, e rohirohi oe. No reira, eiaha e mana‘ona‘o, a faaafaro râ i te fifi. Mai te peu e ua hapa oe i te tahi taata, a parau ia ’na e te tatarahapa nei oe ia hau orua. A feruri no te aha oe i hapa ’i no te ore e tapiti. I te tahi taime, aita ’tu e ravea maori râ te faaoromairaa i te mau faahopearaa  o ta oe mau hape. Aita e apî ia haapeapea, eita hoi te reira e tauturu ia oe ia tavini i te Atua ma te aau atoa.

11. (a) E aroha e e here mai Iehova ia aha tatou? (b) Te nahea maira te Bibilia e hau ai to tatou feruriraa?

11 Te vai ra o te faahapa noa ia ratou iho, a mana‘o atu ai e mea faufaa ore ratou i te aro o te Atua. No te rahi e te ino mau o ta ratou mau hape, eita te Atua e aroha ia ratou. Te tanoraa râ, noa ’tu eaha ta ratou i rave na, e nehenehe ratou e fa‘i i te reira i te Atua, e taui e e ani ia ’na ia faaore i ta ratou mau hara. (Ohi. 3:19) E aroha e e here Iehova ia ratou, ua na reira hoi oia i nia e rave rahi. E hamani maitai oia i te taata haehaa e te haavare ore o te tatarahapa mau. Ua faaore oia i ta Ioba hapa, tei parau: “Te tatarahapa nei au i raro i te repo e te rehu auahi.” (Ioba 42:6) Ia hau to tatou feruriraa, e pee ana‘e i ta te Bibilia e parau ra: “O tei tapo‘i i ta ’na hara, e ore ïa e maitai; o tei fa‘i râ e ua faarue, e arohahia ïa.” (Mas. 28:13; Iak. 5:14-16) No reira, e fa‘i ana‘e i ta tatou hara i te Atua, e pure ana‘e ia ’na ia faaore i te reira, e e faaite ana‘e ma te ohipa i to tatou tatarahapa mau. (Kor. 2, 7:10, 11) I reira noa ïa Iehova o te faaore rahi i te hara e aroha mai ai.—Isa. 55:7.

12. (a) Ia aha tatou mai ia Davida ia faahapa mai to tatou mana‘o haava? (b) I roto i teihea auraa i tatarahapa ’i Iehova? E faaitoito te pahonoraa o teie uiraa ia tatou ia aha? (A hi‘o i te tumu parau tarenihia.)

12 E tauturu mai te Atua ia pure tatou ia ’na. E ravea puai teie. I roto i te hoê salamo nehenehe mau, ua faahiti Davida i to ’na tiaturi e ua pahono Iehova i ta ’na mau pure. (A taio i te Salamo 32:1-5.) Mai ta ’na i parau, ua rohirohi roa oia i te haamamû-noa-raa i to ’na mana‘o haava e faahapa noa ra ia ’na. Ua hepohepo e ua ma‘i-roa-hia oia. I to ’na noa fa‘iraa i ta ’na hara i te Atua te faaoreraahia te reira, a maitai mai ai oia. Ua pahono Iehova i ta Davida mau pure e ua faaitoito ia ’na ia haere i mua a rave noa ’i i te mea maitai. No reira, ia taparuparu oe ia Iehova ma to aau atoa, e faaroo oia ia oe. Te peapea ra anei oe no ta oe mau hape? A tutava ïa i te rave i te mau tauiraa ma te tiaturi e ua faaore Iehova i te reira.—Sal. 86:5.

A FERURI I TO ORARAA A MURI A‘E

13, 14. (a) Ia feruri tatou i te aha? (b) Eaha te tahi mau uiraa e tauturu mai ia hi‘opoa ia tatou?

13 E nehenehe iho â tatou e huti mai i te haapiiraa i ta tatou i rave na a hi‘o  ai râ i mua. E feruri ana‘e i to tatou oraraa i teie nei e a muri a‘e. E tatarahapa anei tatou a muri a‘e i ta tatou mau maitiraa e rave nei? Te tavini ra anei tatou i te Atua ma te taiva ore ia ore tatou e tatarahapa?

14 Ua fatata te ati rahi. Mea tano ïa ia uiui: ‘E tia anei ia ’u ia tavini atu â i te Atua? E rave i te taviniraa pionie? Eaha te haafifi ra ia ’u ia riro ei tavini tauturu? Te tutava mau ra anei au i te ahu i te huru taata apî? E hinaaro anei Iehova i te hoê taata mai ia ’u i roto i ta ’na ao apî?’ Eiaha e mana‘o noa i ta oe i ore i rave, a hi‘opoa râ ia oe e a faaitoito i te tavini ia Iehova ma to aau atoa. A rave i te mau faaotiraa e ore oe e tatarahapa a muri a‘e.—Tim. 2, 2:15.

EIAHA ROA ’TU E TATARAHAPA I TO TAVINIRAA MO‘A

15, 16. (a) Eaha ta e rave rahi i haapae no te tavini ia Iehova ma te taime taatoa? (b) No te aha eiaha ’i e tatarahapa i ta tatou mau haapaeraa i rave no te Atua?

15 E o oe o te tavini nei ia Iehova ma te taime taatoa? E toroa aufau-maitai-hia aore ra e imiraa tere maitai paha ta oe i haapae no te tavini atu â ia Iehova. Aore ra ua faaoti paha oe e faaea taa noa aore ra o oe tei faaipoipo eiaha e fanau i te tamarii. Ua vata atu â ïa oe no te tavini i te Betela, i roto i te paturaa na te ara, ei tiaau haaati aore ra mitionare. I teie nei ua paari oe, eiaha roa ’tu e tatarahapa i teie mau faaotiraa ta oe i rave. Eiaha roa ’tu e mana‘o e e ere ta oe mau haapaeraa i te mea faufaa aore ra ua rave oe i te reira i te taime tano ore.

16 No to oe here rahi ia Iehova e hinaaro mau e tauturu ia vetahi ê ia tavini ia ’na, i rave ai oe i teie mau faaotiraa. Eiaha e mana‘o e e oraraa maitai a‘e to oe ahani oe i rave i te tahi atu â mau faaotiraa. Eiaha! Ia oaoa roa râ oe i te maitiraa i te ravea maitai roa ’‘e no te tavini ia Iehova. E ore oia e haamoe i ta oe mau haapaeraa atoa i rave no ’na. I roto i te paradaiso, to reira te ora mure ore tia roa, e haamaitai rahi roa oia ia oe.—Sal. 145:16; Tim. 1, 6:19.

TAVINI I TE ATUA MA TE ORE E TATARAHAPA

17, 18. (a) Eaha tei tauturu ia Paulo ia tavini i te Atua ma te ore e tatarahapa? (b) Eaha ïa ta tatou e rave mai ia Paulo?

17 Eaha tei tauturu ia Paulo ia tavini i te Atua ma te ore e tatarahapa? Ua faaea oia i te mana‘ona‘o no to ’na oraraa na mua ’‘e. Ua haa roa râ oia ia noaa ia ’na ta ’na haamaitairaa. (A taio i te Philipi 3:13, 14.) Aita Paulo i mana‘o noa i ta ’na mau ohipa ino i rave na a vai ai oia i roto i te haapaoraa ati Iuda. Ua faaitoito râ oia i te tapea i to ’na taiva ore no te fana‘o i te ora mure ore.

18 Eaha ïa ta Paulo e haapii maira? Eiaha tatou e mana‘ona‘o no ta tatou i rave na e ore hoi e tia ia tatou ia taui. E feruri ana‘e râ i ta tatou e rave nei no te fana‘o i te mau haamaitairaa i mua nei. Eita e moe roa ia tatou ta tatou mau hape. Eiaha râ e faahapa noa ia tatou no te reira. E hi‘o ana‘e i mua, a tavini ai i te Atua ma to tatou aau atoa e a tiai ai i te oraraa faahiahia mau a muri a‘e!

^ par. 4 E pinepine te Bibilia i te faahiti e o te vahine atoa ta Saulo i hamani ino. Tapao faaite ïa e e tuhaa rahi ta te vahine i rave na i roto i te pororaa i te senekele matamua, mai i teie tau atoa.—Ioe. 2:28, 29.