Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2013

Matahiapo Kerisetiano, hoa ohipa no to tatou oaoa

Matahiapo Kerisetiano, hoa ohipa no to tatou oaoa

“Ei tauturu . . . matou i to outou oaoa.”—KOR. 2, 1:24.

1. Eaha ta te mau Kerisetiano no Korinetia i rave i oaoa roa ’i Paulo?

I TE matahiti 55, ua faaroo te aposetolo Paulo e te mârô noa ra te mau taeae no Korinetia te tahi i te tahi. No to ’na here ia ratou mai te hoê papa i ta ’na mau tamarii, ua hapono oia i te tahi rata na ratou no te a‘o atu. (Kor. 1, 1:11; 4:15) Ua ani atoa Paulo i to ’na hoa ia Tito ia haere e hi‘o ia ratou e i Teroa raua e farerei ai no te faaite atu i te parau apî. Tau ava‘e i muri iho, a tiai noa ’i Paulo ia Tito i Teroa, aita Tito i tae atu. Te haapeapea noa ra Paulo no to Korinetia. Fano atura Paulo i Makedonia, i reira ïa to raua farereiraa. Ua oaoa roa oia. Faatia ’tura Tito e ua faaroo te mau taeae no Korinetia i ta Paulo mau a‘oraa e te hinaaro ra ratou e farerei ia ’na. Ua ‘rahi atu â to ’na oaoa.’—Kor. 2, 2:12, 13; 7:5-9.

2. (a) Eaha ta Paulo i papai i to Korinetia no nia i te faaroo e te oaoa? (b) Eaha na uiraa ta tatou e pahono?

2 I muri iti a‘e, ua papai â Paulo i te rata na to Korinetia. Teie ta ’na i parau: “E ere râ mai te mea e o matou te fatu o to outou faaroo, ei tauturu râ matou i to outou oaoa; e mau faaroo hoi to outou.” (Kor. 2, 1:24) Eaha ta Paulo i hinaaro e parau? Eaha ïa te haapiiraa no te mau matahiapo Kerisetiano o te amuiraa?

TO TATOU FAAROO E TO TATOU OAOA

3. (a) Eaha te auraa o ta Paulo parau: “Te ti’a papu nei hoi outou i roto i te faaroo”? (b) Te aha nei te mau matahiapo mai ia Paulo?

3 Ua faahiti Paulo i te faaroo e te oaoa, na huru maitatai faufaa roa ia faahotu te mau Kerisetiano. No nia i te faaroo, teie ta ’na i papai: “E ere râ mai  te mea e o matou te fatu o to outou faaroo, . . . e mau faaroo hoi to outou,” aore ra “te ti’a papu nei hoi outou i roto i te faaroo” ia au i Te Faufaa Api. Ua ite ïa Paulo e no to ratou iho faaroo i te Atua, eiaha râ no ’na aore ra no vetahi ê, e mau papu ai te mau taeae no Korinetia. Ua papu ia ’na e e Kerisetiano taiva ore ratou e hinaaro ra iho â e rave i te mea maitai. Aita ïa e faufaa ia riro Paulo ei fatu o to ratou faaroo e aita iho â oia i hinaaro e na reira. (Kor. 2, 2:3) I teie mahana, te tiaturi nei te mau matahiapo, mai ia Paulo, e te tavini ra to ratou mau taeae i te Atua ma te faaroo e te aau tae. (Tes. 2, 3:4) Eita ratou e haamau i te mau ture etaeta no te amuiraa. Te turui nei râ ratou i nia i te mau aratairaa o te Bibilia e a te faanahonahoraa a Iehova. E ere hoi te mau matahiapo i te fatu o te faaroo o to ratou mau taeae.—Pet. 1, 5:2, 3.

4. (a) Eaha te auraa o ta Paulo parau: “Ei tauturu râ matou i to outou oaoa”? (b) Eaha te hiaai o te mau matahiapo, mai to Paulo, i teie mahana?

4 Ua na ô atoa Paulo: “Ei tauturu . . . matou i to outou oaoa.” O vai tera mau “tauturu,” aore ra hoa ohipa? O ’na ïa e to ’na mau hoa rahi. Na te aha e haapapu mai? I roto i ta ’na rata i to Korinetia, ua faahiti Paulo e piti o to ’na mau hoa ohipa i to ’na papairaa: “O Iesu Mesia, i parau-haerehia e matou, o vau e Siluano e Timoteo i ǒ outou na.” (Kor. 2, 1:19) Ia faahiti atoa oia i te parau “hoa rave ohipa” i roto i ta ’na mau rata, o to ’na iho â mau hoa piri roa ta ’na e parau ra, mai ia Apolo, Akuila, Perisila, Timoteo, Tito e te tahi atu. (Roma 16:3, 21; Kor. 1, 3:6-9; Kor. 2, 8:23) No reira, i to Paulo parauraa: “Ei tauturu . . . matou i to outou oaoa,” te haapapu ra ïa oia i to Korinetia e e tauturu iho â oia e to ’na mau hoa ohipa i te amuiraa ia tavini i te Atua ma te oaoa. Tera atoa te hiaai o te mau matahiapo i teie mahana. E tauturu i to ratou mau taeae ia “haamori ia Iehova ma te oaoa.”—Sal. 100:2; Phil. 1:25.

5. E hi‘o mai tatou i te pahonoraa o teihea uiraa e ia feruri tatou i te aha?

5 “Eaha ta te hoê matahiapo i parau e i rave o tei faaoaoa ’tu â ia oe?” Teie te uiraa tei anihia a‘enei i te tahi mau taeae e tuahine itoito rahi no te mau fenua rau. A hi‘o mai ai tatou i ta ratou pahonoraa, e feruri atoa ana‘e eaha ta tatou e pahono atu e eaha te rave ia oaoa ta tatou amuiraa. *

“E AROHA ’TU IA PERESI HEREHIA”

6, 7. (a) Ia aha te mau matahiapo mai ia Iesu, Paulo e te tahi atu mau tavini a Iehova? (b) No te aha te mau taeae e oaoa ’tu â ’i ia haamana‘o tatou i to ratou i‘oa?

6 Mea rahi te taeae e tuahine tei parau e e oaoa ’tu â ratou ia tâu‘a te mau matahiapo ia ratou. Te pee ra ïa te mau matahiapo i te hi‘oraa o Davida, Elihu e to Iesu. (A taio i te Samuela 2, 9:6; Ioba 33:1; Luka 19:5.) Ua tâu‘a mau â teie mau tavini a Iehova ia vetahi ê ma te faahiti i te i‘oa o tera mau taata. Ua ite atoa Paulo i te faufaaraa ia haamana‘o e ia faahiti i te i‘oa o to ’na mau taeae e tuahine. Ta ’na ïa i rave i te pae hopea o te hoê o ta ’na mau rata. Hau atu i te 25 taeae e tuahine ta ’na i faahiti ma to ratou i‘oa. O Peresi te tahi. Teie ta Paulo i parau no teie tuahine Kerisetiano: “E aroha ’tu ia Peresi herehia.”—Roma 16:3-15.

7 Mea fifi roa no te tahi mau matahiapo  ia haamana‘o vetahi mau i‘oa. Ia faaitoito râ ratou i te na reira, e au ra e te parau ra ratou i to ratou mau taeae e tuahine, ‘Mea faufaa oe no ’u.’ (Exo. 33:17) Ma te faahiti atoa i to ratou i‘oa ia pahono ratou i te Haapiiraa o Te Pare Tiairaa aore ra te tahi atu putuputuraa, e oaoa ’tu â ïa to ratou mau taeae.—A hi‘o i te Ioane 10:3.

UA RAVE PAPU OIA I TE OHIPA A TE FATU

8. Eaha ta Paulo i rave ia au i te hi‘oraa o Iehova raua Iesu?

8 Ua tâu‘a ’toa Paulo ia vetahi ê ma te haapopou atu. Teie te tahi atu ravea e tauturu ai te mau matahiapo i to ratou mau taeae e tuahine ia tavini ia Iehova ma te oaoa. I to Paulo papairaa i to Korinetia, ua parau atu oia i to ’na oaoa iti rahi no ratou ma te na ô: “E arue rahi ta ’u ia outou.” (Kor. 2, 7:4) Mea papu e ua mahanahana roa te aau o te mau taeae no Korinetia. Ua haapopou atoa Paulo i te tahi atu mau amuiraa no ta ratou ohipa maitai. (Roma 1:8; Phil. 1:3-5; Tes. 1, 1:8) I to ’na faahitiraa ia Peresi i roto i ta ’na rata i te amuiraa no Roma, ua parau roa oia e mea rave papu teie tuahine i te ohipa a te Fatu. (Roma 16:12) Eita e ore e ua faaitoito roa teie parau haapopou i tera tuahine taiva ore. Ua pee noa Paulo i te hi‘oraa o Iehova raua Iesu.—A taio i te Mareko 1:9-11; Ioane 1:47; Apo. 2:2, 13, 19.

9. No te aha te amuiraa taatoa e oaoa ’tu â ’i ia haapopou te tahi i te tahi?

9 Ua ite atoa te mau matahiapo i teie mahana i te faufaaraa ia parau roa ’tu e mea here na ratou i to ratou mau taeae. (Mas. 3:27; 15:23) Ia haapopou te hoê matahiapo i to ’na mau taeae, te tâu‘a ra oia ia ratou e ta ratou ohipa. E hiaai iho â te mau taeae e tuahine i te mau parau faaitoito a te mau matahiapo. Te na ô nei te hoê tuahine e 50 tiahapa matahiti e mea varavara roa oia i te haapopouhia i ta ’na ohipa. E haapao noa te taata ia ratou iho, a tata‘u ai te tahi i te tahi. I to te hoê matahiapo haapopouraa ia ’na no ta ’na e rave ra i roto i te amuiraa, ua itoito roa oia a parau atu ai: “Mea here iho â to ’u Metua i te ra‘i ia ’u.” Tera atoa te mana‘o o te hoê taeae. Ua haapopou te hoê matahiapo ia ’na no te mea o ’na ana‘e te rave ra i ta ’na tamaiti e tamahine. Ua faaitoito mau â te reira ia ’na ia tavini noa ia Iehova ma te aau atoa. No reira ia haapopou te hoê matahiapo i to ’na mau taeae e tuahine, te tauturu ra ïa oia ia ratou ia tavini â i te Atua ma te oaoa e ia ore ia rohirohi.—Isa. 40:31.

A TIAAU I TE AMUIRAA A TE ATUA

10, 11. (a) Eaha ta te mau matahiapo e rave mai ia Nehemia? (b) Maoti te aha e haapuai ai te hoê matahiapo i te faaroo o te taeae aore ra tuahine ta ’na e farerei?

10 E ru te mau matahiapo i te tauturu i to ratou mau taeae e hinaaro ra i te faaitoitoraa. Mea faufaa roa te reira. Mea na reira ratou e faaite ai e mea here na ratou i to ratou mau taeae a tauturu atoa ’i ia ratou ia tavini i te Atua ma te oaoa. (A taio i te Ohipa 20:28. *) Ua na reira hoi te tahi mau tavini taiva ore a te Atua i tahito ra. A hi‘o na ia Nehemia. Te faatia ra te Bibilia e i to ’na iteraa e ua toaruaru vetahi o to ’na mau taeae ati Iuda, ua faaitoito oia ia ratou. (Neh. 4:14) Te na reira  atoa nei te mau matahiapo i teie mahana. Ia toaruaru to ratou mau taeae, e imi ratou i te ravea no te faaitoito atu. E farerei roa ’tu ratou i to ratou mau taeae e tuahine i ǒ ratou no te horoa ’tu i te tahi “ō varua.” Oia hoi no te aparau i nia i te tahi mea o te haapuai i to ratou faaroo. (Roma 1:11, Te Faufaa Api) Maoti te aha e na reira ’i te mau matahiapo?

11 Mea faufaa ia mana‘o na mua te hoê matahiapo i te taeae aore ra tuahine ta ’na e farerei no te faaitoito atu. I to ’na anei mau fifi, i ta ’na e parau o te tamahanahana, e i te irava aore ra hi‘oraa Bibilia o te faaitoito ia ’na. Ma te feruri na mua i te taeae aore ra tuahine ta ’na e farerei, e horoa ïa te matahiapo i te mau mana‘o o te tauturu mau â, a ore atu ai e paraparau i nia noa i te mau mea rii o te oraraa. E vaiiho atoa te matahiapo ia ’na ia paraparau, a faaroo maite atu ai. (Iak. 1:19) Ua parau te hoê tuahine e mea mahanahana roa ia horoa mai te matahiapo i te tari‘a faaroo.—Luka 8:18.

No te faaitoito mai e faaineine na mua te hoê matahiapo ia ’na

12. O vai i roto i te amuiraa te hinaaro i te faaitoitoraa e no te aha?

12 O vai te faufaahia i te mau tere faaitoitoraa a te mau matahiapo? Ua faaue Paulo i te mau matahiapo ia haapao i “te nǎnǎ atoa.” O te mau melo atoa ïa o te amuiraa, tae noa ’tu te feia poro e te mau pionie o te rave nei i ta ratou taviniraa ahia ’tura matahiti. E hiaai teie mau melo faaroo puai i te Atua i te faaitoitoraa. No te aha? No te mea i te tahi taime e toaruaru atoa ratou no te mau faateimaharaa a teie nei ao ino. E hinaaro atoa teie mau taeae e tuahine i te tauturu. A hi‘o na i te arii Davida. Aua‘e te tahi hoa i tauturu ia ’na i ora ’i oia.

UA TURUHIA OIA E ABISAI

13. (a) I teihea taime to Isebi-benoba mana‘oraa e taparahi ia Davida? (b) Mea nafea Abisai i te turu-oioi-raa ia Davida?

13 I muri iti a‘e i to Davida taurearea faatahinuraahia ei arii, ua aro oia ia Golia  ati Raphai. Ua pohe roa teie tiapai taata ia Davida tei ore i mǎta‘u. (Sam. 1, 17:4, 48-51; Par. 1, 20:5, 8) E rave rahi matahiti i muri a‘e, a aro ai Iseraela i te mau Philiseti, ua faaû Davida i te tahi atu tiapai taata ati Raphai. O Isebi-benoba to ’na i‘oa. (Sam. 2, 21:16) I taua râ taime ra, mai pohe Davida ia ’na. No te aha? E ere no to ’na mǎta‘u. Te parau ra te Bibilia: “Ua paruparu hoi Davida.” I to Isebi-benoba iteraa i te reira, ‘mana‘o atura oia e taparahi ia Davida.’ Ua turu oioi maira râ Abisai, te tamaiti a Zeruia, ia Davida e tairi pohe atura i taua Philiseti ra. (Sam. 2, 21:15-17) Ahani aita, ua pohe Davida. Eita e ore e ua mauruuru roa oia ia Abisai i te tiai-maite-raa e te turu-oioi-raa ia ’na i mua i te ati! Eaha ïa te haapiiraa e huti mai?

14. (a) Maoti te aha e mau papu ai tatou i mua i te mau tupuraa fifi roa? (b) Te aha nei te mau matahiapo e tia ’i ia ratou ia faaitoito mai ia tavini â i te Atua ma te oaoa? A horoa i te tahi hi‘oraa.

14 Te tavini noa ra to Iehova nunaa i te ao nei ia ’na noa ’tu te mau haafifiraa a Satani e te mau enemi. E fifi iti rahi to vetahi. Noa ’tu râ, te tiaturi roa nei tatou ia Iehova o te horoa mai i te puai ia mau papu tatou i mua i tera mau tupuraa fifi roa. Maoti hoi tera puai i pohe ai Golia ia Davida. I te tahi râ taime, eita paha e noaa faahou ia tatou ia faaoromai i te mau faateimaharaa a teie nei ao. E nehenehe ïa tatou e toaruaru no te mau fifi e maraa hoi ia tatou ia faaruru. I reira ïa te tauturu a te tahi matahiapo i te taime tano e faaitoito mai ai ia tamau i te tavini i te Atua ma te oaoa. Mea rahi o tatou tei fana‘o i te reira, oia atoa te hoê tuahine pionie e 60 tiahapa matahiti. Ua faatia oia e tau taime a‘enei, e rohirohi roa oia ia haere i roto i te pororaa. Ua ite te hoê matahiapo i te reira e ua farerei ia ’na ia aparau raua i nia i te hoê irava Bibilia. Ua faaohipa te tuahine i te mau mana‘o tauturu tei horoahia ’tu e ua ite oia i te maitai. Teie ta ’na i parau: “Tera te here mau i to tera matahiapo iteraa i to ’u paruparu e tautururaa mai!” Te tiai nei iho â te mau matahiapo ia tatou e ua ineine noa ratou, mai ia Abisai, i te tauturu mai. Mea mahanahana mau â!

UA ITE RATOU I TO PAULO HERE IA RATOU

15, 16. (a) No te aha te mau taeae e tuahine i here roa ’i ia Paulo? (b) No te aha mea here ai na tatou i ta tatou mau matahiapo hamani maitai?

15 E ere i te ohipa nainai ta te mau matahiapo. I te tahi taime, eita e topa te taoto no to ratou haapeapea a pure ai no to ratou mau taeae e tuahine aore ra a tauturu ai ia ratou. (Kor. 2, 11:27, 28) Te amo roa nei râ ratou, mai ia Paulo, i ta ratou mau hopoia ma te oaoa. Ua papai Paulo i to Korinetia e ‘ua tia roa ia ’na i te faahope i to ’na puai no ratou.’ (Kor. 2, 12:15) No to ’na hoi here i to ’na mau taeae i na reira ’i oia no te faaitoito atu. (A taio i te Korinetia 2, 2:4; Phil. 2:17; Tes. 1, 2:8) No reira te mau taeae i here roa ’i ia Paulo.—Ohi. 20:31-38.

16 Mea here atoa na tatou i ta tatou mau matahiapo hamani maitai e te haamauruuru nei tatou ia Iehova i te horoaraa mai ia ratou ei tiai ia tatou. Te tâu‘a nei ratou ia tatou, a rahi atu â ’i to tatou oaoa. Te faufaahia nei tatou i to ratou mau tere faaitoitoraa. E te mauruuru nei tatou i te mea e ua ineine noa ratou i te tauturu mai i te mau taime eita e noaa faahou ia tatou ia faaoromai i to tatou mau fifi. E hoa ohipa mau â teie mau matahiapo Kerisetiano no to tatou oaoa.

^ par. 5 Ua ui-atoa-hia tera noa mau taeae e tuahine, “Teihea huru maitai o te hoê matahiapo mea au a‘e na oe?” Ua parau te rahiraa e mea au na ratou te mau matahiapo e mea ohie ia paraparau atu. E faataa mai te hoê tumu parau a muri a‘e i te faufaaraa o teie huru maitai.

^ par. 10 Ohipa 20:28: “E teie nei, e ara ia outou iho, e te nǎnǎ atoa i faarirohia ’i outou e te Varua Maitai ei episekopo [aore ra tiaau] i nia ihora, ia faaamu hoi outou i te ekalesia o te Atua.”