Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2013

Ua horoa ratou ia ratou iho—i Norevetia

Ua horoa ratou ia ratou iho—i Norevetia

TAU matahiti i teie nei, e oraraa fana‘o to Roald raua Elsebeth i Bergen, te piti o te oire rahi roa ’‘e o Norevetia. Fatata to raua e 50 matahiti. I apiti tamau na raua e ta raua na tamarii, o Isabel raua Fabian, i te mau ohipa a te amuiraa. E matahiapo Roald, e pionie Elsebeth e e taata poro itoito Isabel raua Fabian.

I Tetepa 2009 râ, ua faaoti te utuafare e rave i te tahi mea taa ê: e poro no te hoê hebedoma i te hoê tuhaa fenua aita e amuiraa. Tere atura ïa Roald, Elsebeth e o Fabian, 18 matahiti i tera taime, i Nordkyn. E fenua tuati teie o te tuhaa fenua o Finnmark, i te pae apatoerau o Norevetia. I te oire iti o Kjøllefjord, ua poro ratou e te tahi atu mau taeae e tuahine tei haere atoa i ǒ no te poro. Te haamana‘o ra Roald: “A haamata ’i tera hebedoma, ua oaoa vau i te faanahoraa i ta ’u ohipa no te apiti i teie taviniraa taa ê no te hoê hebedoma taatoa.” I tera noa râ hebedoma, ua haapeapea ’tura Roald. Eaha tei tupu?

 TE HOÊ ANIRAA MANA‘O-ORE-HIA

Te faatia ra Roald: “Ma te mana‘o-ore-hia, ua ani mai Mario, te hoê pionie no Finnmark, e ua ineine anei matou i te haere i te hoê oire o Lakselv te i‘oa no te tauturu i te hoê amuiraa e 23 taata poro.” Ua maere roa Roald i tera aniraa mana‘o-ore-hia. Te faataa ra oia: “Ua feruri iho â mâua Elsebeth i te neheneheraa e haere e tavini i te vahi e hinaaro-rahi-hia te tauturu ia faarue te tamarii i te fare, eiaha râ i teie nei.” A poro ai râ tau mahana i tera tuhaa fenua aita e amuiraa, ua ite Roald e te hinaaro ra te taata e haapii no nia ia Iehova. Te hinaaro ra ratou i te tauturu i tera iho â taime. Te haamana‘o ra o ’na: “Ua haapeapea mau tera aniraa ia ’u e aita a‘era to ’u taoto i topa.” Afai atura Mario ia Roald e i to ’na utuafare i Lakselv, fatata e 240 kilometera i te pae apatoa o Kjøllefjord. Ua hinaaro Mario ia ite mata roa ’tu ratou i te amuiraa iti no ǒ.

I Lakselv, ua haamataitai atu o Andreas, hoê o na matahiapo e piti no ǒ, i te mataeinaa e te Piha a te Basileia. Ua farii te amuiraa ia ratou ma te mahanahana. Ua parau ratou ia Roald raua Elsebeth e e oaoa ratou ia haere to raua utuafare i ǒ no te tauturu ia ratou i roto i te ohipa a te Basileia. Ma te mata ataata, ua parau o Andreas e ua faanaho ê na oia i te hoê aparauraa no te hoê ohipa na Roald raua Fabian! E nafea teie utuafare?

EAHA TE FAAOTIRAA E RAVE?

Ua mana‘o na mua Fabian: “Aita vau e hinaaro ra e haere mai i ǒ nei.” E faarue i to ’na mau hoa rahi, hoê â hoi ratou i te paariraa i roto i te amuiraa e e haere e ora i roto i te hoê oire nainai. Aita o ’na i au i tera mana‘o. Aita atoa ta ’na tau haapiiraa no te riro ei taata tamaumau uira i oti. I te aniraahia râ te mana‘o o Isabel (21 matahiti i tera taime), ua parau o ’na: “Tera iho â ta ’u i hinaaro noa na e rave!” Te parau nei râ Isabel: “A feruri maite noa ’i au i te reira, ua matara mai iho â, ‘E mana‘o maitai mau anei? E mihi anei au i to ’u mau hoa? Ia faaea noa anei au i roto i ta ’u amuiraa, mea nahonaho maitai hoi?’” Eaha ta Elsebeth i mana‘o i tera aniraa? “No ’u, te tono ra Iehova i to matou utuafare,” ta ’na ïa e parau ra. “Ua mana‘o atoa râ vau i to matou fare, no faaapî-noa-hia ’tura hoi, e i te mau taihaa atoa i roto tei noaa ia matou i na 25 matahiti i mairi.”

Elsebeth raua Isabel

I te hoperaa te hebedoma taa ê, ua ho‘i Roald e to ’na utuafare i Bergen. Ua mana‘ona‘o noa ratou i to ratou mau taeae e tuahine i Lakselv, fatata e 2 100 kilometera i te atea. Te parau ra Elsebeth: “Ua pure noa vau ia Iehova, e ua hapono tamau vau i te hoho‘a i te mau hoa ta matou i farerei i ǒ a faatia ’tu ai i te mau ohipa i tupu. E ua na reira atoa mai ratou.” Te na ô ra Roald: “I titauhia maa taime no te farii i te mana‘o e reva. E mea tia atoa ia feruri au e e nehenehe anei ta matou e amo i ta matou mau haamâu‘araa. E nafea hoi matou? Ua pure noa vau ia Iehova e ua tauaparau e to ’u utuafare e te mau taeae feruriraa paari.” Te haamana‘o ra Fabian: “Hau atu â vau i te feruri i te reira, hau atu â vau i te taa e aita ta ’u e tumu maitai no te parau, aita. Ua pure noa vau ia Iehova e ua puai mǎrû noa ’tura to ’u hinaaro e reva.” E o Isabel? No te faaineine ia ’na mai te peu e e reva iho â, rave a‘era o ’na i te taviniraa pionie. I muri iho i na ono ava‘e taviniraa pionie, i reira o ’na i te faataaraa i te taime rahi no ta ’na iho haapiiraa Bibilia, ua ineine o ’na no tera tere.

TEI RAVEHIA IA RAEA TA RATOU FA

A hinaaro atu â ’i e tavini i te vahi e hinaaro-rahi-hia te taata poro, ua faaitoito te utuafare ia raea ta ratou fa. Noa ’tu e mea au roa na Roald ta ’na ohipa aufau-maitai-hia, ua ani o ’na ia faaea i te ohipa hoê matahiti i te maoro. Ua parau atu râ ta ’na paoti ia ohipa e piti noa hebedoma i nia e ono. Te parau ra Roald: “Noa ’tu e ua topa roa ta ’u moni ava‘e, te maitai noa ra matou.”

Te faatia ra Elsebeth: “Ua ani mai ta ’u tane ia imi i te hoê fare i Lakselv e ia horoa tarahu i to matou fare i Bergen. Ua titau te reira i te taime e te tutavaraa rahi, ua tia râ ia matou. Aita i maoro, ua ite mai te tamarii i te tahi ohipa afa mahana, e ua tauturu mai raua ia aufau i te mau haamâu‘araa no te maa e te faurao.”

Te na ô ra Isabel: “I te mea e haere matou i te hoê oire nainai, te fifi rahi roa ’‘e no ’u, o te iteraa mai ïa i te ohipa no te amo i ta ’u mau haamâu‘araa ei  pionie. I te tahi taime, e au ra e aita e ravea.” Ma te rave i te mau ohipa rii afa mahana, e iva i te matahiti matamua, ua tia ia Isabel ia amo i ta ’na mau haamâu‘araa. E o Fabian? “No te faaoti i ta ’u tau haapiiraa ei taata tamaumau uira, i titauhia na ia ohipa vau ei taata haapii i tera toroa. Ta ’u ïa i rave i Lakselv. I muri a‘e, ua noaa ia ’u ta ’u parau tuite e ua itea ia ’u te hoê ohipa afa mahana ei taata tamaumau uira.”

MEA NAFEA VETAHI Ê I TE TAVINI RAHI ATU Â?

Marelius raua Kesia e poro ra i te hoê vahine Sami i Norevetia

Ua hinaaro atoa Marelius raua Kesia e tavini i te vahi e hinaaro-rahi-hia te taata poro. Te na ô ra Marelius, e 29 matahiti to ’na i teie nei: “I te tairururaa, ua turai mai te mau oreroraa parau e uiuiraa mana‘o no nia i te taviniraa pionie ia feruri e nafea ia tavini rahi atu â.” No Kesia râ, e 26 matahiti to ’na i teie nei, e tautooraa te mana‘o e faarue i to ’na utuafare fetii. Te parau ra o ’na: “Ua mǎta‘u vau i te mana‘o e faarue i te feia ta ’u e here ra.” Hau atu â, e ohipa taime taatoa ta Marelius no te aufau i te tarahu o to raua fare. Te na ô ra o ’na: “Maoti te tauturu a Iehova e te pure e rave rahi no te ani i ta ’na tauturu no te rave i te mau tauiraa, ua tia ia mâua ia haere.” Ua faataa na mua raua i te taime rahi a‘e no te haapiiraa Bibilia, ua hoo i to raua fare, ua faarue i ta raua ohipa e ua haere i te oire no Alta, i te pae apatoerau o Norevetia, i Atete 2011. I ǒ, no te amo i ta raua mau haamâu‘araa ei pionie, ua ohipa Marelius ei taata haapao faufaa e o Kesia i roto i te hoê fare toa rahi.

Ua putapû Knut raua Lisbeth, e 30 tiahapa matahiti to raua i teie nei, i te mau aamu o te Annuaire no nia i te feia e tavini ra i te vahi e hinaaro-rahi-hia te taata poro i te Basileia. Te parau ra Lisbeth: “Ua haaferuri mai tera mau faatiaraa ia mâua no nia i te haereraa e tavini i te hoê fenua ê. Ua taiâ râ vau, eita e tae i te hoê taata mai ia ’u ia na reira.” Ua faaitoito noa râ raua ia raea ta raua fa. Te na ô ra Knut: “Hoo atura mâua i to mâua fare tahua e no te haaputu i te moni, haere a‘era mâua e ora i to ’u mama ra. I muri a‘e, no te tamata i te taviniraa i te hoê tuhaa fenua ê, ua haere mâua i roto i te hoê amuiraa reo Beretane i Bergen hoê matahiti i te maoro, e ua ora mâua i to Lisbeth ra mama.” Aita i maoro, ua taa ia Knut raua Lisbeth e ua ineine raua no te reva i: Ouganda. E ho‘i raua i Norevetia e piti ava‘e i te matahiti hoê no te ohipa. E moni ïa ta raua no te ora e no te poro i te taime taatoa i Ouganda no te toea o te matahiti.

“A TAMATA NA IA ITE I TE MAITAI O IEHOVA!”

“Ua piri roa to matou mau taairaa.”—Roald

Eaha tei tupu no teie mau rave ohipa itoito? Te parau ra Roald: “E taime rahi a‘e ta matou e faataa i ǒ nei ei utuafare ia faaauhia i Bergen. Ua piri roa to matou mau taairaa. E haamaitairaa mau â ia ite i ta mâua mau tamarii ia haere i mua i te pae varua.” Ua na ô â oia: “Aita matou e tapitapi faahou ra i te mau mea materia. E ere te reira i te mea faufaa roa mai ta matou i mana‘o na.”

 Ua ite Elsebeth i te faufaaraa ia haapii i te tahi atu reo. No te aha? I roto i te tuhaa fenua o te amuiraa no Lakselv, e taio-atoa-hia te oire iti no Karasjok, te oire pu o te mau Samis—te feia tumu o te mau tuhaa fenua i te pae apatoerau o Norevetia, Tuete, Filelane e Rusia. Ia putapû te aau o te taata e ora ra i ǒ, ua haapii Elsebeth i te reo Sami. I teie nei, e nehenehe ta ’na e tauaparau rii i roto i tera reo. Te au ra anei oia i ta ’na tuhaa fenua apî? Te na ô ra oia ma te oaoa: “E ono haapiiraa Bibilia ta ’u. Ua oaoa roa vau i te tavini i ǒ nei!”

E pionie e e tavini tauturu o Fabian i teie nei. Te faatia ra o ’na e ua tauturu raua Isabel e toru taurearea o ta ratou amuiraa apî o te hinaaro i te faaitoitoraa no te apiti atu â i te mau ohipa a te amuiraa. Mea itoito ratou tootoru i teie nei i roto i te taviniraa. E piti o ratou tei bapetizo e tei rave i te taviniraa pionie tauturu i Mati 2012. Ua haamauruuru hoê o te feia apî tei haamata i te paruparu i te pae varua ia Fabian raua Isabel no te tautururaa ia ’na ia tapea maite i roto i te parau mau. Te na ô ra Fabian: “Ua putapû roa vau i ta ’na i parau mai. Auê hoi te oaoa ia tauturu i te hoê taata!” Te tapao ra Isabel: “I roto i teie taviniraa, ‘ua tamata iho â vau e ua ite au i te maitai o Iehova.’” (Sal. 34:8) Te na ô faahou ra oia: “Tavini i ô nei, hope te au!”

E oraraa ohie to Marelius raua Kesia i teie nei, e oraraa fana‘o râ. E 41 taata poro i teie nei ta te amuiraa no Alta, i reira hoi raua i te haereraa. Te parau ra Marelius: “A hi‘o ai i muri, mea faaitoito mau ia ite e ua taui roa to mâua oraraa. Te haamauruuru nei mâua ia Iehova i tia ’i ia mâua ia tavini i ǒ nei ei pionie. Aita e mea hoona ’tu â.” Te na ô ra Kesia: “Ua haapii au ia tiaturi atu â ia Iehova, e ua haapao mai iho â oia. Ua tauturu atoa mai te ora-atea-raa i to ’u utuafare fetii ia haafaufaa roa ’tu â i te mau taime e amui ai matou. Aita roa ’tu vau i tatarahapa i ta mâua faaotiraa.”

Knut raua Lisbeth e haapii ra i te hoê utuafare i Ouganda

Mea maitai anei o Knut raua Lisbeth i Ouganda? Te faatia ra Knut: “Aita mâua i matau oioi i te huru oraraa e te ta‘ere apî. Te pape, te uira, te mauiui opu—tera to mâua mau fifi i te tahi mau taime. Teie râ, e noaa noa mai ta mâua haapiiraa Bibilia!” Te na ô ra Lisbeth: “Afa hora noa i to mâua vahi faaearaa, te vai ra te mau tuhaa fenua aitâ te parau apî maitai i porohia ’tura. A haere ai râ i ǒ, e itehia te mau taata e taio ra i te Bibilia e o te ani mai ia haapii ia ratou. Aita e nehenehe e faaau i te oaoa ia haapii i teie mau taata haehaa te poroi Bibilia!”

Auê to tatou Aratai, te Mesia ra o Iesu, i te oaoa i te ite e te ravehia ra te ohipa pororaa ta ’na i haamata i roto i te mau tuhaa fenua rahi atu â! Oia mau, te oaoa rahi nei te mau tavini atoa a te Atua i te horoa ia ratou iho no te haapao i ta Iesu faaueraa “e faariro i te mau fenua atoa ei pǐpǐ.”—Mat. 28:19, 20.

No te ite atu â

O vai te rave nei i to Iehova hinaaro i teie mahana?

Eaha te haapiiraa faataahia no te mau pionie?

Eaha te haapiiraa taa ê tei faataahia no te feia e poro nei i te Basileia ma te taime taatoa?