Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2013

A faaitoito tei pihaiiho Iehova ia oe!

A faaitoito tei pihaiiho Iehova ia oe!

‘E faaetaeta, e ia itoito roa; tei pihai iho to Atua o Iehova ia oe.’—IOS. 1:9.

1, 2. (a) Teihea na huru maitatai te tauturu mai ia faaoromai i te mau fifi? (b) Eaha te faaroo? A faataa.

TE OAOA nei tatou i te tavini ia Iehova. Noa ’tu râ, te fifi nei tatou mai ia vetahi ê e te mauiui atoa nei paha no te parau-tia. (Pet. 1, 3:14; 5:8, 9; Kor. 1, 10:13) Mea faufaa roa te faaroo e te itoito no te faaoromai i te reira.

2 Eaha te faaroo? Ua papai Paulo: “E teie nei, o te faaroo nei, o te tiaturi ïa i te mau mea e tiaihia nei, e te ite i te mau mea aore e hi‘ohia nei.” (Heb. 11:1) E nehenehe te faaroo e faaauhia i te hoê parau faturaa. Maoti te hoê parau faturaa e papu ai ia tatou e na tatou te hoê tâpû fenua. E au te faaroo aore ra te tiaturi-papu-raa e e faatupu iho â te Atua i ta ’na i fafau i te hoê parau faturaa faufaa roa. Maoti to tatou faaroo e papu ai ia tatou e e tupu ta te Atua i fafau e e parau mau ta ’na e faaite maira i roto i ta ’na Parau, tae noa ’tu te mau mea aore e itehia nei.

3, 4. (a) Eaha te itoito? (b) Eaha te tahi ravea no te haapuai i to tatou faaroo e no te itoito atu â?

3 Te itoito, o te puai ïa o te turai ia parau e ia ohipa ma te mǎta‘u ore i roto i te mau tupuraa fifi e te atâta. Mea itoito tatou, aita ana‘e tatou e taiâ e ua ineine ana‘e tatou i te mauiui no ta tatou e tiaturi ra.—Mar. 6:49, 50; Tim. 2, 1:7.

4 E huru maitatai au mau te faaroo e te itoito. Te hinaaro ra anei tatou i te faaroo e te itoito rahi a‘e? I roto i te Bibilia, e tausani taata tei faaite i tera na huru maitatai. Te tahi ravea no te haapuai i to tatou faaroo e no te itoito atu â, o te hi‘opoaraa ïa i te tahi o teie mau hi‘oraa.

 TEI PIHAIIHO IEHOVA IA IOSUA

5. Ia aha Iosua no te riro ei aratai maitai?

5 E ho‘i ana‘e fatata e 3 500 matahiti i muri. E 40 matahiti tei mairi mai to Iehova faaoraraa e mirioni Iseraela i te faatîtîraa i Aiphiti. O te peropheta Mose to ratou aratai. I te 120raa o to ’na matahiti, ua ite atea Mose i te Fenua tǎpǔhia e ua pohe a‘era i nia i te mou‘a ra o Nebo. O Iosua tei mono ia ’na, e taata tei î i te paari no ǒ mai i te Atua ra. (Deut. 34:1-9) Fatata te mau Iseraela i te haru ia Kanaana. No te riro ei aratai maitai, e mea tia ia faaite Iosua i te paari no ǒ mai i te Atua ra, te faaroo, te itoito e te tiaturi.—Deut. 31:22, 23.

6. (a) Ia au i te Iosua 23:6, e titauhia te itoito no te rave i te aha? (b) Eaha te haapii mai i te Ohipa 4:18-20 e te Ohipa 5:29?

6 Mea papu e ua haapuai te paari, te itoito e te faaroo o Iosua i te mau Iseraela i te roaraa o te mau matahiti aroraa no te haru ia Kanaana. Ua titauhia ia itoito ratou i roto i te aroraa, oia atoa râ no te auraro i te Atua. Teie te mau parau hopea a Iosua hou a pohe ai: “E faaitoito outou i te haapao e te rave i te mau mea atoa i papaihia i roto i te ture a Mose ra, eiaha outou e ohipa ê i te pae atau e te pae aui.” (Ios. 23:6) E hinaaro atoa tatou i te itoito no te auraro noa ia Iehova. Ia ani atoa mai te taata ia rave i te tahi mea o te ore e au i to te Atua hinaaro. (A taio i te Ohipa 4:18-20; 5:29.) Ia pure e ia turui tatou i nia ia Iehova, e tauturu mai oia ia itoito.

E NAFEA TATOU E MANUÏA ’I?

7. Ia aha Iosua no te haa ma te itoito a manuïa ’tu ai?

7 Ia noaa ia tatou te itoito no te rave i to te Atua hinaaro, e mea tia ia haapii i ta ’na Parau a faaohipa atu ai. Tera ïa tei parauhia ia Iosua ia rave a mono ai o ’na ia Mose: “Ia etaeta [oe], e ia rahi roa te itoito, ia haapao hua oe i te ture atoa a tau tavini a Mose i faaue ia oe ra. . . . Eiaha te buka ture na ia taa ê atu i roto i to vaha, ia haamana‘o maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ’i.” (Ios. 1:7, 8) Ua pee Iosua i tera a‘oraa e ‘ua manuïa roa oia.’ Ia na reira atoa tatou, e itoito atu â tatou a manuïa ’tu ai i roto i te taviniraa a te Atua.

Ta tatou irava matahiti 2013: ‘E faaetaeta, e ia itoito roa; tei pihai iho to Atua o Iehova ia oe.’—Iosua 1:9

8. No roto mai te irava matahiti 2013 i teihea irava? E nafea tera mau parau e tauturu ai ia oe?

8 Ua itoito-mau-hia Iosua i te faarooraa i ta Iehova i parau â: “E faaetaeta, e ia itoito roa; eiaha e mǎta‘u, eiaha hoi e amiami; tei pihai-atoa-iho hoi to Atua o Iehova ia oe i to mau haerea atoa.” (Ios. 1:9) Tei pihaiiho atoa Iehova ia tatou. Eiaha ïa tatou ‘e mǎta‘u e e amiami.’ Mea faahiahia mau teie mau parau i roto i te Iosua 1:9: ‘E faaetaeta, e ia itoito roa; tei pihai iho to Atua o Iehova ia oe.’ Tera te irava matahiti 2013. I te mau ava‘e i mua, e haapuai mai iho â te reira ia tatou, oia atoa te mau parau e haaraa a te tahi atu mau tavini tei faaite i te faaroo e te itoito.

 MA TE ITOITO, UA MAITI RATOU E TAVINI I TE ATUA

9. Mea nafea Rahaba i te faaiteraa i to ’na faaroo e itoito?

9 I to Iosua tonoraa e piti manu i Kanaana, ua huna te vahine faaturi ra o Rahaba ia raua e ua aratai atura i to raua mau enemi i nia i te e‘a ê. No to ’na faaroo e itoito, ua faaorahia oia e to ’na utuafare i to te mau Iseraela haamouraa ia Ieriko. (Heb. 11:30, 31; Iak. 2:25) Ua faarue iho â ïa Rahaba i to ’na huru oraraa viivii ia auhia mai oia e Iehova. Ua faaite vetahi o tei riro mai ei Kerisetiano i te faaroo, te itoito e te puai morare no te rave i te hoê â mau tauiraa ia auhia mai ratou e Iehova.

10. Mea nafea Ruta i te tururaa i te haamoriraa mau? Mea nafea oia i te haamaitairaahia?

10 I muri a‘e i to Iosua poheraa, ua turu te vahine Moabi ra o Ruta i te haamoriraa mau ma te itoito. Ei vahine ivi a te hoê Iseraela, ua ite rii paha o ’na o vai ra o Iehova. I ora na to ’na metua vahine hoovai o Naomi i Moabi a faaoti ai o ’na e ho‘i i Betelehema, i Iseraela. A haere noa ’i, parau atura Naomi ia Ruta ia ho‘i i to ’na ra nunaa. Pahono a‘era râ ta ’na hunoa vahine: “Eiaha oe e parau onoono mai ia ’u e faarue ia oe, e ia ho‘i au i to ’u nei peeraa ’tu ia oe . . . ; to oe ra nunaa, o to ’u atoa ïa nunaa; e to oe ra Atua, o to ’u atoa ïa Atua.” (Ruta 1:16) O ta Ruta iho â i rave. I muri a‘e, ua faaipoipo Ruta ia Boaza, te hoê fetii a Naomi. Ua fanau mai oia i te hoê tamaroa e ua riro mai ei tupuna no Davida e no Iesu. Oia mau, e haamaitai Iehova i te feia e faaite ra i te faaroo e te itoito.—Ruta 2:12; 4:17-22; Mat. 1:1-6.

MEA RAHI TEI FAAÛ I TE POHE!

11. Mea nafea Iehoiada raua Iehoseba i te faaiteraa i te itoito? Eaha te faahopearaa?

11 E puaihia to tatou faaroo e e itoito atu â tatou a ite ai e tei pihaiiho te Atua i te feia o te haapao na mua i to ’na hinaaro e i te maitai o to ratou mau hoa Kerisetiano. A hi‘o na i te tahu‘a rahi ra o Iehoiada raua ta ’na vahine o Iehoseba. I te poheraa te arii Ahazia, ua haapohe to ’na metua vahine ra o Atalia i te huaai hui arii, eiaha râ ia Ioasa, e ua haru i te terono. Noa ’tu e mea atâta, ua faaora Iehoiada raua Iehoseba ia Ioasa, te tamaiti a Ahazia, ma te huna ia ’na e ono matahiti i te maoro. I te hituraa o te matahiti, faaarii a‘era Iehoiada ia Ioasa e faaue atura ia haapohe ia Atalia. (Arii 2, 11:1-16) I muri a‘e, ua turu Iehoiada i te arii Ioasa no te tataî i te hiero. E i te poheraa Iehoiada i te 130raa o to ’na matahiti, hunahia ’tura oia i rotopu i te mau arii “no te mea, e ohipa maitai ta ’na i rave ia Iseraela, i te Atua, e to ’na ra fare.” (Par. 2, 24:15, 16) No ta Iehoiada raua ta ’na vahine i rave ma te itoito, ua paruruhia te opu fetii hui arii mai Davida e tae atu i te Mesia.

12. Mea nafea Ebeda-meleka i te faaiteraa i te itoito?

12 E tavini Ebeda-meleka i roto i te fare o te arii Zedekia. Ua faaû o ’na i te pohe no Ieremia. Ua tuu te arii ia Ieremia i te mau hui arii no Iuda o tei pari haavare ia ’na e orure hau. Huri a‘era ratou ia ’na i roto i te hoê apoo vari ia pohe o ’na. (Ier. 38:4-6) Noa ’tu e mea atâta, mea riri hoi na te taata e rave rahi ia Ieremia, ua ani Ebeda-meleka ia Zedekia ia tauturu i te peropheta. Ua farii te arii e ua parau ia ’na ia rave e 30 taata no te faaora mai ia Ieremia. Na roto i te peropheta, ua haapapu te Atua ia Ebeda-meleka e eita o ’na e pohe ia haruhia Ierusalema e to Babulonia. (Ier. 39:15-18) E haamaitai te Atua i te feia e faaite i te itoito no te rave i to ’na hinaaro.

13. Mea nafea na Hebera e toru i te faaiteraa i te itoito? Eaha te haapii mai i to ratou hi‘oraa?

 13 Fatata e 600 matahiti hou te Mesia, ua haamaitai Iehova e toru o ta ’na mau tavini Hebera no to ratou faaroo e itoito. Ua haaputuputu te arii Nebukanesa i te feia toroa o Babulonia e ua faaue atu ia haamori i te tii auro rahi. E haapohehia te taata atoa o te ore e na reira i roto i te hoê umu auahi. Ma te faatura, ua parau na Hebera e toru ia Nebukanesa: “E tia . . . i to matou Atua e haamori nei ia faaora oia ia matou i te umu auahi ura ra, e tia ïa ia ’na ia faaora ia matou i to rima, e te arii; ia ore râ oia ia hinaaro, e ore â matou e haamori i to oe ra mau atua, ia ite mai oe, e te arii, e ore hoi e haamori i te tii auro i faatiahia e oe.” (Dan. 3:16-18) Mea oraora te faatiaraa o te Daniela 3:19-30 no nia i te faaoraraa o na Hebera e toru. Noa ’tu e eita paha tatou e haamǎta‘uhia mai tera, e tamatahia to tatou faaroo. Ia papu ia tatou e e haamaitai mai te Atua ia faaite tatou i te faaroo e te itoito.

14. Ia au i te Daniela pene 6, mea nafea Daniela i te faaiteraa i te itoito e ma teihea faahopearaa?

14 Ua faaite Daniela i te faaroo e te itoito a turai ai to ’na mau enemi i te arii Dariu ia haamau i te hoê ture ma te parau atu: “E te taata ia ani i tana aniraa i te taata nei, e te Atua atoa hoi, maori râ ia oe ra, e te arii, e aita i hope na mahana e toru ahuru, e hurihia ïa i roto i te apoo o te mau liona.” I to Daniela iho â faarooraa e ua tarimahia tera parau, “haere noa ’tura [oia] i roto i to ’na fare; e te hamǎmǎ noa ra te mau haamaramarama o to ’na piha i te pae au i fariu tia i Ierusalema, ua tuu ihora oia i tana turi i raro e a toru tuuraa i te mahana hoê, e ua pure ihora e ua haamaitai i tana Atua, mai ta ’na hoi i na reira i mutaa ihora.” (Dan. 6:6-10) Ua hurihia Daniela i roto i te apoo o te mau liona—ua faaora râ Iehova ia ’na.—Dan. 6:16-23.

15. (a) Mea nafea to Akuila e Perisila faaiteraa i te faaroo e te itoito? (b) Eaha te auraa o te mau parau a Iesu i roto i te Ioane 13:34? Mea nafea te Kerisetiano e rave rahi i te faaiteraa i tera huru aroha?

15 Ia au i te Bibilia, ua faaû Akuila e Perisila i te pohe no Paulo. (Ohi. 18:2; Roma 16:3, 4) Ua faaite raua i te itoito ia au i te mau parau a Iesu: “E tuu atu vau i te parau apî na outou, E aroha outou ia outou iho, mai ia ’u e aroha ’tu ia outou na, e aroha atoa hoi outou ia outou iho.” (Ioa. 13:34) Ua titau te Ture a Mose i te hoê taata ia aroha i to ’na taata tupu mai ia ’na iho. (Lev. 19:18) Mea “apî” râ te faaueraa a Iesu. Te faataa ra hoi oia i te aroha e tae roa ’i ia tatou ia horoa i to tatou ora no vetahi ê, mai ta ’na i rave. Ma te itoito, ua faaite e rave rahi Kerisetiano i te aroha  ma te faaû i te pohe no te paruru i to ratou mau taeae ia ore ratou ia hamani-ino-hia aore ra ia haapohehia e te mau enemi.—A taio i te Ioane 1, 3:16.

Aita te mau Kerisetiano matamua i fati

16, 17. Mea nafea te faaroo o te mau Kerisetiano matamua i te tamataraahia? Mea nafea te faaroo o vetahi mau Kerisetiano o teie tau i te tamata-atoa-raahia?

16 Mai ia Iesu, ua haamori te mau Kerisetiano itoito matamua ia Iehova ana‘e. (Mat. 4:8-10) Ua patoi ratou i te tutui i te mea no‘ano‘a no te emepera Roma. (A hi‘o i te hoho‘a.) Ua papai Daniel Mannix i roto i ta ’na buka e i tuu-pinepine-hia na te hoê fata e te auahi ama i nia i te mahora o te tahua. Ua parauhia i te taata atoa i tapeahia ia ueue i te tahi noa tao‘a no‘ano‘a i nia i te fata. I reira e horoahia ’tu ai te hoê parau haapapuraa e ua rave ratou i te tusia a tiamâ ’tu ai. Ua faataahia ’tu e aita ratou e haamori ra i te emepera, te farii noa ra râ ratou e e atua te emepera Roma. Noa ’tu râ, mea iti roa te Kerisetiano tei farii i tera pûpûraa e ora ’i ratou.—Those About to Die.

17 Ua faaite-noa-hia i te mau Kerisetiano tei tapeahia i roto i te mau aua haavîraa Nazis e e nehenehe ta ratou e tiamâ mai e e ore e pohe. I titau-noa-hia ia tuurima ratou i te hoê parau e faaite ra e aita ratou e haamori faahou ra ia Iehova. Mea iti râ tei na reira. I te taparahiraa taata i Rwanda, ua faaû te mau Ite no Iehova Tutsi e Hutu i te pohe no te paruru i te tahi e te tahi. E titauhia te itoito e te faaroo no te faaû i tera mau ati.

A HAAMANA‘O, TEI PIHAIIHO IEHOVA IA TATOU!

18, 19. O teihea mau hi‘oraa Bibilia o te faaroo e te itoito te nehenehe e tauturu mai ia poro?

18 Te fana‘o nei tatou i te haamaitairaa taa ê e apiti i te ohipa rahi roa ’‘e ta te Atua i ore i horoa a‘enei i ta ’na mau tavini i te fenua: e faaite haere i te poroi o te Basileia e e faariro i te taata ei pǐpǐ. (Mat. 24:14; 28:19, 20) Te mauruuru mau nei tatou no te hi‘oraa tia roa o Iesu! Ua haere “oia na roto i te mau oire e te mau oire rii atoa, i te poro haerea i te parau maitai ra i te basileia o te Atua.” (Luka 8:1) Mai ia ’na, e hinaaro tatou i te faaroo e te itoito no te poro i te poroi o te Basileia. Maoti te tauturu a te Atua, e nehenehe tatou e riro mai ia Noa. E taata itoito o ’na o tei “a‘o i te parau-tia” i roto i te hoê “ao paieti ore” i haamouhia i roto i te diluvi rahi.—Pet. 2, 2:4, 5.

19 E tauturu mai te pure ia poro. A hamani-ino-hia ’i vetahi mau pǐpǐ a te Mesia, ua pure ratou no te ‘parau i te parau a te Atua ma te mǎta‘u ore.’ Ua pahonohia ta ratou aniraa. (A taio i te Ohipa 4:29-31.) Mai te peu e te mǎta‘u nei oe ia poro i tera i tera fare, a pure ia Iehova no te ani i te faaroo e te itoito rahi a‘e. E pahono mai oia.—A taio i te Salamo 66:19, 20. *

20. Eaha te tauturu ta tatou e fana‘o nei ei tavini a Iehova?

20 I roto i teie nei ao arepurepu e te ino, e ere i te mea ohie ia tapea i te hoê haerea ta te Atua e au. E tauturu râ ta tatou. Tei pihaiiho te Atua e ta ’na Tamaiti, te Upoo o te amuiraa, ia tatou. E hoa Ite no Iehova atoa to tatou na te ao o tei hau atu i te 7 000 000. E faatupu ana‘e i te faaroo e e poro ana‘e i te parau apî maitai e o ratou ma te haamana‘o i ta tatou irava matahiti 2013: ‘E faaetaeta, e ia itoito roa; tei pihai iho to Atua o Iehova ia oe.’—Ios. 1:9.

^ par. 19 E ite oe i te mau hi‘oraa hau o te itoito i roto i te tumu parau “Ia etaeta oe, e ia rahi roa te itoito” o Te Pare Tiairaa o te 1 no Fepuare 2012.