Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2013

Eiaha te tahi noa ’‘e mea ia faaatea ê ia oe ia Iehova

Eiaha te tahi noa ’‘e mea ia faaatea ê ia oe ia Iehova

“E faataa na outou i teie nei mahana i ta outou e haamori.”—IOS. 24:15.

1-3. (a) No te aha e hi‘oraa maitai ai Iosua no tatou? (b) Ia haamana‘o tatou i te aha a rave ai i te mau faaotiraa?

MEA faufaa roa te mau maitiraa ta tatou e rave. E nehenehe hoi tatou e maiti e nafea ia faaohipa i to tatou oraraa. A feruri na e te haere noa ra te hoê taata na nia i te hoê e‘a. Tei mua ’tura o ’na e piti purumu. Teihea e‘a ta ’na e maiti? Ia haamana‘o oia ihea o ’na e haere ai, e rave o ’na i te e‘a e piri atu â ’i o ’na i ta ’na fa, eiaha râ i te e‘a o te faaatea ê ia ’na.

2 Mea rahi te hi‘oraa Bibilia o te taata tei ite i te hoê â huru tupuraa. O Kaina te tahi. E mea tia ia faaoti o ’na e faaite i to ’na riri aore ra e haavî i te reira. (Gen. 4:6, 7) E titauhia ia maiti Iosua e haamori i te Atua mau aore ra i te mau atua hape. (Ios. 24:15) O te vai-piri-raa ia Iehova ta Iosua fa. Ua maiti ïa o ’na i te hoê e‘a o te tauturu ia ’na ia na reira. E ere te reira te fa a Kaina e ua maiti a‘era i te e‘a o tei faaatea ê ia ’na ia Iehova.

3 I te tahi taime, e mea tia ia rave atoa tatou i te faaotiraa faufaa no te faaea i nia i te e‘a tia. A haamana‘o ïa i ta oe fa: e faahanahana ia Iehova i roto i te mau mea atoa ta oe e rave e e ape i te mau mea atoa o te faaatea ê ia oe ia ’na. (A taio i te Hebera 3:12.) E hi‘opoa mai tatou i roto i teie tumu parau e i to muri iho e hitu tuhaa o te oraraa e ore ai tatou e vaiiho i te tahi noa ’‘e mea ia faaatea ê ia tatou ia Iehova.

TE OHIPA E TE TOROA

4. No te aha mea faufaa ’i ia rave i te ohipa?

4 Ia ohipa te mau Kerisetiano no te aupuru ia ratou e i to ratou utuafare e tia ’i. Ia au i te Bibilia, e  rahi a‘e te ino o te taata o te ore e hinaaro e na reira i to te taata faaroo ore aore ra o tei faarue ia Iehova. (Tes. 2, 3:10; Tim. 1, 5:8) Mea faufaa te ohipa. E nehenehe râ te reira e faaatea ê ia oe ia Iehova ia ore oe e vai ara. E nafea?

5. Ia feruri tatou i te aha hou a farii ai i te hoê ohipa?

5 A feruri na e te imi nei oe i te hoê ohipa. Mai te peu e mea fifi ia ite mai i te tahi i to oe fenua, e hinaaro paha oe e farii i te mau ohipa atoa e pûpûhia ’tu. Ia aha râ aita ana‘e te ohipa e tu ra i te mau faaueraa tumu Bibilia? Ia aha mai te peu e e haafifi te reira i ta oe taviniraa Kerisetiano aore ra e faaatea ê ia oe i to utuafare? Ia farii anei oe i tera ohipa ma te mana‘o e mea maitai a‘e ia rave i te ohipa i te faaea-noa-raa? A haamana‘o, ia maiti oe i te e‘a ino, e faaatea ê te reira ia oe ia Iehova. (Heb. 2:1) E nafea ia rave i te mau faaotiraa paari ia imi oe i te hoê ohipa aore ra ia feruri oe e taui i te ohipa?

6, 7. (a) Eaha na fa e piti e farii ai paha te hoê taata i te hoê ohipa? (b) E piri atu â oe ia Iehova maoti teihea fa, e no te aha?

6 Mai tei faahitihia na, a haamana‘o i ta oe fa. A uiui, ‘No te aha vau e hinaaro ai i te hoê ohipa aore ra toroa?’ Mai te peu e no te noaa mai i te tahi imiraa e tamau ai oe e to utuafare i te tavini ia Iehova, e haamaitai o ’Na i ta oe mau tutavaraa. (Mat. 6:33) Ia ere oe i ta oe ohipa aore ra ia fifi oe i te pae moni, ua ite Iehova e nafea ia tauturu ia oe. (Isa. 59:1) “Ua ite [oia] i te faaora i te feia paieti i roto i te ati.”—Pet. 2, 2:9.

7 E mai te peu e o te noaaraa i te moni rahi ta oe fa? E manuïa paha oe. A haamana‘o râ e mea atâta tera “manuïaraa.” (A taio i te Timoteo 1, 6:9, 10.) Mai te peu e mea faufaa a‘e no oe te moni e te toroa, e faaatea ê oe ia oe ia Iehova.

8, 9. Eaha ta te mau metua e uiui no nia i ta ratou ohipa aore ra to ratou toroa? A faataa.

8 Mai te peu e e metua oe, a feruri i te hi‘oraa ta oe e horoa ra i ta oe mau tamarii. I to ratou mana‘o, eaha te mea faufaa a‘e no oe? To oe toroa anei aore ra to oe auhoaraa e o Iehova? Ia ite ratou e o te tiaraa e te moni te mea faufaa a‘e no oe, e rave atoa anei ratou i te hoê â maitiraa peapea mau a paari mai ai? E faaea anei ratou i te faatura ia oe ei metua? Te na ô ra te hoê Kerisetiano apî: “Te haamana‘o ra vau e ua haapeapea noa to ’u papa no ta ’na ohipa. E au ra e ua faaitoito noa o ’na i roto i ta ’na ohipa ia ite matou i te hoê oraraa fana‘o e no te aupuru ia matou. Ua taui râ i teie mau matahiti hopea nei. E ohipa e e ohipa noa o ’na a hoo mai ai i te mau mea moni o tei ore i hinaaro-mau-hia. Ua matauhia ’tura matou ei utuafare moni mau, eiaha râ ei utuafare o te faaitoito ia vetahi ê ia tavini ia Iehova. Te hinaaro nei au ia turu rahi a‘e mai to ’u papa ia matou i te pae varua i te pae moni.”

9 E te mau metua, eiaha e faaatea ê ia outou ia Iehova ma te haafaufaa rahi roa i to outou toroa. Ma to outou hi‘oraa, a faaite i ta outou mau tamarii e mea faufaa a‘e iho â no outou te taairaa maitai e o Iehova i te mau mea materia.—Luka 11:28.

10. Eaha ta te hoê taata apî e haapao a feruri ai i te hoê toroa?

10 Mai te peu e e taata apî oe e feruri ra i te hoê toroa, e nafea ia maiti i te e‘a tia? Mai tei faahitihia na, mea faufaa ia ite oe i ta oe fa. E tauturu anei te toroa ta oe e haapii ra ia tapi roa ’tu â i te mau ohipa taaihia i te Basileia aore  ra e faaatea ê te reira ia oe ia Iehova? (Tim. 2, 4:10) Eaha ta oe fa? O te peeraa anei i te huru oraraa o te taata o te oaoa ia au i te faito o ta ratou pute moni? O te tiaturiraa anei ia Iehova mai ia Davida? Ua papai o ’na: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ’na ra huaai i te aniraa i te maa.” (Sal. 37:25) A haamana‘o, e faaatea ê te hoê e‘a ia oe ia Iehova area te tahi atu, e aratai ïa ia oe i te oraraa maitai roa ’‘e. (A taio i te Maseli 10:22; Malaki 3:10.) Teihea e‘a ta oe e maiti? *

TE FAAANAANATAERAA

11. Eaha ta te Bibilia e haapii maira no nia i te faaanaanataeraa? Ia haamana‘o tatou i te aha?

11 Aita te Bibilia e parau ra eiaha e arearea aore ra mea mâu‘a te taime. Ua papai Paulo ia Timoteo e ‘e faufaa iti haihai to te haamataroraa i ta te tino nei.’ (Tim. 1, 4:8) Te na ô atoa ra te Bibilia e “e taime to te ata” e “e taime to te ori” e te faaitoito maira ia haamâha i te rohirohi. (Koh. 3:4; 4:6) E nehenehe râ te faaanaanataeraa e faaatea ê ia oe ia Iehova ia ore oe e vai ara. E nafea? Tei te huru faaanaanataeraa ïa ta tatou e maiti e te rahiraa taime ta tatou e faataa ’tu.

E tamǎrû mai te faaanaanataeraa mea maitai ana‘e te reira e ia faataa tatou i te taime au

12. Eaha te hi‘opoa a maiti ai i te hoê faaanaanataeraa?

12 A hi‘opoa na mua i te huru faaanaanataeraa. E ite iho â oe i te mau faaanaanataeraa maitai. Mea rahi râ o te haafaufaa ra i te mau mea ta te Atua e riri ra, mai te haavîraa u‘ana, te peu tahutahu e te taatiraa morare ore. A hi‘opoa maitai ïa i te huru faaanaanataeraa ta oe e maiti. E faataui anei te reira ia oe? E turai anei te reira ia oe ia riro ei taata haavî u‘ana aore ra here ai‘a aore ra o te au ra i te tata‘uraa? (Mas. 3:31) E pau rahi anei ta oe moni? E turori anei vetahi ê? (Roma 14:21) E amuimui oe ia vai ma? (Mas. 13:20) E turai anei te reira ia oe  ia rave i te mau mea ino?—Iak. 1:14, 15.

13, 14. No te aha ia feruri ai i te rahiraa taime ta oe e faataa no te mau faaanaanataeraa?

13 A feruri atoa i te rahiraa taime ta oe e faataa no tera faaanaanataeraa. A uiui, ‘E pau rahi anei to ’u taime i roto i te mau faaanaanataeraa a iti roa mai ai te taime e toe no te pororaa e te mau putuputuraa?’ Ia maiti oe e faataa i te taime rahi mau no te mau faaanaanataeraa, eita te reira e tamǎrû ia oe mai ta oe i mana‘o. A hi‘o na i te feia e vaiiho ra i te faaanaanataeraa i to ’na vairaa. E au roa ’tu â ratou i te reira, e ere anei? No te aha? I te mea e ua ite ratou e ua haapao na mua ratou i te mau mea faufaa a‘e, e nehenehe ïa ratou e tamǎrû ma te ore e haapeapea.—A taio i te Philipi 1:10, 11.

14 Mea au roa paha ia faaanaanatae noa. E nehenehe râ tera e‘a e faaatea ê ia oe ia Iehova. O ta Kim ïa, te hoê tuahine e 20 matahiti, i ite roa ’tu. I haere noa na o ’na i te mau tamaaraa atoa i te Mahana pae, Mahana maa e te Tapati. Ua taa râ ia ’na i teie nei e te vai ra te ohipa faufaa a‘e. Te na ô nei oia: “Ei hi‘oraa, ei pionie, e tia vau i te hora 6 i te poipoi no te haere e poro, ta ’u e ore e nehenehe e rave ia faaanaanatae au e tae roa ’tu i te hora hoê aore ra i te hora piti i te aahiata. Ua ite au e e ere te mau tamaaraa atoa i te mea ino, e nehenehe râ te reira e riro ei rohirohiraa. E mea tia ia vaiiho i tera atoa mau mea i to ratou vairaa.”

15. E nafea te mau metua e tauturu ai i ta ratou tamarii ia maiti i te faaanaanataeraa maitai?

15 Na te mau metua te hopoia e haapao ia ratou e i ta ratou mau tamarii i te pae materia, varua e aau. Oia atoa ïa i te pae o te mau faaanaanataeraa. E metua anei oe? Eiaha e mana‘o e mea ino te mau faaanaanataeraa atoa. Ia ara râ oe i te mau faaanaanataeraa au ore. (Kor. 1, 5:6) Ma te feruri maite, e nehenehe oe e ite mai i te faaanaanataeraa e oaoa mau ai to utuafare. * Ma te na reira, e maiti oe e ta oe mau tamarii i te hoê e‘a e piri atu â ’i outou ia Iehova.

TE MAU TAAIRAA UTUAFARE

16, 17. Eaha te tupuraa peapea ta e rave rahi metua i ite? Eaha te haapapuraa e te taa ra ia Iehova to ratou mauiui?

16 Mea piri roa te mau taairaa o te hoê metua e ta ’na tamarii. No reira Iehova i faaohipa ’i i tera taairaa no te faahoho‘a i to ’na here no to ’na nunaa. (Isa. 49:15) E mauiui iho â tatou ia faarue te hoê melo herehia o te utuafare ia Iehova. “Ua oti roa vau,” ta te hoê ïa tuahine ua tiavaruhia ta ’na tamahine e parau ra. “Ua ui noa vau, ‘No te aha o ’na i faarue ai ia Iehova?’ Ua faahapa noa vau ia ’u iho.”

17 Te taa ra ia Iehova to oe mauiui. Ua ‘ooo roa to ’na aau’ a orure hau ai ta ’na tamaiti matamua ra o Adamu e i muri a‘e, te rahiraa o te taata tei ora hou te diluvi. (Gen. 6:5, 6) Mea fifi paha no te feia tei ore i faaruru a‘enei i tera tupuraa ia taa i te mauiui e itehia. E ere roa ’tu râ i te haerea paari ia vaiiho i te haerea tano ore o te hoê melo utuafare tei tiavaruhia ia faaatea ê ia oe ia Iehova. E nafea ïa ia faaoromai i te mauiui rahi e itehia ia faarue te hoê melo utuafare ia Iehova?

18. Eiaha roa ’tu te mau metua e faahapa ia ratou iho ia faarue ta ratou tamarii ia Iehova, no te aha?

18 Eiaha e faahapa ia oe no te ohipa i tupu. Ua horoa Iehova i te taata te tiamâraa e maiti, e na te melo utuafare pûpûhia e bapetizohia taitahi e amo i ta ’na  iho hopoia. (Gal. 6:5) No Iehova, e ere na oe te hape, na tera iho â taata i hara. (Ezk. 18:20) Eiaha atoa e faahapa ia vetahi ê. A faatura i te ravea ta Iehova i faanaho no te a‘o. A patoi i te Diabolo, eiaha râ i te mau matahiapo e haa ra no te paruru i te amuiraa.—Pet. 1, 5:8, 9.

E ere i te mea ino ia tiaturi e e ho‘i mai te hoê taata herehia ia Iehova ra

19, 20. E nafea te mau metua ua tiavaruhia ta ratou tamarii e faaoromai ai i to ratou mauiui?

19 I te tahi a‘e pae, ia riri oe ia Iehova, e faaatea ê oe ia oe ia ’Na. Te here ra oe i to utuafare. Mea faufaa râ ia ite ratou e mea puai a‘e to oe here no Iehova. No te faaoromai i te mauiui, a faaitoito i te tapea i te mau taairaa maitai e o Iehova. Eiaha e faataa ê ia oe i to oe mau taeae e tuahine Kerisetiano taiva ore. (Mas. 18:1) A faaite i to oe mau huru aau ia Iehova na roto i te pure. (Sal. 62:7, 8) Eiaha e imi i te otoheraa no te amuimui i te hoê melo utuafare i tiavaruhia, na roto paha i te niuniu paraparau aore ra ma te papai ia ’na i nia i te Internet. (Kor. 1, 5:11) Ia rahi ta oe ohipa i roto i te taviniraa a Iehova. (Kor. 1, 15:58) Te na ô ra te tuahine i faahitihia i nia ’tu, “Ua ite au e mea faufaa roa ia tavini noa vau ia Iehova e ia maitai noa to ’u mau taairaa e o ’Na. E nehenehe ïa ta ’u e tauturu i ta ’u tamahine ia ho‘i mai oia ia Iehova ra.”

20 Ia au i te Bibilia, “e tiai [te aroha] i te mau mea atoa.” (Kor. 1, 13:4, 7) E ere i te mea ino ia tiaturi e e ho‘i mai te hoê taata ta oe e here nei ia Iehova ra. I te matahiti taitahi, mea rahi te taata rave hara te tatarahapa nei e te ho‘i mai nei i roto i te faanahonahoraa a Iehova. Eita Iehova e riri noa ia ratou. ‘Ua tia râ ia ’na ia faaore i te hara.’—Sal. 86:5.

A RAVE I TE MAU MAITIRAA MAITAI

21, 22. Eaha ta oe faaotiraa a faaohipa ’i i to oe tiamâraa e maiti?

21 Ua horoa Iehova i te taata te tiamâraa e maiti. (A taio i te Deuteronomi 30:19, 20.) E hopoia atoa râ te reira. Ia uiui te Kerisetiano taitahi: ‘Tei nia vau i teihea e‘a? Ua vaiiho anei au i te ohipa e te toroa, te faaanaanataeraa aore ra te mau taairaa utuafare ia faaatea ê ia ’u ia Iehova?’

22 E here noa Iehova i to ’na nunaa. E faaatea ê tatou ia Iehova i te taime noa tatou e rave ai i te mau maitiraa tano ore. Eiaha roa ’tu râ te reira ia tupu! A faaoti papu eiaha te tahi noa ’‘e mea ia faaatea ê ia oe ia Iehova. E ite mai tatou i to muri nei tumu parau e maha ’tu â tuhaa e faaite ai tatou i tera faaotiraa.

^ par. 10 No te mau haamaramaramaraa hau no nia i te maitiraa i te hoê toroa, a hi‘o i te pene 38 o te buka Les jeunes s’interrogent—Réponses pratiques, buka 2.

^ par. 15 No te tahi mau mana‘o tauturu, a hi‘o i te Réveillez-vous! no Novema 2011, api 17-19.