Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIURAI 2016

A imi i te Faatereraa Arii, eiaha te mau tao‘a materia

A imi i te Faatereraa Arii, eiaha te mau tao‘a materia

“E titau . . . outou i te basileia o te Atua, e amui-atoa-hia mai taua mau mea ra ia outou.”—LUKA 12:31.

HIMENE: 40, 98

1. Eaha te taa-ê-raa i rotopu i ta tatou e hinaaro mau ra e ta tatou e hiaai ra?

MEA iti roa te mau mea ta tatou e hinaaro mau ra no te ora. Ei hi‘oraa, e hinaaro mau tatou i te maa, te ahu e te hoê vahi nohoraa. Aita râ e hopea to te mau mea ta tatou e hiaai ra. Aita te rahiraa o te taata e taa ra e aita ratou e hinaaro mau ra i te mau mea atoa ta ratou e hiaai ra.

2. Eaha te mau mea ta te taata e hiaai ra?

2 Mea taa ê roa paha ta te hoê taata e ora ra i te fenua veve e hinaaro i ta te hoê taata o te ora ra i te hoê fenua ona e hinaaro ra. I roto i te tahi mau fenua, e hinaaro paha te taata i te hoê niuniu afaifai, faurao e piti huira aore ra i te hoê tâpû fenua iti. I te tahi atu mau vahi, e hiaai te taata i te mau ahu moni rahi, te hoê fare rahi a‘e aore ra i te hoê pereoo moni atu â. Noa ’tu râ te vahi e ora ’i tatou aore ra ehia moni ta tatou, e nehenehe tatou e haamata i te hinaaro rahi atu â mea aita tatou e  hinaaro mau ra aore ra eita e pee ia tatou i te aufau.

E NEHENEHE TE NOUNOU TAO‘A E OHIPA I NIA IA TATOU

3. Eaha te nounou tao‘a?

3 Eaha te nounou tao‘a? O te huru feruriraa ïa o te hoê taata mea haapao a‘e na ’na i te mau mea materia i to ’na auhoaraa e te Atua. Eita oia e mâha i te noaaraa ia ’na te mau mea hinaaro-mau-hia, e hiaai rahi atu â oia. E nehenehe atoa te feia e ere i te mea navai te moni aore ra aita ta ratou e nehenehe e hoo mai i te mau mea moni rahi, e riro mai ei taata nounou tao‘a. E nehenehe ratou e faaea i te tuu i te Basileia, aore ra Faatereraa Arii, i te parahiraa matamua i roto i to ratou oraraa.—Heb. 13:5.

4. E nafea Satani e faaohipa ’i i “te hinaaro tia ore o te mata”?

4 Te hinaaro ra Satani ia tiaturi tatou e maoti noa te haaputuraa i te mau tao‘a materia e nehenehe ai tatou e oaoa. E faaohipa ïa oia i ta ’na ao e “te hinaaro tia ore o te mata” no te turai ia tatou ia hiaai rahi atu â. (Ioa. 1, 2:15-17; Gen. 3:6; Mas. 27:20) Te mataitai e te faaroo tamau nei tatou i te mau parau tiani o te tamata ra i te turai ia tatou ia hoo mai i te mau tauihaa apî. Ua hoo a‘ena anei oe i te tahi mea no te au o te reira i roto i te fare toa aore ra ua ite oe i te reira i roto i te hoê parau tiani? Mai te peu e e, peneia‘e ua ite atura oe i muri iho aita oe e hinaaro mau ra i te reira. Ia tamau tatou i te hoo mai i te mau mea aita tatou e hinaaro mau ra, e haafifi te reira i to tatou oraraa. E nehenehe teie mau mea e haafifi i ta tatou taviniraa ia Iehova. Ei hi‘oraa, e iti roa ’tu â paha to tatou taime no te haapii i te Bibilia, no te faaineine e no te apiti i te mau putuputuraa, e no te haere tamau i roto i te pororaa. A haamana‘o, ua faaara te aposetolo Ioane: “Te mou nei hoi teie nei ao, e ta to te ao atoa e hinaaro nei.”

5. Eaha te nehenehe e tupu no te feia o te faaohipa nei i to ratou puai ia noaa rahi mai te tao‘a materia?

5 Te hinaaro ra Satani ia faaohipa tatou i to tatou puai ia noaa rahi mai te moni e te mau tao‘a materia, eiaha e faaohipa i te reira no Iehova. (Mat. 6:24) Ia haapao noa râ tatou i te noaa-rahi-raa mai i te mau mea na tatou iho, e riro ïa to tatou oraraa ei mea faufaa ore. E haapeapea tatou aore ra e nehenehe tatou e fifihia i te pae moni. Te mea ino roa ’tu â, e nehenehe tatou e ere i to tatou faaroo ia Iehova e ta ’na Faatereraa Arii. (Tim. 1, 6:9, 10; Apo. 3:17) Ua parau Iesu e e au “te hinaaro tia ore i te mau mea ěê” i te mau tara o te haafifi i te tupuraa o te hoê huero a ore atu ai te reira e horoa mai i te maa.—Mar. 4:14, 18, 19.

6. Eaha te haapiiraa e huti mai i te hi‘oraa o Baruka?

6 A feruri na ia Baruka, te taata papai parau a te peropheta Ieremia. A haamata ’i Baruka i te imi i “te maitai rahi” no ’na iho, ua haamana‘o Iehova ia ’na e e fatata Ierusalema i te haamouhia. Ua fafau râ oia ia Baruka e e faaora mai oia ia ’na. (Ier. 45:1-5) Aita e tia ia Baruka ia titau hau atu â. Eita Iehova e paruru i te mau mea atoa a te taata. (Ier. 20:5) I teie mahana, te fatata mai ra te hopea o te ao a Satani. E ere ïa teie te taime no te haaputu i te faufaa materia  na tatou iho. E eiaha tatou e tiai e i muri a‘e i te ati rahi, e vai noa te mau mea o ta tatou e fatu ra i teie mahana, noa ’tu mea faufaa te reira no tatou.—Mas. 11:4; Mat. 24:21, 22; Luka 12:15.

E ere teie te taime no te haaputu i te faufaa materia na tatou iho

7. Eaha ta tatou e hi‘opoa mai i muri nei, e no te aha?

7 E nafea ïa tatou e aupuru ai ia tatou iho e to tatou utuafare a tiatonu noa ’i i te mea faufaa roa ’‘e o te oraraa? E nafea tatou e haapae ai i te nounou tao‘a? E eaha te tauturu ia tatou ia faaea i te haapeapea rahi i te noaaraa i ta tatou e hinaaro mau ra? I roto i ta ’na A‘oraa i nia i te mou‘a, ua horoa mai Iesu i te a‘oraa maitai roa ’‘e. (Mat. 6:19-21) E taio tatou i te Mataio 6:25-34 e e aparau tatou no nia i te reira. E haapapu te reira ia tatou e o te Faatereraa Arii, ta tatou e tamau i te imi, eiaha râ te mau tao‘a materia.—Luka 12:31.

E HOROA MAI IEHOVA I TA TATOU E HINAARO MAU RA

8, 9. (a) No te aha eiaha tatou e haapeapea rahi i te mau mea o ta tatou e hinaaro mau ra? (b) Eaha ta Iesu i ite no nia i te mau taata e ta ratou e hinaaro mau ra?

8 A taio i te Mataio 6:25. Ua ite Iesu e te haapeapea ra ta ’na mau pǐpǐ eaha ta ratou e amu, e inu e e ahu. Ua parau ïa oia ia ratou i roto i ta ’na A‘oraa i nia i te mou‘a: “Eiaha e tapitapi i to outou ora.” Ua hinaaro Iesu e tauturu ia ratou ia taa no te aha aita e titauhia ia ratou ia haapeapea no nia i te mau mea atoa. Ua ite oia e ia haapeapea rahi ratou, i te mau mea o ta ratou e hinaaro mau ra, e nehenehe ratou e haamoe eaha te mea faufaa roa ’‘e o te oraraa. Ua haapeapea a‘e Iesu no ta ’na mau pǐpǐ i faaara ’i oia ia ratou e maha taime i roto i ta ’na a‘oraa, no nia i teie fifi.—Mat. 6:27, 28, 31, 34.

9 No te aha Iesu i parau ai ia tatou eiaha e haapeapea no ta tatou e amu, e inu aore ra e eaha ta tatou e oomo? Mea papu, e hinaaro iho â tatou i te maa e te ahu. Mai te peu e e ere tatou i te mea navai i te moni no te hoo mai teie mau mea, mea tano ia haapeapea tatou. Ua taa ia Iesu i te reira. Ua ite oia i ta te taata i hinaaro mau. E ua ite oia e i teie “anotau hopea,” e ora ta ’na mau pǐpǐ i te mau taime fifi mau. (Tim. 2, 3:1) I teie mahana, e rave rahi taata e imi ra i te hoê ohipa e te maraa noa ra te moni o te mau mea atoa. I te vahi e rave rahi, mea veve roa te taata e mea iti aore ra aita ta ratou e maa. Ua ite atoa râ Iesu e mea faufaa roa ’‘e te ora o te hoê taata i te maa, e te tino i te ahu.

Ua parau Iesu e mea faufaa roa ’‘e te ora o te hoê taata i “te maa, e te tino i te ahu”

10. No Iesu, eaha te mea faufaa roa ’‘e ta ratou e tia ia ani na roto i te pure?

10 I na mua ’tu, ua haapii Iesu i ta ’na mau pǐpǐ e ia pure ratou, e titauhia ia ratou ia ani i to ratou Metua i te ra‘i ia horoa i ta ratou e hinaaro mau ra. E nehenehe ratou e pure: “Ho mai i te maa e au ia matou i teie nei mahana.” (Mat. 6:11) I te tahi atu taime, ua parau oia ia ratou ia pure: “Ho mai i te maa e au ia matou i te mau mahana atoa nei.” (Luka 11:3) E ere râ te auraa e ia mana‘o tamau tatou i te mau mea o ta tatou e hinaaro mau ra. Ua parau Iesu i ta ’na mau pǐpǐ o te aniraa ia tae mai to te Atua Faatereraa Arii, te mea faufaa roa ’‘e  i te pureraa no nia i ta ratou e hinaaro mau ra. (Mat. 6:10; Luka 11:2) No te tauturu i ta ’na mau pǐpǐ ia faaea i te haapeapea, ua tamahanahana Iesu ia ratou ma te haamana‘o atu mea nafea Iehova i te aupururaa i te mau mea atoa o ta ’na i poiete.

11, 12. Eaha ta tatou e haapii mai i ta Iehova aupuru no te mau manu o te reva? (A hi‘o i te hoho‘a matamua.)

11 A taio i te Mataio 6:26. Mea titauhia ia tatou ia “hi‘o . . . i te mau manu o te reva.” Noa ’tu mea nainai te mau manu, mea tamaa roa ratou. Ahani, mea rarahi te manu mai te taata ra te huru, e amu oia i te maa hau atu â i ta te taata e amu nei. E amu te mau manu i te maa hotu, te mau huero, te manumanu e te mau toe. Eita râ ratou e ueue i te huero e e tanu i ta ratou iho maa. Ua horoa Iehova i ta ratou e hinaaro mau ra. (Sal. 147:9) Mea papu, eita oia e faaamu roa ’tu i te manu! Mea titauhia ia ratou ia haere e imi i te maa. E ere râ tera ohipa i te mea fifi no ratou, te vai ra iho â te maa.

12 Ua papu ia Iesu e mai te peu e e aupuru to ’na Metua i te mau manu, e aupuru atoa ïa oia i te taata. [1] (Pet. 1, 5:6, 7) Mea papu, mai te manu, eiaha tatou e riro ei taata hupehupe. Mea tia ia ohipa tatou no te tanu i ta tatou maa aore ra ia noaa te moni no te hoo i te reira. E nehenehe Iehova e haamaitai i ta tatou mau tutavaraa. E noa ’tu aita ta tatou moni aore ra maa e navai, e nehenehe oia e horoa mai i ta tatou e hinaaro mau ra. Ei hi‘oraa, e nehenehe vetahi ê e opere i ta ratou e fana‘o ra e o tatou. Ua horoa atoa Iehova na te mau manu i te hoê vahi no te ora. Ua horoa oia i te aravihi i roto ia ratou no te hamani i to ratou ofaaraa, e ua hamani oia i te mau mea ta te mau manu e faaohipa no te hamani i teie mau ofaaraa. E nehenehe atoa Iehova e tauturu ia tatou ia imi i te hoê vahi nohoraa tano no to tatou utuafare.

13. Na te aha e haapapu e mea faufaa a‘e tatou i te mau manu o te reva?

13 I muri a‘e i to Iesu haamana‘oraa i ta ’na mau pǐpǐ e te faaamu ra Iehova i te mau manu, ua ani oia ia ratou: “E ere anei te maitai rahi to outou i to ratou?” (A hi‘o i te Luka 12:6, 7.) A na reira ’i oia i te parau, te haamana‘o ra paha Iesu i te taime e horoa ’i oia i to ’na ora no te huitaata. Aita Iesu i pohe no te mau manu aore ra no te tahi animara. Ua pohe râ oia no tatou ia nehenehe tatou e ora e a muri noa ’tu.—Mat. 20:28.

14. Eaha ta te hoê taata e tapitapi ra e ore roa ’tu e nehenehe e rave?

14 A taio i te Mataio 6:27. Eaha to Iesu mana‘o a parau ai oia e eita ta tatou e nehenehe e tuu hoê a‘e kubiti i to tatou ora ma teie mau tapitapiraa? Te auraa o ta ’na parau, eita ta tatou e nehenehe e ora maoro atu â, ma te tapitapiraa i te mau mea e hinaaro-mau-hia e tatou. Ia rahi roa ana‘e to tatou hepohepo, e nehenehe tatou e ma‘ihia e e pohe atoa.

15, 16. (a) Eaha ta tatou e haapii mai i ta Iehova aupuru i te mau lili o te aua? (A hi‘o i te hoho‘a matamua.) (b) Eaha te mau uiraa ta tatou e uiui, e no te aha?

15 A taio i te Mataio 6:28-30. Te oaoa nei tatou e e ahu maitai to tatou, ia haere iho â râ tatou i roto i te taviniraa aore ra i te mau tairururaa. Mea titauhia râ anei ia tatou ia “tapitapi . . . i te ahu”? Ua haamana‘o faahou Iesu i ta ’na mau pǐpǐ e nafea Iehova e aupuru ai i ta ’na i poiete. Ua faaohipa Iesu i te hi‘oraa o “te mau lili o te aua.” Te haamana‘o ra paha Iesu i te tiare nehenehe e rave rahi mai te lili ra te huru. Aita e titauhia ia ratou ia nira i te ahu no ratou iho. No to ratou râ nehenehe i parau  ai Iesu “e tae noa ’tu ia Solomona ma to ’na unauna rahi, e ore â to ’na ahu e au i te nehenehe i to te hoê o ratou nei.”

16 A feruri na i ta Iesu i parau i muri iho: “I na reira hoi te Atua i te faaunauna i te raau rii o te fenua nei, . . . , a tae ai hoi ia outou, o outou i te faaroo tapetepete e!” Mea papu, e faaahu oia ia tatou! Mea titauhia râ i te mau pǐpǐ a Iesu hau atu â faaroo. (Mat. 8:26; 14:31; 16:8; 17:20) Mea titauhia ia ratou ia tiaturi e te hinaaro ra Iehova e aupuru ia ratou e e na reira iho â oia. E no tatou ïa? Te tiaturi ra anei tatou e e aupuru Iehova ia tatou?

Te tiaturi ra anei tatou e e aupuru Iehova ia tatou?

17. Na te aha e haafifi i to tatou auhoaraa e o Iehova?

17 A taio i te Mataio 6:31-32. Ua niu e rave rahi taata aita ratou i ite o vai Iehova i to ratou oraraa ia noaa rahi mai te moni e te tao‘a. Ia na reira tatou, e nehenehe to tatou auhoaraa e o Iehova e fifihia. Ua ite tatou o Iehova to tatou Metua e te here nei oia ia tatou. E ua papu ia tatou e ia rave tatou i ta ’na e ani mai e ia tuu tatou i te Faatereraa Arii, i te parahiraa matamua i roto i to tatou oraraa, e horoa mai oia i te mau mea atoa o ta tatou e hinaaro ra e hau atu â. Ua taa atoa ia tatou e e ite tatou i te oaoa mau ia maitai to tatou auhoaraa e o Iehova, e tauturu te reira ia tatou ia mauruuru i te fana‘oraa i “te maa, e te tino i te ahu.”—Tim. 1, 6:6-8.

TEI TE PARAHIRAA MATAMUA ANEI TE FAATERERAA ARII O TE ATUA I ROTO I TO ORARAA?

18. Eaha ta Iehova e ite no nia ia tatou iho, e eaha ta ’na e rave no tatou?

18 A taio i te Mataio 6:33. Ia tuu tatou i te Faatereraa Arii, i te parahiraa matamua i roto i to tatou oraraa, e horoa mai Iehova i te mau mea atoa o ta tatou e hinaaro mau ra. Ua faataa Iesu no te aha mea papu teie parau fafau. Ua parau oia: “Ua ite hoi to outou Metua i te ao ra, e ia noaa taua mau mea ra ia outou e tia ’i.” Ua ite a‘ena Iehova i ta outou e hinaaro mau ra hou outou a mana‘o atu e te hinaaro ra outou i te reira. (Phil. 4:19) Ua ite a‘ena oia eaha te mau ahu ta oe e hinaaro mau i muri iho. Ua ite a‘ena atoa oia eaha te maa ta oe hinaaro mau. E ua ite oia e te hinaaro ra oe e to oe utuafare i te hoê vahi nohoraa. E imi iho â Iehova i te ravea ia fana‘o oe i ta oe e hinaaro mau ra.

19. No te aha eiaha ’i tatou e haapeapea no te nehenehe e tupu i a muri a‘e?

19 A taio i te Mataio 6:34. Ua haapii faahou Iesu i ta ’na mau pǐpǐ: “Eiaha e tapitapi.” E horoa Iehova i ta tatou e hinaaro mau ra i te mau mahana atoa. Eiaha ïa tatou e haapeapea rahi no nia i te tupu i a muri a‘e. Ia na reira tatou, e nehenehe tatou e haamata i te tiaturi ia tatou iho a fifi atu ai to tatou auhoaraa e o Iehova. Mea tia râ ia tiaturi maite tatou ia ’na.—Mas. 3:5, 6; Phil. 4:6, 7.

A IMI NA MUA I TE FAATERERAA ARII E AUPURU MAI IEHOVA IA OE

E nehenehe anei ta oe e faaiti mai i te tahi mau mea i roto i to oe oraraa no te tiatonu atu â i te Basileia? (A hi‘o i te paratarafa 20)

20. (a) Eaha te hoê fa ta oe e nehenehe e haamau i roto i te taviniraa ia Iehova? (b) Eaha ta oe e nehenehe e rave no te faaiti i te tahi mau mea i roto i to oe oraraa?

20 Mea peapea mau mai te peu e aita to tatou puai e navai faahou no te tavini ia  Iehova no te mea ua tamata tatou i te haaputu hau atu â tao‘a! E tia ia horoa tatou i te mea maitai roa ’‘e na Iehova. Ei hi‘oraa, e nehenehe anei oe e haere e tauturu i te hoê amuiraa e hinaaro-rahi-hia ra te feia poro? E nehenehe anei oe e riro mai ei pionie? Mai te peu e pionie a‘ena oe, ua feruri anei oe e haere i te Haapiiraa no te feia poro i te parau apî oaoa o te Basileia? E nehenehe anei ta oe e tauturu tau mahana i te hebedoma i te Betela aore ra i te hoê piha ohipa huriraa? Aore ra e nehenehe paha ta oe e tauturu i te tuhaa paturaa (LDC) e e faaohipa i te tahi o to oe taime no te tauturu i te paturaa o te mau Piha a te Basileia. A feruri e nafea oe e nehenehe ai e faaiti mai i te tahi mau mea i roto i to oe oraraa ia rahi atu â to oe taime e puai no te mau ohipa Kerisetiano. Te horoa mai ra te tumu parau tarenihia “ E nafea oe e faaiti mai ai i te tahi mau mea i roto i to oraraa” i te tahi mau ravea. A ani ia Iehova ia tauturu ia oe ia faaoti eaha te tia ia oe ia rave. I muri iho, a haamata i te rave i te mau tauiraa e titauhia.

21. Eaha te tauturu ia tatou ia haafatata ’tu â ia Iehova?

 21 Ua haapii mai Iesu ia imi na mua te Faatereraa Arii. Ia na reira tatou, eita tatou e haapeapea rahi roa no te mau mea o ta tatou e hinaaro ra. E haafatata ’tu â tatou ia Iehova, no te mea te tiaturi ra tatou e e aupuru mai oia ia tatou. Ua haapii mai tatou i te haavî ia tatou iho e eiaha e hoo mai i te mau mea atoa ta tatou e hiaai ra aore ra i te mau mea atoa o ta te ao e pûpû mai ra, noa ’tu e pee ia tatou i te hoo mai i te reira. Ia faaiti tatou i te tahi mau mea i roto i to tatou oraraa i teie nei â, e tauturu mai te reira ia vai taiva ore ia Iehova e ia mau maite “i te ora mure ore” o ta ’na i fafau ia tatou.—Tim. 1, 6:19.

^ [1] (paratarafa 12) I te tahi mau taime, e ere vetahi mau tavini a Iehova i te maa. No te taa no te aha Iehova e vaiiho ai ia tupu noa te reira, a hi‘o i te tumu parau “Uiraa a te feia taio” i roto i Te Pare Tiairaa o te 15 no Tetepa 2014, api 22 (Farani).