Eaha to roto?

Tapura tumu parau

I nehenehe na oia e fana‘o i te farii maitai a te Atua

I nehenehe na oia e fana‘o i te farii maitai a te Atua

E HINAARO tatou i te farii maitai e te haamaitairaa a Iehova a tavini ai ia ’na. E nafea ïa ia fana‘o i ta ’na farii maitai? I tahito ra, ua rave vetahi i te hara ino mau, ua noaa faahou râ ia ratou te farii maitai a te Atua i muri a‘e. Ua faatupu te tahi atu i te mau huru maitatai, ua ere râ ratou i te farii maitai a te Atua i te hopearaa. E ui paha tatou, ‘Eaha ïa ta Iehova e imi i roto i te aau o te taata tataitahi?’ E nehenehe te hi‘oraa o Rehoboama te hoê arii no Iuda e tauturu mai ia ite i te pahonoraa.

HAAMATARAA FIFI

Ua faatere o Solomona, te metua tane o Rehoboama, ei arii i nia ia Iseraela e 40 matahiti i te maoro. (Arii 1, 11:42) I muri a‘e i te poheraa o to ’na metua, ua tere Rehoboama mai Ierusalema ’tu i Sekema no te riro ei arii. (Par. 2, 10:1) Ua taiâ anei oia? Ua matauhia hoi Solomona no to ’na paari rahi. E tia ia Rehoboama ia faaite e paari atoa to ’na no te faatitiaifaro i te hoê fifi.

Ua teimaha roa te mau Iseraela, tono ihora ratou i te mau tia no te faaite ia Rehoboama i to ratou hinaaro. Ua na ô ratou: “Teiaha roa to te zugo a to metua i nia [ia] matou, e tena na, e faahuru mâmâ na oe i ta matou ohipa rahi i to metua ra, e te zugo teiaha ta ’na i tuu mai i nia ia matou, e faaroo matou ia oe i reira.”—Par. 2, 10:3, 4.

E ere i te mea ohie no Rehoboama ia rave i te faaotiraa. Ia farii oia i te aniraa a te nunaa, e ere oia e to ’na utuafare i to ratou oraraa fana‘o. Tera râ, ia ore oia e farii, e orure hau te nunaa. E nafea ïa oia? Ua paraparau na mua o ’na i te feia paari o tei turu na i to ’na metua tane. Ua faaitoito ratou ia ’na ia faaroo i te nunaa. Ua haere atoa râ oia i te mau tane apî e faaoti ihora i te haavî i te nunaa. Na ô atura oia: “Ua faateiaha hoi tau metua i to outou zugo, e rahi hua râ ta ’u i te teiaha; i papai â hoi tau metua ia outou i te papai mau, e papai râ vau ia outou i te okerebe,” e mauhaa hui ïa o te hamanihia i te iri puaa, e hu‘ahu‘a ivi aore ra auri to te hopearaa.—Par. 2, 10:6-14.

Eaha te haapiiraa no tatou? I teie mahana, e rave rahi feia paari tei tavini maoro ia Iehova. E nehenehe ratou e tauturu mai ia rave i te mau faaotiraa maitai. E haerea paari ïa ia faaroo ia ratou.—Ioba 12:12.

“UA FAAROO A‘ERA RATOU I TAUA PARAU A IEHOVA”

Ua haaputuputu Rehoboama i ta ’na nuu no te aro i te mau opu orure hau. Ua tono râ Iehova i te peropheta Semaia no te parau atu: “Eiaha outou e  tae, eiaha e aro i to outou mau taeae, i te tamarii a Iseraela: e ho‘i te taata atoa i te utuafare; na ’u hoi taua parau nei.”—Arii 1, 12:21-24. *

Mea ohie anei no Rehoboama ia faaroo ia Iehova? Eaha to te nunaa mana‘o i teie arii apî? Ua parau hoi oia e e papai ia ratou i “te okerebe,” aita râ oia i nehenehe noa ’‘e e rave i te tahi mea i mua i ta ratou orure-hau-raa! (A hi‘o atoa i te Paraleipomeno 2, 13:7.) Noa ’tu eaha to te nunaa mana‘o ia Rehoboama, “ua faaroo a‘era ratou [te arii ïa e ta ’na nuu] i taua parau a Iehova ra; e ua ho‘i ratou, ua haere i te utuafare, ta Iehova hoi i parau maira.”

Eaha te haapiiraa no tatou? E haerea paari ia faaroo ia Iehova noa ’tu e faaooo mai te taata. E tamau iho â te Atua i te haamaitai mai ia faaroo tatou ia ’na.—Deut. 28:2.

Ua haamaitaihia anei Rehoboama i to ’na faarooraa ia Iehova? A faatere noa ’i ia Iuda e Beniamina, ua patu Rehoboama i te mau oire apî na to ratou tuhaa fenua, oia atoa i te mau oire tei “etaeta roa ’tura ia ’na.” (Par. 2, 11:5-12) Hau atu â, ua auraro Rehoboama maa taime i te ture a Iehova. Mea rahi atoa tei faarue i na opu 10 haamori idolo no te haere i Ierusalema e turu ia Rehoboama e te haamoriraa mau. (Par. 2, 11:16, 17) I te mea ua faaroo o Rehoboama ia Iehova, ua puai atu â to ’na basileia.

UA HARA REHOBOAMA E UA TATARAHAPA

A puai mai ai te faatereraa a te arii Rehoboama, rave ihora oia i te tahi ohipa huru ê. Ua faaea oia i te auraro i ta Iehova ture e haamata ihora i te haamori i te mau atua hape. No te aha? Ua ohipa anei to ’na mama ati Amona i nia i ta ’na faaotiraa? (Arii 1, 14:21) Aita tatou i ite, ua pee râ te nunaa i to ’na hi‘oraa ino. No reira Iehova i vaiiho ai i te arii Sisaka no Aiphiti ia haru e rave rahi oire i te fenua o Iuda. Ua tupu te reira noa ’tu ua faaetaeta Rehoboama i tera mau oire!—Arii 1, 14:22-24; Par. 2, 12:1-4.

Ua ino roa ’tu te tupuraa a haere ai Sisaka e ta ’na nuu e haru ia Ierusalema, i reira hoi Rehoboama e faatere ai. I tera taime, ua faaite atu te peropheta Semaia i teie poroi no ǒ mai i te Atua ra ia Rehoboama e ta ’na hui arii: “Ua faarue mai outou ia ’u; e te vaiiho nei au ia outou i te rima o Sisaka.” Ua nafea Rehoboama a a‘ohia ’i oia? Ua faaite oia i te hoê huru maitai! Te na ô ra te Bibilia: “E oti a‘era te reira, te hui raatira o Iseraela e te arii, ua faahaehaa ihora ia ratou iho; e ua na ô a‘era ratou, e parau-tia ta Iehova.” No reira ua faaora Iehova ia Rehoboama, area o Ierusalema ua haamouhia ïa.—Par. 2, 12:5-7, 12.

I muri iho, ua tamau noa Rehoboama i te faatere ei arii i nia ia Iuda. Hou a pohe ai, ua horoa oia e rave rahi ô i ta ’na mau tamarii atoa. Peneia‘e, ua na reira Rehoboama ia ore ratou ia orure hau i to ratou taeae ia Abia o te mono atu ia ’na. (Par. 2, 11:21-23) Ua ohipa ïa Rehoboama ma te paari atu â, hau atu i to ’na apîraa ra.

E HI‘ORAA MAITAI ANEI REHOBOAMA?

Noa ’tu ua rave Rehoboama i te mea maitai i te tahi taime, te na ô ra te Bibilia: “Ua rave oia i te ino.” Eaha te tumu? No te mea “aita to ’na aau i au tamau i te imi ia Iehova.” No reira o Iehova i ore ai i mauruuru ia ’na.—Par. 2, 12:14.

Aita Rehoboama i faatupu i te auhoaraa piri e o Iehova mai ia Davida

Eaha te haapii mai i te hi‘oraa o Rehoboama? Ua faaroo oia i te Atua i te tahi taime e ua rave atoa i te mea maitai no te nunaa o Iehova. Aita râ oia i faatupu i te auhoaraa piri e o Iehova e aita atoa i imi mau i te farii maitai a Iehova. I muri a‘e, ua faaea oia i te rave i te mea maitai e haamata a‘era i te haamori i te mau atua hape. I to ’na fariiraa i te a‘o a Iehova, ua tatarahapa mau anei Rehoboama ia fana‘o oia i te farii maitai a te Atua? Aore ra ua na reira no te mea tera ta vetahi i parau atu ia rave? (Par. 2, 11:3, 4; 12:6) I muri a‘e, ua rave â oia i te mea ino. Mea taa ê roa ïa Rehoboama i to ’na papa ruau o te arii Davida! Ua hara Davida, ua tatarahapa mau râ o ’na i ta ’na i rave. I te roaraa o to ’na oraraa, ua here oia ia Iehova e ua faaea noa i roto i te haamoriraa mau.—Arii 1, 14:8; Sal. 51:1, 17; 63:1.

 Mea rahi ta tatou e haapii mai i teie aamu Bibilia. E nehenehe e haapopou i te feia o te aupuru i to ratou utuafare e o te hamani maitai ia vetahi ê. No te fana‘o râ i te farii maitai a Iehova, mea tia atoa ia haamori ia ’na mai ta ’na e hinaaro ra e ia faatupu i te auhoaraa piri e o ’na.

E titauhia ïa te here mau ia Iehova. Ia ura noa te auahi, e titauhia ia rahi te vahie. E puai noa atoa to tatou here i te Atua ma te haapii tamau i ta ’na Parau, ma te feruri maite i te reira e ma te tamau i te pure. (Sal. 1:2; Roma 12:12) Na tera here e tauturu mai ia faaoaoa ia Iehova i roto i te mau mea atoa ta tatou e rave. E turai atoa mai te reira ia tatarahapa mau ia hara noa ’tu tatou e ia ani ia Iehova ia faaore mai i ta tatou hara. Ma te na reira, eita roa ’tu tatou e riro mai ia Rehoboama, e vai taiva ore noa râ tatou i roto i te haamoriraa mau.—Iuda 20, 21.

^ par. 9 No te mea ua taiva o Solomona, ua parau a‘ena te Atua e amaha na opu 12 o Iseraela e e piti basileia te haamauhia.—Arii 1, 11:31.