Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2016

Te taata papai parau e ta ’na farii inita, o Iesu ïa. Na ’na e tuu i te tapao i nia i te feia o te ora mai

Uiraa a te feia taio

Uiraa a te feia taio

I roto i te orama a Ezekiela, o vai te taata papai parau e te farii inita e na ono taata e mauhaa i to ratou rima?

E melahi puai i te ra‘i ratou o tei apiti i te haamouraahia o Ierusalema e i te haamouraa atoa o te ao a Satani i Aramagedo. E haamaramaramaraa apî teie. No te aha mea titauhia te reira?

Hou te matahiti 607 hou te Mesia, ua faaite orama Iehova ia Ezekiela i te ohipa e tupu i Ierusalema na mua ’‘e te reira a haamouhia ’i. I roto i te orama, ua ite Ezekiela e rave rahi ohipa ino e tupu ra i reira. I muri iho, ua ite oia e ono taata, “te taata atoa ma te mauhaa taparahi taata ra i tana rima.” te vai atoa ra te hoê taata “e vavai te ahu, ma te farii inita a te taata papai parau.” (Ezk. 8:6-12; 9:2, 3) Ua parauhia i teie taata ia haere na roto i te oire “a tuu ai i te tapao i nia i te rae o te mau taata i autâ noa e ua pii hua, i te mau parau faufau atoa i ravehia i roto ra.” I muri iho, ua parauhia i na ono taata e mauhaa to roto i te rima ia taparahi pohe te feia atoa i roto i te oire aita to ratou e tapao i nia i te rae. (Ezk. 9:4-7) Eaha ta tatou e nehenehe e haapii i teie orama, e o vai te taata papai parau e farii inita ta ’na?

Ua ite Ezekiela i teie orama i 612 hou te Mesia. E parau tohu teie o tei itehia te tupuraa na mua roa e pae matahiti i muri a‘e i to Iehova vaiihoraa i te nuu Babulonia ia haamou ia Ierusalema. Ma te na reira, ua faaohipa Iehova to Babulonia no te faautua to ’na nunaa faaroo ore. (Ier. 25:9, 15-18) E no te mau ati Iuda parau-tia o tei ore i farii i te mau ohipa ino o tei tupu na i roto i te oire? Ua haapao maitai Iehova ia ora mai ratou.

 I roto i te orama, aita Ezekiela i tapao roa i te taata aore ra i apiti i te haamouraa o te oire. Na te mau melahi râ i aratai i te haamouraa o Ierusalema. Te ite ra ïa tatou ma teie parau tohu, eaha te tupu ra i te ra‘i. Ua parau Iehova i ta ’na mau melahi ia rave i te faanahoraa no te haamou i te feia ino e ia haapao maitai ratou e eiaha te feia parau-tia ia pohe. *

E itehia te tupuraa o tera parau tohu i a muri a‘e. I parau na matou e te taata papai parau e ta ’na farii inita, o te feia faatavaihia ïa o te ora noa ra i te fenua nei. Ua parau atoa matou e e tapaohia te feia no te ora mai, ia faaroo e ia farii ratou i te parau apî oaoa o ta tatou e poro ra. Aita râ i maoro a‘enei, ua papu roa a‘era ia matou e mea titauhia ia taui te faataaraa o teie parau tohu. Ua haapii mai tatou i roto i te Mataio 25:31-33, e na Iesu e haava i te taata. E na reira oia i a muri a‘e, i te roaraa o te ati rahi. I tera taime, e ora mai te feia o tei haavahia ei mamoe, e e haamouhia te feia o tei haavahia ei puaaniho.

Eaha ïa ta tatou e haapii mai i te orama a Ezekiela? Teie e pae haapiiraa:

  1.  Hou Ierusalema a haamouhia ’i, ua faaara Ezekiela, Ieremia e Isaia i te taata eaha te tupu i nia i te oire. E au ratou i te feia tiai. I teie mahana, te faaohipa ra Iehova i te hoê pûpû iti feia faatavaihia no te haapii i to ’na nunaa e no te faaara ia vetahi ê hou a haamata ’i te ati rahi. E tuhaa atoa ta te nunaa a te Atua, oia hoi te mau tavini a te Mesia, i roto i teie ohipa faaararaa.—Mat. 24:45-47.

  2.  Aita Ezekiela i tapao i te feia o te ora mai. Aita atoa te nunaa o te Atua e na reira i teie mahana. E poro noa ratou ia vetahi ê e e faaara ratou no nia i te tupu i a muri a‘e. Teie ohipa pororaa e ravehia ra na te ao atoa nei, maoti ïa te tauturu a te mau melahi.—Apo. 14:6.

  3.  Aita to te feia o tei ora mai i te tau o Ezekiela e tapao i nia i to ratou rae. I teie mahana, eita atoa e tuuhia te tapao i nia i te rae o te feia o te ora mai. Eaha te tia i te taata ia rave no te ora mai i te ati rahi? Ia faaroo ratou i te faaararaa, e tia ia ratou ia haapii i te pee i te hi‘oraa o te Mesia, ia pûpû ia ratou iho ia Iehova e ia turu i te mau taeae o te Mesia ma te poro i te parau apî oaoa. (Mat. 25:35-40) I te roaraa o te ati rahi, e tuuhia te tapao i nia ia ratou, oia hoi, e maitihia ratou no te ora mai.

  4.  Te taata e te farii inita, o Iesu ïa. I te roaraa o te ati rahi, e tuu Iesu i te tapao i nia i te feia rahi roa a haava ’i oia ia ratou ei mamoe. I muri iho, e nehenehe ratou e ora e a muri noa ’tu i te fenua nei.—Mat. 25:34, 46. *

  5.  I teie mahana, te faahoho‘a ra na ono taata e mauhaa taparahi taata ta ratou, i te nuu i te ra‘i, o Iesu to ratou aratai. E fatata ratou i te haamou i te mau nunaa e i te faaore i te ino.—Ezk. 10:2, 6, 7; Apo. 19:11-21.

E tauturu mai te mau haapiiraa o ta tatou e huti mai no teie orama ia tiaturi e eita Iehova e haamou i te feia parau-tia, te feia ino noa râ. (Pet. 2, 2:9; 3:9) Te haamana‘o mai ra ta tatou i haapii mai e mea faufaa roa te ohipa pororaa i to tatou tau. Mea titauhia ia faaroo te taata atoa i te faaararaa hou te hopea a tae mai ai!—Mat. 24:14.

^ par. 6 Te feia o tei faaorahia mai, mai ia Baruka (te taata papai parau a Ieremia), te taata Etiopia ra o Ebeda-meleka e te mau ati Rekabi, aita e tapao i nia i to ratou rae. (Ier. 35:1-19; 39:15-18; 45:1-5) E ora mai ratou te auraa o te tapao taipe.

^ par. 12 Aita e faufaa ia fana‘o te feia faatavaihia i teie tapao no te ora mai. E fana‘o râ ratou i te tapaoraa hopea hou ratou a pohe ai aore ra hou a haamata ’i te ati rahi.—Apo. 7:1, 3.