Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2016

Ia riro iho â Iehova ei Potera no tatou

Ia riro iho â Iehova ei Potera no tatou

“E Iehova, . . . na oe matou i hamani: e ohipa ana‘e matou na to rima.”—ISA. 64:8.

HIMENE: 89, 26

1. No te aha o Iehova te Potera rahi roa ’‘e?

I NOVEMA 2010, ua faaotihia te tino moni o te hoê farii araea tahito roa no te fenua Taina hau atu i te 6 miria moni farane i Beretane. Mea faahiahia ia ite e nafea te hoê potera e hamani ai i te hoê farii nehenehe mau e te moni rahi i te hoê materia mâmâ e te matau-maitai-hia e te taata. O Iehova to tatou Potera e ua hau ê oia i te mau potera atoa. Te parau ra te Bibilia e ua poiete Iehova i te hoê taata tia roa “i te repo fenua nei,” oia hoi i te araea. (Gen. 2:7) E tamaiti Adamu “na te Atua” ta ’na i poiete ia nehenehe oia e pee i te mau huru maitatai o te Atua.—Luka 3:38.

2, 3. E nafea tatou e pee ai i te haerea o te mau Iseraela tei tatarahapa?

2 I to Adamu orure-hau-raa i to ’na Atua poiete, aita ’tura oia i riro faahou mai ei tamaiti a te Atua. E rave rahi râ o te mau huaai a Adamu o tei maiti ia Iehova ei Faatere no ratou. (Heb. 12:1) I to ratou auraroraa i to ratou Atua poiete ma te haehaa, ua faaite ratou e te hinaaro nei ratou ia ’na, eiaha râ ia Satani, ei Faatere e ei Potera no ratou. (Ioa. 8:44) Te haamana‘o mai ra to ratou taiva ore i te Atua i ta te mau Iseraela o tei tatarahapa i parau: “E Iehova, o oe to matou metua; e araea matou,  e na oe matou i hamani: e ohipa ana‘e matou na to rima.”—Isa. 64:8.

3 Te tutava rahi nei te feia haamori mau ia Iehova i teie mahana i te riro ei feia haehaa e te auraro. No ratou, e fana‘oraa taa ê te piiraa ia Iehova ei Metua no ratou, e te hinaaro ra ratou ia ’na ei Potera no ratou. Te hinaaro ra anei tatou e riro mai ei araea mǎrû o ta te Atua e nehenehe e tauturu ia taui a riro atu ai ei farii nehenehe mau? Te ite ra anei tatou i nia i to tatou mau taeae e tuahine taitahi e te ohipa ra te Atua ia taui ratou? No te tauturu ia tatou ia faaite i te hoê huru feruriraa tano, e hi‘opoa mai tatou e nafea Iehova e maiti ai i te feia ta ’na e tauturu ia taui, no te aha oia e tauturu ai ia ratou ia taui e e nafea oia i te na reira.

E MAITI IEHOVA I TE FEIA TA ’NA E TAUTURU IA TAUI

4. Mea nafea Iehova i te maitiraa i te feia o ta ’na i faatae ia ’na ra? A faataa.

4 Eita Iehova e hi‘o i te taata mai ta tatou e na reira ra. E hi‘opoa râ oia i te aau e ia tatou taitahi o vai tatou. (A taio i te Samuela 1, 16:7b.) Ua haapapu Iehova i te reira a haamau ai oia i te amuiraa Kerisetiano. Ua faatae oia ia ’na ra e i ta ’na Tamaiti e rave rahi taata o ta vetahi ê paha e faariro ei mea faufaa ore. (Ioa. 6:44) Ei hi‘oraa, te vai ra te Pharisea ra o Saula te i‘oa, “tei faaino hoi i mutaa iho, e te hamani ino, e te hauti,” aore ra faatura ore. (Tim. 1, 1:13) Ua hi‘o râ Iehova i to Saula aau e aita oia i mana‘o e araea faufaa ore o Saula. (Mas. 17:3) Ua ite Iehova e e nehenehe Saula e tauturuhia ia taui no te riro mai ei “farii maitihia” o te poro “i te hui arii ra, e i te tamarii hoi a Iseraela.” (Ohi. 9:15) Ua maiti atoa Iehova i te tahi atu mau taata o te nehenehe e tauturuhia ia taui “no te mea maitai,” oia atoa te feia taero ava, te feia o te rave ra i te mau peu tia ore e te feia eiâ. (Roma 9:21; Kor. 1, 6:9-11) A haapii ai ratou i te mau Papai, ua haapuai ratou i to ratou faaroo ia Iehova e ua vaiiho ratou ia tauturu oia ia ratou ia taui.

E ere na tatou e haava i te taata o ta tatou tuhaa fenua aore ra i roto i ta tatou amuiraa

5, 6. E nafea to tatou tiaturi ia Iehova mai te hoê Potera no tatou e ohipa ’i to tatou haerea (a) i nia i te taata o ta tatou tuhaa fenua? (b) i nia i to tatou mau taeae e tuahine?

5 E tiaturi tatou e e nehenehe Iehova e maiti e e faatae i te taata maitai ia ’na ra. No reira, eiaha tatou e haava ia vetahi ê i roto i ta tatou tuhaa fenua aore ra i roto i ta tatou amuiraa. A hi‘o na i te huru o te hoê taata o Michael te i‘oa, a haere mai ai te mau Ite no Iehova e farerei ia ’na. Te parau ra oia: “E hi‘o noa vau vahi ê, ma te ore e tâu‘a ia ratou, mai te mea ra e aita ratou. Mea etene roa vau! I muri a‘e, i roto i te tahi atu tupuraa, ua farerei au i te hoê utuafare, ua faahiahia roa vau ia ratou no to ratou haerea maitai. I te hoê mahana, ua hitimahuta roa vau i te iteraa e e Ite no Iehova ratou! Ua turai to ratou haerea ia ’u ia hi‘opoa i te tumu o to ’u mau mana‘o oti noa. Ua taa oioi ia ’u e no to ’u taa ore e te faaroo-tari‘a-noa-raa i feruri ai au mai tera.” Ua hinaaro Michael e haapii atu â e ua farii oia i te hoê haapiiraa  Bibilia. I muri iho, ua bapetizohia oia e tei roto oia i te taviniraa taime taatoa.

6 Ia taa ia tatou e o Iehova to tatou Potera, e taui atoa to tatou haerea i nia i to tatou mau taeae e tuahine. E hi‘o tatou ia ratou tataitahi ei ohipa te maitai mai ra. Mea na reira Iehova e hi‘o ai ia ratou. E hi‘o oia o vai mau ratou e ua ite oia e no te hoê taime poto noa to ratou huru tia ore. Ua ite atoa oia o vai te taata ta ratou e nehenehe e riro mai. (Sal. 130:3) E nehenehe tatou e pee i to Iehova hi‘oraa ia faaite tatou i te hoê â haerea i nia i to tatou mau taeae. E nehenehe atoa tatou e ohipa e to tatou Potera no te tauturu i to tatou mau taeae e tuahine ia haere i mua i te pae varua. (Tes. 1, 5:14, 15) E tia i te mau matahiapo o te amuiraa ia horoa i te hoê hi‘oraa maitai ma te na reira.—Eph. 4:8, 11-13.

NO TE AHA IEHOVA E TAUTURU AI IA TATOU IA TAUI

7. No te aha e haafaufaa ’i tatou i te a‘oraa a Iehova?

7 E parau paha vetahi: ‘Aita roa ’tu vau i haafaufaa maite te a‘oraa a to ’u na metua e tae roa i te taime a fanau ai au i te tamarii.’ A paari mai ai tatou, e nehenehe tatou e haafaufaa i te a‘oraa no te mea ua ite tatou e e faaiteraa î i te here te reira. (A taio i te Hebera 12:5, 6, 11.) Mea papu, ua here Iehova ia tatou mai ta ’na mau tamarii, no reira oia e a‘o ai ia tatou ma te faaoromai, aore ra e tauturu ia tatou ia taui. Te hinaaro ra oia ia riro tatou ei taata î i te paari, ia oaoa tatou e ia here tatou ia ’na ei Metua no tatou. (Mas. 23:15) Aita oia e hinaaro ia mauiui tatou e aita atoa oia e hinaaro ia pohe tatou ei feia rave hara.—Eph. 2:2, 3.

Ua here Iehova ia tatou mai ta ’na mau tamarii, no reira oia e a‘o ai ia tatou ma te faaoromai, aore ra e tauturu ia tatou ia taui

8, 9. Mea nafea Iehova e haapii ai ia tatou i teie mahana, e e nafea teie haapiiraa i te tamau i a muri a‘e?

8 Hou tatou a ite ai o vai Iehova, e rave rahi paha huru to tatou e ere i te mea maitai. Ua tauturu râ Iehova ia tatou ia taui e e huru maitatai ïa to tatou i teie nei. (Isa. 11:6-8; Kol. 3:9, 10) Te ora nei tatou i roto i te hoê paradaiso pae varua. E vahi taa ê teie o ta Iehova i haamau i to tatou tau no te tauturu ia tatou ia taui. I roto i teie paradaiso pae varua, te ite ra tatou i te hau, noa ’tu mea ino te feia e haaati ra ia tatou. Te vai ra o tei paari aita ratou i fana‘o i te here a to ratou utuafare, ua ite ratou i te here mau a to ratou mau taeae e tuahine i roto i te paradaiso pae varua. (Ioa. 13:35) E ua haapiihia tatou ia faaite i te here ia vetahi ê. Te mea faufaa roa ’tu â, ua haapii tatou o vai Iehova e ua ite tatou i teie nei i to ’na here metua.—Iak. 4:8.

9 I roto i te ao apî, e faufaa-maite-hia tatou i te paradaiso pae varua. E oaoa atoa tatou i te oraraa i roto i te hoê paradaiso i te fenua nei i raro a‘e i te faatereraa o ta te Atua Basileia aore ra Faatereraa arii. I tera tau, e tamau Iehova i te tauturu ia tatou ia taui e i te haapii ia tatou ma te hoê ravea aita tatou e nehenehe e feruri i teie taime. (Isa. 11:9) E horoa atoa mai Iehova  i te hoê feruriraa e i te hoê tino tia roa. E ohie ïa tatou i te taa e i te auraro roa i ta ’na mau faaueraa. No reira, e tamau ana‘e i te vaiiho ia Iehova ia tauturu ia tatou ia taui e e faaite ana‘e ia ’na e te haafaufaa ra tatou i teie haapapuraa o to ’na here no tatou.—Mas. 3:11, 12.

E NAFEA OIA E TAUTURU AI IA TATOU IA TAUI

10. Mea nafea Iesu e faaite ai i te faaoromai e te aravihi o te Potera rahi?

10 Mai te hoê potera aravihi o te ite eaha te huru araea ta ’na e faaohipa ra, ua matau maitai atoa to tatou Potera o Iehova ia tatou. Ua ite oia i to tatou mau paruparu, to tatou mau taotiaraa e to tatou haereraa i mua i te pae varua e e tauturu oia i te taata taitahi ia taui i roto i tera mau tupuraa. (A taio i te Salamo 103:10-14.) E nehenehe tatou e haapii mai i ta Iehova huru hi‘oraa ia tatou ma te hi‘o i to Iesu huru i mua i te huru tia ore o ta ’na mau aposetolo. I te tahi mau taime, ua aparau te mau aposetolo no te ite o vai te mea rahi a‘e. Mai te peu e tei reira oe, eaha to oe mana‘o no nia i to te mau aposetolo haerea? E mana‘o paha oe e ere ratou mai te araea mǎrû. Area râ Iesu, ua ite oia e e nehenehe ratou e tauturuhia ia taui ia faaroo ratou i ta ’na mau a‘oraa maitatai e te faaoromai e ia pee ratou i to ’na haehaa. (Mar. 9:33-37; 10:37, 41-45; Luka 22:24-27) I muri a‘e i te tia-faahou-raa o Iesu, ua fana‘o te mau aposetolo i te varua o te Atua e aita ’tura ratou i haapao faahou o vai tei rahi a‘e. Ua tiatonu noa râ ratou i te ohipa ta Iesu i ani ia ratou ia rave.—Ohi. 5:42.

11. E nafea Davida i te haapapuraa ia ’na ei araea mǎrû, e e nafea tatou e nehenehe ai e pee i to ’na hi‘oraa?

11 I teie mahana, te faaohipa ra Iehova i te Bibilia, i to ’na varua mo‘a e i te amuiraa no te tauturu ia tatou ia taui. E nafea te Bibilia e nehenehe ai e na reira? Mea titauhia ia taio tatou i te reira, ia feruri maite i ta tatou e taio ra e ia ani ia Iehova ia tauturu mai ia faaohipa i ta tatou i haapii. Ua papai te arii Davida: “Ia mana‘o vau ia oe i nia i tau roi, e ia imi ia oe i te mau araraa ra.” (Sal. 63:6) Ua papai atoa oia: “E haamaitai â vau ia Iehova o tei haapii mai ia ’u ra; te a‘o maira tau mana‘o aau ia ’u i te rui.” (Sal. 16:7) Mea papu, ua feruri maite Davida i ta Iehova mau a‘oraa e ua vaiiho oia i te reira ia taui i to ’na mau mana‘o hohonu e huru aau, noa ’tu e ere i te mea ohie ia farii i te a‘oraa. (Sam. 2, 12:1-13) Ua vaiiho mai Davida i te hoê hi‘oraa faahiahia o te haehaa e te auraro. A uiui: ‘Ia taio vau i te Bibilia, te feruri maite ra anei au i te reira e te vaiiho nei au i te a‘oraa a te Atua e haaputapû i to ’u mau mana‘o e huru aau hohonu roa ’‘e? E nehenehe anei ta ’u e rave hau atu â?’—Sal. 1:2, 3.

12, 13. E nafea Iehova e tauturu ai ia tatou ia taui maoti te varua mo‘a e te amuiraa Kerisetiano?

12 E nehenehe te varua mo‘a e tauturu ia tatou ia taui ma te mau ravea huru rau. Ei hi‘oraa, e nehenehe te reira e tauturu ia tatou ia pee i te huru o Iesu e ia faatupu i te mau tuhaa rau o te hotu o te varua. (Gal. 5:22, 23) Hoê tuhaa o te hotu o te varua, o te here ïa. Te here nei tatou i te Atua e te hinaaro nei tatou e auraro ia ’na e ia vaiiho ia ’na ia tauturu ia tatou ia taui, no te mea ua ite tatou e e faufaahia tatou i ta ’na mau a‘oraa. Hau atu â, e nehenehe te varua mo‘a e horoa mai i te puai ia ore teie ao ino e ohipa i nia ia tatou. (Eph. 2:2) I to te aposetolo Paulo  apîraa, ua peehia paha oia i te huru feruriraa o te mau aratai haapaoraa ati Iuda. Ua tauturu râ te varua ia ’na ia taui. Ua papai oia i muri iho: “E tia ia ’u te mau mea atoa nei i . . . tei tauturu mai ia ’u.” (Phil. 4:13) No tatou atoa, mea faufaa ia ani i te varua mo‘a, ua ite tatou e e pahono mai Iehova i ta tatou mau pure haavare ore.—Sal. 10:17.

E faaohipa Iehova i te mau matahiapo Kerisetiano no te tauturu ia tatou ia taui, e mea tia râ ia faaohipa tatou i ta ratou a‘oraa (A hi‘o i te paratarafa 12, 13)

13 E faaohipa atoa Iehova i te amuiraa e te mau matahiapo no te tauturu ia tatou taitahi ia taui. Ei hi‘oraa, ia tapao te mau matahiapo hoê o to tatou mau paruparu, e tamata ratou i te tauturu ia tatou. Eita râ ratou e horoa i te mau a‘oraa niuhia i nia i to ratou mau mana‘o. (Gal. 6:1) E pure râ ratou ma te haehaa ia Iehova no te fana‘o i te ite e te paari. I muri iho, e rave ratou i te mau maimiraa ma te faaohipa i te Bibilia e ta tatou mau papai Kerisetiano no te ite i te mau haamaramaramaraa o te tauturu ia tatou. Ia haere mai te mau matahiapo e farerei ia oe a horoa ’tu ai i te a‘oraa maitai î i te here, peneia‘e no nia i to oe huru faaahuraa, a haamana‘o e haapapuraa te reira i te here o te Atua no oe. Ia pee oe i te a‘oraa, e riro oe mai te araea mǎrû o ta Iehova e nehenehe e faaohipa e e faufaahia oe i te reira.

14. Noa ’tu e e puai to ’na i nia i te araea, e nafea Iehova e faatura ai i to tatou tiamâraa e maiti?

14 Ia taa tatou e nafea Iehova e tauturu ai ia tatou ia taui, e nehenehe te reira e tauturu ia tatou ia faatupu i te auhoaraa maitai e to tatou mau taeae e tuahine. E faaite atoa tatou i te hoê huru feruriraa maitai no nia i te taata o ta tatou tuhaa fenua, oia atoa ta tatou mau piahi Bibilia. I tahito ra, hou a ohipa ’i i nia i te araea, mea titauhia i te potera ia tamâ i te reira e ia tatara i te mau ofaifai e te tahi atu mau pehu. E tauturu atoa te Potera rahi, o Iehova, i te taata o te hinaaro ra ia tauturuhia ratou ia taui. Eita oia e faahepo ia ratou ia taui, e faaite râ oia ia ratou i ta  ’na mau ture aveia mâ. E mea tia ia ratou i muri iho ia faaoti e rave anei ratou i te mau tauiraa titauhia.

15, 16. E nafea te mau piahi Bibilia e faaite ai e te hinaaro ra ratou ia tauturu Iehova ia ratou ia taui? A faataa.

15 A hi‘o na i tei tupu no Tessie, te hoê tuahine no Auteralia. Mea ohie roa no ’na ia haapii i ta te Bibilia e parau ra. Tera râ, aita oia i haere i mua i te pae varua e aita atoa hoi oia i haere i te mau putuputuraa. Ua pure te tuahine o te faatere i ta ’na haapiiraa e ua faaoti oia i te faaea i ta ’na haapiiraa. I muri iho, ua tupu te tahi ohipa maere mau. I roto i ta raua haapiiraa, ua parau o Tessie i te tuahine no te aha aita o ’na e haere i mua i te pae varua. Ua parau oia e e au oia i te hoê taata haavare, mea au roa hoi na ’na i te hauti pere. I teie râ mahana, ua faaoti oia i te faaea i te na reira.

16 Aita i maoro, ua haamata Tessie i te haere i te mau putuputuraa e i te faatupu i te mau huru maitatai Kerisetiano, noa ’tu ua faaooo te tahi o to ’na mau hoa ia ’na. I muri a‘e, ua bapetizohia o Tessie e ua rave oia i te taviniraa pionie tamau, noa ’tu e tamarii apî roa ta ’na. Mea papu, ia haamata te mau piahi Bibilia i te rave i te mau tauiraa no te faaoaoa i te Atua, e haafatata oia ia ratou e e tauturu oia ia ratou ia riro mai ei farii maitai.

17. (a) Eaha to oe huru aau ia riro Iehova ei Potera no tatou? (b) Eaha ta tatou e hi‘opoa i roto i te tumu parau i muri nei?

17 I teie mahana, te ohipa maitai ra te tahi mau potera no te taui i te araea mǎrû ei farii nehenehe mau. Hoê â huru no Iehova, e tauturu oia ma te faaoromai ia taui tatou ma te faaohipa i ta ’na a‘oraa e te haapao maite ra oia eaha ra to tatou huru. (A taio i te Salamo 32:8.) Te ite ra anei oe to Iehova anaanatae ia oe? Te ite ra anei oe ia Iehova e tauturu maite ra ia oe ia taui? Mai te peu e e, eaha te mau huru maitatai o te tauturu ia oe ia vai noa mai te araea mǎrû o ta Iehova e nehenehe e faaohipa? Eaha te mau huru e titauhia ia oe ia haapae ia ore oe e riro mai mai te araea paari o te ore roa ’tu e nehenehe e faaohipahia? E e nafea te mau metua e ohipa ’i e o Iehova no te tauturu i ta ratou mau tamarii ia taui? E pahono mai ïa te tumu parau i muri nei i teie mau uiraa.