Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIUNU 2016

Te hoê huru maitai o te Atua o tei hau ê i te mau taiamani

Te hoê huru maitai o te Atua o tei hau ê i te mau taiamani

No te taata, e ofai faufaa roa te mau taiamani. E raea roa e mirioni tara Marite te faito moni o vetahi taiamani. Tera râ, no te Atua, te vai ra anei te tahi ohipa o tei hau a‘e i te mau taiamani aore ra te tahi mau ofai?

 Ua itehia e Haykanush, te hoê taata poro bapetizo-ore-hia i Aramenia i te hoê parau tiaraa ratere aita i atea noa ’‘e i to ’na fare. I roto i te parau tiaraa ratere, te vai ra te tahi mau tareta e te hoê tino moni rahi. Ua parau oia i ta ’na tane, e taata poro bapetizo-ore-atoa-hia oia, i ta ’na i ite mai.

E fifi rahi to teie na hoa faaipoipo i te pae moni e mea rahi ta raua tarahu. Ua faaoti râ raua i te faaho‘i i te moni i te vahi nohoraa e vai ra i roto i te parau tiaraa ratere. Ua maere roa te taata na ’na teie parau tiaraa ratere, to ’na atoa utuafare. Ua faataa Haykanush e ta ’na tane e e haerea tia to raua no te mea te haapii ra raua i ta te Bibilia e parau ra. I muri iho, ua faaohipa raua i tera taime no te paraparau no nia i te mau Ite no Iehova e no te horoa i te tahi mau papai i te utuafare.

Ua hinaaro te utuafare e horoa na Haykanush te tahi moni ei haamauruururaa, aita râ oia i farii a‘e. I te mahana i muri iho, ua haere te vahine a teie taata e farerei ia Haykanush e ta ’na tane i te fare, e no te faaite i to ’na mauruuru no ta Haykanush i rave, e ua mârô oia ia farii Haykanush i te hoê tapea rima taiamani.

Mai teie utuafare, e maere e rave rahi taata i te haerea tia a Haykanush e ta ’na tane. Ua maere anei râ Iehova? Eaha to ’na mana‘o i to raua haerea tia? Ua hoona anei to raua haerea tia?

MEA FAUFAA A‘E TE MAU HURU MAITATAI I TE MAU TAO‘A MATERIA

E ere i te mea fifi ia pahono i tera mau uiraa. No te aha? No te mea ua ite te mau tavini a te Atua e mea faufaa a‘e no Iehova te peeraa i to ’na mau huru maitatai i te mau taiamani, te auro aore ra te tahi mau tao‘a materia. Oia mau, ta Iehova e haafaufaa ra, mea taa ê ïa i ta e rave rahi taata e haafaufaa ra. (Isa. 55:8, 9) E no ta ’na mau tavini, mea faufaa roa ta ratou mau tutavaraa no te pee i to Iehova mau huru maitatai.

E hi‘o ana‘e i ta te Bibilia e parau ra no nia i te haroaroa e te paari. Te parau ra te Maseli 3:13-15: “E ao to te taata i noaa ia ’na te paari; te taata i noaa ia ’na te ite ra! O te tao‘a hoi e hoona ’i oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra. E maitai rahi to ’na i to te poe; e te mau mea atoa i hinaarohia ra, e ore roa ïa e au ia ’na.” Mea papu, te haafaufaa ra Iehova i te mau huru maitatai atoa i te tahi mau tao‘a materia.

E no nia i te haerea tia?

E Atua tia o Iehova. E “ore e tia [ia ’na] ia haavare.” (Tito 1:2) Ua faaurua oia i te aposetolo Paulo no te papai i te mau kerisetiano Hebera i te senekele matamua: “E pure ia matou: ua ite mau hoi matou e, te tia nei to matou aau, i te opuaraa e ei haapao maitai ta matou i te mau mea atoa nei.”—Heb. 13:18.

Ua vaiiho mai Iesu i te hoê hi‘oraa maitai o te haerea tia. Ei hi‘oraa, ua parau te tahu‘a rahi Kaiapha, “Te faatǎpǔ atu nei au ia oe i te Atua ora ra, e faaite mai oe ia matou, e o oe anei te Mesia, te Tamaiti a te Atua?” E taata tia o Iesu e ua parau oia e o ’na te Mesia. Ua faaite oia i te parau mau noa ’tu ua ite oia e e pari te Sunederi ia ’na ei taata faaino e e nehenehe oia e haapohehia no te reira.—Mat. 26:63-67.

E no tatou? Mai te peu e tei roto tatou i te hoê tupuraa e te fana‘o nei tatou i te mau tao‘a materia ma te ore e faaite te mau faataaraa i te tahi atu taata aore ra ma te taui rii i te reira, e haerea tano faahou anei râ to tatou?

 TE TUTAVARAA IA FAAITE I TE HAEREA TIA

E nehenehe e riro ei mea fifi ia faaite i te haerea tia i teie anotau hopea, ia ite iho â râ tatou e mea “miimii, e nounou moni” e rave rahi taata. (Tim. 2, 3:2) Ia tupu te fifi i te pae faufaa aore ra ia riro te imiraa i te hoê ohipa ei mea fifi, no e rave rahi taata, e ere i te mea ino ia eiâ, ia punu aore ra ia rave i te tahi mau ohipa e ere i te mea tia. Ua matau-roa-hia teie huru feruriraa. No reira ïa e rave rahi o te mana‘o ra e o te haerea tia ore te ravea otahi no te fana‘o i te mau tao‘a materia. Ua rave vetahi mau Kerisetiano i te mau faaotiraa ino e ua rave i te “mea tia ore,” ua ere ratou i to ratou roo maitai i roto i te amuiraa.—Tim. 1, 3:8; Tito 1:7.

E rave rahi râ Kerisetiano o te pee ra i to Iesu hi‘oraa. Ua taa ia ratou e mea faufaa a‘e te faatupuraa i te mau huru maitatai mai to te Atua i te mau tao‘a e faufaa atoa. No reira eita te mau Kerisetiano apî e punu ia noaa mai te nota maitai i te fare haapiiraa. (Mas. 20:23) Ia faaite oe i te hoê haerea tia, eita  paha oe e haamauruuru-noa-hia, mai ia Haykanush. Tera râ, te parau ra te Atua e mea tano ia faaite i te hoê haerea tia, eita to tatou mana‘o haava e hauti, e mea faufaa mau te reira.

Ta te hi‘oraa ïa o Gagik e faaite ra. Te parau oia: “Hou a riro ai au ei Kerisetiano, ua rave au i te ohipa na te hoê taiete rarahi, e ua ape te fatu taiete i te aufau i te tute ma te faaite i te hoê noa tuhaa iti o te faufaa i noaa mai i te taiete. Ei taata faatere i te taiete, ua titauhia ia ’u ia peta i te taata haapao tute ia tapo oia i to ’na mata i te mau ohipa pi‘o a te taiete. I te pae hopea, ua riro vau ei taata haerea tia ore. I to ’u haapiiraa i te parau mau, aita vau i hinaaro faahou e na reira, noa ’tu mea aufau-maitai-hia tera ohipa. Ua haamata vau i ta ’u iho taiete. I tera iho â mahana matamua, ua haamana vau i ta ’u taiete e ua aufau vau i ta ’u mau tute atoa.”—Kor. 2, 8:21.

Te parau ra Gagik: “Ua iti mai ta ’u moni ohipa i te afaraa, e tautooraa ïa teie no ’u i te aupururaa i to ’u utuafare. Tera râ, mea oaoa a‘e au i teie nei. E mana‘o haava mâ to ’u i mua ia Iehova. E hi‘oraa maitai au no ta ’u na e piti tamaiti e ua tutava vau no te amo i te mau hopoia i roto i te amuiraa. I rotopu i te feia haapao tute e te tahi atu mau taata e ohipa vau e o ratou, e roo maitai to ’u i teie nei ei taata haerea tia.”

E TAUTURU IEHOVA IA TATOU

Te here ra Iehova i te feia o te arue ia ’na ma te pee i to ’na mau huru maitatai faahiahia mau, oia atoa te haerea tia. (Tito 2:10) E ia na reira tatou, ua fafau oia i te tauturu ia tatou. Ua faaurua oia i te arii Davida ia parau: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ’na ra huaai i te aniraa i te maa.”—Sal. 37:25.

Te haapapu ra te aamu o te vahine taiva ore ra o Ruta, i te reira. Ma te taiva ore, ua faaea noa oia i to ’na metua hoovai vahine ra o Naomi, aita oia i vaiiho ia ’na no te mea ua paari o ’na. Ua haere Ruta i Iseraela, i reira oia e nehenehe ai e haamori i te Atua mau. (Ruta 1:16, 17) E haerea tia to ’na e ua haa rahi oia no te ohi haere i te kerite na roto i te faaapu ia au i te faanahoraa o te mau ture no te feia veve. E mai ta Davida i ite i muri a‘e, aita Iehova i faarue noa ’‘e ia Ruta e ia Naomi. (Ruta 2:2-18) Aita oia i haamaitai noa ia Ruta i te pae materia. Ua maiti oia ia ’na ia riro mai oia ei tupuna o te arii Davida, oia atoa, o te Mesia fafauhia.—Ruta 4:13-17; Mat. 1:5, 16.

Mea fifi roa paha no te tahi mau tavini a Iehova te imiraa i te moni no te hoo mai i ta ratou e hinaaro mau ra. Eita ratou e imi i te hoê ravea ohie e te pi‘o râ. E haa rahi ratou ma te haapao maitai. Ma te na reira, e faaite ratou e mea faufaa a‘e te mau huru maitatai faahiahia mau o te Atua, oia atoa te haerea tia, i te ohipa materia.—Mas. 12:24; Eph. 4:28.

Mai ia Ruta, ua faaite te mau Kerisetiano na te ao atoa nei i te faaroo i te mana o Iehova no te tauturu ia ratou. Ua tiaturi rahi ratou i Tei fafau: “e ore roa vau e faarue ia oe, e ore, e ore roa ’tu.” (Heb. 13:5) Ua faaite noa Iehova e e nehenehe ta ’na e e tauturu oia i te feia o te faaite ra i te haerea tia i te mau taime atoa. Ua tapea noa oia i ta ’na i fafau no te horoa i ta ta ’na mau tavini e hinaaro mau ra.—Mat. 6:33.

E nehenehe ïa te taata e haafaufaa i te mau taiamani e te tahi mau tao‘a materia. Ua papu râ ia tatou e te haafaufaa ra to tatou Metua i te ra‘i i to tatou haerea tia e te tahi mau huru maitatai eiaha ia iti mai, ia rahi atu â i te tahi mau ofai faahiahia!

Ia faaite tatou i te haerea tia, e nehenehe tatou e paraparau ma te hoê mana‘o haava mâ i te taata i roto i te taviniraa