1, 2. Mea nafea te Bibilia i te tohuraa i te maraaraa o te nunaa o Iehova?

 ATI aˈe te ao nei, ua itehia i roto i te hoê faanahonahoraa, te hoê pûpû taata o te here ra ia Iehova e o te hinaaro ra e tavini ia ˈna. O te mau Ite no Iehova teie mau taata. Noa ˈtu e huru tia ore to ratou e e hape ratou, te aratai ra Iehova i to ˈna nunaa maoti to ˈna varua moˈa. E hiˈo mai tatou i te tahi mau tuhaa i haamaitai ai oia ia ratou.

² I 1914, mea iti roa te taata haamori ia Iehova. Ua haamaitai râ Iehova i te ohipa pororaa. E mirioni ïa taata tei haapii i te pue parau mau Bibilia e o tei riro mai ei Ite no Iehova. Ua faataa Iehova i teie maraaraa faahiahia mau i to ˈna parauraa: “E riro te mea iti haihai ei tausani; e o tei riirii ra e riro ei fenua itoito: na ˈu, na Iehova, e faatupu etaeta i te reira, i to ˈna tau.” (Isa. 60:22) I teie mahana, e ite-maitai-hia te tupuraa o teie parau tohu. E au te nunaa o Iehova i te hoê nunaa rahi. Inaha, e rave rahi nunaa na te ao nei e mea iti aˈe te numera o te huiraatira ia faaauhia i te numera o te nunaa o Iehova.

3. Mea nafea te mau tavini i te faaiteraa i te here?

 ³ I teie anotau hopea, ua tauturu Iehova i to ˈna nunaa ia haapuai i to ratou here te tahi i te tahi. “E aroha hoi te Atua” e e pee ratou i to ˈna hiˈoraa. (Ioa. 1, 4:8) Ua faaue Iesu i ta ˈna mau pǐpǐ ia “aroha outou ia outou iho.” Ua parau atoa oia: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioa. 13:34, 35) Aita i maoro aˈenei, ua faaite te mau tavini a Iehova i teie here te tahi i te tahi, noa ˈtu e te tamaˈi ra te mau nunaa. Ei hiˈoraa, i te piti o te Tamaˈi rahi, fatata 55 mirioni o tei pohe. Aita râ te nunaa o Iehova e haapohe i te taata i roto i tera tamaˈi. (A taio i te Mika 4:1, 3.) Ua tauturu te reira ia ratou ia ore e “viivii i te toto o te taata atoa nei.”—Ohi. 20:26.

4. No te aha mea faufaa te maraaraa o te nunaa o Iehova?

⁴ Te maraa noa ra te numera o te mau tavini o te Atua, noa ˈtu e enemi rahi to ratou, o Satani. O ˈna te “atua o teie nei ao.” (Kor. 2, 4:4) Te faaohipa ra Satani i to ˈna mana i nia i te mau faanahonahoraa poritita o teie nei ao, te mau ravea haaparareraa parau apî e te faaohipa ra oia i te reira ia faaea te pororaa i te parau apî oaoa. Eita râ ta ˈna e nehenehe e tapea i teie ohipa. Ua ite râ Satani e mea poto te taime e toe ra ia ˈna, e tutava oia i te tapea ia tatou ia ore tatou e haamori ia Iehova.—Apo. 12:12.

5. No te aha te tahi mau taime e haamauiui ai vetahi ia tatou? (A hiˈo i te hohoˈa matamua.)

⁵ Ua haapii te mau tavini o te Atua e mea faufaa roa ia here i te Atua e te tahi atu mau taata. Ua parau Iesu: “Hinaaro oe i to Atua ia Iehova ma to aau atoa, e ma to varua atoa, e ma to manaˈo atoa. O te ture matamua teie e te hau i te rahi. E mai te reira atoa te piti; E aroha ˈtu oe i to taata-tupu.” (Mat. 22:35-39) No te hara a Adamu, te faaite ra te Bibilia e mea tia ore anaˈe te mau taata atoa. (A taio i te Roma 5:12, 19.) No reira i te tahi mau taime, e parau aore ra e rave vetahi o te amuiraa i te tahi mea e mauiui ai tatou. Ia tupu noa ˈtu te reira, eaha te rave? E puai noa anei to tatou here ia Iehova? E taiva ore anei tatou ia ˈna e i to ˈna nunaa? Te faataa ra te Bibilia no te tahi mau tavini o te Atua o tei parau aore ra o tei rave i te tahi mea o te haamauiui ia vetahi ê. E hiˈo mai tatou eaha te haapii mai i tei tupu no ratou.

6. No te aha i parauhia ˈi e aita Eli i manuïa i te aˈo i ta ˈna nau tamaiti?

⁶ Ei hiˈoraa, e tahuˈa rahi o Eli i Iseraela, ua faaroo ore ra ta ˈna na tamaiti e piti i ta Iehova mau ture. Te parau ra te Bibilia: “E pue taata taiata taua na tamarii a Eli ra; aore raua i haapao ia Iehova.” (Sam. 1, 2:12) Ua ite o Eli e ua rave ta ˈna na tamaiti e piti i te ohipa ino. Noa ˈtu ra te reira, aita oia i aˈo maitai ia raua. I muri aˈe, ua faautua Iehova ia Eli e i ta ˈna na tamaiti e piti. E i muri iho, aita o ˈna i vaiiho i te mau huaai a Eli ia tavini ei tahuˈa rahi. (Sam. 1, 3:10-14) Ahiri oe i ora i te tau o Eli e ua ite oe e te vaiiho nei oia i ta ˈna na tamaiti e piti ia rave i te ohipa ino, eaha râ paha ïa to oe huru? Na tera tupuraa anei e haaparuparu i to oe faaroo ia Iehova? E i te pae hopea, e faaea anei oe i te tavini ia ˈna?

7. Mea nafea Davida i te raveraa i te hara ino, e eaha ta te Atua i rave?

 ⁷ E huru maitatai faahiahia mau to Davida, no reira Iehova i here rahi ai ia ˈna. (Sam. 1, 13:13, 14; Ohi. 13:22) Tera râ, ua rave Davida i te ohipa ino mau. A haere ai o Uria i te tamaˈi, ua taoto o Davida i te vahine a Uria, ia Bate-seba, e ua hapu mai oia. Aita Davida i hinaaro ia ite te taata i ta ˈna i rave. Ua faaue oia ia Uria ia haere mai e hiˈo ia ˈna e ua tamata oia i te turai ia Uria ia hoˈi i to ˈna fare. Ua tiaturi o Davida e e taoto o Uria ia Bate-seba, e manaˈo ïa te taata o Uria te papa o tera tamarii. Aita râ Uria i hoˈi i te fare. Ua imi ïa o Davida i te ravea ia pohe Uria i te tamaˈi. No ta ˈna hara rahi, ua mauiui roa Davida e to ˈna utuafare. (Sam. 2, 12:9-12) Tera râ, e Atua aroha hamani maitai o Iehova e ua faaore oia i ta ˈna hara. Ua ite oia e te hinaaro ra Davida e rave i te mea tano. (Arii 1, 9:4) Ahiri oe i ora i tera tau, eaha râ paha to oe huru i ta Davida i rave? E faaea anei oe i te tavini ia Iehova?

8. (a) Mea nafea te aposetolo Petero i te oreraa e tapea i ta ˈna parau? (b) I muri aˈe i ta Petero i rave, no te aha Iehova i tamau ai i te faaohipa ia Petero?

⁸ Te tahi atu hiˈoraa Bibilia, o te aposetolo Petero. Ua maiti Iesu ia ˈna ei aposetolo na ˈna. Noa ˈtu râ, e rave rahi taime to Petero parauraa aore ra raveraa i te mau mea e ere i te mea tano. Ei hiˈoraa, ua parau Petero e eita roa ˈtu oia e faarue ia Iesu noa ˈtu e faarue vetahi ia ˈna. (Mar.  14:27-31, 50) I muri aˈe râ a tapeahia ˈi Iesu, ua faarue te mau aposetolo atoa, e o Petero ia ˈna. I muri iho, e toru taime, ua parau Petero e aita o ˈna i ite o vai Iesu. (Mar. 14:53, 54, 66-72) Tera râ, ua oto roa o Petero no ta ˈna i rave. Ua faaore ïa Iehova i te hapa ta ˈna i rave e ua tamau oia i te faaohipa ia ˈna. Ahiri e pǐpǐ oe i tera taime e ua ite oe i ta Petero i rave, e tamau anei oe i te tiaturi ia Iehova?

9. No te aha e tiaturi ai oe e e rave noa te Atua i te mea tia?

⁹ Na roto i teie mau hiˈoraa, te ite ra tatou e ua rave vetahi mau tavini a Iehova i te mau ohipa iino e ua haamauiui roa ratou ia vetahi ê. Ia tupu te reira i teie mahana, eaha ta oe e rave? E faaea anei oe i te haere i te mau putuputuraa aore ra e faarue roa i te faanahonahoraa a Iehova e to ˈna nunaa? Aore ra te taa ra ia oe i to Iehova aroha hamani maitai e te tiai ra oia ia tatarahapa te hoê taata? Tera râ, i te tahi mau taime, e nehenehe te hoê taata o tei rave i te hara rahi e ore e tatarahapa no te ohipa ta ˈna i rave. E tiaturi anei oe e ua ite Iehova i te reira e e faaafaro oia i te reira i te taime ta ˈna i maiti? E nehenehe ta ˈna e tatara roa i teie taata i te amuiraa mai te peu e e titauhia. Te tiaturi ra anei oe e e rave iho â Iehova i te mea tia e te tano?

10. Eaha ta Iesu i taa no nia i te mau hape a Iuda Isakariota e a Petero?

¹⁰ I roto i te Bibilia, te taio ra tatou no nia e rave rahi o tei taiva ore ia Iehova e i to ˈna nunaa noa ˈtu te rave ra te feia e haaati ra ia ratou i te mau hape rahi. O Iesu te hiˈoraa maitai roa ˈˈe. I muri aˈe i te pure-noa-raa i te hoê po no te ani i te tauturu a to ˈna Metua, ua maiti oia 12 aposetolo. I muri aˈe râ, ua taiva hoê o ratou ia ˈna, o Iuda Isakariota ïa. Ua parau atoa te aposetolo Petero e aita oia i matau ia Iesu. (Luka 6:12-16; 22:2-6, 31, 32) Aita Iesu i faahapa ia Iehova aore ra i te mau pîpî ia haamauiui vetahi ia ˈna. Ua vai piri râ Iesu i to ˈna Metua e ua tamau oia i te tavini ia ˈna ma te taiva ore. Ua haamaitai ïa Iehova ia ˈna ma te faatia faahou mai ia ˈna mai te pohe mai e i muri aˈe ma te faariro ia ˈna ei Arii o te Basileia i te raˈi.—Mat. 28:7, 18-20.

11. Eaha ta te Bibilia i tohu no nia i te mau tavini a Iehova i teie tau?

¹¹ Te haapii mai ra te hiˈoraa o Iesu ia vai taiva ore ia Iehova e i to ˈna nunaa. E tumu maitai e na reira ˈi tatou. E nehenehe tatou e ite e te aratai ra Iehova i to ˈna nunaa i teie anotau hopea. E tauturu oia ia ratou ia faaite i te parau mau na te ao atoa nei e o ratou anaˈe te rave ra i teie ohipa. Oia atoa, mea hoê mau â e mea oaoa ratou no te mau haapiiraa atoa ta Iehova i horoa ia ratou. Ua faataa Iehova i te reira a parau ai oia: “Inaha, e himene hua to ˈu ra mau tavini i te oaoa aau ra.”—Isa. 65:14.

12. E nafea tatou ia hiˈo i te mau hape a vetahi ê?

¹² Te oaoa mau nei tatou e te aratai e te  tauturu ra Iehova ia tatou no te rave i te mau ohipa maitatai e rave rahi. Te taa-ê-raa no te feia i roto i te ao a Satani, aita ratou e oaoa ra e aita to ratou e tiaturiraa no a muri aˈe. E ere i te haerea paari, e ere atoa i te mea tano ia faarue ia Iehova e i to ˈna nunaa, no te mea noa e ua rave aore ra ua parau te hoê taata i roto i te amuiraa i te tahi mea tano ore! E mea tia ia vai taiva ore tatou ia Iehova e ia pee i ta ˈna aratairaa. E titau-atoa-hia ia tatou ia haapii e nafea ia hiˈo e eaha to tatou huru i te mau hape a vetahi ê?

13, 14. (a) No te aha ia faaoromai tatou te tahi i te tahi? (b) Eaha te parau fafau ta tatou e haamanaˈo?

¹³ Eaha te tia ia oe ia rave ia parau aore ra ia rave to tatou mau taeae i te tahi mea o te haamauiui ia tatou? Te horoa ra te Bibilia i teie aˈoraa: “Eiaha ia ru noa to aau i te riri, tei te opu o te maamaa ra te riri i te vai-maite-raa.” (Koh. 7:9) E taata tia ore anaˈe tatou e e hape tatou. Eiaha ïa tatou e tiai e e parau e e rave iho â to tatou mau taeae i te mea tano. E ere i te mea maitai ia tamau i te manaˈo i ta ratou mau hape. Ia na reira tatou, eita tatou e oaoa faahou a tavini ai ia Iehova. Te mea ino roa ˈtu â, e nehenehe to tatou faaroo e paruparu e e faarue paha tatou i te faanahonahoraa a Iehova. I muri iho, eita ta tatou e nehenehe e tavini ia Iehova aore ra e tiaturi e ora i roto i ta ˈna ao apî.

¹⁴ Eaha ïa te nehenehe e tauturu ia oe ia oaoa noa i te tavini ia Iehova ia rave vetahi ê i te tahi mea o te haapeapea ia oe? A haamanaˈo noa i teie parau fafau tamahanahana mau: “Inaha, te hamani nei au i te raˈi apî e te fenua apî, e ore hoi tei mutaaihora e manaˈohia, e ore e faatupu-faahou-hia i roto i te aau: Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.” (Isa. 65:17; Pet. 2, 3:13) E horoa mai Iehova i teie mau haamaitairaa ia vai taiva ore tatou ia ˈna.

15. Eaha ta Iesu i faaue ia tatou ia rave ia hape vetahi ê?

¹⁵ Mea papu, aita â tatou i roto i te ao apî. No reira, ia haamauiui mai te tahi taata ia tatou, mea titauhia ia feruriruri i ta Iehova e hinaaro ra ia rave tatou. Ei hiˈoraa, ua parau Iesu: “Ia faaore hoi outou i ta vetahi ê ra hapa, e faaore atoa mai to outou Metua i te ao ra i ta outou. Ia ore râ outou ia faaore i ta vetahi ê ra hapa, e ore atoa to outou Metua e faaore mai i ta outou hapa.” Ua ani Petero ia Iesu e e faaore anei tatou e “hitu” taime, ua pahono atu Iesu: “Aore au i parau atu ia oe e, Ia hitu; ia hitu râ ahuru i te hituraa.” Ua haapii mai Iesu e mea tia ia ineine tatou i te faaore i ta vetahi ê mau hapa.—Mat. 6:14, 15; 18:21, 22.

16. Eaha te hiˈoraa maitai ta Iosepha i vaiiho mai?

 ¹⁶ Te haapii mai ra te hiˈoraa o Iosepha e nafea tatou ia haapeapea mai vetahi ê ia tatou. O Iosepha anaˈe e to ˈna taeae apî aˈe te mau tamaiti a Iakoba e Rahela. Ahuru tamaiti ê atu a Iakoba, ua here râ oia ia Iosepha hau atu i te taatoaraa. Ua pohehae roa ratou ia Iosepha. Inaha, no to ratou riri ia ˈna, i hoo ai ratou ia ˈna ei tîtî e ua afaihia oia i Aiphiti. I muri aˈe e rave rahi matahiti, ua faariro te arii no Aiphiti ia Iosepha ei taata puai roa ˈˈe i raro aˈe ia ˈna o tera fenua, no te mea ua faahiahia roa oia i ta Iosepha ohipa. I muri aˈe, ua haere mai te mau taeae o Iosepha i Aiphiti no te hoo i te maa, no te oˈe e itehia ra. A ite ai ratou ia Iosepha, aita ratou i taa o vai mau na oia, ua haamanaˈo ra oia ia ratou. Noa ˈtu ta ratou hamani-ino-raa ia ˈna, aita oia i faautua ia ratou. Ua tamata oia ia ratou no te ite ua taui mau ra anei ratou. A taa ˈi ia Iosepha e ua taui ratou, ua parau oia ia ratou e o ˈna to ratou taeae. I muri aˈe, ua tamahanahana oia ia ratou e ua parau: “Eiaha e mǎtaˈu: na ˈu outou e faaamu, e ta outou mau tamarii atoa.”—Gen. 50:21.

17. Eaha ta oe e rave ia hape vetahi ê?

¹⁷ A haamanaˈo e e hape te taata atoa, e nehenehe atoa oe e haamauiui ia vetahi ê. No reira, ia taa ia oe e ua haamauiui oe i te tahi atu taata, a pee i te aˈoraa Bibilia. A ani ia ˈna ia faaore i ta oe hapa e a tamata i te faahau e o ˈna. (A taio i te Mataio 5:23, 24.) Mea au roa na tatou ia faaore vetahi ê i ta tatou hapa. Mea tia ïa ia na reira tatou i nia ia ratou. Te parau mai ra te Kolosa 3:13: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai [“ia Iehova,” New World Translation] atoa i faaore i ta outou na, e na reira atoa outou.” Ia here mau â tatou i to tatou mau taeae, eita tatou e tamau i te inoino i te mau mea ta vetahi ê i rave na mua ˈˈe. (Kor. 1, 13:5) Ia faaore tatou i ta vetahi ê hapa, e faaore atoa Iehova i ta tatou hapa. Ia hape vetahi ê, e faaite anaˈe i te aroha hamani maitai ia ratou mai to tatou Metua ra ia Iehova i na reira i nia ia tatou.—A taio i te Salamo 103:12-14.