Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 1 2016

 TUMU PARAU MATAMUA | EAHA TO TE ATUA MANA‘O I TE TAMA‘I?

To te Atua mana‘o i te tama‘i i teie mahana

To te Atua mana‘o i te tama‘i i teie mahana

Te haamauiuihia nei te taata. E rave rahi te pure tamau ra i te Atua e te uiui ra e ore anei te ino i te hoê mahana. Te faaroo ra anei te Atua i ta ratou mau taparuraa? E te feia e faatupu i te tama‘i ia faaea ratou i te hamani-ino-hia, te turu ra anei te Atua ia ratou?

I te tama‘i Aramagedo te mau tama‘i atoa e ore roa ’i

Na mua, ia papu ia oe i teie parau: Te ite ra te Atua i te mauiui e tupu nei na te ao e e ohipa ta ’na e faaineine ra i te rave. (Salamo 72:13, 14) I roto i ta ’na Parau, te Bibilia, te fafau ra te Atua i “tei hamani-ino-hia ra, o te ora ïa ta ’na e tuu mai.” Afea? “Ia fa mai te Fatu ra o Iesu mai te ra‘i mai, ma tana mau melahi mana atoa ra . . . i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia.” (Tesalonia 2, 1:7, 8) E fa mai Iesu i te mahana ta te Bibilia e faaite ra mai “te tama‘i i taua mahana rahi o te Atua Puai hope,” parau-atoa-hia, Aramagedo.—Apokalupo 16:14, 16.

I tera tama‘i, eita te Atua e faaohipa i te taata. Ua maiti oia i ta ’na Tamaiti, Iesu Mesia, oia atoa te tahi atu mau melahi puai no te aro i te feia iino. E faaore te mau nuu o te ra‘i i te mau ohipa ino atoa.—Isaia 11:4; Apokalupo 19:11-16.

Tae roa mai i teie mahana, aita te mana‘o o te Atua i te tama‘i i taui. Ua riro noa te reira ei ravea no te faaore i te mauiui e te ino. Ua haapapu tei tupu i te roaraa o te tau, o te Atua ana‘e te tano ia maiti afea tera tama‘i e tupu ai e o vai te apiti i tera aroraa. Mai ta tatou i ite a‘enei, ua faaoti a‘ena te Atua eaha te tama‘i o te faaore i  te ino e te faaora i te feia e mauiui ra. Ua maiti atoa o ta ’na Tamaiti, Iesu Mesia, te tia ’tu no te tama‘i. Aita ïa te Atua e turu ra i te mau tama‘i e tupu ra na te ao nei noa ’tu eaha te tumu o te reira.

A feruri na i te tahi tamaiti o te taputô e to ’na taeae, aita râ te metua tane i reira. E faaea raua i te taputô maa taime no te niuniu i te papa. E parau te tahi tamaiti, na to ’na taeae i haamata. Area te tahi atu, e pahono ïa ua haamauiui to ’na taeae ia ’na. Te tiaturi ra toopiti e turu atu te papa. Ua faaroo te metua tane i te faataaraa a te tahi e te tahi. Ua faaue ia faaea i te tama‘i e ia tiai ia ho‘i atu o ’na i te fare no te faaafaro i te fifi. E tiai na tamaiti e piti maa taime. Aita râ i maoro, ua taputô faahou. I te taeraa ’tu te papa, aita oia i mauruuru ia raua toopiti e ua faautua ’tu no to raua faaroo ore.

I teie mahana, e pinepine te mau nunaa i te ani i te haamaitairaa a te Atua. Aita râ o ’na e turu ra i te tahi noa ’‘e nuu tama‘i. I roto i ta ’na Parau, te Bibilia, te na ô maitai ra oia:“Eiaha roa te ino e tahoohia i te ino i te taata atoa nei,” e “eiaha outou e tahoo.” (Roma 12:17, 19) Ua faaite atoa e tia i te taata ia “tiai maite atu” ia ohipa o ’na i Aramagedo. (Salamo 37:7) Ia ore, ua riro ta ratou mau tama‘i ei patoiraa teoteo e eita roa oia e mauruuru i te reira. I Aramagedo, e faaite te Atua i to ’na riri e e faaafaro oia i te mau fifi atoa i muri mai i te mau aroraa a te mau nunaa. I muri iho, e “faaore oia i te tama‘i e tae roa a‘enei i te hopea fenua!” (Salamo 46:9; Isaia 34:2) I te tama‘i Aramagedo ïa te mau tama‘i atoa e ore roa ’i.

E rave rahi atu â haamaitairaa ta te Basileia o te Atua e hopoi mai. Ua faahiti Iesu i tera faatereraa i roto i ta ’na pure tuiroo a na ô ai: “Ia tae to oe ra basileia. Ia haapaohia to oe hinaaro i te fenua nei mai tei te ra‘i atoa na.” (Luka 11:2) Eita noa te Basileia o te Atua e faaore i te mau tama‘i atoa, i te tumu râ o te reira, te ino. * (Salamo 37:9, 10, 14, 15) Te taahia ra ïa no te aha te mau pǐpǐ a Iesu e tiai ru ai i te mau haamaitairaa a te Basileia o te Atua.—Petero 2, 3:13.

E tiai maoro anei tatou i te taime e faaore ai te Basileia o te Atua i te mauiui, te hamani-ino-raa e te ino? Te tupu ra te mau parau tohu Bibilia. Te faaite ra te reira te ora nei tatou i te “anotau hopea” o te faanahoraa o teie nei ao. (Timoteo 2, 3:1-5) * Fatata roa tera anotau i te hope i te Basileia o te Atua i te tama‘i Aramagedo.

Mai tei faaitehia ’tu, e haamouhia te feia i patoi i te “faaroo i te evanelia o to tatou Fatu o Iesu Mesia.” (Tesalonia 2, 1:8) Eita râ te Atua e hinaaro ia pohe noa ’‘e te hoê noa ’tu e taata ino. (Ezekiela 33:11) I te mea “aita roa i hinaaro e ia pohe atu te hoê” i te tama‘i hopea, te ara nei oia ia porohia te parau apî oaoa no nia i to tatou Fatu Iesu Mesia e ati noa ’‘e te fenua, ia ite te mau nunaa atoa hou te hopea. (Petero 2, 3:8, 9; Mataio 24:14; Timoteo 1, 2:3, 4) Na roto i te ohipa pororaa na te ao a te mau Ite no Iehova, e nehenehe te taata e ite o vai te Atua, e faaroo i te parau apî oaoa no nia ia Iesu e e ite i te mahana e ore roa ’i te tama‘i.

^ par. 9 E haamou atoa te Basileia o te Atua i to tatou enemi, te pohe. E rave rahi roa taata ta te Atua e faatia mai i te ora, mai tei pohe i te tama‘i.

^ par. 10 No te ite atu â no nia i te mau mahana hopea, a hi‘o i te pene 9 o te buka Eaha ta te Bibilia e haapii mau ra? piahia e te mau Ite no Iehova.

No te ite atu â

No te aha te mau Ite no Iehova e ore ai e haere i te tama‘i?

Ua matauhia te Ite no Iehova no te ore e haere te tama‘i. Haapii no te aha?