Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 1 2016

 UA TAUI TE BIBILIA I TO ’U ORARAA

Ua mana‘o vau tera te oraraa mau

Ua mana‘o vau tera te oraraa mau
  • MATAHITI FANAURAA: 1982

  • FENUA: PORONIA

  • AAMU: TAATA INO, RAVE I TE RAAU TAERO E IMI I TE OHIPA AUFAU-MAITAI-HIA

NA MUA ’‘E:

Ua fanauhia vau i te tahi oire iti i Poronia. E ere i te mea atea roa i te otia fenua o Heremani. Mea rahi te mau vahi faaapu e faaamuraa animara, oia atoa te mau ururaau. Mea hau roa to matou oraraa. Ua faaitoito mai to ’u na metua here ia riro ei taata maitai, ia ohipa maite i te fare haapiiraa e ia imi i te ohipa aufau-maitai-hia.

Ua haamata râ te fifi i to ’u haereraa i te haapiiraa teitei i te oire Wrocław no te haapii no nia i te ture. Mea atea te faaearaa o to ’u na metua e maiti atura vau i te mau amuimuiraa iino. Mea au roa na ’u te tueraa popo. Ua turai mai râ to ’u mau hoa apî ia haafaufaa roa ino i te reira. No Varsovie mai te pǔpǔ ta ’u i turu na. I te mau hopea hebedoma, e apee au ia ratou noa ’tu eaha te vahi ta ratou e hauti. I tera mau tere, te vai ra te inu-rahi-raa i te ava, te raau taero e te tahi taime, te taputôraa e te feia turu i te tahi atu pǔpǔ tue popo. No ’u, ua riro te reira ei ravea no te haamoe i te ahoaho o te oraraa. Ua ite râ vau, e fifi ta ’u tapiraa i te toroa i te pae o te ture ia tapeahia vau e te mutoi.

Mea au roa na matou te mau hoa e haere i te mau vahi inuraa e fare oriraa. E pinepine atoa matou i te apiti i te taputôraa i roto i te mau aroâ. Ua tapeahia vau e te mutoi e rave rahi taime, e ravea noa râ ta ’u ia ore au ia haafifihia i mua i te ture. I te tahi taime, mea na roto ïa i te petaraa. Ua mana‘o vau tera te oraraa mau. I roto râ ia ’u, ua ite au mea ino ta ’u e rave ra. E haere na vau i te mau Tapati atoa i te fare pureraa no te tamǎrû i to ’u mana‘o haava.

UA TAUI TE BIBILIA I TO ’U ORARAA:

I 2004, e piti Ite no Iehova tei patoto mai i te opani e ua farii au i te aparau i nia i te Bibilia. I to ’u iteraa eaha mau na te hoê Kerisetiano, ua haamata to ’u mana‘o haava i te faahapa mai. Ua ite au e tia ia faaea i te inu rahi i te ava, te rave i te raau taero e te faahoa i te feia o te ore e haapao i te mau aratairaa Bibilia. Ua taa atoa ia ’u, e titauhia ia faarue i tera huru taata ino to ’u. Ua ite au e tia ia taui, ua tamau noa râ i te rave i te mea ino.

I te tahi râ po, ua taputô vau na muri e vau taata. Ua haamana‘o vau ia ’u i te tarava-noa-raa i roto i te aroâ, ua tupaihia e ua tuehia to ’u upoo. Ua fatata roa i te pohe, pure a‘era vau e na ô atura:  “Iehova e, aroha mai na ia ’u. Aita vau i haapao maite i ta oe Parau. Mai te peu e ora ’tu vau, e haapii au i te Bibilia e te mau Ite no Iehova e e taui atoa.” Ua ora mai au e ua tapea i ta ’u i parau ma te haapii i te Bibilia.

I 2006, ua tere au i Beretane. Ua hinaaro ia noaa mai te moni e navai no te ho‘i i Poronia no te fana‘o i te tahi parau tuite teitei a‘e i te pae o te ture. Ua tamau vau i ta ’u haapiiraa Bibilia e hoê irava tei haaputapû mau ia ’u. Ua papai te aposetolo Paulo: “Oia mau ïa e mea faufaa ore atoa te mau mea atoa nei ia ’u, i te maitai rahi ra i te ite i te Mesia i tau Fatu ra ia Iesu: e faarue ai au i te mau mea atoa ra, e e aua ïa ia ’u, ia noaa ia ’u te Mesia.” (Philipi 3:8) Mai ia ’u, e taata ino te aposetolo Paulo na mua ’‘e e ua haere atoa hoi e haapii i te ture. (Ohipa 8:3) Ua ite râ oia i muri a‘e, te vai ra te tahi oraraa maitai a‘e: E tavini i te Atua e e tutava i te pee i te hi‘oraa o Iesu. Ua feruriruri au i te hi‘oraa o Paulo e ua taa eita vau e oaoa i te ohipa aufau-maitai-hia e no to ’u huru ino mau. Ua tiaturi i te mea ua tia ia Paulo ia taui, e nehenehe atoa ïa ta ’u. Ua faaoti atura vau i te faaea i Beretane e ua tuu i te hiti i ta ’u tapiraa i te toroa faahiahia.

Rahi atu â vau i te haapii no nia ia Iehova, rahi atu â vau i te here ia ’na. Ua putapû roa vau i te ite e faaore Iehova i te hapa a te feia o te hinaaro mau e taui. (Ohipa 2:38) E i to ’u feruriruriraa i nia i te Ioane 1, 4:16 o te parau ra “e aroha te Atua,” ua taa ’tura vau no te aha mea au ore na te Atua i te feia mea ino i nia ia vetahi ê.

Ua hinaaro vau e riro atoa ei melo o tera fetii taeae oaoa

Ua faahiahia atoa vau i te huru o te mau Ite no Iehova. Ua ite mau vau te tutava ra ratou i te haapao i te mau faaueraa Bibilia i roto i te oraraa. Ua hinaaro vau e riro atoa ei melo o tera fetii taeae oaoa. Ua rave au i te mau tutavaraa e tauiraa i roto i to ’u oraraa, e ua bapetizohia ei Ite no Iehova i 2008.

Te oaoa nei mâua Esther i te haapii i te Bibilia i te feia e paraparau ra i te reo o Poronia

TO ’U FAUFAARAAHIA:

Ua taui te Bibilia i te hoê taata ino mau tei tapi na i te toroa faahiahia, tei rave i te raau taero e tei inu rahi i te ava. Ua riro ei tavini no te Atua o te oaoa ra i te haapii i te Bibilia ia vetahi ê. Te au noa ra vau e mataitai i te tueraa popo, ua faaoti papu râ i te vaiiho i te reira i to ’na vairaa mau.

I teie nei, ua faaipoipohia vau ia Esther, te tahi tavini o te Atua nehenehe mau. Te oaoa nei mâua i te haapii i te Bibilia i te feia e paraparau ra i te reo o Poronia i te pae Apatoerau o Beretane. I teie nei au i ite ai te oaoa mau. E mana‘o haava maitai e e oraraa oaoa e faufaa mau to ’u.

No te ite atu â

PARAU APÎ OAOA A TE ATUA

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.