Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TENUARE 2016

A faaoti papu “ia vai maite mai â te aroha taeae”!

A faaoti papu “ia vai maite mai â te aroha taeae”!

“Ia vai maite mai â te aroha taeae.”—HEB. 13:1.

HIMENE: 72, 119

1, 2. No te aha Paulo i papai ai i te hoê rata no te mau Kerisetiano Hebera?

I TE matahiti 61, ua fana‘o te mau amuiraa no Iseraela i te hoê taime hau. Noa ’tu ua tapeahia te aposetolo Paulo i Roma, ua tiaturi oia e e matara oioi mai oia i te fare tapearaa. No matara noa maira to ’na hoa pororaa ra o Timoteo e ua hinaaro ru raua e farerei i te mau taeae i Iudea. (Heb. 13:23) I roto noa râ e pae matahiti, ua titauhia i te mau Kerisetiano i Iudea e o tei ora iho râ i Ierusalema ia haa oioi. No te aha? Ua parau a‘ena Iesu i ta ’na mau pǐpǐ e ia ite ana‘e ratou e ua haaatihia Ierusalema e te mau faehau, e mea tia ia faarue ratou i te oire.—Luka 21:20-24.

2 E 28 matahiti a‘enei to Iesu horoaraa i teie faaararaa i ta ’na mau pǐpǐ. I te roaraa o taua taime ra, ua vai taiva ore te mau Kerisetiano i Iseraela noa ’tu e rave rahi hamani-ino-raa e tamataraa. (Heb. 10:32-34) Ua hinaaro râ Paulo ia faaineine ratou no te ohipa e tupu i muri a‘e, e o ta ratou ïa i faaruru ei tamataraa rahi roa ’‘e o to ratou faaroo. (Mat. 24:20, 21; Heb. 12:4) Ua titauhia ia ratou ia faatupu rahi atu â i te faaoromai e te faaroo no te auraro i ta Iesu mau parau o tei faaora ia ratou.  (A taio i te Hebera 10:36-39.) No reira Iehova i turai ai ia Paulo ia papai i te hoê rata na teie mau taeae e tuahine here. No reira teie rata i piihia ’i te buka Hebera, no te faaitoito ïa ia ratou no te ohipa e tupu mai i muri a‘e.

3. No te aha e titauhia ia tatou ia haafaufaa i te buka Hebera?

3 Ei tavini a te Atua, e titauhia ia tatou ia haafaufaa i te buka Hebera. No te aha? No te mea te faaruru atoa ra tatou i te hoê â tupuraa i to te mau Kerisetiano no Iudea. Te ora nei tatou i te hoê ‘anotau ati rahi,’ e e rave rahi Kerisetiano taiva ore tei faaoromai i te mau tamataraa aore ra hamani-ino-raa rahi mau. (Tim. 2, 3:1, 12) No te rahiraa râ o tatou, te fana‘o nei i te hau no te mea aita tatou e faaruru roa ra i te mau hamani-ino-raa. No reira, mai te mau Kerisetiano i te tau o Paulo, e titauhia ia vai ara noa tatou. No te aha? E fatata roa tatou i te ite i te tamataraa rahi roa ’‘e o to tatou faaroo!—A taio i te Luka 21:34-36.

4. Eaha te irava matahiti, e no te aha mea tano te reira?

4 Eaha te tauturu ia tatou ia faaineine no teie tupuraa no a muri a‘e? I roto i te buka Hebera, ua faahiti Paulo e rave rahi ohipa o te tauturu ia tatou ia haapuai i to tatou faaroo. Ua faataahia hoê o te reira ei haamana‘oraa i roto i te Hebera 13:1 e o te faaitoito mai ra: “Ia vai maite mai â te aroha taeae.” Ua maitihia te reira ei irava matahiti 2016.

Ta tatou irava matahiti 2016: “Ia vai maite mai â te aroha taeae.”—Hebera 13:1

EAHA TE AROHA TAEAE?

5. Eaha te aroha taeae?

5 Eaha te aroha taeae? Te auraa o te parau Heleni ta Paulo i faaohipa, o te “here no te hoê taeae” ïa. Mea puai e mea tamahanahana te aroha taeae i rotopu i te mau melo utuafare aore ra i te mau hoa piri. (Ioa. 11:36) Eiaha tatou e haa mai te mea ra e e taeae e tuahine tatou, e taeae e e tuahine iho â tatou. (Mat. 23:8) Ua na ô Paulo: “Ei atiraa aroha mau to outou ia outou iho, i te aroha taeae ra; i te faaturaraa ’tu te tahi i te tahi.” (Roma 12:10) Te faaite mai ra teie mau parau e mea puai roa to tatou here no to tatou mau taeae. E tauturu mai teie aroha taeae e oia atoa te here niuhia i nia i te mau faaueraa tumu Kerisetiano i te nunaa o te Atua ia faatupu i te auhoaraa piri te tahi i te tahi e ia vai hoê noa.

6. E nafea te mau Kerisetiano mau e taa ’i i te auraa o te aroha taeae?

6 Ua ite-rahi-hia te parau “aroha taeae” i roto i te mau papai Kerisetiano. No te mau ati Iuda i na mua ’‘e, ua faahiti-pinepine-hia te parau “taeae” no te hoê fetii e i te tahi mau taime no te hoê taata e ere i te fetii, eiaha râ no te hoê taata e ere i te ati Iuda. No te mau Kerisetiano mau râ, o to tatou “taeae” ïa noa ’tu no teihea fenua ratou te Kerisetiano mau. (Roma 10:12) Ua haapii Iehova ia tatou ia here te tahi i te tahi mai te mau taeae. (Tes. 1, 4:9) No te aha râ mea faufaa no tatou ia faaite i te aroha taeae?

NO TE AHA MEA FAUFAA ROA IA TAMAU I TE FAAITE I TE AROHA TAEAE?

7. (a) Eaha te tumu faufaa roa ’‘e e faaite ai tatou i te aroha taeae? (b) A horoa i te tahi atu tumu e haapuai ai tatou i te aroha taeae no te tahi i te tahi.

7 Te faaue mai ra Iehova ia faaite tatou i te aroha taeae. Teie ïa te tumu faufaa roa ’‘e ia na reira ’i tatou. Eita roa ’tu tatou e here ia Iehova ia ore tatou e here i to tatou mau taeae. (Ioa. 1, 4:7, 20, 21) Te vai ra te tahi  atu tumu, e hinaarohia te tahi i te tahi i roto iho â râ i te mau tupuraa fifi mau. I to Paulo papairaa i ta ’na rata no te mau Kerisetiano Hebera, ua ite oia e mea titauhia ia faarue vetahi i to ratou fare e ta ratou iho mau tao‘a. Ua faataa Iesu i taua taime fifi mau ra. (Mar. 13:14-18; Luka 21:21-23) No reira hou a tupu ai te reira, mea titauhia ia haapuai te mau Kerisetiano i to ratou aroha taeae no te tahi i te tahi.—Roma 12:9.

E titauhia ia haapuai i to tatou aroha taeae i teie nei â no te mea e tauturu te reira ia tatou ia faaoromai i te mau fifi atoa ta tatou e faaruru no a muri a‘e

8. Eaha te titauhia ia rave i teie nei â hou a haamata ’i te ati rahi?

8 Fatata te ati rahi roa ’‘e o te tuatapaparaa o te huitaata i te tae mai. (Mar. 13:19; Apo. 7:1-3) E titauhia ia faaroo tatou i teie a‘oraa: “Haere mai, e au mau taata e; a tomo i roto i to mau piha ra, a opani mai i to mau uputa ia oe ra; a faatapuni ai ia oe iho e vahi iti a‘e, ia hoê a‘e amoraa mata, e ia pee ê atu taua tahoo nei.” (Isa. 26:20) Peneia‘e ua taaihia tera mau “piha” i ta tatou mau amuiraa. I reira tatou e haamori ai ia Iehova e to tatou mau taeae e tuahine. Teie râ, e titauhia ia rave hau atu â i te haere-tamau-raa i te mau putuputuraa. Ua haamana‘o mai Paulo i te mau Kerisetiano Hebera e mea titauhia ia faaitoito te tahi i te tahi no te faaite i te here e no te rave i te maitai no te tahi i te tahi. (Heb. 10:24, 25) E titauhia ia haapuai i to tatou aroha taeae i teie nei â e e tauturu te reira ia tatou ia faaoromai i te mau fifi atoa ta tatou e faaruru no a muri a‘e.

9. (a) Eaha te mau tupuraa e nehenehe ai tatou e faaite i te aroha taeae i teie mahana? (b) A horoa mai i te mau hi‘oraa mea nafea te nunaa o Iehova i faaite ai i te aroha taeae.

9 I teie nei â, ua rau te mau tupuraa no te faaite i te aroha taeae hou a haamata ’i te ati rahi. Te mauiui ra e rave rahi o to tatou mau taeae no te aueueraa fenua, te pape pue, te mata‘i rorofai, te miti faaî aore ra no te tahi atu ati natura. Te faaruru ra te tahi mau taeae i te hamani-ino-raa. (Mat. 24:6-9) No te mea te ora ra tatou i roto i te hoê ao pi‘o i ite ai tatou i te fifi i te pae moni i te mau mahana atoa. (Apo. 6:5, 6) Teie râ, rahi atu â to tatou mau taeae i te faaruru i te mau fifi, rahi atu â ïa tatou i te faaite i to tatou here ia ratou. Noa ’tu eita teie ao e faaite i te here, e titauhia ia tamau tatou i te faaite i te aroha taeae.—Mat. 24:12. [1]

E NAFEA TO TATOU AROHA TAEAE E VAI NOA ’I?

10. Eaha ta tatou e hi‘opoa i teie nei?

10 Noa ’tu te mau fifi, e nafea tatou e papu ai e e tamau tatou i te faaite i te aroha taeae? E nafea e haapapu ai e te vai ra teie aroha no to tatou mau taeae? I muri iho i to ’na parauraa, “ia vai maite mai â te aroha taeae,” ua faaite te aposetolo Paulo e rave rahi ravea ia na reira atoa te mau Kerisetiano. E hi‘opoa ana‘e i teie nei e ono o te reira.

11, 12. Eaha te auraa ia faaite i te farii maitai? (A hi‘o i te hoho‘a matamua.)

 11 “Eiaha e faaore i te ite atu i te taata ěê ra.” (A taio i te Hebera 13:2.) Eaha te auraa o te parau ra “ite atu”? O “te farii maitai atu i te taata ěê ra” te auraa o te parau ta Paulo i faaohipa na roto i te reo tumu. E haamana‘o paha teie parau ia tatou ia Aberahama e ia Lota. Teie na taata e piti o tei faaite i te farii maitai i te mau taata ěê ta raua i ore i matau. Ua ite râ Aberahama e Lota e e melahi hoi taua mau taata ěê ra. (Gen. 18:2-5; 19:1-3) Ua faaitoito teie mau hi‘oraa i te mau Kerisetiano Hebera ia faaite i te aroha taeae ma te farii maitai i te taata.

12 E nafea e faaite ai i te farii maitai ia vetahi ê? E nehenehe tatou e farii i to tatou mau taeae e tuahine i te fare no te tamaa aore ra no te faaitoito atu. Noa ’tu aita tatou i matau maitai i to tatou tiaau haaati e ta ’na vahine, e nehenehe tatou e titau manihini ia raua ia haere mai raua i ta tatou amuiraa. (Ioa. 3, 5-8) Eita e titauhia ia faarahi i te maa aore ra ia haamâu‘a rahi i te moni. O te faaitoitoraa i to tatou mau taeae ta tatou fa, e ere râ no te faaiteite i ta tatou mau faufaa. Eita tatou e titau manihini noa i te feia o te titau manihini atoa mai ei faaho‘iraa i ta tatou. (Luka 10:42; 14:12-14) Te mea faufaa roa ’‘e, eita roa ’tu tatou e haa rahi a moe atu ai ia tatou i te faaite i te farii maitai!

13, 14. E nafea “e haamana‘o i te feia i tapeahia”?

13 “E haamana‘o i te feia i tapeahia.” (A taio i te Hebera 13:3.) A papai ai Paulo i te reira, ua mana‘o oia i te mau taeae tei tapeahia no to ratou faaroo. Ua haapopou Paulo i te amuiraa no te mea ua faaite ratou i te aroha i te feia tei tapeahia. (Heb. 10:34) Ua tauturu te tahi mau taeae ia Paulo i na maha matahiti oia i te fare tapearaa. Mea atea roa râ to vetahi ê faaearaa. E nafea ratou e tauturu ai ia Paulo? E pure u‘ana noa ratou no ’na.—Phil. 1:12-14; Heb. 13:18, 19.

E nehenehe tatou e pure no te mau taeae, te mau tuahine e no te mau tamarii tei te fare tapearaa i Érythrée

14 I teie mahana, e rave rahi Ite no Iehova tei te fare tapearaa no to ratou faaroo. E nehenehe te mau taeae e tuahine e ora ra i pihaiiho e tauturu ia ratou i roto i te tahi mau tuhaa. Teie râ, e rave rahi o tatou mea atea to ratou faaearaa i to tatou mau taeae tei te fare tapearaa. E nafea tatou e nehenehe ai e tauturu atu ma te ore e haamoe ia ratou? E turai mai te aroha taeae ia pure u‘ana tatou no ratou. Ei hi‘oraa, e nehenehe tatou e pure no te mau taeae, te mau tuahine e no te mau tamarii tei te fare tapearaa i Erythrée, oia atoa no to tatou mau taeae mai ia Paulos Eyassu, Isaac Mogos e Negede Teklemariam, e 20 matahiti i muri a‘e, tei te fare tapearaa noa â ratou.

15. E nafea tatou e haamaitai ai i to tatou faaipoiporaa?

15 “Ia haamaitaihia te faaipoiporaa i te taata atoa.” (A taio i te Hebera 13:4.) E nehenehe atoa tatou e faaite atu i to tatou  aroha taeae ma te vai mâ noa i te pae morare. (Tim. 1, 5:1, 2) Ei hi‘oraa, ia faaturi tatou e te hoê taeae aore ra e te hoê tuahine, e haamauiui tatou ia ’na e oia atoa i to ’na utuafare. E faaino tatou i te tiaturiraa e vai ra i rotopu i to tatou mau taeae. (Tes. 1, 4:3-8) A feruri atoa na i te huru aau o te hoê vahine ia ite oia e te mataitai ra ta ’na tane i te mau hoho‘a faufau. E mana‘o anei teie vahine e te here ra ta ’na tane ia ’na e te faatura ra oia i te faanahoraa o te faaipoiporaa?—Mat. 5:28.

16. E nafea te mauruuru e tauturu ai ia tatou ia faaite i te aroha taeae?

16 “Ia mauruuru i ta outou i noaa.” (A taio i te Hebera 13:5.) E tauturu mai te tiaturiraa ia Iehova ia mauruuru noa i ta tatou e fana‘o ra. E nafea te reira e tauturu ai ia tatou ia faaite i te aroha taeae? A faaite ai tatou i te mauruuru, e haamana‘o ïa tatou e mea faufaa a‘e to tatou mau taeae e tuahine i te moni aore ra i te mau tao‘a. (Tim. 1, 6:6-8) Eita tatou e amuamu no nia i to tatou mau taeae aore ra no nia i to tatou tupuraa i roto i te oraraa. Eita atoa tatou e pohehae ia vetahi ê aore ra e nounou. Ia mauruuru tatou, e faaite ïa i te aau horoa noa.—Tim. 1, 6:17-19.

17. Ia itoito mai tatou, e nafea te reira e tauturu ai ia tatou ia faaite i te aroha taeae?

17 “Ia faaitoito.” (A taio i te Hebera 13:6.) Ia tiaturi tatou ia Iehova, e horoa mai iho â oia i te itoito no te faaruru i te mau tamataraa ino mau. E tauturu mai te reira ia faatupu i te hoê mana‘o maitai. Ma te na reira, e faaite ïa tatou i te aroha taeae  na roto i te faaitoitoraa e te tamahanahanaraa i to tatou mau taeae e tuahine. (Tes. 1, 5:14, 15) I te roaraa o te ati rahi, e nehenehe atoa tatou e itoito mai a papu ai e e fatata to tatou faaoraraa.—Luka 21:25-28.

E nehenehe atoa tatou e itoito mai a papu ai e e fatata to tatou faaoraraa

18. E nafea tatou e nehenehe ai e faarahi atu â i to tatou aroha taeae no te mau matahiapo?

18 “E haamana‘o i to outou mau aratai.” (A taio i te Hebera 13:7, 17.) Te faaohipa ra te mau matahiapo i roto i ta tatou amuiraa i to ratou taime no te haa rahi no tatou. Ia feruri tatou i nia i te mau ohipa atoa ta ratou e rave ra no tatou, e rahi atu â to tatou here e to tatou mauruuru no ratou. Eita roa ’tu tatou e hinaaro ia ere ratou i to ratou oaoa aore ra ia inoino ratou no te tahi ohipa o ta tatou i rave. Teie râ, te hinaaro ra tatou e faaroo atu ma te aau tae. Ma te na reira, e “rahi roa te faatur[a] ia ratou ma te aroha, no ta ratou ra ohipa.”—Tes. 1, 5:13.

Te haafaufaa ra anei oe i te ohipa ta te mau matahiapo e rave ra no tatou? (A hi‘o i te paratarafa 18)

IA RAHI ATU Â I TE NA REIRA

19, 20. E nafea tatou e tamau ai i te faaite atu â i te aroha taeae?

19 Ua matauhia te mau Ite no Iehova no to ratou aroha taeae. Hoê â huru i te tau o Paulo. Ua faaitoito râ Paulo i te mau taeae ia faaite atu â i te here a na ô ai: “Ia rahi atu â to outou aroha.” (Tes. 1, 4:9, 10) Mea papu, e nehenehe e haamaitaihia i roto i tera tuhaa!

20 A taio ai tatou i te irava matahiti i ta tatou Piha a te Basileia i te roaraa o teie matahiti, a feruri maite ana‘e i teie mau uiraa: E nehenehe anei au e faaite atu â i te farii maitai? E nafea vau e tauturu ai i to ’u mau taeae tei te fare tapearaa? E faatura anei au i te faanahoraa a te Atua no nia i te faaipoiporaa? Eaha te tauturu ia ’u ia mauruuru noa? E nafea vau e tiaturi atu â ia Iehova? E nafea vau e faaroo atu â i te mau matahiapo? Ia haa rahi tatou no te haamaitai atu â i roto i na tuhaa e ono, aita noa te irava matahiti i tuu-noa-hia i roto i ta tatou Piha a te Basileia, no te haamana‘o râ ia tatou ia faaroo i te mau parau a Paulo: “Ia vai maite mai â te aroha taeae.”—Heb. 13:1.

^ [1] (paratarafa 9) No te ite i te mau hi‘oraa mea nafea te mau Ite no Iehova i faaite ai i te aroha taeae i roto i te mau tupuraa fifi, a hi‘o i Te Pare Tiairaa o te 15 no Tiurai 2002, api 8-9 e te buka Les Témoins de Jéhovah, prédicateurs du Royaume de Dieu, i te pene 19.