Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2016

A ohipa amui e te Atua: E itehia te oaoa

A ohipa amui e te Atua: E itehia te oaoa

“E teie nei te a‘o atoa ’tu nei matou, te rave ohipa amui nei, ia outou, e eiaha outou e farii faufaa ore noa i te aroha mau o te Atua.”—KOR. 2, 6:1.

HIMENE: 75, 74

1. Noa ’tu e o Iehova te Atua Teitei, eaha ta ’na e titau manihini ia vetahi ê ia rave?

O IEHOVA te Atua teitei. Ua poiete oia i te mau mea atoa e mea faito ore to ’na paari e to ’na puai. I muri iho i to ’na tautururaa ia Ioba ia taa i te reira, ua parau Ioba ia ’na: “Ua ite au e, e puaihope to oe, e e ore ta oe i opua ra e tia ia faaore.” (Ioba 42:2) E nehenehe Iehova e rave i te mau ohipa atoa ta ’na e faaoti i te rave ma te ore e titau i ta te tahi atu tauturu. Ua faaite râ oia i te here a titau manihini ai ia vetahi ê no te ohipa amui e o ’na e no te faatupu i ta ’na opuaraa.

2. Eaha te ohipa faufaa ta Iehova i hinaaro ia rave Iesu?

2 Ua poiete te Atua i ta ’na Tamaiti ra o Iesu hou oia a poiete ai i te taata e te tahi atu mau mea. Ua vaiiho Iehova i ta ’na Tamaiti ia tauturu ia ’na no te poiete i te tahi atu mau mea. (Ioa. 1:1-3, 18) Ua papai te aposetolo Paulo no nia ia Iesu: “Na ’na hoi  i hamani i te mau mea atoa nei, o to te ra‘i, e to te fenua nei, o tei itea ia hi‘o ra e tei ore i itea, te feia terono, e te feia hau, te hui arii, e te feia mana; e mea hamani-ana‘e-hia ïa e ana, e no ’na ana‘e.” (Kol. 1:15-17) No reira aita noa Iehova i horoa i ta ’na Tamaiti i te hoê ohipa faufaa, ua faaite atoa râ oia ia vetahi ê i te hopoia faufaa a ta ’na Tamaiti. Auê ïa fana‘oraa taa ê!

3. Ua titau manihini Iehova ia Adamu ia rave i te aha, e no te aha?

3 Ua hinaaro atoa Iehova ia ohipa amui mai te taata e o ’na. Ei hi‘oraa, ua farii oia ia Adamu ia horoa i te i‘oa o te mau animara. (Gen. 2:19, 20) A feruri na i te oaoa o Adamu a rave ai i teie ohipa! Ua hi‘opoa maite oia i te huru o te mau animara e ua maiti oia i te hoê i‘oa no te mau animara taitahi. No te mea na Iehova i poiete i te mau animara atoa, e nehenehe ïa oia e horoa i te i‘oa o te mau animara. Teie râ, ua faaite oia i to ’na here rahi no Adamu ma te farii ia ’na ia horoa i te i‘oa o te mau animara. Ua horoa atoa te Atua i te hopoia ia Adamu ia faariro i te fenua ei paradaiso. (Gen. 1:27, 28) Ua faaoti râ Adamu e faaea i te ohipa e te Atua e ei faahopearaa, ua mauiui rahi oia e ta ’na atoa mau huaai.—Gen. 3:17-19, 23.

4. Mea nafea vetahi e ohipa ’i e te Atua no te faatupu i to ’na hinaaro?

4 I muri iho, ua titau manihini te Atua i te tahi atu taata ia tavini e o ’na. Ua patu Noa i te araka o tei faaora ia ’na e to ’na utuafare i te roaraa o te diluvi. Ua faatiamâ Mose i te nunaa Iseraela mai Aiphiti mai. Ua aratai Iosua ia Iseraela i roto i te Fenua tǎpǔhia. Ua patu Solomona i te hiero i Ierusalema. Ua riro mai Maria ei metua vahine no Iesu. Ua haa teie feia taiva ore atoa e te tahi atu e o Iehova no te faatupu i to ’Na hinaaro.

5. I roto i teihea ohipa e nehenehe ai tatou e apiti, e te hinaaro ra anei Iehova ia apiti atoa tatou i roto i teie ohipa? (A hi‘o i te hoho‘a matamua.)

5 I teie mahana, te titau manihini ra Iehova ia tatou ia rave i te nehenehe ia tatou no te turu i to ’na Basileia. E rave rahi ravea ta tatou no te tavini i te Atua. Noa ’tu eita tatou e nehenehe e tavini ia ’na mai te taatoaraa, e nehenehe tatou pauroa e poro i te parau apî oaoa o te Basileia. E nehenehe Iehova e rave i teie ohipa o ’na ana‘e ma te paraparau tia ’tu mai te ra‘i mai i te taata i te fenua nei. Ua parau Iesu e e nehenehe Iehova e haaparaparau i te mau ofai ia vetahi ê no nia i te Arii o to ’na Basileia. (Luka 19:37-40) Ua farii râ Iehova ia riro tatou ei “rave ohipa” no ’na. (Kor. 1, 3:9) Ua papai te aposetolo Paulo: “E teie nei te a‘o atoa ’tu nei matou, te rave ohipa amui nei [e o ’na], ia outou, e eiaha outou e farii faufaa ore noa i te aroha mau o te Atua.” (Kor. 2, 6:1) E fana‘oraa taa ê rahi mau ia titau-manihini-hia tatou no te ohipa e te Atua. E hi‘o ana‘e i te tahi mau tumu e fana‘o ai tatou i te oaoa rahi maoti te reira.

E HOPOI MAI TE OHIPARAA E TE ATUA I TE OAOA

6. Mea nafea te Tamaiti fanau tahi a te Atua i faataa ’i i to ’na huru aau no nia i ta ’na ohipa e to ’na Metua?

6 E ite noa te mau tavini a Iehova i te oaoa a ohipa ’i e te Atua. Hou a haere mai ai i te fenua nei, ua parau te Tamaiti fanau tahi a te Atua: “Ia Iehova ra vau i haamata ’i oia i ta ’na ohipa . . . Tei pihaiiho hoi au ia ’na i reira mai te tamaiti faaamu; e te oaoa noa ra vau i te mau mahana atoa ra, i te oaoa tamau-maite-raa i mua i tana aro.” (Mas. 8:22,  30) A ohipa ’i e to ’na Metua, ua oaoa Iesu i te faatupu e rave rahi ohipa e ua ite atoa oia e ua here Iehova ia ’na. E no tatou ïa?

Eaha te ohipa faahiahia roa ’‘e ta tatou e rave no te haapii i te taata i te parau mau (A hi‘o i te paratarafa 7)

7. No te aha e hopoi mai te ohipa pororaa i te oaoa?

7 Ua parau Iesu e e oaoa tatou ia horoa ’tu e oia atoa, ia rave mai. (Ohi. 20:35) Ua hopoi mai te reira i te oaoa a farii ai tatou i te parau mau. No te aha râ e oaoa atoa ’i tatou ia faaite atu i te parau mau ia vetahi ê? No te mea te ite ra tatou i to ratou oaoa a taa ’i ia ratou eaha ta te Bibilia e haapii ra e a haamata ’i te hoê taairaa e te Atua. E oia atoa, i te iteraa e ua taui ratou i to ratou feruriraa e haerea. O te pororaa te ohipa faufaa roa ’‘e ïa e te oaoa mau ta tatou e nehenehe e rave. Maoti te reira, e nehenehe te feia o te riro mai ei hoa o te Atua e fana‘o i te ora mure ore.—Kor. 2, 5:20.

8. Eaha ta te tahi mau taata i parau no nia i te oaoa ia ohipa e o Iehova?

8 Ia tauturu tatou ia vetahi ê ia haapii no nia i te Atua, ua taa ia tatou e e faaoaoa tatou ia Iehova e e haafaufaa oia i ta tatou mau tutavaraa no te tavini ia ’na. (A taio i te Korinetia 1, 15:58.) Te na ô ra Marco, o tei ora i Italia: “E oaoa rahi to ’u i te iteraa e ua horoa vau i te mea maitai roa ’‘e na Iehova, eiaha râ na te hoê taata e moe oioi ia ’na i ta ’u i rave.” Hoê â mana‘o to Franco, o te tavini ra i Italia, te parau ra oia: “Maoti ta ’Na Parau e ta ’na mau faanahoraa pae varua, ua haamana‘o mai Iehova i te mau mahana atoa i to ’na here no tatou e mea faufaa ana‘e te mau mea atoa ta tatou e rave no ’na noa ’tu e e au ra e no tatou mea faufaa ore ta tatou mau tutavaraa. Mea oaoa ïa ia rave i te ohipa e te Atua e mea faufaa te reira i roto i to ’u oraraa.”

E HAAFATATA ’TU Â TE OHIPARAA E TE ATUA IA TATOU IA ’NA E IA VETAHI Ê

9. Eaha te taairaa e vai ra i rotopu ia Iehova e Iesu, e no te aha?

9 Ia ohipa amui tatou e te feia ta tatou e here ra, e haafatata ’tu â tatou ia ratou. E ite  atu â ïa tatou no nia ia ratou e no nia i to ratou mau huru maitatai. E ite atoa tatou eaha ta ratou e opua i te rave e e nafea e naea ’i ia ratou i te reira. Ua ohipa Iesu e o Iehova peneia‘e e miria matahiti. No te puai râ o to raua here no te tahi e te tahi, aita hoê a‘e ohipa e nehenehe e haafifi i to raua taairaa. Ua faataa Iesu i to raua taairaa ma te parau: “O vau e te Metua ra, hoê â ïa.” (Ioa. 10:30) Ua hoê iho â raua e ua ohipa amui maitai atoa raua.

E haapuai te pororaa i to tatou faaroo no te mea te haamana‘o mai ra te reira i te mau parau fafau a te Atua e i ta ’na mau faaueraa tumu î i te here

10. No te aha e haafatata ’tu â ’i te pororaa ia tatou i te Atua e ia vetahi ê?

10 Ua ani Iesu ia Iehova ia paruru i ta ’na mau pǐpǐ. No te aha? Ua pure oia: “Ia hoê a‘e ratou mai ia tâua atoa nei â.” (Ioa. 17:11) Ia arataihia tatou e te mau faaueraa tumu a te Atua i roto i to tatou oraraa e ia faaite atu tatou i te reira i roto i te pororaa, e taa maitai ïa ia tatou i to ’na mau huru maitatai faahiahia mau. Te haapii ra tatou no te aha e haerea paari ia tiaturi i te Atua e ia pee i ta ’na aratairaa. Ia haafatata ’tu tatou i te Atua, e haafatata atoa mai oia ia tatou. (A taio i te Iakobo 4:8.) Hau atu â, e haafatata ’tu tatou i to tatou mau taeae e tuahine no te mea ua ite atoa tatou i te hoê â mau fifi e oaoaraa e o ratou e hoê â fa ta tatou. Te ohipa amui nei tatou, te oaoa amui nei e te faaruru amui nei tatou. Te parau ra Octavia, o te ora ra i Beretane: “Ua haafatata te ohiparaa e o Iehova ia ’u ia vetahi ê.” Te faataa ra oia e ua niuhia to ’na mau auhoaraa i nia i “te hoê â fa e aratairaa.” Mea papu, e na reira iho â tatou. I te iteraa i te mau tutavaraa o to tatou mau taeae no te faaoaoa ia Iehova, e haafatata ’tu â tatou ia ratou.

11. No te aha e haafatata ’tu â ’i tatou ia Iehova e i to tatou mau taeae i roto i te ao apî?

11 E puai to tatou here no te Atua e no to tatou mau taeae i teie nei â, e puai atu â râ te reira i roto i te ao apî. A feruri na i te mau ohipa faahiahia atoa ta tatou e rave a muri a‘e! E farii popou tatou i te feia e faatia-faahou-hia mai mai te pohe mai a haapii atu ai ia ratou no nia ia Iehova. E ohipa atoa tatou no te faariro i te fenua ei paradaiso. E oaoa rahi to tatou ia ohipa amui e ia naea riirii atu i te taata i te tia-roa-raa i raro a‘e i te faatereraa a te Mesia. E haafatata ’tu â ïa te mau taata atoa te tahi i te tahi e ia Iehova atoa, o “te haamâha nei i te hiaai o te mau mea ora atoa nei.”—Sal. 145:16.

E PARURU TE OHIPARAA E TE ATUA IA TATOU

12. E nafea te pororaa e paruru ai ia tatou?

12 Mea faufaa ia paruru i to tatou taairaa e o Iehova. Te ora nei tatou i roto i te ao a Satani, e ei taata tia ore, mea ohie no tatou ia feruri e ia haa mai ta to te ao. Mai te mea ra e, i roto i te hoê anavai mea opape, te au nei tatou. Tera râ, te turaihia ra tatou i roto i te  hoê vahi aita tatou e hinaaro e haere. No reira, mea tia ia faaohipa i to tatou puai atoa no te au i te tahi atu vahi o te anavai. Hoê â huru, mea faufaa ia haa rahi tatou no te ape i te aratairaa o te ao a Satani. E nafea ïa te pororaa e paruru mai ai? Ia paraparau tatou no nia ia Iehova e no nia i te Bibilia, ia tiatonu i nia i te mau ohipa faufaa e te maitai atoa. Eiaha râ i nia i te mau ohipa o te haaparuparu i to tatou faaroo. (Phil. 4:8) E haapuai te pororaa i to tatou faaroo no te mea te haamana‘o mai ra te reira i te mau parau fafau a te Atua e i ta ’na mau faaueraa tumu î i te here. E tauturu atoa mai te reira ia tatou ia faaite tamau i te mau huru maitatai ta tatou e hinaaro rahi no te paruru ia tatou iho ia Satani e i ta ’na ao.—A taio i te Ephesia 6:14-17.

Ia haa rahi tatou i roto i te ohipa a Iehova, aita e taime no te haapeapea rahi a‘e i to tatou mau fifi

13. Eaha ta te hoê tuahine no Auteralia i parau no nia i te pororaa?

13 Ia haa rahi tatou i roto i te pororaa, te haapiiraa e te tautururaa ia vetahi ê i roto i te amuiraa, e paruru te reira ia tatou no te mea aita e taime no te haapeapea rahi a‘e i to tatou mau fifi. Te parau ra Joel, o te ora ra i Auteralia: “Ua tauturu mai te ohipa pororaa ia ore e haapao rahi a‘e i to ’u mau fifi. Ua haamana‘o vau i te mau tautooraa ta te feia e faaruru ra e i te mau haamaitairaa ta ’u i fana‘o a faaohipa ’i au i te mau faaueraa Bibilia i roto i to ’u oraraa. Ua tauturu atoa te ohipa pororaa ia ’u ia faaite i te haehaa, maoti te reira i nehenehe ai au e tiaturi ia Iehova e i te mau taeae e tuahine.”

14. Na te aha e faaite e tei ia tatou ra te varua mo‘a o te Atua a faaoromai ai tatou i roto i te pororaa?

14 E horoa atoa mai te pororaa hau atu â tiaturiraa e tei ia tatou ra iho â te Atua. Ei hi‘oraa, ta oe ohipa, o te opereraa ïa i te faraoa na te taata o to oe nunaa. Eita oe e aufauhia no tera ohipa e e na oe iho e aufau i te mau haamâu‘araa. Eita atoa te rahiraa o te taata e hinaaro i te faraoa, e no vetahi, mea riri roa na ratou ia afai atu oe i te reira na ratou. E tamau noa anei oe i te rave i tera ohipa? Peneia‘e e haaparuparu te reira ia oe a hinaaro atu ai paha e faarue atu i teie ohipa. No te rahiraa o tatou, te tamau ra i te poro i te mau matahiti atoa noa ’tu e titauhia te taime, te moni e noa ’tu e faaooo mai te taata ia tatou aore ra e riri mai. Te haapapu ra te reira e te tauturu mai ra te varua mo‘a o te Atua ia tatou.

E FAAITE TATOU I TE HERE NO ’NA E NO VETAHI Ê A OHIPA ’I E TE ATUA

15. E nafea te ohipa pororaa i taaihia ’i i te opuaraa a Iehova no te huitaata?

15 E nafea te ohipa pororaa i taaihia ’i i te opuaraa a Iehova no te huitaata? Ua hinaaro te Atua ia ora te taata e a muri noa ’tu e aita te reira i taui a hara ’i Adamu. (Isa. 55:11) Ua rave te Atua i te hoê faanahoraa ia tiamâ mai tatou i te hara e te pohe. E nafea ïa? Ua haere mai Iesu i te fenua nei e ua pûpû oia i to ’na ora. No te fana‘o râ i to ’na tusia, mea faufaa no te taata ia auraro i  te Atua. Ua haapii ïa Iesu i te taata eaha ta te Atua e tiai ra ia ratou e ua faaue oia i ta ’na mau pǐpǐ ia na reira atoa. Ia poro e ia tauturu tatou ia vetahi ê ia riro mai ratou ei hoa no te Atua i teie mahana, te ohipa tia ’tu nei tatou e te Atua i roto i ta ’na faanahoraa î i te here no te faaora i te taata i te hara e te pohe.

16. E nafea ta tatou pororaa i taaihia ’i i te mau faaueraa rahi roa ’‘e a te Atua?

16 Ia tauturu tatou ia vetahi ê ia ite i te e‘a no te ora mure ore, e faaite ïa tatou e te here ra tatou ia ratou e ia Iehova atoa. Ua ‘hinaaro oia i te taata atoa ia ora, e ia noaa te ite i te parau mau.’ (Tim. 1, 2:4) Ua ani te hoê Pharisea ia Iesu eaha te faaueraa rahi roa ’‘e a te Atua, ua pahono atu Iesu: “Hinaaro oe i to Atua ia Iehova ma to aau atoa, e ma to varua [aore ra “ora,” Traduction du monde nouveau] atoa, e ma to mana‘o atoa. O te ture matamua teie e te hau i te rahi. E mai te reira atoa te piti; E aroha ’tu oe i to taata-tupu, mai to aroha ia oe iho na.” (Mat. 22:37-39) E auraro tatou i teie mau faaueraa ma te poro i te parau apî oaoa.—A taio i te Ohipa 10:42.

17. Eaha to outou huru aau no nia i te fana‘oraa taa ê e poro i te parau apî oaoa?

17 Auê ïa haamaitairaa ta tatou! Ua horoa mai Iehova i te hoê ohipa o te faaoaoa ia tatou, o te turai mai ia haafatata ’tu tatou ia ’na e i to tatou mau taeae e o te paruru i to tatou mau taairaa e o ’Na. Ma te na reira, e faaite ïa tatou i to tatou here no te Atua e no vetahi ê. E mirioni tavini a Iehova na te ao e e tupuraa taa ê to ratou. Noa ’tu mea apî tatou aore ra mea paari, mea ona aore ra mea veve, mea puai aore ra mea paruparu, e nehenehe tatou pauroa e faaite i to tatou faaroo ia vetahi ê. E tuea paha to tatou mana‘o e to Chantel, no Farani, o te na ô ra: “Ua parau mai te Atua puai roa ’‘e o te ao nui e o tei poiete i te mau mea atoa, te Atua oaoa: ‘A haere e paraparau! A paraparau no ’u, a paraparau ma to outou aau. E horoa ’tu vau i te puai, ta ’u Parau te Bibilia, te tauturu no te ra‘i mai e no te fenua nei, te hoê faaineineraa tamau e te mau faaueraa taa maitai i te taime au mau.’ Auê ïa fana‘oraa taa ê ia rave i ta Iehova e ani maira e ia ohipa amui e to tatou Atua!”