Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2016

“E haere atoa matou” na muri ia outou

“E haere atoa matou” na muri ia outou

“E haere atoa matou i ǒ na [aore ra na muri ia outou]: ite a‘enei matou e, tei ia outou te Atua.”—ZEK. 8:23.

HIMENE: 65, 122

1, 2. (a) Eaha ta Iehova i parau o te tupu ra i to tatou tau? (b) Eaha te mau uiraa ta tatou e pahono i roto i teie tumu parau? (A hi‘o i te hoho‘a matamua.)

UA PARAU Iehova no nia i to tatou tau, “e haru mai ai na taata tino ahuru no roto i te mau parau atoa o te mau fenua ra, i te hiti ahu o te hoê ati Iuda ta ratou e haru, a na ô atu ai, E haere atoa matou i ǒ na [aore ra na muri ia outou]: ite a‘enei matou e, tei ia outou te Atua.” (Zek. 8:23) Te mau “ati Iuda,” o te feia ïa ta te Atua i faatavai maoti to ’na varua mo‘a. Ua pii-atoa-hia ratou ‘te Iseraela o te Atua.’ (Gal. 6:16) Na “taata tino ahuru,” o te feia ïa e tiaturi e ora e a muri noa ’tu i te fenua nei. E fana‘oraa taa ê no ratou ia haamori ia Iehova e teie pûpû faatavaihia e ua ite ratou e ua haamaitai oia i teie pûpû.

2 Mai te peropheta Zekaria, ua faaite Iesu e ua hoê te nunaa o te Atua. Ua faaite atoa oia o vai te feia e tiai ru ra i te ora i te ra‘i ei “nǎnǎ iti” e te feia e tiai ru ra i te ora i te fenua nei ei “mamoe ê atu.” Ua parau râ Iesu e e ‘hoê nǎnǎ’ ratou pauroa  no te pee ia ’na, e ei tiai no ratou. (Luka 12:32; Ioa. 10:16) No te mea te vai ra na pûpû e piti, e ui paha vetahi: (1) Mea faufaa anei ia ite te mau “mamoe ê atu” i te i‘oa o te taatoaraa o te feia faatavaihia i teie mahana? (2) Eaha te titauhia i te feia faatavaihia ia mana‘o no nia ia ratou iho? (3) Ia haamata te tahi taata i roto i ta ’u amuiraa i te rave i te pane e te uaina i te Oroa haamana‘oraa, eaha to ’u huru i nia ia ’na? (4) Mea faufaa anei ia haapeapea vau i te maraaraa o te numera o te feia e rave ra i te pane e te uaina i te Oroa haamana‘oraa? E pahono mai teie tumu parau i teie mau uiraa.

MEA FAUFAA ANEI IA ITE TATOU I TE I‘OA O TE TAATOARAA O TE FEIA FAATAVAIHIA I TEIE MAHANA?

3. No te aha eita tatou e nehenehe ai e ite papu o vai tei ô i roto i na 144 000 taata?

3 Mea faufaa anei ia ite te mau “mamoe ê atu” i te i‘oa o te taatoaraa o te feia faatavaihia i teie mahana? Aita. No te aha? No te mea eita tatou e nehenehe e ite papu e e fana‘o iho â anei teie feia faatavaihia i ta ratou haamaitairaa. [1] Noa ’tu e ua titau manihini te Atua ia ratou ia haere i te ra‘i, e fana‘o ratou i ta ratou haamaitairaa ia vai taiva ore noa ratou. Ua ite Satani i te reira e e faaohipa ïa oia i te mau “peropheta haavare” no te haavare ia ratou. (Mat. 24:24) Aita i papu i te mau Kerisetiano faatavaihia e e fana‘o iho â ratou i ta ratou haamaitairaa tae atu i te taime e haapapu ai Iehova e ua haava oia ia ratou ei feia taiva ore. Ua horoa Iehova i teie farii maitai hopea, aore ra tapaoraa hopea, hou a pohe ai ratou aore ra hou a haamata ’i “te ati rahi.”—Apo. 2:10; 7:3, 14.

O Iesu to tatou Aratai e ia au i te Bibilia, mea titauhia ia pee tatou i to ’na noa hi‘oraa

4. Ia ore tatou e ite i te i‘oa o te feia faatavaihia atoa i teie mahana, e nafea te mau mamoe ê atu e “haere” ai e o ratou?

4 Ia ore tatou e ite i te i‘oa o te feia faatavaihia atoa i teie mahana, e nafea te mau mamoe ê atu e “haere” ai e o ratou? Te parau ra te Bibilia no nia i na “taata hoê ahuru” o tei haru i “te hiti ahu o te hoê ati Iuda . . . , a na ô atu ai, E haere atoa matou i ǒ na [aore ra na muri ia outou]: ite a‘enei matou e, tei ia outou te Atua.” Te faahiti ra te irava i te hoê noa ati Iuda. Tera râ, ua taaihia te ta‘o ra “outou” e “tei ia outou” hau atu hoê taata. Oia hoi, e ere teie ati Iuda i te hoê noa taata, o te taatoaraa o te pûpû o te feia faatavaihia. Ua ite te mau mamoe ê atu i te reira e te tavini ra ratou ia Iehova e taua pûpû ra. Aita ïa e faufaa no ratou ia ite i te i‘oa o te mau melo atoa o teie pûpû e ia pee ia ratou taitahi. O Iesu to tatou Aratai e ia au i te Bibilia, mea titauhia ia pee tatou i to ’na noa hi‘oraa.—Mat. 23:10.

EAHA TE TITAUHIA I TE MAU KERISETIANO FAATAVAIHIA IA MANA‘O NO NIA IA RATOU IHO?

5. Eaha te faaararaa ta te feia faatavaihia e titauhia ia feruri maite, e no te aha?

5 E titauhia i te feia faatavaihia ia feruri maite i nia i te faaararaa i roto i te Korinetia 1, 11:27-29. (A taio.) E nafea paha te hoê taata  faatavaihia e rave ai i te pane e te uaina “ma te au ore” i te Oroa haamana‘oraa? Ia ore o ’na e tamau i te hoê taairaa maitai e o Iehova e ia taiva o ’na ia ’Na, e riro oia ei taata faatura ore a rave ai i te pane e te uaina. (Heb. 6:4-6; 10:26-29) E faaararaa puai teie o te haamana‘o ra i te feia faatavaihia e mea tia ia vai taiva ore noa ratou ia “noaa te berabeio [aore ra re] i te parauraa a te Atua no nia maira i te Mesia nei ia Iesu.”—Phil. 3:13-16.

6. Eaha te titauhia i te mau Kerisetiano faatavaihia ia mana‘o no nia ia ratou iho?

6 Ua parau Paulo i te mau Kerisetiano faatavaihia: “Te a‘o atu nei au, te taata i tapeahia i te Fatu nei, ia outou, ia au to outou haerea i te parauraa i parauhia mai ai outou na.” E nafea ratou e na reira ’i? Ua faataa Paulo: “Ma te aau haehaa, e te mǎrû, ma te haamahuraa roa, i te faaoromairaa te tahi i te tahi ma te aroha; ma te ara maite ia vai â te au tahoê a te [v]arua i te ati ra i te hau.” (Eph. 4:1-3) E tauturu te varua mo‘a o Iehova i ta ’na mau tavini ia faaite i te haehaa, eiaha râ i te teoteo. (Kol. 3:12) Eita ïa te feia faatavaihia e mana‘o e mea maitai a‘e ratou ia vetahi ê. Ua ite ratou e aita roa ’tu Iehova e horoa hau atu â varua mo‘a ia ratou, eiaha râ i te tahi atu mau tavini. Hau atu â, eita ratou e mana‘o e e taa atu â ratou i te pue parau mau Bibilia ia vetahi ê. Oia atoa, aita roa ’tu ratou e parau i te tahi atu taata e ua faatavaihia oia e e haamata oia i te rave i te pane e te uaina i te Oroa haamana‘oraa. E faaite râ ratou i te haehaa a ite ai e o Iehova ana‘e o te nehenehe e titau manihini i te taata ia haere i te ra‘i.

7, 8. Eaha ta te mau Kerisetiano faatavaihia e ore e tiai, e no te aha?

7 Noa ’tu e ua mana‘o te feia faatavaihia e e fana‘oraa taa ê ia titau-manihini-hia no te haere i te ra‘i, eita ïa ratou e tiai ia haafaufaa vetahi ê ia ratou. (Eph. 1:18, 19; a taio i te Philipi 2:2, 3.) Ua ite atoa ratou e aita Iehova i faaite ia vetahi ê e ua faatavai oia ia ratou. No reira, eita te hoê taata faatavaihia e maere ia ore oia e tiaturi-oioi-hia e ua faatavaihia anei oia. Te taa ra ia ’na eaha ta te Bibilia e parau ra, eiaha e tiaturi oioi i te hoê taata o te faaite mai ra e ua horoa mai te Atua i te hoê hopoia taa ê na ’na. (Apo. 2:2) No te mea eita te hoê taata faatavaihia e tiai ia haafaufaa rahi a‘e vetahi ê ia ’na, eita ïa o ’na e faaite atu e ua faatavaihia oia i te mau taata a tahi ra o ’na e farerei ai. No reira, aita paha oia i faaite atu i te reira ia vetahi ê. Eita atoa oia e faateitei ia ’na no nia i te mau ohipa faahiahia mau ta ’na e rave i te ra‘i.—Kor. 1, 1:28, 29; a taio i te Korinetia 1, 4:6-8.

8 Eita te mau Kerisetiano faatavaihia e mana‘o e rave i te taime e te tahi noa feia faatavaihia, mai te mea ra e e melo ratou o te hoê pûpû taata taa ê. Eita ratou e imi i te tahi atu feia faatavaihia no te paraparau no nia i to ratou riroraa ei taata faatavaihia aore ra no te amui ei pûpû no te haapii i te Bibilia. (Gal. 1:15-17) Eita te amuiraa e vai hoê ia na reira te feia faatavaihia. Eita ïa ratou e haa e te varua mo‘a, o te tauturu ra i te nunaa o te Atua ia vai hau e ia vai hoê noa.—A taio i te Roma 16:17, 18.

EAHA TO TATOU HURU I NIA IA RATOU?

9. No te aha e titauhia ia tatou ia haapao maitai i to tatou huru i nia i te feia e rave ra i te pane e te uaina i te Oroa haamana‘oraa? (A hi‘o i te tumu parau tarenihia  ‘Eita te here e rave i te mea au ore.’)

9 Eaha to oe huru i nia i te mau taeae e tuahine  faatavaihia? Ua parau Iesu i ta ’na mau pǐpǐ: “E taeae ana‘e hoi outou atoa.” Ua parau faahou oia: “Te faateitei ia ’na ihora, e faahaehaahia ïa; e o te faahaehaa ia ’na ihora, e faateiteihia ïa.” (Mat. 23:8-12) E ere ïa i te mea tano ia faateitei i te hoê taata, noa ’tu e e taeae o te Mesia o ’na. Ia faahiti te Bibilia no nia i te mau matahiapo, te faaitoito mai ra te reira ia pee i to ratou faaroo. Teie râ, aita roa ’tu te Bibilia e parau ra e e nehenehe ta tatou e faariro i te hoê taata ei aratai no tatou. (Heb. 13:7) Parau mau, te na ô ra te Bibilia ‘ia rahi atu â i te faatura’ i te tahi mau taata. E ere no te mea ua faatavaihia ratou, no te mea râ te faatere maitai ra ratou e te haa rahi ra no te a‘o e no te haapii. (Tim. 1, 5:17) Ia faateitei e ia haapao rahi a‘e tatou i te feia faatavaihia, e huru ê paha ratou. E hau atu â, e nehenehe te reira e turai ia ratou ia riro ei taata faaoru. (Roma 12:3) Eita tatou taitahi e hinaaro e rave i te tahi ohipa o te turai i te feia faatavaihia o te Mesia ia rave i te hoê hape ino mau!—Luka 17:2.

Eaha to oe huru i nia i te mau taeae e tuahine faatavaihia? (A hi‘o i te paratarafa 9-11)

10. E nafea tatou e faaite ai e te faatura ra tatou i te mau Kerisetiano faatavaihia?

10 E nafea tatou e faaite ai e te faatura ra tatou i te feia ta Iehova i faatavai? Ma te ore e ani atu mea nafea ratou i riro mai ei taata faatavaihia. E ere i te ohipa na tatou ia ite i te reira. (Tes. 1, 4:11; Tes. 2, 3:11) Eiaha tatou e mana‘o e ua faatavai-atoa-hia ta ratou tane aore ra vahine, to ratou mau metua aore ra te tahi atu mau melo o to ratou utuafare. Eita te hoê taata e fana‘o i ta ’na tiaturiraa no ǒ mai i to ’na utuafare ra. (Tes. 1, 2:12) Eiaha tatou e uiui atu i te mau uiraa e haamauiui ai ia vetahi ê. Ei hi‘oraa, eita tatou e ani i te vahine a te hoê taeae faatavaihia eaha to ’na huru aau ia ora e a muri noa ’tu i te fenua nei o ’na ana‘e aita ta ’na tane. Ua papu râ ia tatou e, i roto i te ao apî, e “haamâha Iehova i te hiaai o te mau mea ora atoa nei.”—Sal. 145:16.

11. E nafea tatou e paruru ai ia tatou iho a ape ai i te faatietie i te taata?

11 Ia ore tatou e haafaufaa rahi a‘e ia vetahi ê, e paruru ïa tatou ia tatou iho. E nafea ïa? Te parau mai ra te Bibilia e te vai ra te tahi mau ‘taeae haavare’ i roto i te amuiraa o te parau ra e ua faatavaihia ratou. (Gal. 2:4, 5; Ioa. 1, 2:19) Oia atoa, aita te tahi mau taata faatavaihia i vai taiva ore. (Mat. 25:10-12; Pet. 2, 2:20, 21) Ia ape râ tatou i te faatietie i te taata, eita roa ’tu tatou e pee ia vetahi ê, oia atoa i te feia faatavaihia, te feia matau-rahi-hia, aore ra te mau tavini a Iehova e mea maoro ratou i roto i te parau mau. Ma te na reira, ia ore ratou e vai taiva ore, aore ra ia faarue ratou i te amuiraa, eita ïa tatou e ere i to tatou faaroo ia Iehova aore ra eita tatou e faaea i te tavini ia ’na.—Iuda 16.

MEA FAUFAA ANEI IA HAAPEAPEA NO NIA I TE NUMERA O TE RAHIRAA O TE TAATA

12, 13. No te aha e ere i te mea faufaa ia haapeapea tatou no nia i te numera o te rahiraa o te taata e rave ra i te pane e te uaina i te Oroa haamana‘oraa?

12 E rave rahi matahiti, ua iti te numera o te rahiraa o te taata tei rave i te pane e te uaina i te Oroa haamana‘oraa. Aita i maoro a‘enei, te maraa noa ’tu ra teie numera i te mau matahiti atoa. Mea faufaa anei ia haapeapea tatou no te reira? Aita. E hi‘o ana‘e i te tumu.

13 ‘Ua ite Iehova i to ’na taata.’ (Tim. 2, 2:19) Taa ê atu ia Iehova, aita te mau taeae o te taio ra i te rahiraa o te taata o te rave ra  i te pane e te uaina i te Oroa haamana‘oraa i ite o vai tei faatavai-mau-hia ra. Te vai atoa ra i roto te feia e mana‘o ra e ua faatavaihia ratou, aita râ hoi. Ei hi‘oraa, ua faaea te tahi mau taata o tei rave i te pane e te uaina i te na reira. No vetahi, e ma‘i paha to ratou i te pae feruriraa aore ra i te pae o te huru aau, ua mana‘o ratou e e faatere ratou e te Mesia i te ra‘i. Oia mau, aita i papu maitai ia tatou ehia taata tei faatavaihia e toe ra i te fenua nei.

14. Eaha ta te Bibilia e parau ra no nia i te numera o te feia faatavaihia e toe mai i te fenua nei a haamata ’i te ati rahi?

14 Tei te mau tuhaa atoa o te fenua nei te feia faatavaihia i te taime e tae mai ai Iesu no te rave ia ratou no te ra‘i. Te parau ra te Bibilia no nia ia Iesu e “na ’na e tono i ta ’na ra mau melahi ma te pu oto rahi ra, e na ratou e haaputu i to ’na feia i maitihia ra no na apoo mata‘i e maha ra, mai te tahi pae ra‘i e tae noa ’tu i te tahi pae ra‘i.” (Mat. 24:31) Te faaite atoa ra te Bibilia e i te roaraa o te anotau hopea, e iti mai te numera o te taata faatavaihia e toe ra i te fenua nei. (Apo. 12:17) Aita râ te Bibilia e parau ra ehia taata faatavaihia e toe mai a haamata ’i te ati rahi.

15, 16. Eaha ta tatou e hinaaro mau ra no te taa no nia i na 144 000 taata maitihia e Iehova?

15 Na Iehova e faaoti i te taime e maiti ai o ’na i te feia faatavaihia. (Roma 8:28-30) Ua haamata Iehova i te maiti i te feia faatavaihia i muri iho a faatia-faahou-hia  mai ai Iesu mai te pohe mai. E hanere tiahapa matahiti i muri a‘e i te reira, aita te rahiraa o te taata o tei parau e e Kerisetiano ratou i pee maite i te hi‘oraa o te Mesia. Oia atoa i taua mau matahiti ra, ua faatavai Iehova vetahi mau taata e Kerisetiano mau ratou. E au ratou i te sitona o ta Iesu i parau e e tupu te reira i rotopu i te zizania. (Mat. 13:24-30) I te roaraa o te anotau hopea, ua maiti noa Iehova i te taata o te apiti i na 144 000 taata. [2] No reira, ia maiti te Atua vetahi o taua mau taata ra hou te hopea, e rave iho â oia i te mea maitai. (Isa. 45:9; Dan. 4:35; a taio i te Roma 9:11, 16.) [3] E mea tia ia ore tatou e haa mai te mau taata rave ohipa o te riri ra i te huru o to ratou fatu i nia i te feia i haamata i te rave i te ohipa i te hora hopea.—A taio i te Mataio 20:8-15.

16 Aita ta te taatoaraa o te feia tei te ra‘i to ratou tiaturiraa e tuhaa i roto i “te tavini haapao maitai e te paari.” (Mat. 24:45-47) Mai i te senekele matamua, te faaohipa ra Iehova e Iesu i te tahi noa mau taata i teie mahana no te faatamaa, oia hoi no te haapii atu i te rahiraa taata. E i teie mahana, mea iti roa te mau Kerisetiano faatavaihia e e hopoia ta ratou no te horoa i te maa na te nunaa o te Atua i te taime tano.

17. Eaha ta outou i haapii i roto i teie tumu parau?

17 Eaha ta outou i haapii i roto i teie tumu parau? Ua faaoti Iehova e horoa i te ora mure ore i te fenua nei na te mau taata e rave rahi e te ora i nia i te ra‘i no te feia o te faatere e o Iesu. E haamaitai Iehova i te taatoaraa o ta ’na mau tavini, mai te “ati Iuda” e “na taata tino ahuru” e ma te titau ia ratou ia auraro i te hoê â mau ture e ia taiva ore noa. Mea titauhia ia tavini amui te taatoaraa ia ’Na e ma te tahoê. Ia haa rahi atoa ia vai te hau i roto i te amuiraa. E no te mea te piri mai ra te hopea, e tavini noa ana‘e ia Iehova e e pee ia Iesu mai te hoê nǎnǎ.

^ [1] (paratarafa 3) Ia au i te Salamo 87:5, 6, e faaite te Atua i te mau i‘oa o te feia atoa o te faatere e o Iesu i te ra‘i i a muri a‘e.—Roma 8:19.

^ [2] (paratarafa 15) Noa ’tu e te faaite mai ra te Ohipa 2:33 e tei roto atoa Iesu a faatavaihia ’i te hoê taata, na Iehova râ e titau manihini i teie taata ra.

^ [3] (paratarafa 15) No te ite atu â, a hi‘o “Uiraa a te feia taio” i roto i Te Pare Tiairaa o te 1 no Me 2007, api 30 (Farani).