Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) ME 2016

Ia rahi atu â te mau maitai e huti mai i te maa pae varua a Iehova

Ia rahi atu â te mau maitai e huti mai i te maa pae varua a Iehova

“O vau to Atua ra, o Iehova; o tei faaite ia oe i te mea e maitai ai oe ra.”—ISA. 48:17.

HIMENE: 117, 114

1, 2. (a) Eaha te mana‘o o te mau Ite no Iehova no nia i te Bibilia? (b) Eaha te tuhaa o te Bibilia ta oe e au roa ’‘e?

EI Ite no Iehova, mea au na tatou i te Bibilia. E horoa mai te reira i te tamahanahanaraa, te tiaturiraa e te haapiiraa papu. (Roma 15:4) E ere te reira i te hoê buka mana‘o taata, o te “parau râ na te Atua.”—Tes. 1, 2:13.

2 Hau atu â, te vai ra paha te mau tuhaa o te Bibilia o ta tatou e au roa ’‘e. Mea au na vetahi te mau Evanelia, no te mea te faaite ra te reira i to Iehova huru faahiahia mau maoti Iesu. (Ioa. 14:9) Mea au na vetahi ê i te mau buka parau tohu, mai te Apokalupo o te faaite ra “i te mau mea e fatata i te tupu.” (Apo. 1:1) E tamahanahanahia vetahi a taio ai ratou i te mau Salamo e mea au na vetahi ê i te taio i te mau a‘oraa maitai o te buka Maseli. Papu maitai, e buka te Bibilia no te taata atoa.

3, 4. (a) Eaha to tatou mana‘o no nia i ta tatou mau piaraa? (b) Eaha te mau papai ta tatou e fana‘o ra no te mau pûpû taata taa maitai?

3 No te mea mea au na tatou i te Bibilia, mea au atoa na tatou i ta tatou mau papai o tei niuhia i nia i te Parau a te Atua.  Pauroa te mau buka, buka rairai, vea e te tahi atu mau papai ta tatou e fana‘o nei, no ǒ mai ïa ia Iehova ra. E tauturu mai te reira ia tatou ia vai piri noa ia ’na e ia tapea i te hoê faaroo puai.—Tito 2:2.

4 E rave rahi o ta tatou mau papai, ua papaihia no te mau Ite no Iehova. Tera râ, te vai ra te tahi mau papai no te tahi mau pǔpǔ taa maitai, mai te feia apî aore ra te mau metua. Te rahiraa o te mau tumu parau e te mau video i nia i ta tatou reni Internet, ua faaineinehia ïa no te feia e ere i te mau Ite no Iehova. Te faaite ra teie mau piaraa e rave rau e ua tapea Iehova i ta ’na i fafau ma te horoa mai i te haapiiraa e rave rahi no te taata atoa.—Isa. 25:6.

5. Ua papu ia tatou e e oaoa Iehova i te aha?

5 E rave rahi o tatou o te hinaaro ra ia rahi atu â te taime no te taio i te Bibilia e i ta tatou mau papai. No reira, eita paha tatou e nehenehe e horoa i te hoê â rahiraa taime no te haapii i te mau papai atoa o ta tatou e fana‘o ra. Ua papu râ ia tatou e e oaoa Iehova ia tatou, ia faaohipa tatou i to tatou taime ma te paari no te taio e no te haapii i te Bibilia e i ta tatou mau papai. (Eph. 5:15, 16) Tera râ, te vai ra te hoê fifi mea tia ia tatou ia haapao maitai. Eaha te reira?

6. Eaha te nehenehe e faaere ia tatou i te mau maitai o te mau maa pae varua a Iehova?

6 Aita ana‘e tatou e haapao maitai, e nehenehe tatou e mana‘o e ere te tahi mau tuhaa o te Bibilia aore ra te tahi mau papai no tatou. Ei hi‘oraa, eaha râ mai te peu e aita tatou e ite ra i te faufaaraa o te hoê tuhaa o te Bibilia no to tatou tupuraa? Aore ra e ere paha na mua roa no tatou i faaineinehia ’i te tahi mau papai. E taio vitiviti anei tatou i te reira aore ra eita roa ’tu tatou e taio? Mai te peu e tera iho â, e nehenehe tatou e ere i te mau haamaramaramaraa faufaa e faufaahia ’i tatou. E nafea tatou e ape ai i teie mau mana‘o atâta? Mea tia ia haamana‘o tatou e no ǒ mai ia Iehova ra te mau haapiiraa atoa ta tatou e fana‘o nei. Te taio ra tatou i roto i te Bibilia: “O vau to Atua ra, o Iehova; o tei faaite ia oe i te mea e maitai ai oe ra.” (Isa. 48:17) I roto i teie tumu parau, e hi‘opoa mai tatou e toru ravea o te tauturu mai ia faufaahia tatou i te mau faanahoraa o ta Iehova e horoa mai.

TE MAU RAVEA IA FAUFAAHIA TATOU I TE TAIORAA BIBILIA

7. No te aha mea titauhia ia taio i te Bibilia e te hoê feruriraa farii?

7 A taio e te hoê feruriraa farii. Parau mau, te vai ra te tahi mau tuhaa o te Bibilia ua papaihia no te hoê taata aore ra no te hoê pǔpǔ taata taa maitai. Tera râ, te parau ra te Bibilia e “te mau parau mo‘a atoa i papaihia ra e mea faaurua mai ïa e te Atua, e e mea maitai.” (Tim. 2, 3:16) No reira, mea titauhia ia taio tatou i te Bibilia e te hoê feruriraa farii. E tamata te hoê taeae i te haamana‘o e e nehenehe ta ’na e huti mai e rave rahi haapiiraa i roto hoê noa aamu. E tauturu te reira ia ’na ia ite i te mau haapiiraa aita paha e itehia i te taioraa matamua. No reira, hou a taio ai tatou i te Bibilia, e tia ia ani ia Iehova ia horoa mai i te hoê feruriraa farii e te paari no te taa i te mau haapiiraa o ta ’na e hinaaro ra ia haapii tatou.—Ezr. 7:10; a taio i te Iakobo 1:5.

Te fana‘o ra anei oe i te mau maitai atoa i roto i ta oe taioraa Bibilia? (A hi‘o i te paratarafa 7)

8, 9. (a) Ia taio tatou i te Bibilia, eaha ta tatou e uiui? (b) Eaha ta te mau titauraa no te mau matahiapo Kerisetiano e haapii mai ra no nia ia Iehova?

8 A uiui. Ia taio oe i te Bibilia, a faaea e  a uiui: ‘Eaha ta te reira e haapii mai ra no nia ia Iehova? E nafea vau e nehenehe ai e faaohipa i teie haapiiraa i roto i to ’u oraraa? E nafea vau e nehenehe ai e faaohipa i te reira no te tauturu ia vetahi ê?’ Ia feruri maite tatou i teie mau uiraa, e faufaahia ’tu â tatou i ta tatou taioraa Bibilia. Teie te hoê hi‘oraa. Te faataa ra te Bibilia te tahi mau titauraa mea tia ia faaî te mau matahiapo Kerisetiano. (A taio i te Timoteo 1, 3:2-7.) E ere râ te rahiraa o tatou i te matahiapo, e mana‘o paha ïa tatou e eita roa ’tu teie mau haapiiraa e tauturu mai. Tera râ, e faaohipa mai tatou na uiraa e toru o tei faahitihia i nia ’tu no te ite e nafea teie mau titauraa e nehenehe ai e tauturu ia tatou taitahi.

9 “Eaha ta te reira e haapii mai ra no nia ia Iehova?” Ua horoa mai Iehova i te mau titauraa no te mau matahiapo. E ture aveia teitei ta ’na no te mau tane o te haapao ra i te amuiraa. Te faaite ra te reira e mea faufaa te amuiraa no Iehova. Te parau ra te Bibilia e ua hoo mai oia i te reira i te toto o ta ’na Tamaiti. (Ohi. 20:28, New World Translation) Te titau ra ïa Iehova ia riro te mau matahiapo ei hi‘oraa maitai e e hopoia ta ratou i mua ia ’na no ta ratou huru haapaoraa i te mau mero o te amuiraa. Te hinaaro nei oia ma ta ratou haapao maitai ia tatou, ia ite tatou i te hau. (Isa. 32:1, 2) Ia taio tatou i teie mau titauraa, te haapii ra ïa tatou e te haapeapea mau ra Iehova no tatou.

Te titau ra Iehova ia faaite tatou taitahi i te hoê huru au noa e ia faaohipa i te hoê mana‘o maitai

10, 11. (a) A taio ai tatou i te mau titauraa no te mau matahiapo, e nafea tatou e faaohipa ’i i te reira i roto i to tatou iho oraraa? (b) E nafea tatou e faaohipa ’i i te reira no te tauturu ia vetahi ê?

 10 “E nafea vau e nehenehe ai e faaohipa i teie haapiiraa i roto i to ’u oraraa?” Mai te peu e e matahiapo oe, e tia ia tamau oe i te hi‘opoa i te mau titauraa e faaî a tamata atu ai i te haamaitai atu â ia oe. “Ia hinaaro u‘ana [oe] i te toroa episekopo” aore ra matahiapo, e tia ia tamata oe i te faaî i teie mau titauraa ma te rave i te mau mea atoa o te maraa ia oe. (Tim. 1, 3:1) E nehenehe râ te mau Kerisetiano atoa e huti mai i te haapiiraa i teie mau titauraa. Ei hi‘oraa, te titau ra Iehova ia faaite tatou taitahi i te hoê huru au noa e ia faaohipa i te hoê mana‘o maitai. (Phil. 4:5; Pet. 1, 4:7) Ia riro te mau matahiapo “ei aveia . . . no [te] nǎnǎ,” e nehenehe tatou e haapii mai no nia ia ratou e “e pee atu i to ratou faaroo.”—Pet. 1, 5:3; Heb. 13:7.

11 “E nafea vau e nehenehe ai e faaohipa i teie haapiiraa no te tauturu ia vetahi ê?” E nehenehe tatou e faaohipa i te anairaa titauraa no te mau matahiapo Kerisetiano no te tauturu i te mau piahi Bibilia e te feia tei faaite i te anaanatae ia ite e nafea te mau matahiapo e taa ê ai i te mau pǔpǔ ekalesiatiko. E tauturu atoa mai teie anairaa titauraa ia haamana‘o i te haaraa rahi a te mau matahiapo i roto i te amuiraa. E nehenehe ïa te reira e tauturu ia tatou ia faatura i teie mau taeae. (Tes. 1, 5:12) Rahi noa ’tu â tatou i te faatura ia ratou, oaoa ’tu â ratou i te rave i ta ratou hopoia.—Heb. 13:17.

12, 13. (a) Ma te faaohipa i te mau mauhaa e vai ra ia tatou ra, eaha te mau maimiraa ta tatou e rave? (b) A horoa i te hoê hi‘oraa e nafea te mau haapiiraa no nia i te tahi tupuraa e haamatara ’i i te mau haapiiraa o ta tatou i ore i ite oioi.

12 A rave i te mau maimiraa. Ia haapii tatou i te Bibilia, e nehenehe tatou e imi i te mau pahonoraa i teie mau uiraa:

  • Na vai i papai i teie tuhaa o te Bibilia?

  • Ihea e afea ra te reira i te papairaahia?

  • Eaha te mau mea faufaa tei tupu a papaihia ’i teie buka?

E tauturu mai te mau pahonoraa ia taa i te mau haapiiraa ta tatou i ore i ite oioi.

13 Ei hi‘oraa, te parau ra te Ezekiela 14:13, 14: “Ia rave te fenua i te hara ia ’u nei e ua rahi roa te hara, e ua faatoro ihora vau i tau rima i nia iho i taua fenua ra, e ua ofati ihora vau i te tauturu ra i te maa i taua fenua ra, e ua hopoi atu vau i te o‘e i nia iho, e faaorehia a‘era e au te taata e te puaa atoa: e te parahi ra eie nei tau taata tootoru i reira, O Noa, o Daniela, e o Ioba, o to ratou ihora varua te ora i ta ratou ra parau-tia, te na reira maira te Fatu ra o Iehova.” Ia rave tatou i te tahi mau maimiraa, e haapii mai tatou e ua papai Ezekiela i teie mau parau a 612 matahiti hou te Mesia. Ua pohe o Noa raua Ioba e rave rahi hanere matahiti na mua ’tu, ua haamana‘o râ Iehova i to raua taiva ore. Area ia Daniela, te ora ra ïa oia. E 20 matahiti paha to ’na a parau ai Iehova e e taata parau tia oia mai  ia Noa e Ioba. Eaha ta tatou e haapii mai? Te ite e te haafaufaa ra Iehova pauroa ta ’na mau tavini taiva ore, te feia apî atoa.—Sal. 148:12-14.

TE MAU MAITAI E HUTI MAI I TE MAU PIARAA E RAVE RAU

14. E nafea te mau piaraa no te feia apî e tauturu ai ia ratou, e nafea vetahi ê e faufaa-atoa-hia ’i i te reira? (A hi‘o i te hoho‘a matamua.)

14 Te mau piaraa no te feia apî. Ua ite mai tatou e e nehenehe tatou e faufaahia i te mau tuhaa atoa o te Bibilia. Hoê â huru, e nehenehe atoa tatou e faufaahia i te mau piaraa atoa. E hi‘o ana‘e i te tahi mau hi‘oraa. I na matahiti i mairi, ua horoa Iehova e rave rahi piaraa no te feia apî. [1] E tauturu teie mau piaraa ia ratou i mua i te mau faaheporaa a te hoa i te fare haapiiraa e te mau fifi e rahi noa ra. E nafea râ tatou pauroa e faufaahia ’i i te taioraa i teie mau tumu parau e buka? Ia taio tatou i te reira, e haapii mai tatou i te mau fifi ta te feia apî e faaruru ra a nehenehe atu ai e tauturu e e faaitoito ia ratou.

Eiaha atoa te mau Kerisetiano paari a‘e e mana‘o e no te feia apî noa te mau papai ta ratou e taio ra

15. No te aha e tia i te mau Kerisetiano paari a‘e e faaite i te anaanatae i te mau piaraa i faaineinehia no te feia apî?

15 Eiaha atoa te mau Kerisetiano paari a‘e e mana‘o e no te feia apî noa te mau papai ta ratou e taio ra. E rave rahi fifi faataahia i roto i te mau tumu parau faaineinehia no ratou, e tano no te mau Kerisetiano atoa. Ei hi‘oraa, mea titauhia ia tatou pauroa ia turu i ta tatou mau tiaturiraa, ia haavî i to tatou mau huru aau, ia patoi i te faaheporaa a te mau hoa, ia ape i te mau amuimuiraa e te mau faaanaanataeraa iino. No reira, noa ’tu e no te feia apî teie mau papai, te mau mana‘o e vai ra i roto, no ǒ mai ïa i te Bibilia ra e e nehenehe te mau Kerisetiano atoa e faufaahia i te reira.

16. I roto i teihea tuhaa e tauturu ai ta tatou mau papai i te feia apî?

16 E nehenehe te mau papai faaineinehia no te feia apî e tauturu atoa ia ratou ia haapuai i to ratou auhoaraa e o Iehova. (A taio i te Koheleta 12:1, 13.) E nehenehe atoa te feia paari a‘e e faufaahia i te reira. Ei hi‘oraa, i roto i te A ara mai na! no Eperera 2009 (Farani), te vai ra te tumu parau “Te feia apî e uiui ra . . . E nafea e ite ai i te oaoa ia taio i te Bibilia?” Te horoa ra teie tumu parau e rave rahi ravea tauturu e te hoê tumu parau tarenihia o ta oe e nehenehe e paoti, e haaputu e e faaohipa no te haapiiraa. Ua faufaahia anei râ te feia paari a‘e i tera tumu parau? Ua parau te hoê vahine faaipoipo e e mama atoa, mea fifi no ’na te taioraa Bibilia na mua ’‘e. Ua faaohipa râ oia i te mau mana‘o i roto i te tumu parau e i teie nei, mea au roa na ’na te taioraa Bibilia. Te oaoa nei oia i te ite e nafea te mau buka o te Bibilia e tuati ai e mea nehenehe mau te hoho‘a e puta mai. Ua fa‘i oia, “Aita vau i oaoa a‘enei i te taioraa i te Bibilia.”

17, 18. E nafea tatou e faufaahia ’i i te taioraa i te mau papai faaineinehia no te taata atoa? A faataa.

17 Te mau piaraa no te taata atoa. Mai 2008 mai â, te fana‘o nei tatou i Te Pare Tiairaa no te haapiiraa. Ua papaihia  te reira na mua roa no te mau Ite no Iehova. Te vai atoa ra râ te mau vea piahia na mua roa no te taata atoa. E nafea tatou e faufaa-atoa-hia ’i i te reira? E faaohipa ana‘e i te hoê hi‘oraa. Ia titau manihini oe i te hoê taata i te Piha a te Basileia e ua haere mai oia e oaoa roa oe. A horoa ’i te taeae i ta ’na oreroraa parau, e mana‘o oe i ta oe manihini. E feruri oe eaha ta teie taata e mana‘o no nia i te mau mea ta ’na e faaroo ra e e nafea te reira e nehenehe ai e taui i to ’na oraraa. I muri a‘e, e putapû to aau e e mauruuru atu â oe i teie tumu parau.

18 Hoê â atoa ohipa te nehenehe e tupu ia taio tatou i te mau papai faaineinehia no te taata atoa. Ei hi‘oraa, te faataa ra Te Pare Tiairaa no te taata atoa e te mau tumu parau i nia jw.org i te Bibilia ma te faaohipa i te mau ta‘o e parau mea ohie ia taa. Ia taio tatou i teie mau papai, e rahi atu â to tatou ite e to tatou anaanatae i te pue parau mau Bibilia ta tatou i taa maitai i teie nei. E nehenehe atoa tatou e haapii mai i te tahi atu mau ravea no te faataa i ta tatou mau tiaturiraa i roto i te taviniraa. Oia atoa, e haapuai te vea A ara mai na! i to tatou tiaturiraa e te vai ra te hoê Atua poiete. E tauturu atoa te reira ia tatou ia haapii mai e nafea ia turu i ta tatou mau tiaturiraa.—A taio i te Petero 1, 3:15.

19. E nafea tatou e faaite ai i te mauruuru ia Iehova no te maa pae varua ta ’na e horoa mai?

19 Mea papu, ua horoa Iehova e rave rahi a‘oraa e haapiiraa no to tatou maitai. (Luka 11:28) E tamau ana‘e i te taio e i te faaohipa i te mau piaraa atoa o ta ’na i horoa mai. A na reira ’i, e faufaahia tatou. E faaiteraa atoa te reira i to tatou mauruuru ia Iehova no te mau maa pae varua ta ’na e horoa mai.—Isa. 48:17.

^ [1] (paratarafa 14) I rotopu i teie mau papai, te vai ra te mau buka Les jeunes s’interrogent. Réponses pratiques, buka 1 e buka 2, oia atoa te mau anairaa tumu parau “Les jeunes s’interrogent,” o te itehia i nia i te reni Internet ana‘e.