Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2016

 AAMU

Ua manuïa ta ’u taviniraa maoti Iehova

Ua manuïa ta ’u taviniraa maoti Iehova

Ua parau vau i te raatira, ua tapea-a‘ena-hia vau no te mea aita vau i haere i te tama‘i. Ua ani atu vau ia ’na: “E tuu faahou anei oe ia ’u i te fare tapearaa?” O te piti ïa o te taime i faauehia ’i au ia faaô i roto i te nuu a te Hau Amui no Marite.

UA FANAUHIA vau i Crooksville, i Ohio, i Marite, i te matahiti 1926. Aita ta papa raua mama e haapaoraa. Ua faaue mai râ raua i na vau tamarii ia haere i te fare pureraa. Ua haere au i te pureraa a te hoê pǔpǔ faaroo no roto mai i te haapaoraa Porotetani, parauhia Méthodiste. I te 14raa o to ’u matahiti, ua horoa mai te perepitero i te hoê re, no te mea i na hoê matahiti, ua haere au i te fare pure pauroa te Tapati.

Ua tauturu Margaret Walker (te piti o te tuahine na te pae aui atu) ia ’u ia ite i te parau mau

I tera taime, ua haamata te hoê taata tapiri o Margaret Walker te i‘oa i te farerei i to ’u mama no te paraparau no nia i te Bibilia. I te hoê mahana, ua hinaaro vau e apiti ia raua. Ua mana‘o mama e e haafifi vau i ta ’na haapiiraa, parau mai nei oia ia ’u ia haere i rapae i te fare. Ua tamata noa râ vau i te faaroo i ta raua aparauraa. I muri a‘e tau farereiraa, ua ani mai Margaret, “Ua ite oe o vai te i‘oa o te Atua?” Ua parau atu vau, “Pauroa te taata ua ite o vai, o te Atua.” Na ô mai ra oia, “A rave na i ta oe Bibilia e a hi‘o i te Salamo 83:18.” O ta ’u ïa i rave. Ite atura vau e o Iehova te i‘oa o te Atua. Ua horo vau e farerei i to ’u mau hoa e ua parau atu ia ratou, “Ia ho‘i noa ’tu outou i te fare i teie po, a hi‘o i te Salamo 83:18 i roto i te Bibilia e a hi‘o o vai te i‘oa o te Atua.” E nehenehe e parau e oioi roa vau i te haamataraa i te poro.

Ua haapii au i te Bibilia e ua bapetizohia vau i 1941. Tau taime i muri iho, na ’u i faatere i te haapiiraa buka a te amuiraa. Ua faaitoito vau i to ’u mama e to ’u mau taeae e tuahine ia haere atoa mai. E ua haamata ratou pauroa i te apiti mai i te haapiiraa buka o ta ’u e faatere ra. Area râ o papa, aita oia i anaanatae.

TE PATOIRAA I TE FARE

Ua horoahia mai hau atu â hopoia i roto i te amuiraa. Ua rave mai au e rave rahi buka i neneihia e te mau Ite no Iehova. I te hoê mahana, ua faatoro to ’u papa i to ’na rima i nia i ta ’u mau buka e ua parau: “Ua ite oe i tera mau mea? Hinaaro vau ia afai oe i te reira i rapae e o oe atoa.” Ua faarue au i te fare e ua ora vau aita i atea noa ’tu ia Zanesville, i Ohio. Ua ho‘i noa râ vau no te faaitoito i to ’u utuafare.

Ua tamata papa i te tapea ia mama ia ore oia e apiti i te putuputuraa. I te tahi mau taime, e tapapa oia ia ’na no te faaho‘i mai i roto i te fare. E horo ïa oia i rapae na te tahi atu opani no te haere i te putuputuraa.  Ua parau vau ia mama: “Eiaha oe e haapeapea, e rohirohi o ’na i te horo noa na muri ia oe.” I muri a‘e, ua faaea papa i te tapapa ia ’na, ua nehenehe atura ta ’na e apiti i te mau putuputuraa ma te ore e haafifihia.

A haamauhia ’i te Haapiiraa no te taviniraa Kerisetiano i 1943, ua haamata vau i te horoa i te tumu parau i roto i ta ’u amuiraa. Ua tauturu mai te a‘oraa i horoahia mai i muri a‘e i ta ’u mau tumu parau ia riro mai ei taeae aravihi a‘e no te paraparau.

TE TIARAA AMUI ORE I TE ROARAA O TE TAMA‘I

I 1944, i te Piti o te tama‘i rahi, ua faauehia vau ia faaô i roto i te nuu. Ua haere au i Fort Hayes i Columbus, i Ohio, e ua ravehia te mau hi‘opoaraa i nia ia ’u e ua faaî au i te mau api parau. Ua parau vau i te mau taata toroa a te hau e aita vau e hinaaro e riro mai ei faehau. Ua farii ratou ia ho‘i au i te fare. Tau mahana râ i muri iho, ua haere mai te hoê raatira i te fare e ua parau mai, “Corwin Robison, e parau haamana ta ’u no te tuu ia oe i roto i te fare auri.”

I te tiripuna e piti hebedoma i muri a‘e, ua parau te haava: “Ahani na ’u tera, e faaea oe ia ’u i te fare auri e tae noa ’tu i to oe poheraa. Eaha ta oe e parau?” Ua pahono atu vau: “E te Haava e, te tanoraa ia tapaohia vau ei tavini. Pauroa te uputa o te mau taata, ua riro ïa te reira ei pupiti na ’u. E poro vau i te parau apî oaoa o te Basileia i te mau taata e rave rahi.” Ua parau te haava i te pǔpǔ tia haava: “Aita outou i haere mai i ǒ nei no te faaoti e tiaraa tavini anei to ’na aore ra aita. Tei ǒ nei outou no te faaoti ua faaô anei oia ia ’na i roto i te tau faehau aore ra aita.” Aita i afa hora, ua faaoti te pǔpǔ tia haava e ia faautuahia vau. Te utua, e pae matahiti i te fare tapearaa i Ashland, i Kentucky.

UA PARURU IEHOVA IA ’U I ROTO I TE FARE TAPEARAA

Tei te fare tapearaa i Columbus, i Ohio vau e piti hebedoma e ua faaea vau i roto i te piha i te mahana matamua. Ua pure au ia Iehova: “Aita ta ’u e nehenehe e faaea i roto i teie piha e pae matahiti. Aita vau i ite eaha te ohipa e rave.”

I te mahana i muri iho, ua vaiiho te feia tiai ia ’u ia haere i rapae. Ua haere tia ’tu vau i te hoê taata mau auri mea roroa oia e te tino pautuutu, ua tia noa mâua i reira a hi‘o noa ’i na te haamaramarama. Ua parau mai oia, “Eaha ta oe ohipa i ǒ nei, taurearea?” Na ô atura vau, “E Ite no Iehova vau.” Ua parau mai oia “Tera iho â? No te aha ïa oe i tapeahia ’i?” Ua pahono atu vau, “Eita te mau Ite no Iehova e haere i te tama‘i e e taparahi i te taata.” Ua na ô mai oia, “Ua tuuhia outou i te fare tapearaa no te mea aita outou e taparahi i te taata. E te tahi mau taata ïa, ua tapeahia ratou i te fare tapearaa no te mea ua taparahi ratou i te taata. Eaha ïa te auraa?” Ua na ô atu vau, “Aita vau i ite.”

I muri iho, ua parau teie taata, “Ua tapeahia vau 15 matahiti i roto i te tahi atu fare tapearaa, ua taio vau i te tahi o ta outou mau papai.” I to ’u faarooraa i te reira, ua pure au, “E Iehova, a tauturu mai ia faaea noa teie taata i pihaiiho ia ’u.” I tera taime, ua parau teie taata mau auri, o Paul to ’na i‘oa: “Ia haafifi  noa ’‘e hoê o ratou ia oe, e tuô noa oe. Farerei ta ratou.” A faaea noa ’i au i ǒ, aita to ’u e fifi e na 50 taata mau auri i tera vahi.

Tei rotopu vau i te mau Ite no Iehova o tei tapeahia i te fare tapearaa no to ratou tiaraa amui ore i Ashland, i Kentucky

Ua afaihia vau i te tahi atu fare tapearaa i Ashland. Ua matau vau i te tahi mau taeae feruriraa paari o tei tapea-ê-na-hia i reira. Ua tauturu mai ratou ia ’u e ia vetahi ia vai piri noa ia Iehova. Ua horoa mai ratou i te mau taioraa Bibilia tahebedoma e ua faaineine matou i te mau uiraa e te mau pahonoraa no te mau putuputuraa faanahohia e te mau taeae. Tei roto matou i te hoê piha rarahi, e ua apǎpǎhia te mau roi i te roaraa o tera piha. E faanaho te hoê taeae i ta matou tuhaa fenua. E parau mai oia: “Robison, na oe e haapao i teie roi e tae atu i tera roi. Te taata no ’na tera roi, na oe ïa tera tuhaa fenua. Hou o ’na a faarue ai i teie vahi, ia porohia o ’na.” Mea na reira matou i te faanahoraa i ta matou pororaa.

EAHA TA ’U I ITE A MATARA MAI AI MAI TE FARE TAPEARAA?

Ua oti te Piti o te tama‘i rahi i 1945, ua faaea râ vau i te fare tapearaa tau taime i muri a‘e i te reira. Ua haapeapea vau no to ’u utuafare, no te mea ua parau mai papa, “Ua nehenehe ta ’u e tiahi ia oe, e nehenehe atoa ta ’u e na reira i nia ia ratou.” A matara mai ai mai te fare tapearaa, eaha ra vau i te oaoa. E hitu o to ’u utuafare o tei apiti i te mau putuputuraa e hoê o to ’u mau tuahine o tei bapetizohia, noa ’tu te patoiraa a papa.

I roto i te taviniraa e o Demetrius Papageorge, te hoê taeae faatavaihia o tei haamata i te tavini ia Iehova i 1913

A haamata ’i te tama‘i i te fenua Korea i 1950, ua anihia vau ia faaô i roto i te nuu no te piti o te taime. Ua haere faahou vau i Fort Hayes. A ravehia ’i te mau hi‘opoaraa no te ite e nehenehe anei ta ’u e haere i te tama‘i, ua parau mai te hoê raatira, “I roto i ta oe pǔpǔ, ua raea atoa ia oe hoê o te mau faito teitei roa ’‘e.” Ua na ô atu vau, “Mea maitai, eita râ vau e haere i te tama‘i.” Ua faahiti au i te Timoteo 2, 2:3 e ua parau atu, “E faehau a‘ena vau no te Mesia.” Mamû noa ’tura oia no te hoê taime, parau mai nei oia, “E nehenehe oe e haere.”

I muri iti noa ’‘e, ua apiti vau i te putuputuraa no te taviniraa i te Betela i te hoê tairururaa i Cincinnati, i Ohio. Ua parau mai te taeae Milton Henschel e te hinaarohia ra te tauturu i te Betela no te mau taeae e hinaaro ra e haa rahi no te Basileia. Ua faaî au i te hoê aniraa no te haere i te Betela e ua fariihia vau. Ua haamata vau i te tavini i te Betela i Brooklyn i Atete 1954, mai reira mai, tei te Betela vau.

Mea rahi roa ta ’u ohipa i te Betela. E rave rahi matahiti to ’u haapao-noa-raa i te mau matini haaveavearaa pape i te vahi neneiraa e i te mau piha ohipa, e taata haapao matini vau e e tataî vau i te mau ponao opani. E ohipa atoa vau i te mau piha tairururaa i New York.

Haapao i te mau matini haaveavearaa pape i roto i te fare tahua o te mau piha ohipa i te Betela no Brooklyn

Mea au roa na ’u te porotarama i te Betela, mai te haamoriraa poipoi e te haapiiraa o Te Pare Tiairaa, oia atoa te pororaa e te amuiraa. Ia mana‘o oe no nia i te  reira, teie te mau ohipa ta te mau utuafare Ite no Iehova e tia ia rave tamau. Ia hi‘opoa amui te mau metua e te mau tamarii i te irava mahana, te rave-tamau-raa i te arui haamoriraa utuafare, ia horoa i te pahonoraa i te mau putuputuraa a te amuiraa e te faaiteraa i te itoito i roto i te pororaa i te parau apî oaoa, e vai piri noa ïa te taatoaraa o te utuafare ia Iehova.

E rave rahi o ta ’u i faahoa i te Betela e i roto i te amuiraa. E feia faatavaihia vetahi e ua haere i te ra‘i. Area vetahi, aita ïa i faatavaihia. E feia tia ore ana‘e râ te mau tavini a Iehova, te mau melo o te Betela atoa. Ia peapea vau e te hoê taeae, e tamata vau i te faatupu i te hau. E haamana‘o vau i te Mataio 5:23, 24, e nafea ia faatitiaifaro i te peapea. E ere i te mea ohie ia parau “Te tatarahapa ’tu nei au,” maoti râ te reira e afaro ai te peapea.

TE FAAHOPEARAA MAITAI O TA ’U TAVINIRAA

I teie mahana, mea fifi roa no ’u ia poro i tera e tera fare no to ’u matahiti rahi, eita râ vau e tuu. Ua haapii au i te tahi tuhaa o te reo Tinito Mandarin e ua oaoa vau i te paraparau i te feia Tinito i roto i te aroâ. I te tahi mau poipoi, e opere au 30 aore ra 40 vea i te feia e anaanatae ra.

Pororaa i te feia e paraparau ra i te reo Tinito i Brooklyn, New York

Hoê ho‘i-faahou-raa ta ’u i te fenua Taina! I te hoê mahana, ua ite au i te hoê tamahine apî, e mata ataata to ’na e te opere ra oia i te mau parau tiani no te hoê hoohooraa maa hotu. Ma te mata ataata, ua horoa ’tu vau na ’na Te Pare Tiairaa e te A ara mai na! na roto i te reo Tinito. Ua rave oia e ua parau mai e o Katie to ’na i‘oa. I muri a‘e i te reira, i te mau taime a ite ai oia ia ’u, e haere mai Katie e paraparau ia ’u. Ua haapii atu vau ia ’na i te i‘oa o te mau maa hotu na roto i te reo Beretane e e na nia iho faahou oia i te faahiti i ta ’u e parau atu. Ua faataa atoa vau i te mau irava Bibilia ia ’na e ua farii oia i te buka Bibilia haapii. Tau hebedoma râ i muri a‘e, aita vau i ite faahou ia ’na.

Te mau ava‘e i muri a‘e, ua horoa vau i te mau vea i te tahi tamahine o te opere atoa ra i te mau parau tiani e ua farii oia i te reira. I te hebedoma i muri iho, ua toro mai oia i ta ’na niuniu afaifai e ua parau mai, “E paraparau oe i Taina.” Ua parau atu vau, “Aita vau i matau i te taata i Taina.” Ua mârô râ oia, ua rave au i te niuniu afaifai e ua na ô vau, “Iaorana, o Robison teie.” Ua na ô mai te tahi reo, “Robby, o Katie teie. Ua ho‘i mai au i Taina.” Ua parau atu vau, “I Taina?” Pahono mai nei Katie, “E. Robby, ua ite oe te tamahine i toro ia oe te niuniu afaifai? O to ’u ïa tuahine tera. Ua haapii mai oe ia ’u e rave rahi ohipa maitai, mai te peu e tia ia oe, a haapii ia ’na i ta oe i haapii mai ia ’u.” Ua parau vau, “E rave vau i tei maraa ia ’u, Katie. Mauruuru no to oe faaiteraa mai e teihea roa oe.” Tau taime i muri a‘e, ua aparau â vau e to Katie tuahine no te taime hopea râ o to mâua farereiraa. Noa ’tu teihea roa na tamahine e piti i teie nei, te tiaturi nei au e e haapii atu â raua no nia ia Iehova.

Ua tavini au ia Iehova e 73 matahiti, ua oaoa vau e ua tauturu oia ia ’u ia tapea i to ’u amui-ore-raa e to ’u taiva ore i roto i te fare tapearaa. Ua parau atoa mai to ’u iho mau taeae e tuahine e ua itoitohia ratou i to ’u faarururaa i te patoiraa a papa ma te ore e tuu. Ua bapetizohia mama e e ono o to ’u mau taeae e tuahine. Ua taui rii te huru o papa, e ua apiti oia i te tahi o te mau putuputuraa hou oia a pohe ai.

Mai te peu tera te hinaaro o te Atua, e ho‘i mai ïa te mau melo o to ’u utuafare e te mau hoa i te ora i roto i te ao apî. Auê ïa te oaoa ia haamori ia Iehova e a muri noa ’tu e te feia o ta tatou e here ra! *

^ par. 32 A faaineinehia ’i teie tumu parau no te neneiraa, ua pohe o Corwin Robison ma te taiva ore ia Iehova.