Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Fepuare 2016

Ua pii Iehova ia ’na “tau hoa”

Ua pii Iehova ia ’na “tau hoa”

“O oe . . . , e Iseraela, o to ’u ïa tavini; o oe hoi, e Iakoba, o tei maitihia ïa e au; te huaai o tau hoa o Aberahama.”—ISA. 41:8.

HIMENE: 91, 22

1, 2. (a) E nafea tatou e ite ai e e nehenehe te mau taata e riro ei hoa no te Atua? (b) Eaha ta tatou e hi‘opoa mai i roto i teie tumu parau?

MAI te taime a fanauhia ’i tatou e tae atu i to tatou poheraa, e hinaaro iho â tatou i te here. E hinaaro rahi mau te taata eiaha noa i te here e vai ra i rotopu i te tane e te vahine, i te hoê râ auhoaraa piri e te au mau. Teie râ, e hinaaro rahi atu â tatou i te here no ǒ mai ia Iehova ra. E rave rahi taata o te ore ra e tiaturi e e nehenehe te taata e fana‘o i te hoê auhoaraa au mau e te Atua no te mea aita o ’na e ite-mata-hia e e Atua Mana hope o ’na. Ua ite râ tatou i te parau mau!

2 Ua ite tatou i roto i te Bibilia e ua riro te mau taata ei hoa no te Atua. Mea titauhia ia huti mai tatou i te haapiiraa i to ratou hi‘oraa. No te aha? No te mea o te auhoaraa e te Atua te fa faufaa roa ’‘e ta tatou e nehenehe e haamau i roto i to tatou oraraa. A feruri na i te hi‘oraa o Aberahama. (A taio i te Iakobo 2:23.) Mea nafea oia i te riroraa ei hoa no te Atua?  Ua niuhia te auhoaraa piri o Aberahama e te Atua i nia i te faaroo, e ua itehia o ’na mai ‘te metua o te taata atoa i faaroo ra.’ (Roma 4:11) A feruri i nia i to ’na hi‘oraa, e ui ana‘e, ‘E nafea vau e pee ai i te faaroo o Aberahama e e haapuai ai i to ’u auhoaraa e o Iehova?’

MEA NAFEA ABERAHAMA I RIRO MAI AI EI HOA NO IEHOVA?

3, 4. (a) A faataa eaha te tamataraa rahi roa ’‘e o te faaroo o Aberahama. (b) No te aha Aberahama i ineine ai i te pûpû ia Isaaka?

3 A feruri na ia Aberahama i te 125raa o to ’na matahiti e haere ra na nia i te hoê mou‘a. [1] I muri ia ’na, ta ’na tamaiti ïa o Isaaka e 25 matahiti to ’na. Te amo ra oia i te vahie e ua hopoi Aberahama i te hoê tipi e te mau mea atoa tei titauhia no te faaama i te hoê auahi. E tere fifi mau teie no Aberahama. E ere râ no to ’na matahiti rahi, mea itoito noa hoi o ’na. Mea fifi teie tere no te mea ua ani Iehova ia pûpû i ta ’na tamaiti!—Gen. 22:1-8.

Aita Aberahama i auraro i te Atua ma te taa ore, oia hoi, i auraro ia ’na ma te feruri ore no te mea e faaroo mau to ’na

4 E tamataraa rahi roa ’‘e paha teie no te faaroo o Aberahama. No vetahi, mea ino te Atua i to ’na aniraa ia Aberahama ia pûpû i ta ’na tamaiti. Ua parau vetahi ê e ua hinaaro iho â Aberahama e rave i te reira no te mea aita o ’na i here i ta ’na tamaiti. Ua mana‘o te taata mai te reira no te mea aita to ratou e faaroo e aita ratou i ite eaha te faaroo mau aore ra nafea te reira e ohipa ’i. (Kor. 1, 2:14-16) Aita râ Aberahama i auraro i te Atua ma te taa ore, oia hoi, i auraro ia ’na ma te feruri ore. Ua auraro ra oia no te mea e faaroo mau to ’na. Ua ite oia e e ore Iehova e ani ia ’na ia rave i te tahi ohipa o te faaoto roa ia ’na. Ua ite Aberahama e ia faaroo oia, e haamaitai Iehova ia ’na e i ta ’na tamaiti here e. Eaha tei titauhia ia Aberahama no te faatupu i te hoê faaroo puai mai teie? Ua titauhia ia ’na te ite e te aravihi.

5. (a) Mea nafea paha Aberahama i te haapiiraa no nia ia Iehova? (b) Ua turai te mau mea atoa ta ’na i haapii ia aha?

5 Te ite. Ua paari mai Aberahama i roto i  te hoê oire piihia Ura. I reira, ua haamori te mau taata i te mau atua hape mai to ’na papa i na reira. (Ios. 24:2) Mea nafea ïa Aberahama i te haapiiraa no nia ia Iehova? Te faaite ra te Bibilia e e fetii o Sema, te tamaiti a Noa, e o Aberahama. E ua ora noa Sema e tae atu i to Aberahama 150raa o to ’na matahiti. E faaroo puai to teie taata e ua paraparau paha oia i to ’na fetii no nia ia Iehova. Aita i papu ia tatou. Teie râ, mea na reira paha Aberahama i te iteraa no nia ia Iehova. Ua here Aberahama ia Iehova maoti te mau mea atoa ta ’na i haapii no nia ia ’Na e ua tauturu te reira ia ’na ia faatupu i te faaroo.

6, 7. Mea nafea to Aberahama aravihi i haapuai ai i to ’na faaroo?

6 Te aravihi. Mea nafea Aberahama i aravihi ai e i haapuai ai i to ’na faaroo ia Iehova? No vetahi, e turai te mana‘o ia faatupu i te huru aau, e te huru aau ia ohipa. Ua haaputapû te mau mea atoa ta Aberahama i haapii no nia i te Atua i to ’na aau, e ua faatura rahi oia i “te Atua teitei ra [o] Iehova, i te Fatu o te ra‘i e te fenua nei.” (Gen. 14:22) Ua pii te Bibilia i teie faatura hohonu, te “mǎta‘u i te Atua.” (Heb. 5:7) No te fana‘o i te hoê auhoaraa piri e te Atua, mea titauhia ia tatou te mǎta‘u i te Atua. (Sal. 25:14) O teie huru maitai tei turai ia Aberahama ia auraro ia Iehova.

7 Ua parau te Atua ia Aberahama e Sara ia faarue i to raua fare i Ura e ia haere i te tahi atu â vahi. E feia paari raua e e titauhia ia raua ia ora i roto i te mau fare ie i te toearaa o to raua oraraa. Noa ’tu e ua ite Aberahama e e faaruru raua i te mau tupuraa atâta, ua faaoti papu o ’na e auraro ia Iehova. No reira, ua haamaitaihia e ua paruruhia oia e te Atua. Ei hi‘oraa, ua paruru semeio Iehova ia Aberahama raua Sara e rave rahi taime a faaatea-ê-hia ’i ta Aberahama vahine nehenehe mau ra o Sara ia ’na e a mǎta‘u ai Aberahama no to ’na iho ora. (Gen. 12:10-20; 20:2-7, 10-12, 17, 18) Ua puai atu â to Aberahama faaroo maoti teie tupuraa.

8. E nafea tatou e fana‘o ai i te ite e te aravihi no te haapuai i to tatou auhoaraa e o Iehova?

8 E nehenehe anei tatou e fana‘o i te hoê auhoaraa piri e o Iehova? E. Mea papu roa ïa te reira! Mai ia Aberahama, e titauhia ia haapii tatou no nia ia Iehova. E nehenehe atoa e noaa ia tatou te ite e te aravihi ta tatou e hinaaro mau ra. I teie mahana, mea fana‘o a‘e ïa tatou ia Aberahama. (Dan. 12:4; Roma 11:33) I roto te Bibilia, mea rahi te ite no nia i “te Fatu o te ra‘i e te fenua nei.”  E turai mai ta tatou e haapii ra ia here ia Iehova e e tauturu mai te reira ia faatura rahi ia ’na. E turai atoa mai teie here e teie faatura no te Atua ia auraro ia ’na. Ma te na reira, te ite ra tatou e nafea Iehova e paruru ai e e haamaitai ai ia tatou. Maoti te reira, e aravihi atu â ïa tatou e e haapuai te reira i to tatou faaroo. Ia tavini tatou ia Iehova i te taime taatoa, e fana‘o tatou i te oaoa e te hau. (Sal. 34:8; Mas. 10:22) E puai atu â to tatou auhoaraa e o ’na, ia noaa ia tatou hau atu â ite e aravihi.

MEA NAFEA ABERAHAMA I TE TAPEARAA I TO ’NA AUHOARAA E TE ATUA

9, 10. (a) Eaha te titauhia ia rave ia riro te hoê auhoaraa ei mea puai? (b) Na te aha e faaite e ua poihere e ua haapuai Aberahama i to ’na auhoaraa e o Iehova?

9 E nehenehe te hoê auhoaraa e faaauhia i te hoê tao‘a faufaa. (A taio i te Maseli 17:17.) E ere te reira mai te hoê vairaa tiare mea moni roa o tei faaohipa-noa-hia no te faanehenehe. E au râ te auhoaraa i te hoê tiare nehenehe o te hinaaro mau ra i te pape e te haapao maitai no te uaa mai. Ua poihere e ua haapuai Aberahama i to ’na auhoaraa e o Iehova. Mea nafea ïa?

Ua riro te auhoaraa mai te hoê tiare nehenehe o te hinaaro mau ra i te pape e te haapao maitai no te uaa mai

10 Ua haapuai noa Aberahama i to ’na mǎta‘u e to ’na auraro i te Atua. Ei hi‘oraa, a haere ai oia e to ’na utuafare e ta ’na mau tavini i Kanaana, ua vaiiho noa oia ia Iehova ia aratai ia ’na a rave ai oia i te mau faaotiraa rahi aore ra te mea iti. Hoê matahiti i muri iho a fanauhia ’i Isaaka, i te 99raa o to Aberahama matahiti, ua parau Iehova ia ’na ia peritome i te mau aiû atoa o to ’na utuafare. Ua feaa anei Aberahama i ta Iehova i parau ia ’na aore ra ua imi anei oia i te hoê otoheraa no te ore e rave i ta Iehova i ani ia ’na? Aita, ua tiaturi oia ia Iehova e ua auraro oia “i taua mahana ra.”—Gen. 17:10-14, 23.

11. No te aha Aberahama i hepohepo ai no nia ia Sodoma e Gomora, e mea nafea Iehova i te tautururaa ia ’na?

11 No te mea ua auraro noa Aberahama ia Iehova i roto atoa i te mea iti, ua puai atu â to raua auhoaraa. No ’na, ua nehenehe oia e paraparau ia Iehova no nia i te mau mea atoa, mai te aniraa i ta ’na tauturu ia faaruru i te mau tupuraa fifi mau. Ei hi‘oraa, i to Iehova faaiteraa e e haamou oia i na oire e piti o Sodoma e Gomora, ua hepohepo Aberahama. No te aha? Ua haapeapea oia ia haamouhia te feia iino e oia atoa te feia maitai. Peneia‘e ua haapeapea atoa oia no to ’na fetii ra o Lota e to ’na utuafare, o tei ora i Sodoma. Ua tiaturi Aberahama ia Iehova, “te Haava i to te ao atoa nei.” No reira Aberahama i faaite ai ia Iehova i ta ’na mau haapeapearaa ma te haehaa. Ua faaite Iehova i te faaoromai i to ’na hoa a haapapu atu ai ia ’na i to ’na aroha hamani maitai. Ua faataa Iehova e noa ’tu e e haava oia, e imi oia i te feia maitai no te faaora ia ratou.—Gen. 18:22-33.

12, 13. (a) Mea nafea te ite e te aravihi o Aberahama i tauturu ai ia ’na i muri iho? (b) Eaha te faaite e ua tiaturi Aberahama ia Iehova?

 12 Mea papu e ua tauturu te ite e te aravihi ta Aberahama i fana‘o ia puai noa to ’na auhoaraa e o Iehova. No reira i muri iho, i to Iehova aniraa ia Aberahama ia pûpû i ta ’na tamaiti, ua taa ia ’na e ua faaite noa Iehova i te faaoromai, te hamani maitai, te parau mau e ua paruru atoa oia ia ’na. Ua papu iho â ia Aberahama e ere roa ’tu Iehova i te hoê Atua haavî aore ra etaeta! No te aha ïa tatou e parau i te reira?

13 Hou a faarue ai i ta ’na mau tavini, ua parau Aberahama: “E parahi orua i ǒ nei, e te asini; e haere mâua e te tamaiti nei i ǒ a‘era e haamori i te Atua; a ho‘i mai ai ia orua nei.” (Gen. 22:5) Eaha ta Aberahama e hinaaro ra e parau? Ua haavare anei oia i te parauraa ’tu e e ho‘i mai raua Isaaka, ma te ite e e pûpû oia ia ’na? Aita. Te na ô ra te Bibilia e ua ite Aberahama e e nehenehe Iehova e faaora ia Isaaka mai te pohe mai. (A taio i te Hebera 11:19.) Ua ite Aberahama e noa ’tu mea paari roa raua Sara, ua horoa Iehova i te puai ia nehenehe raua e fanau i te hoê tamaiti. (Heb. 11:11, 12, 18) Ua taa ïa ia ’na e aita hoê ohipa e ore e tia ia Iehova ia rave. Aita Aberahama i ite eaha te ohipa e tupu i taua mahana ra. Teie râ, ua tiaturi oia e ia tupu noa ’tu, e faatia faahou Iehova i ta ’na tamaiti ia tupu mai te mau parau fafau atoa a te Atua. No reira, ua piihia Aberahama te ‘metua o te taata atoa i faaroo ra.’

Ua tiaturi o Aberahama e ia pohe noa ’tu Isaaka, e faatia faahou Iehova i ta ’na tamaiti ia tupu mai te mau parau fafau atoa a te Atua

14. Eaha ta te mau tamataraa ta outou e faaruru ra a tavini ai ia Iehova, e e nafea te hi‘oraa o Aberahama e tauturu ai ia outou?

14 I teie râ mahana, eita Iehova e ani ia tatou ia pûpû i ta tatou mau tamarii, ia auraro râ tatou i ta ’na mau faaueraa. I te tahi mau taime, aita paha tatou e taa ra i te tumu o teie mau faaueraa aore ra peneia‘e e mana‘o tatou e mea fifi ia pee i te reira. Aita anei outou i mana‘o mai tera? No vetahi, mea fifi roa te pororaa. Peneia‘e mea mamahu e mea fifi no ratou ia paraparau i te mau taata aita ratou i matau. E mǎta‘u paha ratou i te faaite e mea taa ê ratou i te vahi raveraa ohipa e te fare haapiiraa. (Exo. 23:2; Tes. 1, 2:2) Ia anihia outou ia rave i te hoê ohipa fifi, a feruri i te hi‘oraa faahiahia mau o te faaroo e te itoito o Aberahama. Ia feruri maite tatou i te hi‘oraa o te mau tane e vahine taiva ore, e turai te reira ia tatou ia pee i to ratou hi‘oraa e ia haafatata ’tu â i to tatou Hoa ra o Iehova.—Heb. 12:1, 2.

E HOPOI MAI TE HOÊ AUHOARAA I TE MAU HAAMAITAIRAA

15. No te aha tatou e papu ai aita roa ’tu Aberahama i tatarahapa i to ’na auraroraa ma te taiva ore ia Iehova?

15 Ua tatarahapa a‘ena anei Aberahama no te mea ua auraro oia i te mau faaueraa a Iehova? Te parau ra te Bibilia no nia ia  Aberahama e ua “pohe roa a‘era i te ruhiruhiaraa ra, ua ruhiruhia roa te taata, ua rahi roa to ’na matahiti.” (Gen. 25:8) I te 175raa o to ’na matahiti, ua nehenehe Aberahama e feruri i nia i te roaraa o to ’na oraraa e e ite i te oaoa. No te aha? No te mea ua riro to ’na auhoaraa e o Iehova ei mea faufaa roa ’‘e no ’na. A taio ai râ tatou no nia ia Aberahama, ‘ua ruhiruhia roa oia, ua rahi roa to ’na matahiti,’ e ere ïa i te auraa e aita oia i hinaaro e ora e a muri noa ’tu.

16. Eaha te oaoa ta Aberahama e nehenehe e ite i roto i te paradaiso?

16 Te parau ra te Bibilia no Aberahama e “te tiai ra hoi oia i te hoe oire niu mau, ta te Atua e faaau e e faatia ra.” (Heb. 11:10, Te Bibilia Mo‘a V.C.J.S., 1976) Ua tiaturi o Aberahama e e ite oia i teie oire i te hoê mahana, oia hoi, te Basileia o te Atua e faatere i te fenua nei. E e ite mau iho â oia i te reira! A feruri na i te oaoa ta Aberahama e ite a ora ’i oia i roto i te paradaiso i te fenua nei e a tamau noa ’i i te haapuai i to ’na auhoaraa e te Atua. E oaoa oia i te ite e ua tauturu to ’na hi‘oraa o te faaroo i te mau tavini a te Atua tausani matahiti i te maoro! E ite oia i roto i te paradaiso e ua riro te tusia i nia i te mou‘a Moria ei taipe no te tahi tupuraa rahi atu â. (Heb. 11:19) E ite oia mea nafea te oto a faaineine ai oia i te pûpû i ta ’na tamaiti Isaaka i te tautururaa e mirioni taata taiva ore ia taa i to Iehova oto a horoa ’i oia i ta ’na Tamaiti, Iesu Mesia, ei hoo no te taatoaraa. (Ioa. 3:16) Ua tauturu te hi‘oraa o Aberahama ia tatou paatoa ia haafaufaa rahi atu â i te hoo, te faaiteraa rahi roa ’‘e o te here i ore i itehia a‘enei.

17. Eaha ta outou e faaoti papu i te rave, e eaha ta tatou e hi‘opoa mai i roto i to muri nei tumu parau?

17 Ia faaoti papu tatou taitahi i te pee i to Aberahama faaroo. Mai ia ’na, e hinaaro tatou i te ite e te aravihi. E tamau ana‘e i te haapii no nia ia Iehova e ia auraro ia ’na, e ite ïa tatou mea nafea oia e haamaitai ai e e paruru ai ia tatou. (A taio i te Hebera 6:10-12.) Ia riro noa Iehova ei Hoa no tatou e a muri noa ’tu! I roto i to muri nei tumu parau, e hi‘opoa tatou e toru a‘e hi‘oraa o te feia taiva ore o tei riro mai ei hoa piri no te Atua.

^ [1] (paratarafa 3) Na mua ’‘e, o Aberama e Sari te i‘oa o Aberahama e Sara. I roto râ i teie tumu parau, e faaohipa tatou i te i‘oa ta Iehova i horoa no raua i muri a‘e.