Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) FEPUARE 2016

A pee i te hi‘oraa o te mau hoa piri o Iehova

A pee i te hi‘oraa o te mau hoa piri o Iehova

“Te auhoaraa piri roa e o Iehova, tei te feia ïa i mǎta‘u ia ’na.”—SAL. 25:14, New World Translation.

HIMENE: 106, 118

1-3. (a) No te aha tatou e papu ai e e nehenehe tatou e riro ei hoa no te Atua? (b) Eaha ta tatou taitahi e hi‘opoa mai i roto i teie tumu parau?

I ROTO i te Bibilia, ua piihia Aberahama hoa no te Atua. (Par. 2, 20:7; Isa. 41:8; Iak. 2:23) O Aberahama ana‘e te taata ta te Bibilia i pii, hoa o te Atua. Te auraa ïa e o Aberahama noa ana‘e te taata o te riro mai ei hoa no Iehova? Aita. Te faaite ra te Bibilia e e nehenehe tatou pauroa e fana‘o i te reira.

2 I roto i te Parau a te Atua, e rave rahi aamu o te mau tane e vahine taiva ore o tei mǎta‘u ia Iehova, o tei tiaturi ia ’na e o tei riro mai ei hoa piri roa no ’na. (A taio i te Salamo 25:14 i roto i te nota.) [1] Tei roto atoa ratou i te ‘nahoa rahi ite’ ta Paulo i faataa. Pauroa teie mau taata taitahi, e mau hoa ana‘e no te Atua.—Heb. 12:1.

3 E hi‘o ana‘e e toru hoa o Iehova o ta te Bibilia e faahiti ra: (1) Ruta, te hoê vahine ivi taiva ore no Moabi, (2) Hezekia, te hoê arii taiva ore no Iuda, e (3) Maria, te metua vahine o Iesu o tei faaite i te haehaa. Eaha ta tatou e haapii mai i ta ratou i rave no te riro mai ei hoa no te Atua?

 UA FAAITE OIA I TE HERE TAIVA ORE

4, 5. Eaha te mau faaotiraa fifi ta Ruta i rave, e no te aha mea fifi no ’na ia na reira? (A hi‘o i te hoho‘a matamua.)

4 E vahi atea ta Naomi e ta ’na na hunoa vahine, o Ruta raua Oraphe, e haere ra mai Moabi e tae atu i Iseraela. A haere noa ’i ratou, ua faaoti o Oraphe e ho‘i i te fare i Moabi. O Naomi râ, ua faaoti oia e ho‘i i Iseraela, to ’na iho fenua. Eaha ta Ruta i faaoti i te rave? Ua titauhia ia ’na ia rave i te hoê faaotiraa fifi mau. E ho‘i anei oia i te fare i Moabi i to ’na utuafare aore ra e faaea anei oia i pihaiiho ia Naomi, to ’na metua vahine hoovai, no te haere i Betelehema?—Ruta 1:1-8, 14.

5 Te ora ra te utuafare o Ruta i Moabi. E nehenehe ta ’na e ho‘i i ǒ ratou e na ratou paha e aupuru ia ’na. Ua matau oia i te taata, te reo e te peu tumu i Moabi. Eita ta Naomi e nehenehe e haapapu ia Ruta i te tahi noa ’‘e o teie mau mea i Betelehema. E ua mǎta‘u Naomi e eita Ruta e ite mai i te hoê tane aore ra i te hoê fare no ’na. Parau atura Naomi ia ’na ia ho‘i i Moabi. Mai ta tatou i ite, ua ‘ho‘i Oraphe i to ’na ra taata, e i to ’na ra mau atua.’ (Ruta 1:9-15) Ua faaoti o Ruta e eita roa ’tu oia e ho‘i i roto i to ’na nunaa e e haamori i to ratou mau atua hape.

6. (a) Eaha te maitiraa î i te paari ta Ruta i rave? (b) No te aha Boaza i parau ai no Ruta e te imi ra o ’na i te haapuraa i raro a‘e i to Iehova pererau?

6 E au ra e ua haapii o Ruta no nia ia Iehova maoti ta ’na tane aore ra ia Naomi. Ua haapii oia e ere Iehova mai te mau atua no Moabi. Ua here Ruta ia Iehova. Ua ite oia e ua tia ia Iehova ia fana‘o i to ’na here e ia haamori oia ia ’Na. Ua rave Ruta i te hoê maitiraa î i te paari. Ua parau oia ia Naomi: “To oe ra nunaa, o to ’u atoa ïa nunaa; e to oe ra Atua, o to ’u atoa ïa Atua.” (Ruta 1:16) E putapû to tatou aau ia feruri tatou i nia i to Ruta here no Naomi. Te mea faahiahia roa râ, o te here ïa o Ruta no Iehova. Ua faahiahia atoa o Boaza i te reira, i muri a‘e, ua haapopou oia ia ’na no to ’na ‘imiraa i te haapuraa i raro a‘e i to Iehova pererau.’ (A taio i te Ruta 2:12.) Te haamana‘o mai ra te mau ta‘o ta Boaza i faaohipa e e nafea te manu iti e imi ai i te paruru i raro a‘e i te pererau o to ’na metua. (Sal. 36:7; 91:1-4) Hoê â huru, ua horoa Iehova ia Ruta i te hoê paruru î i te here e ua haamaitaihia oia no to ’na faaroo. Aita hoê a‘e tumu i tatarahapa ’i Ruta i ta ’na faaotiraa.

7. Eaha te nehenehe e tauturu i te feia o te taiâ ra i te pûpû i to ratou ora ia Iehova?

7 E rave rahi taata o te haapii ra no nia ia Iehova, aita râ ratou e maiti ia ’na ei haapuraa no ratou. Te taiâ nei ratou i te pûpû i to ratou ora ia ’na e i te bapetizo ia ratou. Ia mana‘o oe mai tera, a feruri no te aha oe i taiâ ’i. Pauroa te taata e haamori i te hoê atua aore ra i te tahi atu. (Ios. 24:15) E te maitiraa î i te paari te rave, o te taviniraa ïa i te Atua mau. Ia pûpû oe ia oe ia Iehova, te faaite ra oe i to oe tiaturiraa e o ’na to oe haapuraa. E tauturu oia ia oe ia tavini noa ia ’na noa ’tu te fifi e rave rau ta oe e farerei. Tera ta Iehova i rave no Ruta.

‘UA ATI MAITE OIA IA IEHOVA’

8. A faataa i te tupuraa o Hezekia.

8 Mea taa ê roa te tupuraa o Hezekia i to Ruta. No roto mai oia i te hoê nunaa o tei pûpû ia ratou i te Atua. Aita râ te taatoaraa o te mau Iseraela i vai taiva ore. E arii ino mau Ahaza, te metua tane o Hezekia. Ua  faaite oia i te faatura ore i te hiero o te Atua e ua turai i te nunaa ia haamori i te tahi atu mau atua. Ua tutui oraora noa Ahaza i te tahi o te mau tuaane o Hezekia i roto i te auahi ei tusia no te hoê atua haavare. E oraraa riaria mau to Hezekia mai to ’na tamariiriiraa!—Arii 2, 16:2-4, 10-17; Par. 2, 28:1-3.

9, 10. (a) No te aha i nehenehe ai Hezekia e inoino? (b) No te aha eiaha ’i tatou e inoino i te Atua? (c) No te aha eiaha ’i tatou e mana‘o e na to tatou tupuraa e faaoti i te huru taata ta tatou e riro mai?

9 Ua nehenehe te hi‘oraa ino o Ahaza e turai i ta ’na tamaiti ra o Hezekia e inoino aore ra e riri ia Iehova. I teie mahana, mea iti ta te tahi atu mau taata e faaruru ra i ta Hezekia, e ua mana‘o ratou e e tumu papu i ‘riri ai ratou ia Iehova’ aore ra i inoino ai i ta ’na faanahonahoraa. (Mas. 19:3) No vetahi, te mana‘o ra ratou e e nehenehe to ratou oraraa utuafare ino e turai ia ratou ia pee i teie huru oraraa ino aore ra ia rave atoa i te hoê â hape a to ratou mau metua. (Ezk. 18:2, 3) Mea tano anei râ teie mau mana‘o?

10 Ei pahonoraa i teie uiraa, ua haapapu to Hezekia oraraa e e ere i te reira! Aita roa ’tu hoê tumu papu e riri ai ia Iehova. Eita oia e faatupu i te mau mea ino i nia i te taata. (Ioba 34:10) Mea papu, e nehenehe te mau metua e haapii i ta ratou mau tamarii ia rave i te mea maitai aore ra i te mea ino. (Mas. 22:6; Kol. 3:21) E ere râ te auraa e e turai to tatou huru oraraa ia faaoti i te huru taata ta tatou e riro mai. No te aha? No te mea ua horoa mai Iehova ei ô te tiamâraa e maiti, te auraa ïa e e nehenehe ta tatou e maiti i te mea maitai aore ra i te mea ino. (Deut. 30:19) Mea nafea Hezekia i te faaohiparaa i teie ô faufaa mau?

E rave rahi taata apî o tei farii i te parau mau noa ’tu to ratou huru oraraa utuafare (A hi‘o i te paratarafa 9, 10)

11. Eaha ta Hezekia hoê o te arii maitai roa ’‘e no Iuda i rave?

11 Noa ’tu o to ’na metua tane hoê o te mau arii ino roa ’‘e i Iuda, e taata maitai roa râ o Hezekia. (A taio i Te mau arii 2, 18:5, 6.) Ua maiti oia eiaha e pee i te hi‘oraa ino o to ’na metua tane. E ua maiti oia e faaroo maite i te mau peropheta a Iehova, mai ia Isaia, Mika e Hosea. Ua haapao maite oia i ta ratou a‘oraa. Ua turai te reira ia ’na ia faaafaro e rave rahi fifi ta to ’na metua tane i faatupu. Ua tamâ ïa oia i te hiero a ani atu ai i te Atua  ia faaore i te hara a te mau taata e a faaore ai i te mau idolo i tera fenua. (Par. 2, 29:1-11, 18-24; 31:1) I muri iho, i te hinaaroraa te arii Senakeriba no Asura e aro ia Ierusalema, ua faaite Hezekia i te itoito rahi e te faaroo. Ua tiaturi oia i ta Iehova paruru e ua faaitoito oia i te nunaa. (Par. 2, 32:7, 8) I te hoê taime, ua riro mai Hezekia ei taata teoteo. A a‘o ai râ Iehova ia ’na, ua faaite oia i te haehaa. (Par. 2, 32:24-26) Te mea papu, e hi‘oraa faahiahia mau o Hezekia no tatou. Aita oia i vaiiho i te huru oraraa o to ’na utuafare e haafifi i to ’na oraraa. Ua faaite râ oia e e hoa oia no Iehova.

12. Mai ia Hezekia, mea nafea e rave rahi i teie mahana i haapapu ai e e hoa ratou no Iehova?

12 Mea ino e mea aroha ore teie ao. E rave rahi tamarii o tei paari mai e aita te mau metua e here e e haapao ia ratou. (Tim. 2, 3:1-5) Noa ’tu e i teie mahana, no roto mai e rave rahi Kerisetiano i te mau utuafare fifi mau, ua maiti ratou e faatupu i te hoê auhoaraa e o Iehova. Mai ia Hezekia, ua faaite ratou e ere na to ratou huru oraraa utuafare e faaoti i te huru taata ta ratou e riro mai i muri a‘e. Ua horoa mai te Atua i te ô o te tiamâraa, e nehenehe tatou e maiti i te tavini e i te faahanahana ia Iehova mai ia Hezekia.

“INAHA EI TAVINI AU NO TE FATU”

13, 14. No te aha e au ra e mea fifi atoa te hopoia a Maria, e mea nafea râ oia i te fariiraa i ta Gaberiela mau parau?

13 E rave rahi matahiti i muri a‘e i te tau o Hezekia, te vai ra te hoê vahine apî e te haehaa, o Maria to ’na i‘oa. E auhoaraa taa ê mau â to ’na e o Iehova e e hopoia otahi ta ’na. E hapû mai oia, e fanau atoa mai e e aupuru oia i te Tamaiti a te Atua! Mea papu e ua here e ua tiaturi Iehova ia Maria, inaha, ua horoa ’tu oia i te hoê fana‘oraa taa ê faahiahia mau mai teie. Eaha râ to Maria huru na mua a faaroo ai oia no nia i teie hopoia?

“Inaha ei tavini au no te Fatu” (A hi‘o i te paratarafa 13, 14)

14 E pinepine tatou i te paraparau no nia i te haamaitairaa rahi i horoahia ia Maria. Eaha râ te tahi o to ’na mau mǎta‘u? Ei hi‘oraa, ua parau te melahi ra o Gaberiela e e hapû mai oia ma te ore râ te hoê taata e taoto ia ’na. Aita râ o Gaberiela i faataa i to Maria utuafare e te mau hoa e nafea o ’na e hapû mai ai. Eaha ta ratou e mana‘o? E nafea oia e haapapu ai ia Iosepha e aita oia i taiva ia ’na? Hau atu â, e hopoia rahi mau ta ’na no te aupuru i te Tamaiti a te Atua mai te hoê taata! Aita tatou i ite i te taatoaraa o ta Maria mau haapeapearaa. Ua ite râ tatou eaha ta ’na i rave i muri a‘e i to Gaberiela paraparauraa ia ’na. Ua na ô oia: “Inaha ei tavini au no te Fatu, ia na reirahia mai au mai ta oe i parau na.”—Luka 1:26-38.

15. No te aha e faaroo faahiahia to Maria?

 15 E faaroo faahiahia to Maria! Ua ineine oia i te rave i te mau mea atoa e anihia ia ’na ia rave mai te hoê tavini. Ua tiaturi oia e aupuru e e paruru Iehova ia ’na. E nafea Maria e faaite ai i teie huru faaroo puai? Aita tatou i fanauhia mai e te faaroo. E nehenehe râ tatou e fana‘o i te faaroo ia faatupu tatou i te reira e ia ani i te Atua ia haamaitai mai i ta tatou mau tutavaraa. (Gal. 5:22; Eph. 2:8) Ua haa rahi o Maria no te haapuai i to ’na faaroo. Mea nafea tatou i te iteraa i te reira? E hi‘o mai ïa tatou mea nafea oia i te faarooraa e eaha ta Maria i parau.

16. Na te aha e haapapu e ua faaroo maite Maria?

16 Mea nafea Maria i te faarooraa. Te parau ra te Bibilia e ia ‘ru tatou i te faaroo, ia haere maine i te parau.’ (Iak. 1:19) Ua faaroo maite Maria. Te faaite ra te Bibilia e mea haapao roa oia i te mau mea atoa o ta ’na i faaroo, te mau mea iho â râ no nia ia Iehova. Ua rave oia i te taime no te feruri maite i nia i te mau mea faufaa atoa. Hoê hi‘oraa o te reira, o te mahana ïa a fanauhia ’i Iesu, a parau ai te mau tiai mamoe ia Maria no nia i te hoê poroi no ǒ mai i te hoê melahi ra. I muri a‘e, i te 12raa o to Iesu matahiti, ua maere roa o Maria i to Iesu faahitiraa i te hoê parau. I roto i na tupuraa e piti, ua faaroo Maria, ua haamana‘o e ua feruri maite oia i ta ’na i faaroo.—A taio i te Luka 2:16-19, 49, 51.

17. E nafea tatou e haapii ai no nia ia Maria na roto i ta ’na i parau?

17 Eaha ta Maria i parau. Aita te Bibilia e faahiti roa ra no nia i ta Maria i parau. Tei roto te Luka 1:46-55 te paraparauraa roa ’‘e a Maria. Te faaite ra teie mau parau e mea ite roa oia i te mau Papai Hebera. E nafea tatou e ite ai? Ua tuea noa te mau parau a Maria i te mau parau o te pure a Hana, te metua vahine o Samuela. (Sam. 1, 2:1-10) E au ra e ua faahiti o Maria i te mau Papai e 20 taime i roto i ta ’na paraparauraa. Mea papu, mea au roa na ’na e paraparau no nia i ta ’na i haapii no ǒ mai i to ’na Hoa rahi ra o Iehova.

18. E nafea tatou e nehenehe ai e pee i to Maria faaroo?

18 Mai ia Maria, i te tahi mau taime, e horoahia mai te tahi mau hopoia no ǒ mai ia Iehova ra o ta tatou e mana‘o e mea fifi roa no tatou. A pee i to ’na hi‘oraa, a farii ma te haehaa i te hopoia e a tiaturi i ta Iehova tauturu. E nehenehe atoa tatou e pee i to Maria faaroo ma te faaroo maite ia Iehova e ma te feruri maite i ta ’na e haapii mai ra no nia ia ’na e i ta ’na mau opuaraa. E nehenehe ïa tatou e faaite ma te oaoa ia vetahi ê eaha ta tatou i haapii.—Sal. 77:11, 12; Luka 8:18; Roma 10:15.

19. Eaha tei papu ia tatou ia pee tatou i te mau hi‘oraa Bibilia faahiahia mau o te faaroo?

19 Mea papu e hoa o Ruta, Hezekia e Maria no Iehova, mai ia Aberahama. E ‘nahoa rahi ite’ ratou o tei riro mai ei hoa no te Atua. E tamau ana‘e i te pee i teie mau hi‘oraa faahiahia mau o te faaroo. (Heb. 6:11, 12) Ia na reira tatou, e nehenehe tatou e fana‘o i te haamaitairaa e riro mai ei hoa no Iehova e a muri noa ’tu!

^ [1] (paratarafa 2) Salamo 25:14 (NWT): “Te auhoaraa piri roa e o Iehova, tei te feia ïa i mǎta‘u ia ’na.”