Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) EPERERA 2016

 AAMU

E mau paretenia tei riro mai ei tuahine i te pae varua

E mau paretenia tei riro mai ei tuahine i te pae varua

E RAVE rahi matahiti i teie nei, ua riri e ua tuô to ’u tuahine apî a‘e ia ’u, o Araceli to ’na i‘oa: “Eiaha oe e paraparau faahou mai ia ’u. Aita vau e hinaaro e faaroo i te tahi atu mau mea o ta oe haapaoraa. Ua taahoa roa vau. Ua riri roa vau ia oe!” Ua mauiui roa vau i teie mau parau. E 91 matahiti to ’u i teie nei, e te haamana‘o maitai ra vau i te reira. Mai ta te Koheleta 7:8 râ e parau ra, “e mea maitai a‘e te hopea ra i te matamehai ra.”—Felisa.

Felisa: Ua paari au i roto i te hoê utuafare haihai i te fenua Paniora. E Katolika to ’u utuafare e mea haere roa matou i te fare pure. Inaha, 13 o to ’u mau fetii tei riro mai ei perepitero aore ra tei ohipa i te fare pure. E perepitero atoa te taeae fetii o to ’u mama e e orometua haapii oia i te hoê fare haapiiraa Katolika. I muri a‘e i to ’na poheraa, ua faahanahana te Pâpa Jean Paul II ia ’na ma te faariro atu ei peata. E taata tupai auri to ’u papa e to ’u mama, e ohipa oia i roto i te faaapu. E vau tamarii matou e o vau te matahiapo.

I te 12raa o to ’u matahiti, ua tupu te hoê tama‘i i Paniora. I muri a‘e i te tama‘i, ua afaihia to ’u papa i te fare auri, no te mea aita te faatereraa i au i to ’na mau mana‘o poritita. Mea fifi roa no to ’u mama ia faatamaa ia matou pauroa. Ua afai ïa oia to ’u mau tuahine apî a‘e ia ’u, o Araceli, Lauri e Ramoni e ora i roto i te hoê fare paretenia i te oire no Bilbao. I reira, mea navai a‘e ïa te maa no to ’u mau tuahine.

Araceli: I tera taime, 14 matahiti to ’u, 12 matahiti to Lauri e to Ramoni, 10 matahiti ïa to ’na. Ua mihi noa matou i to matou utuafare. Ta matou ohipa i te fare paretenia, o te tamâraa ïa. E piti matahiti i muri a‘e, ua tono te mau paretenia ia matou i roto i te hoê fare paretenia rarahi a‘e, i Zaragoza, o te haapao ra i te feia paari. Ua haa rahi matou no te tamâ i te fare tutu maa e ua rohirohi roa matou i te reira.

Felisa: A haere ai to ’u mau tuahine i te fare paretenia i Zaragoza, ua faaoti to ’u mama e to ’u metua fetii, e perepitero oia i te vahi i faaea ’i matou, i te afai atoa ia ’u i ǒ. Ua hinaaro raua e faaatea ê ia ’u i te hoê  taurearea mea au na ’na ia ’u. Ua oaoa vau i te haere tau taime i te fare paretenia, no te mea mea here na ’u i te Atua. Ua haere au i te fare pure pauroa te mahana e ua hinaaro vau e riro mai ei mitionare Katolika mai hoê o to ’u mau fetii i te fenua Afirika.

Te fare paretenia i Zaragoza i Paniora (aui). Te huriraa Bibilia a Nácar-Colunga (atau)

I te fare paretenia râ, mai te mea ra e eita ta ’u e nehenehe e rave i te mau mea atoa o ta ’u e hinaaro e rave. Aita te mau paretenia i faaitoito ia ’u ia tavini i te Atua i te tahi fenua, mai ta ’u i mana‘o. Hoê matahiti ïa i muri a‘e, ua ho‘i au i te fare e ua haapao vau i to ’u metua fetii, te perepitero. E tamâ vau i to ’na fare e i te mau po atoa, e faahiti mâua i te pure Rotario. Mea au atoa na ’u e faanaho i te mau tiare i roto i te fare pure e e faanehenehe i te mau hoho‘a o Maria e te mau “peata.”

Araceli: I Zaragoza, ua faahiti au i te mau euhe matamua titauhia no te riro mai ei paretenia. I muri iho, ua faaoti te mau paretenia e faataa ê ia matou e toru. Ua afai ratou ia ’u i te hoê fare paretenia i Madrid e o Lauri, i te hoê fare paretenia i Valencia. Ua faaea o Ramoni i Zaragoza. I Madrid, ua faahiti au i te piti o te anairaa euhe no te riro mai ei paretenia. E rave rahi taata, mai te mau piahi e te feia paari tei haere mai e faaea i te fare paretenia. Mea rahi ïa te ohipa e rave. Ua ohipa vau i te fare ma‘i a te fare paretenia.

Ua hinaaro mau iho â vau e riro mai ei paretenia. Ua mana‘o vau e e faaohipa matou i te rahiraa o te taime no te taio i te Bibilia e no te haapii no nia i te reira. Ua inoino râ vau. Aita hoê a‘e taata e faaohipa i te Bibilia aore ra e paraparau no nia i te Atua aore ra Iesu. Ua haapii au i te tahi mau parau na roto i te reo Latino. Ua haapii atoa vau i te oraraa a te mau “peata” Katolika e ua haamori au ia Maria. I te rahiraa râ o te taime, ua rave noa matou i te ohipa.

Ua haamata vau i te haapeapea. Ua mana‘o vau e e tia ia ’u ia noaa mai ia ’u te tahi moni no te tauturu i to ’u utuafare i te raveraa i te ohipa i te fare paretenia ia ona mai te tahi mau taata. Ua paraparau atura vau i te vahine faatere o te fare paretenia no nia i te reira, e ua parau vau ia ’na e te hinaaro nei au e ho‘i. Ua tuu oia ia ’u i roto i te hoê piha tapearaa. Ua mana‘o oia e e haaferuri te reira ia ’u ia faaea mai.

Ua tuu mai te mau paretenia ia ’u i rapae i te piha tapearaa. I to ratou râ taaraa e te hinaaro noa iho â nei au e faarue i te fare paretenia, ua tuu faahou ratou ia ’u i roto i te piha tapearaa. I muri a‘e i to ratou na reiraraa ia ’u e toru taime, ua parau mai ratou e e nehenehe ta ’u e ho‘i, ia papai râ vau: “Te haere ra vau no te mea mea au a‘e na ’u e tavini ia Satani i te Atua.” Ua huru ê roa vau. Ua hinaaro iho â vau e faarue i tera vahi, aita râ vau i hinaaro e papai i tera mau parau. Ani atura vau e te hinaaro nei au e paraparau i te hoê perepitero e ua faataa ’tu vau ia ’na i tei tupu. Ua noaa mai ia ’na te parau faatia a te Epikopo ia faaho‘ihia vau i te fare paretenia i Zaragoza. Tau ava‘e i muri a‘e,  ua faatiahia vau ia ho‘i. Tau taime i muri iho, ua faarue atoa o Lauri e o Ramoni i te fare paretenia.

TE HOÊ BUKA O TEI FAAAMAHAMAHA IA MATOU

Felisa

Felisa: Tau taime i muri iho, ua faaipoipo vau e ua haere e ora i Cantabria, te hoê mataeinaa i Paniora. Ua haere tamau vau i te fare pure. I te hoê Tapati i te fare pure, ua tuô te perepitero ma te riri, “A hi‘o i tera buka!” Ua faaite mai oia ia matou i te buka Te parau mau e aratai i te ora mure ore ra. Ua parau oia, “Mai te peu e ua horoa ’tu te hoê taata i tera buka, a horoa mai ia ’u ra aore ra a faarue ’tu!”

Aita ta ’u tera buka, ua hinaaro râ vau hoê. Tau mahana i muri iho, ua haere mai e piti vahine i to ’u fare. E Ite no Iehova raua e ua horoa mai raua i tera buka. Ua taio vau i te reira i tera iho â po. I te ho‘iraa mai teie e piti vahine, ua ani mai e aita anei au e hinaaro e haapii i te Bibilia e ua farii au.

Te buka Parau mau

Ua hinaaro noa na vau e faaoaoa i te Atua. Ua haapii au i te parau mau no nia ia Iehova e ua haamata vau i te here mau ia ’na. Ua hinaaro vau e paraparau i te mau taata atoa no nia ia ’na. I 1973, ua bapetizohia vau. I te mau taime atoa e nehenehe ta ’u, e tamata vau i te paraparau i to ’u utuafare no nia i te parau mau. No to ’u râ utuafare, to ’u tuahine iho â râ o Araceli, ua mârô oia ia ’u e mea hape ta ’u e tiaturi ra.

Araceli: I te mea hoi e e ere te feia i te fare paretenia i te mea maitai i nia ia ’u, ua riri au e aita vau i oaoa i ta ’u haapaoraa. Ua haere noa râ vau i te fare pure i te Tapati, ua faahiti au i te Rotario i te mau mahana atoa. Ua hinaaro noa iho â vau e taa i te Bibilia e ua ani au i ta te Atua tauturu. I muri iho, ua parau mai o Felisa eaha ta ’na i haapii. Ua rahi roa hoi to ’na oaoa i ta ’na i tiaturi i mana‘o ai au e ua maamaahia o ’na. Aita vau i farii i ta ’na i parau mai.

Araceli

I muri a‘e, ua ho‘i au i Madrid no te ohipa e i muri iho ua faaipoipo vau. I te roaraa o te mau matahiti, ua tapao vau e te taata o te haere pinepine i te fare pure, aita ratou e ora mau ra ia au i ta Iesu mau haapiiraa. Aita atura ïa vau i haere faahou i te fare pure. Aita vau i tiaturi faahou i te mau “peata” aore ra i te po auahi, e aita atoa vau i tiaturi faahou e e nehenehe ta te hoê perepitero e faaore i te mau hara. Ua faarue atoa vau i ta ’u mau hoho‘a faaroo atoa. Aita vau i ite mea maitai anei ta ’u e rave ra. Ua inoino roa vau, ua tamau noa râ vau i te pure i te Atua: “Te hinaaro nei au e ite no nia  ia oe. A tauturu mai ia ’u!” Te haamana‘o ra vau e e rave rahi taime to te mau Ite no Iehova patotoraa i ǒ ’u, aita râ vau i tatara noa ’‘e i te opani. Aita vau i tiaturi faahou i te mau haapaoraa atoa.

Te ora ra o Lauri i Farani e o Ramoni, te ora ra ïa i Paniora. I te omuaraa o te mau matahiti 1980, ua haamata raua i te haapii i te Bibilia e te mau Ite no Iehova. Ua papu ia ’u e mai ia Felisa, aita raua i taa e te haapii ra raua e rave rahi haavare. I muri a‘e, ua matau vau ia Angelines, hoê o to ’u mau taata tapiri e ua riro mai mâua ei hoa piri. E Ite no Iehova atoa o ’na. Ua ani mai Angelines e ta ’na tane e rave rahi taime aita anei au e hinaaro ra e haapii i te Bibilia e o raua. Ua taa ia raua e noa ’tu e parau vau e aita vau e tâu‘a ra i te haapaoraa, ua hinaaro mau râ vau e ite no nia i te Bibilia. Parau atura vau ia raua: “Na reira. E farii au i te haapii e orua, tera râ, e faaohipa vau i ta ’u iho Bibilia.” Te vai ra ta ’u te huriraa Bibilia a Nácar-Colunga.

UA TAHOÊ ATURA TE BIBILIA IA MATOU

Felisa: I to ’u bapetizoraahia i 1973, fatata e 70 Ite no Iehova i Santander, te oire pu no Cantabria. Ua titauhia ia matou ia haere atea no te poro i te mau taata atoa i na hanere oire iti o te mataeinaa. Ua rave ïa matou i te pereoo mataeinaa e i muri a‘e i te pereoo no te haere i tera oire iti e tera oire iti.

I te roaraa o te mau matahiti, ua haapii au i te Bibilia i e rave rahi taata, e 11 o ratou o tei bapetizohia. E te rahiraa o te taata o ta ’u i haapii, e Katolika ana‘e. Mea titauhia ia ’u ia faaite i te faaoromai ia ratou. Mai ia ’u, mea titauhia ia ratou te taime no te taa e mea hape ta ratou e tiaturi ra. Ua ite au e o te Bibilia ana‘e e te varua mo‘a o Iehova te nehenehe e tauturu i te hoê taata ia taui i to ’na feruriraa e ia taa i te parau mau. (Heb. 4:12) Ua bapetizohia ta ’u tane, o Bienvenido te i‘oa i 1979, e mutoi oia na mua ’‘e. E ua haamata to ’u mama i te haapii i te Bibilia hou oia a pohe ai.

Araceli: A haamata ’i au i te haapii i te Bibilia e te mau Ite no Iehova, ua mana‘o vau e eita ta ’u e nehenehe e tiaturi ia ratou. A mairi ai râ te tau, aita vau i mana‘o faahou mai tera. Aita noa te mau Ite no Iehova e haapii mai i te Bibilia, e auraro atoa râ ratou i tera mau haapiiraa. Ua rahi mai to ’u faaroo ia Iehova e i te Bibilia e ua oaoa roa ’tu â vau. Ua ite te tahi o to ’u mau taata tapiri i teie tauiraa e ua parau mai, “Araceli, a tamau i te pee i te e‘a o ta oe i maiti!”

Te haamana‘o ra vau hoê pure ta ’u, “Mauruuru Iehova i to oe oreraa i faarue ia ’u, e i te mau taime atoa ta oe i horoa mai, i nehenehe ai au e ite i ta ’u i imi noa na, te ite mau o te Bibilia.” Ua ani atoa vau i to ’u tuahine ia Felisa ia faaore mai i ta ’u mau hapa, i to ’u parauraa ’tu ia ’na te mau mea e ere i te mea maitai. Mai reira mai, eita mâua e tatama‘i te tahi e te tahi, te oaoa nei râ mâua i te aparau no nia i te Bibilia. Ua bapetizohia vau i 1989, i te 61raa o to ’u matahiti.

Felisa: E 91 matahiti to ’u i teie nei. Ua pohe ta ’u tane, e eita ta ’u e nehenehe faahou e ohipa mai na mua ’‘e. Te taio nei râ vau i te Bibilia i te mau mahana atoa e e haere au i te mau putuputuraa e i te pororaa ia nehenehe ta ’u.

Araceli: Mea au na ’u e aparau no nia ia Iehova i te mau perepitero atoa e te mau paretenia o ta ’u e farerei, no te mea paha e paretenia atoa vau na mua ’‘e. Mea anaanatae ta ’u mau aparauraa e vetahi o ratou e e rave rahi tei rave i te mau buka e te mau vea. Te haamana‘o ra vau i te hoê perepitero. I muri a‘e i te aparauraa vau ia ’na tau taime, ua farii oia i ta ’u i parau ia ’na. Ua parau mai oia: “Ua paari au, e haere au ihea? Eaha ta to ’u paroita e to ’u utuafare e parau?” Na ô atura vau ia ’na: “E te Atua ïa?” Ua taa ia ’na e ua tano vau, e ua ite au e ua oto oia. E au râ e aita to ’na e itoito no te taui.

Aita roa ’tu e moe ia ’u i te parauraa mai ta ’u tane e te hinaaro ra oia e haere na muri ia ’u i te putuputuraa. E 80 matahiti to ’na a haere mai ai oia no te taime matamua i te putuputuraa e i muri a‘e i te reira, aita oia i mairi hoê noa ’‘e putuputuraa. Ua haapii oia i te Bibilia e ua haamata i te poro. Te haamana‘o ra vau e rave rahi ohipa faahiahia mau ta mâua i rave amui i roto i te taviniraa. Ua pohe oia e piti ava‘e hou oia a bapetizohia ’i.

Felisa: A haamata ’i au i te tavini ia Iehova, ua patoi mai to ’u mau tuahine ia ’u. I muri a‘e râ, ua farii atoa ratou i te parau mau. Tera hoê o te mau ohipa maitatai roa ’‘e ta ’u i ite i roto i to ’u oraraa. I muri a‘e i te reira, ua oaoa matou i te amui no te paraparau no nia i to tatou Atua here ra, o Iehova e no nia i ta ’na Parau! Te haamori ra ïa matou paatoa ia Iehova. *

^ par. 29 E 87 matahiti to Araceli, to Felisa, 91 matahiti e to Ramoni, 83 matahiti. Te tavini noa ra â ratou paatoa ia Iehova ma te taiva ore. Ua pohe Lauri i 1990 e ua vai taiva ore atoa oia ia Iehova.