Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) EPERERA 2016

E aratai te taiva ore i te farii maitai a te Atua

E aratai te taiva ore i te farii maitai a te Atua

“[A] pee . . . i te feia i noaa tei parauhia maira i te faaroo e te faaoromai.”—HEB. 6:12.

HIMENE: 86, 54

1, 2. Eaha te tautooraa ta Iepheta raua ta ’na tamahine i faaruru?

TE HORO ra te hoê tamahine e farerei i to ’na papa. Ua oaoa roa oia i te ite ia ’na i te ho‘iraa mai mai te tama‘i mai e aita oia i pêpê noa ’‘e. No ta ’na upootiaraa rahi i himene e i ori ai ta ’na tamahine ma te oaoa. Eaha râ ta to ’na papa i rave e i parau i muri iho i maere ai o ’na? Ua hahae Iepheta i to ’na mau ahu e ua tuô: “Auê oe, e tau tamahine e! ua haehaa roa iho nei au ia oe e!” I muri iho, ua na ô Iepheta ia ’na e ua euhe oia ia Iehova, te hoê euhe o tei taui i te oraraa o ta ’na tamahine. Te auraa ïa e eita roa ’tu oia e nehenehe e faaipoipo e e fanau i te tamarii. Oioi roa râ oia i te horoa i te hoê pahonoraa nehenehe o tei faaitoito i to ’na papa ia tapea i ta ’na i euhe ia Iehova. Ua faaite ta ’na pahonoraa e ua tiaturi maite oia e noa ’tu eaha ta Iehova e ani, e mea maitai ana‘e. (Tav. 11:34-37) Ua oaoa roa te papa a faaite ai ta ’na tamahine i te faaroo, ua ite oia e e faaoaoa te faaotiraa ta ’na e rave ia Iehova.

 2 Ua tiaturi maite Iepheta e ta ’na tamahine ia Iehova e i ta ’na huru raveraa i te mau ohipa. Ua faaite raua i te taiva ore noa ’tu e e ere i te mea ohie no raua. Ua hinaaro raua i ta Iehova farii maitai e ua hoona ïa i te raveraa i te mau haapaeraa atoa.

3. No te aha e faufaahia ’i tatou i te hi‘oraa o Iepheta raua ta ’na tamahine i teie mahana?

3 E ere iho â i te mea ohie ia taiva ore ia Iehova. Mea titauhia ia tatou “ia mârô maite atu i te faaroo.” (Iuda 3) No te tauturu ia tatou ia na reira, e haapii ana‘e i ta Iepheta raua ta ’na tamahine i faaruru i roto i to raua oraraa. Mea nafea raua i te vai taiva-ore-raa ia Iehova?

A VAI TAIVA ORE NOA ’TU TE MAU HINAARO O TEIE NEI AO

4, 5. (a) Eaha te faaueraa ta Iehova i horoa i te mau Iseraela a tomo ai ratou i te Fenua tǎpǔhia? (b) Ia au i te Salamo 106, eaha tei tupu no te mau Iseraela no to ratou faaroo-ore-raa?

4 I te mau mahana atoa, e haamana‘o Iepheta raua ta ’na tamahine i te faahopearaa o te faaroo ore o te mau Iseraela ia Iehova. Fatata 300 matahiti na mua ’tu, ua faaue Iehova i te mau Iseraela ia haapohe i te feia haamori haavare atoa i te Fenua tǎpǔhia, aita râ ratou i faaroo. (Deut. 7:1-4) E rave rahi Iseraela o tei haamata i te pee i te feia no Kanaana o te haamori ra i te mau atua haavare e e oraraa morare ore to ratou.—A taio i te Salamo 106:34-39.

5 No te faaroo-ore-raa te mau Iseraela, aita Iehova i paruru ia ratou i to ratou mau enemi. (Tav. 2:1-3, 11-15; Sal. 106:40-43) Eita e ore e mea fifi roa no te mau utuafare o tei here ia Iehova ia vai taiva ore i tera roaraa matahiti fifi mau. Ua faahiti râ te Bibilia e te vai ra te feia taiva ore, mai ia Iepheta raua ta ’na tamahine, oia atoa ia Elikana raua Hana e Samuela. Ua faaoti ratou e faaoaoa ia Iehova.—Sam. 1, 1:20-28; 2:26.

6. Eaha te mau hinaaro o teie nei ao e itehia ra i teie mahana, e eaha te tia ia tatou ia rave?

6 I to tatou tau, te mana‘o e te haa ra te taata mai te feia no Kanaana. Ua niu ratou i to ratou oraraa i nia i te mau peu taotoraa tia ore, te haavîraa u‘ana e te moni. Ua horoa mai râ Iehova i te mau faaararaa papu. Te hinaaro ra oia e paruru ia tatou mai ta ’na i hinaaro e paruru i te mau Iseraela i tera mau hi‘oraa ino. Eaha ta tatou e haapii mai i to ratou mau hape? (Kor. 1, 10:6-11) E tia ia rave tatou i tei nehenehe ia tatou no te ape i te mau mana‘o o teie nei ao. (Roma 12:2) E tutava anei tatou i te na reira?

UA FAAITE IEPHETA I TE TAIVA ORE NOA ’TU TE MAU PATOIRAA

7. (a) Eaha ta to Iepheta iho nunaa i rave i nia ia ’na? (b) Eaha ta Iepheta i rave?

7 I te tau o Iepheta, ua haavîhia te mau Iseraela na te mau Philiseti e na te feia no Amona, no te mea ua faaroo ore te mau Iseraela ia Iehova. (Tav. 10:7, 8) Hau atu â i te mau nunaa enemi, ua faaruru atoa Iepheta i te patoiraa o to ’na iho mau taeae e te mau aratai no Iseraela. No te pohehae o to ’na iho mau taeae e te au ore ia ’na, ua faahepo ratou ia ’na ia faarue i te fenua ta ’na iho i fatu. (Tav. 11:1-3) Aita Iepheta i vaiiho i to ratou haerea ino ia haafifi ia ’na. Mea nafea tatou i te iteraa i te reira? A taparu ai te mau tavana o te nunaa i ta ’na tauturu, ua farii oioi oia i te tauturu atu. (Tav. 11:4-11) Na te aha i turai ia Iepheta ia na reira?

8, 9. (a) Eaha te mau faaueraa tumu i roto i te ture a Mose o tei tauturu paha ia Iepheta? (b) Eaha te mea faufaa roa ’‘e no Iepheta?

 8 E raatira puai o Iepheta, e mea ite oia i te aamu o Iseraela e te ture a Mose. No te mau huru raveraa a Iehova i nia i to ’Na nunaa, ua haapii te reira ia ’na i te mau ture aveia a te Atua no nia i te mea maitai e te mea ino. (Tav. 11:12-27) Ua faaohipa Iepheta i teie ite i roto i to ’na oraraa a rave ai oia i te tahi mau faaotiraa. Ua ite maitai oia eaha to Iehova mana‘o no nia i te riri e te tahoo e e eaha ta te Atua e titau ra ia rave to ’Na nunaa no te faaite i te here te tahi i te tahi. Hau atu â, ua haapii te ture a Mose ia ’na e nafea oia i nia ia vetahi ê, te feia iho â râ e au ore ra ia ’na.—A taio i te Exodo 23:5; Levitiko 19:17, 18.

9 E au ra e ua tauturu te hi‘oraa o Iosepha ia Iepheta. Aita e ore e ua haapii oia i te aroha hamani maitai o ta Iosepha i faaite i to ’na mau taeae noa ’tu e mea au ore na ratou ia ’na. (Gen. 37:4; 45:4, 5) Ma te haamana‘o i teie hi‘oraa, ua tauturu paha te reira ia Iepheta ia faaite i te hoê haerea o te faaoaoa ia Iehova. Ua haamauiui mau â te ohipa ta te mau taeae o Iepheta i rave i nia ia ’na. Te aroraa râ no te i‘oa o Iehova e no to ’na nunaa te mea faufaa a‘e no Iepheta eiaha râ i to ’na iho mau huru aau. (Tav. 11:9) Ua faaoti oia i te taiva ore ia Iehova. No to ’na huru feruriraa, ua haamaitai Iehova ia ’na e i te mau Iseraela.—Heb. 11:32, 33.

Eiaha roa ’tu e vaiiho i to tatou mau mauiui ia haafifi i ta tatou taviniraa ia Iehova

10. E nafea te mau faaueraa tumu a te Atua e tauturu mai ai ia haa mai te mau Kerisetiano i teie mahana?

10 Eaha ta tatou e haapii mai i te hi‘oraa o Iepheta? Eaha ta tatou e rave ia haapeapea mai te mau taeae aore ra ia mana‘o tatou e ere ratou i te mea maitai i nia ia tatou? Eiaha roa ’tu e vaiiho i te mau mana‘o o te haamamae ia tatou ia haafifi i ta tatou taviniraa ia Iehova. Eiaha roa ’tu e faaea i te haere i te mau putuputuraa Kerisetiano aore ra i te rave i te taime e te amuiraa. E pee ana‘e i te hi‘oraa o Iepheta e e faaroo ana‘e ia Iehova. E tauturu te reira ia tatou ia faaruru i te mau tupuraa fifi ia nehenehe tatou e riro mai ei hi‘oraa maitai.—Roma 12:20, 21; Kol. 3:13.

E HAAPAPU TE HAAPAERAA I RAVEHIA MA TE AAU TAE I TO TATOU FAAROO

11, 12. Eaha ta Iepheta i euhe, e eaha ta te reira i titau?

11 Ua ite Iepheta e mea titauhia ia ’na i ta te Atua tauturu no te faatiamâ mai ia Iseraela i te ati Amona mai. Ua euhe oia ia Iehova e ia upootia mai oia, e horoa oia mai te hoê “tusia taauahi” na ’Na te taata matamua o tei haere mai i rapae i to ’na fare ia ho‘i atu oia mai te tama‘i mai. (Tav. 11:30, 31) Eaha ïa te auraa?

12 Mea riri na Iehova ia faatusiahia te taata. Ua ite ïa tatou e aita Iepheta i faatusia i ta ’na tamahine. (Deut. 18:9, 10) I raro a‘e i te ture a Mose, te tusia taauahi, e ô taa ê te reira o ta te taata e horoa  taatoa na Iehova. Te auraa no Iepheta, te taata ta ’na e horoa na Iehova e tavini ïa oia i te sekene no te toea o to ’na oraraa. Ua faaroo Iehova ia Iepheta e ua tauturu oia ia ’na ia upootia mai. (Tav. 11:32, 33) O vai râ ta Iepheta i horoa na Iehova?

13, 14. Eaha ta te mau parau a Iepheta i roto i Te mau tavana 11:35 e haapapu ra no nia i to ’na faaroo?

13 A feruri na i tei faahitihia i te omuaraa o teie tumu parau. A ho‘i mai ai o Iepheta mai te tama‘i mai, te taata matamua o tei haere mai ia ’na ra, o ta ’na ïa tamahine here, ta ’na tamahine otahi! E tapea anei Iepheta i ta ’na i euhe? E horoa anei oia i ta ’na tamahine na Iehova no te tavini i te sekene no te toea o to ’na oraraa?

14 Ua tauturu faahou â te mau faaueraa tumu o te Ture a te Atua ia Iepheta ia rave i te maitiraa maitai. Peneia‘e ua haamana‘o oia i te mau parau o te Exodo 23:19, o te faaue ra i te nunaa o te Atua i te horoa ma te aau tae i te mea maitai roa ’‘e na Iehova. Ua parau atoa te Ture e ia euhe te hoê taata ia Iehova, “eiaha roa oia e tahemo i ta ’na parau; e rave oia i te mau mea atoa ta to ’na vaha i parau ra.” (Num. 30:2) Noa ’tu ua ite oia eaha te auraa o te reira no ta ’na tamahine e no ’na iho, ua tapea Iepheta i ta ’na i euhe, mai te vahine haapao maitai ra o Hana, o tei ora atoa paha i te tau o Iepheta. No te mea e tavini ta ’na tamahine i te sekene, eita roa ’tu ïa ta ’na e nehenehe e fanau mai i te tamarii. Aita roa ’tu ïa e taata e amo i te i‘oa o Iepheta  e e fana‘o i to ’na fenua. (Tav. 11:34) Noa ’tu râ, ua parau Iepheta ma te taiva ore: “Ua parau hoi tau vaha ia Iehova, e ore hoi e tia ia faaore.” (Tav. 11:35) Ua farii Iehova i te haapaeraa rahi ta Iepheta i rave e ua haamaitai oia ia ’na. Ahani o oe tera, e taiva ore anei oe mai ia Iepheta?

15. Eaha te euhe ta te rahiraa o tatou i rave, e nafea tatou e nehenehe ai e faaite i te taiva ore?

15 A pûpû ai tatou i to tatou ora ia Iehova, ua euhe tatou i te rave i to ’na hinaaro i roto te mau tupuraa atoa. Ua ite tatou e ere i te mea ohie ia tapea i tera euhe. Eaha râ to tatou huru ia anihia mai tatou ia rave i te tahi ohipa o ta tatou e ore e au? Ia upootia tatou i nia i to tatou mau huru aau e ia faaroo tatou ma te aau tae i te Atua, e haapapuraa ïa te reira o to tatou taiva ore i ta tatou i euhe. Peneia‘e mea mauiui te mau haapaeraa ta tatou e rave, e rahi a‘e râ te mau haamaitairaa a Iehova. (Mal. 3:10) E no te tamahine a Iepheta, eaha to ’na huru i ta to ’na metua i euhe?

E nafea tatou e faatupu ai i te faaroo mai ia Iepheta raua ta ’na tamahine? (A hi‘o i te paratarafa 16, 17)

16. Eaha te huru o te tamahine a Iepheta i te euhe a to ’na metua tane? (A hi‘o i te hoho‘a matamua.)

16 Mea taa ê te euhe a Iepheta i ta Hana. Ua euhe Hana e horoa i ta ’na tamaiti ia Samuela no te tavini i te sekene ei Nazira (Sam. 1, 1:11) E fariihia te hoê Nazira ia faaipoipo e ia fana‘o i te hoê utuafare. No te tamahine râ a Iepheta, ua horoahia oia ei “tusia taauahi,” eita ïa oia e ite te oaoa ei vahine faaipoipo e ei metua vahine. (Tav. 11:37-40) A feruri na, e nehenehe ta ’na e faaipoipo i te tane maitai roa ’‘e o to ’na fenua, i te mea hoi e o to ’na papa te raatira i Iseraela. I teie nei râ, e riro mai ïa oia ei tavini haehaa i te sekene. Ua aha ïa teie vahine? Ua faaite oia e o te taviniraa ia Iehova te mea faufaa roa ’‘e ma te parau i to ’na papa: “E na reira mai oe ia ’u mai ta to vaha i parau ra.” (Tav. 11:36) Ua rave oia i te mau haapaeraa o to ’na iho mau hinaaro e faaipoipo e ia fanau i te tamarii no te tavini ia Iehova. E nafea tatou e pee ai i to ’na huru feruriraa haapae?

Ua rave oia i te mau haapaeraa o to ’na iho mau hinaaro e faaipoipo e ia fanau i te tamarii no te tavini ia Iehova

17. (a) E nafea tatou e pee ai i te faaroo o Iepheta raua ta ’na tamahine? (b) E nafea te mau parau o te Hebera 6:10-12 e faaitoito ai ia oe ia rave i te mau haapaeraa?

 17 E tausani tane e e vahine Kerisetiano apî o te rave ra i te mau haapaeraa eiaha e faaipoipo aore ra o te maiti ra eiaha e fanau i te tamarii, no te hoê a‘e taime. No te aha? No te mea te hinaaro ra ratou e tavini hau atu â ia Iehova. E rave rahi atoa feia paari o tei rave i te mau haapaeraa ma te faaiti i te taime no ta ratou tamarii aore ra mootua. Ma te na reira, e nehenehe ratou e horoa rahi atu â taime e puai no Iehova. Te ohipa ra vetahi o ratou i roto i te mau paturaa aore ra te apiti ra i te Haapiiraa no te feia poro i te parau apî oaoa o te Basileia a haere atu ai i roto i te hoê amuiraa e hinaaro-rahi-hia te feia poro. E rave atoa vetahi i te mau faanahoraa no te faarahi atu â i ta ratou taviniraa ia Iehova i te tau o te Oroa haamana‘oraa. Eita roa oia e haamoe i te mau haapaeraa î i te here ta teie feia taiva ore atoa i rave. (A taio i te Hebera 6:10-12.) E no oe? E nehenehe anei ta oe e rave i te mau haapaeraa no te tavini rahi atu â ia Iehova?

EAHA TE MAU HAAPIIRAA TA TATOU I HUTI MAI?

18, 19. Eaha ta tatou i haapii mai i te aamu Bibilia no nia ia Iepheta raua ta ’na tamahine, e nafea tatou e nehenehe ai e pee i to raua hi‘oraa?

18 Na te aha i tauturu ia Iepheta ia faaruru i to ’na mau fifi e rave rahi? Ua vaiiho oia ia Iehova ia aratai i ta ’na mau maitiraa i roto i to ’na oraraa. Ua maiti oia eiaha e pee i te haerea o te mau taata e haaati ra ia ’na. E ua vai taiva ore oia noa ’tu ua haapeapea vetahi ê ia ’na. Ua haamaitai Iehova ia Iepheta e ta ’na tamahine no te mau haapaeraa ta raua i rave ma te aau tae e ua faaohipa Iehova ia raua no te turu i te haamoriraa mau. Noa ’tu ua faaea vetahi i te rave i te mea tano, ua vai taiva ore Iepheta raua ta ’na tamahine ia Iehova.

19 Te parau ra te Bibilia: “[A] pee . . . i te feia i noaa tei parauhia maira i te faaroo e te faaoromai.” (Heb. 6:12) E pee ana‘e i te hi‘oraa o Iepheta raua ta ’na tamahine. Ua ite tatou e ia vai taiva ore tatou, e haamaitai mai Iehova.