Eaha to roto?

Tapura tumu parau

Nafea oe e faufaahia ’i ia ite o vai te Atua?

Nafea oe e faufaahia ’i ia ite o vai te Atua?

Tae roa mai i teie nei, ua ite mǎrû noa mai tatou i te pahonoraa o te uiraa: O vai te Atua? Ua haapii na mua tatou i roto i te Bibilia e o Iehova to ’na i‘oa e o te here to ’na huru maitai rahi a‘e. Ua ite atoa mai tatou i ta ’na i rave na e i ta ’na e fatata roa i te rave no te maitai o te huitaata. Mea rahi â te haapii mai no nia i te Atua. E nafea oe e faufaahia ’i ia ite o vai te Atua?

Te fafau ra Iehova e “ia imi oe ia ’na ra, e itea ’tu oia e oe.” (Paraleipomeno 1, 28:9) A feruri na i te ô taa ê mau e tiai ra ia oe a imi ai e a ite ite ai o vai te Atua: te hoê auhoaraa piri e o Iehova! (Salamo 25:14) E nafea oe e faufaahia ’i i te reira?

Te oaoa mau. Ua faataahia Iehova mai “te Atua oaoa.” (Timoteo 1, 1:11) Ma te faafatata ’tu ia ’na e ma te pee i ta ’na mau aratairaa, e ite oe i te oaoa mau e e faufaahia oe i te pae aau, i te pae feruriraa e i te pae tino. (Salamo 33:12) E nehenehe atoa oe e fana‘o i te hoê oraraa oaoa ma te haapae i te mau huru oraraa e mauiui ai oe, ma te pee i te mau peu e maitai ai to oe ea e ma te tapea i te mau taairaa maitai e te tahi atu. E e tuea to oe mana‘o i to te fatu salamo o tei parau: “E mea maitai râ ia ’u ia haafatata ’tu i te Atua.”—Salamo 73:28.

E aupuruhia te taata taitahi. Ua fafau Iehova i ta ’na mau tavini: “Ei nia ia oe tau mata vai ai.” (Salamo 32:8) Te auraa ïa e e haapao Iehova i te taata taitahi e to ratou mau hinaaro. (Salamo 139:1, 2) I te taime oe e faatupu ai i te taairaa maitai e o Iehova, i reira oe e taa ’i e tei pihai iho noa ’tu o ’na.

Te hoê a muri a‘e faahiahia mau. Hau atu i te tautururaa ia oe ia fana‘o i te hoê oraraa oaoa e te mauruuru i teie nei â, te faaineine atoa nei te Atua i te hoê a muri a‘e faahiahia mau no oe. (Isaia 48:17, 18) Te na ô ra te Bibilia: “No te fana‘o i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ’i.” (Ioane 17:3) I teie anotau fifi, e au te tiaturiraa ta te Atua e pûpû mai ra i te hoê tutau o te tauturu mai ia vai “papu e te aueue ore.”—Hebera 6:19.

O te tahi noa teie o te mau tumu faufaa roa no te ite maitai atu â o vai te Atua e no te faatupu i te auhoaraa piri e o ’na. A tauaparau na e te hoê Ite no Iehova aore ra a haere i nia i te reni jw.org no te ite atu â.