Eaha to roto?

Tapura tumu parau

Mai te aha te Atua?

Mai te aha te Atua?

Hau atu tatou i te ite i te mau huru maitatai o te hoê taata, hau atu â tatou i te matau ia ’na a riro mai ai ei hoa rahi. Oia atoa, hau atu tatou i te ite i te mau huru maitatai o Iehova, hau atu â tatou i te matau i to ’na huru a riro mai ai ei hoa rahi. I nia i te taatoaraa o te mau huru maitatai nehenehe mau o te Atua, e maha te mea rahi a‘e: to ’na puai, paari, parau-tia e here.

E ATUA PUAI

“E te Fatu e, e Iehova! inaha, na oe te ra‘i nei i hamani, e te fenua, i te mana rahi no oe ra.”IEREMIA 32:17.

E itehia to te Atua puai i roto i te poieteraa. A hi‘o na, ia tia oe i rapaeau mea puai ana‘e te mahana, e mahanahana roa to oe iri e ere anei? Te fana‘o ra ïa oe i te mau maitai o te mana poiete o Iehova. Mai te aha te puai o te mahana? I ropu i te mahana, e au ra e naea to ’na veavea 15 mirioni teteri. I te mau tetoni atoa, e hamani te mahana i te ito tei tuea i te paainaraa o e hanere mirioni paura atomi.

Mea nainai râ to tatou mahana ia faaauhia i na miria e miria fetia matau-ore-hia i roto i te ao nui. A hi‘o na ia UY Scuti, hoê teie o te mau fetia rahi roa ’‘e paha no te mau aivanaa, 1 700 taime ïa to ’na rahi ia faaauhia i te mahana. Ia mono o UY Scuti i te mahana, e ô atoa te paraneta fenua i roto tae noa ’tu te aveia peehia e Jupiter. E tauturu mai  paha te reira ia maramarama ’tu â i ta Ieremia i parau. Oia hoi, na Iehova i hamani i te ra‘i e te fenua, te ao nui atoa ïa, maoti to ’na mana rahi.

E nafea tatou e faufaahia ’i i te puai o te Atua? E ora te taata maoti te mau mea ta te Atua i poiete, mai te mahana e te mau mea faufaa e te faahiahia i nia i te fenua. Hau atu â, te faaohipa ra te Atua i to ’na puai no te maitai o te taata tataitahi. E nafea? I te tau o Iesu, ua horoa te Atua i te puai ia ’na ra no te rave i te mau mea faahiahia mau. Te taio nei tatou: “Te ite faahou nei te matapo, te haere nei te piri‘o‘i, ua ora te lepera e te faaroo nei te tari‘a turi, ua tia faahou mai tei pohe.” (Mataio 11:5) E i teie mahana? “Te horoa nei oia i te itoito no te matapouri,” ta te Bibilia ïa e parau ra. E te na ô nei â: “O te feia râ e tiaturi ia Iehova, e noaa ïa te etaeta apî.” (Isaia 40:29, 31) E nehenehe te Atua e horoa i “te puai o te hau ê i to te taata nei” no te faaruru i te mau fifi o te oraraa. (Korinetia 2, 4:7) Eita anei oe e hinaaro e faafatata ’tu â i te hoê Atua î i te here o te faaohipa i to ’na puai hope no to oe maitai?

E ATUA Î I TE PAARI

“Aita te huru rau o ta oe ra ohipa, e Iehova! e mau ravea paari ana‘e â ta oe!”SALAMO 104:24.

Hau atu â tatou i te haapii no nia i te mau mea ta te Atua i poiete, hau atu â tatou i te faahiahia i mua i to ’na paari. Te vai ra te hoê tuhaa maimiraa parauhia biomimétique i reira te mau aivanaa e hi‘opoa ’i i te mau mea ta Iehova i poiete a faaohipa ’tu ai i ta ratou i ite mai i roto i te natura no te haamaitai atu â i te mau mea ta ratou i hamani. Mai te velcro tae noa ’tu te manureva.

Mea faahiahia mau te mata taata

Te vahi faahiahia roa i reira e ite-maitai-hia ’i te paari o te Atua, tei roto ïa i te tino taata. A hi‘o na e nafea te hoê pêpe e paari mai ai i roto i te opu. I te omuaraa, hoê noa ïa tao‘a tahi ora, to roto pauroa te mau haamaramaramaraa no ǒ mai i te papa e te mama. E tataipiti teie tao‘a tahi ora a rahi roa mai ai. E i te hoê taime tia, e haamata teie mau tao‘a tahi ora i te taui no te riro mai ei tao‘a tahi ora no te toto, no te uaua uira e no te ivi. I muri iti a‘e, e fa mai te mau mero o te tino o te haamata i te ohipa. I roto e iva noa ava‘e, ua riro mai te hoê tao‘a tahi ora ei pêpe. No te paari itehia i roto, mea rahi te taata te pee i te mana‘o o teie taata papai Bibilia o tei parau: “E haamaitai au ia oe, ua taa ê hoi to ’u hamaniraahia.”—Salamo 139:14.

E nafea tatou e faufaahia ’i i te paari o te Atua? Ua ite te Atua poiete i tei titauhia ia oaoa tatou. No to ’na ite otia ore, te horoa mai ra o ’na i te a‘oraa î i te paari i roto i ta ’na Parau te Bibilia. A hi‘o na, te faaue mai ra oia: “A faaore noa ’tu . . . i ta ’na hapa.” (Kolosa 3:13) E a‘oraa î i te paari anei? E. Ia au i te mau hi‘opoaraa, e tauturu mai te na reiraraa ia taoto maitai atu â e ia faatopa mai i te ne‘iraa toto. E faaiti atoa mai i te mau fifi o te hepohepo rahi e i te pae o te ea. E au te Atua i te hoê hoa î i te paari e te haapao maitai o te ore roa e faaea i te horoa mai i te mau a‘oraa no to tatou  maitai. (Timoteo 2, 3:16, 17) Eita anei oe e hinaaro i te hoa mai teie?

E ATUA PARAU-TIA

“Mea au hoi na Iehova te parau-tia.”SALAMO 37:28.

E rave noa te Atua i te mea tia. “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra!” (Ioba 34:10) Mea tia ta ’na mau haavaraa mai ta te fatu salamo i faahiti a parau ai ia Iehova e e ‘haava o ’na i te mau taata ma te parau au.’ (Salamo 67:4) I te mea ‘e hi‘o Iehova i te aau,’ eita o ’na e vare, e ite iho â o ’na i te parau mau e e haava ma te tano. (Samuela 1, 16:7) Te ite nei te Atua i te mau ohipa tia ore atoa i nia i te fenua e ua fafau oia e fatata roa “e tâpû-ê-hia . . . te paieti ore i te fenua nei.”—Maseli 2:22.

E ere râ te Atua i te hoê haava etaeta o te faautua haere noa. E faaite o ’na i te hamani maitai ua tano ana‘e. Te parau ra te Bibilia: “E aroha e te hamani maitai to Iehova,” i nia atoa i te feia ino o te tatarahapa mau nei. E ere anei teie i te parau-tia mau?—Salamo 103:8; Petero 2, 3:9.

E nafea tatou e faufaahia ’i i te parau-tia o te Atua? Ua parau te aposetolo Petero: “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎta‘u ia ’na e o te rave i te mea tia.” (Ohipa 10:34, 35) E faufaahia tatou i te parau-tia o te Atua, eita roa hoi o ’na e faaite i te huru paetahi aore ra e maitiiti i te taata. E nehenehe tatou e fana‘o i to ’na farii maitai e e haamori ia ’na noa ’tu eaha to tatou iri, nunaa, haapiiraa e tiaraa totiare.

E ore te Atua e maitiiti i te taata, e faufaahia ïa tatou noa ’tu eaha to tatou iri aore ra tiaraa totiare

Te hinaaro ra te Atua ia taa e ia faufaahia tatou i to ’na parau-tia, no reira o ’na e horoa mai ai i te hoê mana‘o haava. Te faataa ra te mau Papai i te mana‘o haava mai te hoê ture ‘ua papaihia i roto i to tatou aau’ o te ‘faaite’ mea tano aore ra mea hape to tatou haerea. (Roma 2:15) E nafea tatou e  faufaahia ’i? Ia haapii-maitai-hia, e turai mai to tatou mana‘o haava ia huri tua i te mau ohipa ino aore ra tia ore. E ia hape tatou, e turai mai te reira ia tatarahapa e ia faaafaro i to tatou haerea. Mea faufaa ia maramarama i te huru parau-tia o te Atua, e tauturu mai hoi te reira e e faafatata ’tu â tatou ia ’na!

E HERE TE ATUA

“E here te Atua.”IOANE 1, 4:8.

E faaite te Atua i te puai, te paari e te parau-tia. Aita râ te Bibilia e parau e puai, paari e parau-tia te Atua. Te parau ra e here te Atua. No te aha? No te mea maoti to te Atua puai e ohipa ’i oia. E aratai atoa ta ’na parau-tia e to ’na paari i ta ’na mau huru raveraa. Na to Iehova râ here e turai ia ’na ia ohipa. O te here te tumu o te mau mea atoa ta ’na e rave.

Aita Iehova e ere ra i te tahi a‘e mea. Noa ’tu râ, no to ’na here, ua poiete oia i te taata e i te mau melahi o te nehenehe e fana‘o ma te oaoa i to ’na aupuru î i te here. Ma te miimii ore, ua faaineine oia i te fenua ia riro te reira ei nohoraa au mau no te taata. E te faaite noa nei oia i to ’na here no te taata atoa, “e faahiti hoi oia i to ’na mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa.”—Mataio 5:45.

Hau atu â, “e Atua here rahi Iehova e te aroha hamani maitai.” (Iakobo 5:11) E faaite oia i to ’na here rahi i te feia e faaitoito mau nei i te ite o vai o ’na e i te faafatata ’tu ia ’na. Te hi‘o nei oia i taua mau taata ra, “aita hoi oia i atea ia tatou tataitahi.”—Ohipa 17:27.

E nafea tatou e faufaahia ’i i te here o te Atua? Hope te au te hoê taharaa mahana, te paho o te ata a te hoê pêpe, te here o te hoê mero utuafare. E ere paha teie mau mea i te mea faufaa roa, e faaoaoa roa râ te reira i to tatou oraraa.

E faufaa-atoa-hia tatou i te tahi atu tapao o to te Atua here: te pure. Te faaitoito mai ra te Bibilia: “Eiaha ïa e haapeapea noa ’‘e, na roto râ i te pure e te taparuparuraa e te haamaitairaa, a faaite i ta outou mau aniraa i te Atua.” Mai te hoê papa î i te here, te hinaaro ra te Atua ia ani tatou i ta ’na tauturu no te faaruru i to tatou mau mana‘o horuhoru. Ia na reira tatou, te fafau ra Iehova i roto i to ’na here miimii ore e e horoa mai o ’na i “te hau o te Atua, tei hau ê i te mau mana‘o atoa.”—Philipi 4:6, 7.

Ua ite mai ïa tatou i te mau huru maitatai faufaa roa ’‘e o te Atua, oia hoi to ’na puai, paari, parau-tia e here. Ua taa maitai atu â anei ia oe mai te aha te Atua? Ia rahi atu â to oe mauruuru i te Atua, a hi‘o na i ta ’na i rave e i ta ’na e rave no oe.

MAI TE AHA TE ATUA? O Iehova te mea puai a‘e, paari a‘e e tia a‘e, aita ’tu. Mea au a‘e râ na tatou to ’na here